រឿងរ៉ាវ​នៃ​ការ​ប្តឹងផ្តល់​គ្នា​របស់​តារាចម្រៀង វ៉ាន់ នី​ឡា និង​អតីត​សង្សារ ជិត​១​មួយឆ្នាំ ដើមបណ្តឹង បាន​ត្រឹម​ទន្ទឹងរង់ចាំ​យុត្តិធម៌​

, , Leave a comment

​រាជធានី​ភ្នំពេញ : រឿងរ៉ាវ​នៃ​ការ​ប្តឹងផ្តល់​គ្នា របស់​តារាចម្រៀង វ៉ាន់ នី​ឡា លោក​គុយ សិទ្ធិ​ស័​ក្ដ ជា​អតីត​សង្សារ​និង​សង្សារ​បង្ហោះ​រូបអាក្រាត​ធ្វើ​ឲ្យ​នាងរង​ការ​អាម៉ាស់ ឡើង​ផ្អើល​គ្រប់​ទីកន្លែង តែ​ជន​ដែល​បាន​បង្ករឿង​នៅតែមាន​សេរីភាព ហើយ​សូម្បីតែ​តុលាការ​ក៏បាន​ត្រឹម​កោះហៅៗ ក្នុងពេល​ភាគី​ជា​ជនបង្ក​ជា​កូន​អ្នកមានអំណាច រហូតមកដល់​ពេលនេះ​ជិត​១​មួយឆ្នាំ​ហើយ ដែល​ហាក់​គ្មាន​ពន្លឺ​បន្តិច​សោះឡើយ។​

 

​ជាក់ស្តែង​កាលពី​រសៀល​ថ្ងៃទី​២៤ ខែកក្កដា ឆ្នាំ​២០១៧ សាលាដំបូង​រាជធានី​ភ្នំពេញ​បើកសវនាការ​ជំនុំជម្រះ​រឿងក្តី​ជនជាប់ចោទ គុយ សិទ្ធិ​សក្តិ កូនប្រុស​លោក គុយ ប៊ុនសន អតីត​អគ្គនាយក​នៃ​អគ្គនាយកដ្ឋាន​ពន្ធនាគា​រ ជាមួយ​កញ្ញា​វ៉ាន់ នី​ឡា ដោយ​អវត្តមាន​ជនជាប់ចោទ និង​ដើមបណ្ដឹង​រដ្ឋប្បវេណី​។​

 

​ក្រោយ​ការសួរដេញដោល លោក កោ វណ្ឌី អនុប្រធាន​សាលាដំបូង​រាជធានី​ភ្នំពេញ បាន​លើក​ពេល​ប្រកាស​សាលក្រម​ថ្ងៃទី​១៥ ខែសីហា ឆ្នាំ​២០១៧ ខាងមុខនេះ​វិញ ។ មជ្ឈដ្ឋាន​មួយចំនួន​រង់ចាំ​មើលថា តើ​ជោគវាសនា​ជនជាប់ចោទ គុយ សិទ្ធិ​សក្តិ នឹងត្រូវ​តុលាការ​សម្រេច​យ៉ាងណា​។​

 

​ជនជាប់ចោទ គុយ សិទ្ធិ​សក្តិ ត្រូវបាន​ចោទប្រកាន់​ពីបទ «​ហិង្សា​ដោយ​ចេតនា​និង​ចែកចាយ​រូបភាព​អាសអាភាស​» ប្រព្រឹត្ត​នៅ​រាជធានី​ភ្នំពេញ កាលពី​អំឡុង​ឆ្នាំ​២០១៦ តាម​មាត្រា​២១៧​នៃ​ក្រមព្រហ្មទណ្ឌ និង មាត្រា​៣៨ និង​មាត្រា​៣៩ ច្បាប់​ស្តីពី​ការបង្ក្រាប​អំពើ​ជួញដូរ​មនុស្ស និង​អំពើ​ធ្វើ​អាជីវកម្ម​ផ្លូវភេទ​។​

 

