លោក គុណ ញឹម អគ្គនាយក​គយ និង​មេ​គយ​ចល័ត គួរតែ​លុបលាង​ភាពអាម៉ាស​របស់​គយ​តាម​ព្រំដែន ដែល​គ្មាន​សមត្ថភាព​ទប់ស្កាត់ ឬ​មិន​ចង់​ធ្វើ​ព្រោះ​លាភសក្ការៈ​

, , Leave a comment

​រាជធានី​ភ្នំពេញ : រថយន្ត​ស៊េរី​ទំនើបៗ​ចំនួន​៤​គ្រឿង​អត់​មាន​ពន្ធ​នាំចូល​តែមាន​ស្លាក​លេខ ត្រូវបាន​កម្លាំង​គយ​ចល័ត​ចាប់​តាមផ្លូវ​សាធារណៈ​ក្នុងភូមិ​សាស្ត្រ​ខណ្ឌ ចំនួន​៤​ផ្សេងគ្នា​នៅ​រាជធានី​ភ្នំពេញ នៅ​រសៀល​ថ្ងៃទី​៦ ខែធ្នូ ឆ្នាំ​២០១៥ ។ ប្រតិបត្តិ​ការបង្ក្រាបរ​ថ​យន្ត​ស៊េរី​ទំនើប​អត់​មាន​ពន្ធ​នាំចូល​តែមាន​ស្លាក​លេខ​នេះ​ដឹកនាំ​ផ្ទាល់​ដោយ លោក​លោក ព្រាប គា​រ៉ាត់ ប្រធានការិយាល័យ​ស្រាវជ្រាវ​បទល្មើស​គេចពន្ធ ហៅ​គយ​ចល័ត រួមជាមួយ​លោក ស្រី សុធី អនុប្រធាន សហការ​ជាមួយ​កម្លាំង​អាវុធហត្ថ​លើ​ផ្ទៃ​ប្រទេស និង​មានការ​ចូលរួម​សម្របសម្រួល​ដោយ​ព្រះរាជអាជ្ញារង​សាលាដំបូង​រាជធានី ភ្នំពេញ លោក មាស ច័ន្ទ​ពិសិដ្ឋ​។​

 

​លោក ព្រាប គា​រ៉ាត់ ដែល​ដឹកនាំ​កម្លាំង​គយ​ចល័ត​ចុះ​ចាប់​រថយន្ត​ស៊េរី​ទំនើប​ទាំង​៤​គ្រឿង​អត់​ពន្ធ​នេះ​បាន​ប្រាប់​ឲ្យ​សារព័ត៌​មានកំណើត​ថ្មី​ដឹងថា រថយន្ត​ស៊េរី​ទំនើប​ទាំង​៤​គ្រឿង ដែល​ចាប់បាន​នៅពេលនេះ​មាន ទី​១-​រថយន្ត​ម៉ាក ឡិច​ស៊ី​ស ៣៥០ ពណ៌​ស ស៊េរី​ឆ្នាំ​២០១០ ចាប់បាន​នៅ​ភោ​ជនី​ដ្ឋា​ន​ដើម​ចំប៉ា ស្ថិតក្នុង​សង្កាត់​ចតុមុខ ខណ្ឌដូនពេញ​, ទី​២-​រថយន្ត​ម៉ាក កាមរី ស៊េរី​ឆ្នាំ​២០១៤ ចាប់បាន​នៅ​ម្តុំ​វត្ត​ទឹកថ្លា ស្ថិតក្នុង​សង្កាត់​ទឹកថ្លា ខណ្ឌ​សែន​សុខ​, ទី​៣-​រថយន្ត​ម៉ាក ឡង់​គ្រី​ស័​រ ពណ៌​ស ចាប់បាន​នៅ​ភោ​ជនី​ដ្ឋា​ន​សមុទ្រ​ខៀវ ស្ថិតក្នុង​សង្កាត់​បឹង​ព្រលិត ខណ្ឌ​៧​មករា និង​ទី​៤-​រថយន្ត​ម៉ាក ហាយ​លែ​ន​ឌ័​រ ចាប់​នៅ​ម្តុំ​ផ្សារ​ដេប៉ូ ស្ថិតក្នុង​សង្កាត់​ផ្សារ​ដេប៉ូ​ទី​២ ខណ្ឌទួលគោក​។​

