ក្រសួងការពារជាតិ ចេញប្រកាស​ព័ត៌មាន​ជា​ផ្លូវការ ពី​ការស្លាប់​ទាហាន​មួក​ខៀវ​កម្ពុជា​៣​រូប​ទៀត ក្រោយ​បាត់​ខ្លួន នៅ​ប្រទេស​អាហ្វ្រិក​កណ្តាល​

, , Leave a comment

10-5-2017

​រាជធានី​ភ្នំពេញ : នៅ​ថ្ងៃទី​១០ ខែឧសភា ឆ្នាំ​២០១៧​នេះ ក្រសួងការពារជាតិ​ក​ម្ពុ​ជា បានចេញ​សេចក្តីប្រកាស​ព័ត៌មាន​ជា​ផ្លូវការ ជូន​ដល់​សាធារណជន​ទាំងអស់ អំពី​ការស្លាប់​ទាហាន​មួក​ខៀវ​កម្ពុជា​៣​នាក់ ក្រោយពី​បាត់​ខ្លួន ក្នុង​ព្រឹត្តិការណ៍​ពួនស្ទាក់​បាញ់ប្រហារ​ដោយ​ក្រុម​ឧទាម នៅ​សាធារណរដ្ឋ​អាហ្វ្រិក​កណ្តាល កាលពី​យប់​ថ្ងៃទី​៨ ខែឧសភា​។​

 

​យោងតាម​សេចក្តីប្រកាស​ព័ត៌មាន របស់​អ្នកនាំពាក្យ​ក្រសួងការពារជាតិ បាន​បញ្ជាក់ថា ទាហាន​មួក​ខៀវ​កម្ពុជា​៣​រូប ដែល​បាន​បាត់​ខ្លួន​នោះបាន​ស្លាប់​ហើយ បន្ទាប់ពី​សាកសព​ទាំង​៣​ត្រូវបាន​រកឃើញ​នៅ​ព្រឹក​ថ្ងៃទី​៩ ខែឧសភា ចម្ងាយ​ប្រមាណ​២​គីឡូម៉ែត្រ ពី​កន្លែងកើតហេតុ​។ ការស្វែងរក​សព​ទាហាន​មួក​ខៀវ​កម្ពុជា​ទាំង​៣​រូប មានការ​ជួយ​អន្តរាគមន៍​ពី​ក្រុម​គ្រូ​ព្រះវិហារ​នៅក្បែរនោះ ហើយ​នាំយកមក​តំបន់ Bangassou រង់ចាំ​ប​ញ្ចូ​ន​តាម​ឧ​ត្ថ​ម្ភា​គ​ចក្រ អង្គការសហប្រជាជាតិ មកកាន់​ទីក្រុង Bangui​។​

 

​បើតាម​សេចក្តីប្រកាស​ក្រសួងការពារជាតិ បានឱ្យដឹងថា ទាហាន​មួក​ខៀវ​កម្ពុជា​៣​រូប ដែល​បាន​បាត់​ខ្លួន ហើយ​ក្រោយមក​បាន​ស្លាប់​នោះ​រួមមាន លោក ស៊ាន នរិន្ទ (​ព្រិន្ទបាលទោ​) ជំនួយការ​ត្រួតពិនិត្យ​គុណភាព​, លោក​ពលបាលឯក មុំ តុលា (​ព្រិន្ទបាលទោ​) ជំនួយការ​បើកបរ​អ៊ិ​ស្ការ​វ៉ា​ទ័​រ និង​លោក ម៉ៅ អេង (​អនុសេនីយ៍ឯក​) បុគ្គលិក​ពេទ្យ​។​

 

​តាម​សេចក្តីប្រកាស​ព័ត៌មាន​នេះ ក្រសួងការពារជាតិ​ក​ម្ពុ​ជា សូម​សម្តែង​នូវ​ការសោកស្តាយ​ជា​ពន់ពេក និង​ចូលរួម​រំលែក​ទុក្ខ យ៉ាង​ក្រៀមក្រំ ជាមួយ​គ្រួសារ​សព ចំពោះ​កា​រព​លិ​ជីវិត ប្រកបដោយ​កិត្តិយស​ថ្លៃថ្នូរ និង​វីរៈភាព​ដ៏​អង់អាច​ក្លាហាន នៃ​កង​យោ​ធិ​ពល​ខេ​ម​ភូមិន្ទ ដែល​បាន​លះបង់​ជីវិត ក្នុងការ​បំពេញបេសកកម្ម មនុស្សធម៌ អន្តរជាតិ ក្រោម​ឆ័​ត្រ​អ​.​ស​.​ប នៅ​សាធារណរដ្ឋ​អាហ្វ្រិក​កណ្តាល​។​

 

​សូមបញ្ជាក់ថា នៅ​យប់​រំលង​អា​ធ្រា​ត្រ ថ្ងៃទី​៨ ខែឧសភា ឆ្នាំ​២០១៧ មានការ​វាយប្រហារ ដោយ​ក្រុម​ឧទ្ទាម ទៅលើ​ក្បួន​យុទ្ធ​ដំណើរ​របស់​កម្លាំង Minusca របស់​អង្គការសហប្រជាជាតិ បណ្តាលឱ្យ​កម្លាំង​កម្ពុជា​ម្នាក់​ស្លាប់​ភ្លាមៗ ម្នាក់​រងរបួស និង​បាត់​ខ្លួន​៣​នាក់​។ ប៉ុន្តែ​ពេលនេះ​អ្នក​ដែល​បាត់​ខ្លួន​ទាំង​នោះបាន​ស្លាប់​ហើយ​។ ដោយ​ចំនួន​អ្នកស្លាប់​ទាំងអស់​៤​នាក់ (​មុន​ម្នាក់ ក្រោយ​៣​នាក់​)​។​

 

​ប្រមុខ​រាជរដ្ឋាភិបាល​កម្ពុជា សម្តេច​តេ​ជោ ហ៊ុន សែន ក៏បាន​អំពាវនាវ​ឱ្យ​អង្គការសហប្រជាជាតិ យកចិត្តទុកដាក់​ទទួល​ខុសត្រូវ ឱ្យបាន​ខ្ពស់​ចំពោះ​ហេតុការណ៍​ខាងលើ​ផងដែរ​។​

 

​សូមបញ្ជាក់ថា កម្ពុជា​បានចាប់ផ្តើម​បញ្ជូនទាហាន​មួក ក្រោម​ឆ័​ត្រ អ​.​ស​.​ប ទៅកាន់​ប្រ​ទេ​ល​សូ​ម៉ាលី ស៊ូដង់​ខាងជើង ស៊ូដង់​ខាងត្បូង លី​បង់ និង​អាហ្វ្រិក​កណ្តាល តាំងពី​ឆ្នាំ​២០០៦ ហើយ​បាន​ស្លាប់​៧​នាក់ និង​រង​បួស​ចំនួន​៧​នាក់ ដោយ​មិនទាន់​រាប់បញ្ចូល​ករណីនេះ​ទេ​៕

10-5-2017 (1)

 

Leave a Reply

(*) Required, Your email will not be published