​ទោះបី​អវត្តមាន​ជនជាប់ចោទ គុយ សិទ្ធិ​សក្តិ ក្នុងពេល​សវនាការ​ក៏ដោយ ក្រឡាបញ្ជី​សវនាការ​បាន​អាន​ចម្លើយ​របស់​គុយ សិទ្ធិ​សក្តិ នៅ​ដំណាក់កាល​ចៅក្រម​ស៊ើបសួរ ដោយ​បញ្ជាក់ថា គុយ សិទ្ធិ​សក្តិ បាន​ស្គាល់ សុខ ចិន្តា ហៅ វ៉ាន់ នី​ឡា តាម​ហ្វេ​ស​ប៊ុ​ក​កាលពី​ឆ្នាំ​២០១៤​ហើយ​ដល់​ឆ្នាំ​២០១៥ បាន​ស្រលាញ់គ្នា​ហើយក៏​បាន​នាំ​ទៅលេង​ផ្ទះ​និង​ជួប​ប៉ា​ម៉ាក់​។​ចំណែក​រឿង​ដែល​ចោទថា គុយ សិទ្ធិ​សក្តិ បង្ហោះ​រូប​អាសអាភាស គឺ​ជនជាប់ចោទ​មិនបាន​ដឹង​ទេ និង​សុំ​ឲ្យ​តុលា​ការជួយ​រក​យុត្តិធម៌។​

 

​ដោយឡែក​លោក នួន បូរ៉ា មេធាវី​ការពារ​សិទ្ធិ​ឲ្យ​ដើមបណ្តឹង​បាន​និយាយ​នៅពេល​សវនាការ​ថា កាលពី​ថ្ងៃទី​២៦​ខែកុម្ភៈ​ឆ្នាំ​២០១៦ លោក គុយ សិទ្ធិ​សក្តិ និង ដើមបណ្តឹង សុខ ចិន្តា ហៅ វ៉ាន់ លី​ឡា បាន​ឈ្លោះ​គ្នា​ហើយ គុយ សិទ្ធិ​សក្តិ បាន​វាយ វ៉ាន់ នី​ឡា ។ ពេលនោះ​ជនរងគ្រោះ បាន​បើកឡាន​ចេញ​ឲ្យ​គេ​ជួយ ហើយ​ពេលនោះ គុយ សិទ្ធិ​សក្តិ បាន​បើកឡាន​របស់​ជនរងគ្រោះ​ចេញទៅ ហើយ​នៅក្នុង​ឡាន​នោះ​ក៏មាន​កាបូប​ទូរស័ព្ទ​របស់​ជនរងគ្រោះ​ផងដែរ​ដោយ​រយៈពេល ជិត​១០​ថ្ងៃ ទើប​គុយ សិទ្ធិ​សក្តិ បាន​យកមក​ប្រគល់​ឲ្យ​វ៉ាន់ នី​ឡា វិញ​។​

 

​លោក​មេធាវី បន្តថា ចំណែក​រូប​ដែល​បាន​បង្ហោះ​នោះ​គឺ​ដោយសារតែ​ការស្រលាញ់គ្នា​និង​គិតថា បាន​គ្នា​ជា​ប្តី​ប្រពន្ធ​ទើប​មាន​ការថត​ផ្ញើ​ឲ្យ​គ្នា​មើល​ដោយសារតែ គុយ សិទ្ធិ​សក្តិ​នៅ​រៀន​ឯ​បរទេស​។​ក្នុង​រឿងក្ដី​នេះ ដើមបណ្ដឹង​រដ្ឋប្បវេណី​ទាមទារ​សំណង​ជំងឺ​ចិត្ត​ចំនួន​៥០​ម៉ឺន​ដុល្លារ។​

 

​លោក សេង ហៀ​ង ជា​តំណាង​អយ្យការ នៅតែ​សន្និដ្ឋាន​រក្សា​បទចោទប្រកាន់​លើ​ជនជាប់ចោទ គុយ សិទ្ធិ​សក្តិ ដដែល ហើយ​ស្នើ​តុលាការ​សម្រេច​តាមច្បាប់​៕

 

Leave a Reply

(*) Required, Your email will not be published