 

​ប្រភព​ដដែល​បាន​បន្តទៀតថា បច្ចុប្បន្ននេះ​កម្លាំង​គយ​ចល័ត​បានដឹងថា​នៅមាន​រថយន្ត​ជាច្រើន​គ្រឿង ទៀត​បាន​នឹង​កំពុង​លាក់ទុក​នៅក្នុង​ផ្ទះ ឬ​ភូមិគ្រឹះ ហើយ​កម្លាំង​គយ​ចល័ត​នឹង​បន្ត​ចុះ​ចាប់​ទៅដល់​គេហដ្ឋាន ប្រសិនបើ​បងប្អូន​ប្រជាពលរដ្ឋ​ដែលជា​ម្ចាស់​យានយន្ត​មិន​ព្រមយក​រថយន្ត​មក​បង់ពន្ធ​តាមផ្លូវ​ច្បាប់​ទេនោះ​។​

 

​ទោះបីជា​យ៉ាងណា​នាយកដ្ឋាន​គយ និង​រដ្ឋាករ សូម​អំពាវនាវ​ឲ្យ​ម្ចាស់​យានយន្ត​ទាំងអស់​មេត្តា​រួសរាន់​មក​ធ្វើការ បង់ពន្ធ​តាមផ្លូវ​ច្បាប់ និង​ទាន់ពេលវេលា ដើម្បី​ចៀសវាង​ការចុះ​ចាប់​ដល់​គេហដ្ឋាន នាំ​ឲ្យ​មាន​ភ្ញាក់ផ្អើល និង​ប៉ះពាល់​កិត្តិយស​។ ក្រោយពេល​ចាប់បាន រថយន្ត​ស៊េរី​ទំនើប​អត់​ពន្ធ​ទាំង​៤​គ្រឿង​ត្រូវបាន​យកទៅ​រក្សាទុក​នៅ​មជ្ឈមណ្ឌល​ឃ្លាំង​គយ​ចល័ត​។​

 

​ជុំវិញ​ករណីនេះ មានមតិ​ជាច្រើន​បាន​លើកឡើងថា តើ​អង្គភាព​ប្រឆាំង​អំពើពុករលួយ អាច​រកឃើញ​មន្ត្រី​គយ ដែល​ស៊ីលុយ​ឡាន រត់ពន្ធ​ទាំងនោះ បានដែរ​ទេ ? តើ​លោក​រដ្ឋមន្ត្រី ក្រសួង​សេដ្ឋកិច្ច និង​ហិរញវត្ថុ នឹក​មិនឃើញ ពី​កំហុស​របស់​មន្ត្រី​គយ នៅតាម​ច្រក​ដែល​ឃុបឃិត ឲ្យ​ឡាន​រត់ពន្ធ​ហូរ​ចូល ឬ​បែបណា ? ដើម្បីអោយ​ច្បាប់​របស់​យើង អាចមាន​តម្លាភាព លោក អូន ព័ន្ធមុនីរ័ត្ន ត្រូវតែ​វែកមុខ និង​ចាប់​មន្ត្រី​គយ ដែល​ឃុបឃិត ស៊ីលុយ​ឈ្មួញ​រត់ពន្ធ​ឡាន ទាំងនោះ ហើយ​បង្ហោះ​ព័ត៌មាន ចេញមក​ផង៕

07-12-2015 07-12-2015 (1)

 

Leave a Reply

(*) Required, Your email will not be published