លោក នុប សំអាន មេគយទំនប់រលក ដែលទើបឡើងថ្មី កំពុងសាងភាពល្បីល្បាញខាងប្រព្រឹត្តអំពើពុករលួយ

, , Leave a comment

ខេត្ត​ព្រះ​សីហនុ ​៖ ប្រភពពី​ឈ្មួញ​និង​អាជីវករ​ដែល​រកស៊ី​នាំចូល​ទំនិញ​ពី​ប្រទេស​សៀម​តាម​ច្រក ​កំពង់ផែ​ទំនប់រលក ក្រុងព្រះសីហនុ ខេត្ត​ព្រះសីហនុ បាន​ឲ្យ​ដឹងថា លោក នុ​ប សំ​អា​ន ប្រធានការិយាល័យ​គយ​ប្រចាំ​ផែ​ទំនប់រលក​ថ្មី ​ដែល​ចូលកាន់​តំណែង​ ជំនួស​អ្នក​ចាស់​ កំពុង​សាង​ភាពល្បីល្បាញ ​ខាង​ប្រព្រឹត្ត​អំពើ ពុករលួយ​។

តាម​ការអះអាង​ របស់​ឈ្មួញ​តូចតាច​ បាន​ឲ្យ​ដឹងថា ប្រធានការិយាល័យ​គយ​ច្រក​ផែ​ទំនប់រលក សព្វថ្ងៃនេះ​ កំពុង​គាបសង្កត់ ​ឲ្យ​ពួកគាត់​បង់លុយ ​លើ​តុ​ក្រោម​តុ​ ស្រេច​តែ​អំពើ​ចិត្ត​ ដោយ​គ្មាន​ញញើត​អ្វី​ទាំងអស់​ ដោយសារតែ​អាង​មាន​ខ្នងបង្អែក​រឹងមាំ​។ទន្ទឹមនឹងនេះ​មេ​គយ​ថ្មី​ប្រចាំ​ផែ​ទំនប់រលក​បែរជា​បើក ដៃ​ឲ្យ​ឈ្មួញ​ធំៗ​នាំចូល​ទំនិញគេចពន្ធ​និង​ទំនិញ​ខុសច្បាប់​ តាម​អំពើ​ចិត្ត​ដោយ​គ្មាន​ញញើត​អ្វី​ទាំងអស់ ដូច្នេះ​លោក ទុំ ណូ ប្រធាន​សាខាគយ​ខេត្ត​ព្រះសីហនុ មិនគួរ​បណ្ដោយ​ឲ្យ​មេ​គយ​ថ្មី​ប្រចាំ​ផែ​ទំនប់រលក ធ្វើ​អ្វីៗ​ស្រេច​តែ​អំពើ​ចិត្ត​ទៀត​ទេ​។

តាម​ការ​បង្ហើប​ពី​មន្ត្រី​និង​ភ្នាក់ងារ​គយ​នៅ​ខេត្ត​ព្រះសីហនុ មួយចំនួន​បាន​ឲ្យ​ដឹងថាមេ​គយ​ថ្មី​ប្រចាំ​ផែ​ទំនប់រលកទំនងជា​ចំណាយ​ដើមទុន​យ៉ាងច្រើន​ដើម្បី​មុខតំណែង​នេះ​ ទើប​ខំប្រឹង​ ប្រើ​គ្រប់​វិធី ​ប្រមូល​លុយ​ស្រង់ដើម​ ដោយ​គ្មាន​ញញើត​អ្វី​ឡើយ​។

ជាក់ស្ដែង​នៅ​ផែ​ទំនប់រលក​ឬ​ផែ សូ ជុង​ហួរ ក្នុង​សង្កាត់​លេខ​១ ក្រុងព្រះសីហនុ បច្ចុប្បន្ន​គឺជា​ចំណុច​ដែល​ឈ្មួញ​ធំៗ​នាំចូល​ទំនិញគេចពន្ធនិង​ទំនិញ​ខុសច្បាប់​ ច្រើន​ប្រភេទ ​ដែល​ធ្វើ​ឲ្យ​រដ្ឋ​ត្រូវ​ខាតបង់​ចំណូល​ពន្ធ ​យ៉ាងច្រើន​ សន្ធឹកសន្ធាប់​ក្នុង​មួយខែៗ​។

ប្រភព​បាន​ឲ្យ​ដឹង​ទៀតថា ទំនិញគេចពន្ធ​ ដែល​ឈ្មួញ​នាំចូល ​តាម​ផែ​ទំនប់ រលក​ មានដូចជា ម៉ូតូ​ស៊េរី​ទំនើបៗ សម្ភារៈប្រើប្រាស់​ក្នុង​ការិយាល័យ គ្រឿងសំណង់ ភេសជ្ជៈ គ្រឿង​កំប៉ុង ស្រា​ថ្លៃៗស្រា​បៀរ ទូរស័ព្ទដៃ​ទំនើបៗ កុំព្យូទ័រ និង ​គ្រឿង​អេ​ឡិច​ត្រូ​និ​ច​ផងដែរ​។

ប្រភព​បាន​បន្តទៀតថា ជា​រៀងរាល់ថ្ងៃ​ទំនិញ ដែល​ដឹក​តាម រថយន្ត​សណ្តោង​ធំៗ និង​មាន​បិទបាំង​ជិត មិនត្រូវ​បាន មន្ត្រី​ការិយាល័យ​គយ ទំនប់រលក និង​សមត្ថកិច្ច​ប្រចាំការនៅ​ច្រក ផែ​មួយ​នេះ ត្រួតពិនិត្យ ឲ្យ​បាន​ដិតដល់ នោះទេ​។

ករណីនេះ លោក ឱម យ៉ិនទៀង ប្រធាន​អង្គភាព ប្រឆាំង​អំពើពុករលួយ គួរ តែ​បញ្ជូន​មន្ត្រី ឲ្យ​ចុះ​ស៊ើបអង្កេត ពី​ភាពមិនប្រក្រតី និង​អំពើពុករលួយ ជា​ប្រព័ន្ធនៅ​ការិយាល័យគយ​និង​រដ្ឋាករទំនប់រលក ដែលមាន​ការឃុបឃិត បើក ដៃ​ឲ្យ​ឈ្មួញ នាំចូល​ទំនិញគេចពន្ធ បំផ្លាញ​ចំណូល ថវិកាជាតិ រាប់សិប​ឆ្នាំ មកហើយ​៕

 

Leave a Reply

(*) Required, Your email will not be published