នាយ​ឧ​ត្ត​ម​ស​នី​យ៍ កែ គឹមយ៉ាន ៖ សម្រាប់​ជនល្មើស​គ្រឿងញៀន​ខ្លះ គុក​ដាក់​បានតែ​ឈ្មោះ ចំណែក​មនុស្ស​ចេញ​រកស៊ី​គ្រឿងញៀន​ធំ​ជាង​មុន​

, , Leave a comment

​រាជធានី​ភ្នំពេញ : “​ជនល្មើស​គ្រឿងញៀន​ខ្លះ មានតែ​ឈ្មោះ​នៅក្នុង​គុក តែ​មនុស្ស​នៅ​ខាងក្រៅ រកស៊ី​គ្រឿងញៀន​ធំ​ជាង​មុន​”​។ ការ​ថ្លែង​បែបនេះ​នាយ​ឧ​ត្ត​ម​ស​នី​យ៍ កែ គឹមយ៉ាន ឧបនាយករដ្ឋមន្ត្រី និង​ជា​ប្រធាន​ប្រធាន​អាជ្ញាធរ​ជាតិ ប្រយុទ្ធប្រឆាំង​គ្រឿងញៀន សំដៅលើ​ជនល្មើស​ដែល​ជាប់​ពាក់ព័ន្ធ និង​បទល្មើស​គ្រឿងញៀន​មួយចំនួន មានតែ​ឈ្មោះ​ក្នុង​បញ្ជី​ជាប់ពន្ធនាគារ ប៉ុន្តែ​មនុស្ស​វិញ ចេញ​រកស៊ី​គ្រឿងញៀន​នៅ​ខាងក្រៅ​ហើយ​ធំ​ជាង​មុន​ទៀត​។​

 

​នា​ក្រសួងមហាផ្ទៃ ក្នុង​ពិធី​ផ្សព្វផ្សាយ​ផែនការ​សកម្មភាព និង​ការបណ្ដុះបណ្ដាល​ជន​បង្គោល របស់​គណៈកម្មការ​ទទួល​បន្ទុក​ផ្សព្វផ្សាយ​អប់រំ នៃ​យុទ្ធនាការ​ប្រយុទ្ធប្រឆាំង​គ្រឿងញៀន នៅ​ថ្ងៃទី​០៧ ខែមីនា ឆ្នាំ​២០១៧​នេះ នាយ​ឧ​ត្ត​ម​សេនីយ៍ កែ គឹមយ៉ាន បាន​បញ្ជាក់ថា បើ​គិតពី​ស្ថាន​ទម្ងន់ទោស អ្នកខ្លះ​ត្រូវ​ជាប់ពន្ធនាគារ​មួយជីវិត តែ​បាន​៣​ឆ្នាំ​ឃើញ​ចេញ​វិញ​បាត់​។ មិនមែន​ចេះតែ​លើកឡើង​នោះទេ ប្រមុខ​បង្ក្រាប​គ្រឿងញៀន​រូបនេះ បាន​ព្រលយ​មួយ​ឃ្លា​ថា «​ដែល​ខ្ញុំ​ថា ចាប់​ដំបូង​តិច ចេញ​មកវិញ​ខ្លាំង ខ្ញុំ​ស្គាល់​តើ វា​មក​ជួល​ផ្ទះ​កូនចៅ​ខ្ញុំ​ទៀត ដល់​ឥឡូវ​បន្ធូរ​ចុះ​បន្ធូរ​ឡើង សល់​តែ​៣​ឆ្នាំ​»​។​

 

​លោក​បាន​បន្តថា បុគ្គល​ដែល​លោក​លើកឡើង​នោះ មាន​ទាំង​ម៉ាស៊ីន​ផលិត​គ្រឿងញៀន ដាក់​លើ​រថយន្ត បើក​ចល័ត​ទៅ​ផលិត​គ្រប់​ទីកន្លែង​ទៀត នេះ​ជា​រឿង​ជាក់ស្ដែង ហើយ​បាន​រិះគន់ថា «​បើ​នៅតែ​ធូររលុង​បែបនេះ កម្លាំង​សមត្ថកិច្ច​អ្នកអនុវត្ត​ច្បាប់ គេ​គ្មាន​ទឹកចិត្ត​អនុវត្ត​ទេ អ៉ី​ចឹ​ង​ហើយ ចាប់យក​លុយ​ដែរ​ទៅ​»​។​

 

​សូមជម្រាបថា លទ្ធផល​នៃ​យុទ្ធនាការ​ប្រយុទ្ធប្រឆាំង​គ្រឿងញៀន​លើក​ទី​១ ប្រចាំខែ​កុម្ភៈ ឆ្នាំ​២០១៧ កម្លាំង​សមត្ថកិច្ច​នៅ​ទូទាំងប្រទេស ចេញ​បង្ក្រាបបាន ៩២១​ករណី ឃាត់ខ្លួន ២,០៥៣​ករណី ក្នុងនោះ​មាន​ស្ត្រី ២១៥​នាក់ ក្នុងនោះ ករណី​ជួញដូរ​មាន ៥៨២​ករណី ឃាត់ខ្លួន ១០២៧​នាក់ និង​ករណី​ប្រើប្រាស់ ៣៣៨​ករណី ឃាត់ខ្លួន ១,០២៦​នាក់​។ ប្រតិបត្តិ​ការបង្ក្រាប​ពេញ​មួយខែ​កុម្ភៈ សមត្ថកិច្ច​បាន​ចាប់យក​គ្រឿងញៀន ៧ ២៥១.២៨​ក្រោម និង​កញ្ឆា ៩៧,៤៧៨​ដើម ដកហូត​រថយន្ត ១៥​គ្រឿង ម៉ូតូ​២០៨​គ្រឿង ទូរស័ព្ទដៃ ៦៣៩​គ្រឿង​៕

07-3-2017

 

Leave a Reply

(*) Required, Your email will not be published