មាន​មូលហេតុ​៣​ដែល​ជំរុញ​ឲ្យ​លោក សម រង្ស៊ី លើក​ពេល​ត្រឡប់មក​កម្ពុជា​វិញ​

, , Leave a comment

24-11-2015 (1)

រាជធានី​ភ្នំពេញ : លោក សម រង្ស៊ី ប្រធាន​គណបក្ស​សង្គ្រោះ​ជាតិ​បានបញ្ជាក់​នៅតាម​បណ្តាញ​សង្គម​ហ្វេ​ស​ប៊ុ​ក​របស់ខ្លួន​កាលពី​យប់​នៅ​ថ្ងៃទី​២២ ខែវិច្ឆិកា ឆ្នាំ​២០១៥ មាន​មូលហេតុ​ចំនួន​៣ ដែល​ធ្វើ​ឲ្យ​លោក​លើក​ពេល​ត្រឡប់មក​ប្រទេស​កម្ពុជា​វិញ​កាលពី​រាត្រី​ថ្ងៃទី​១៦ ខែវិច្ឆិកា ឆ្នាំ​២០១៥​កន្លងទៅ​។​

 

​លោក សម រង្ស៊ី សរសេរថា​មូល​ហេតុដែល​ប្រែប្រួល​គម្រោង​វិល​ត្រឡប់មក​ប្រទេស​កម្ពុជា​នោះ​រួមមាន គឺ ១- នៅ​រសៀល​ថ្ងៃទី ១៦ វិច្ឆិកា​នោះ ថ្នាក់ដឹកនាំ​គណបក្ស​សង្គ្រោះ​ជាតិ​ទាំងមូល នៅ​ប្រទេស​កម្ពុជា ក្នុងនោះ​មាន​តំណាងរាស្ត្រ និង​សមាជិក​ព្រឹទ្ធសភា​ទាំងអស់ បាន​ជួបជុំគ្នា​ហើយ​សម្រេច​ជា​ឯក​ច្ឆ័​ន​ស្នើ​ឲ្យ​ខ្ញុំ​លើក​ការវិលត្រឡប់​របស់ខ្ញុំ មួយរយៈ​ពេល ដោយសារតែ​សហការី​របស់ខ្ញុំ​ទាំងនោះ មានការ​ព្រួយបារម្ភ​យ៉ាងខ្លាំង​ពី​អំពើហិង្សា ដែល​អាច​កើតឡើង​ពេល​ខ្ញុំ​មកដល់​ព្រលានយន្តហោះ​អន្តរជាតិ​ភ្នំពេញ នៅ​យប់​ថ្ងៃទី ១៦ វិច្ឆិកា​នោះ​។ អំពើហិង្សា​នោះ អាច​ប៉ះពាល់​អ្នកគាំទ្រ​គណបក្ស​សង្គ្រោះ​ជាតិ​ជាច្រើន​នាក់ ដែល​ត្រៀម​មក​ស្វាគមន៍​ខ្ញុំ នៅ​ព្រលានយន្តហោះ​។ ខ្ញុំ​បានទទួល​សំណើ​នេះ​តាម​ទូរស័ព្ទ​ពី​លោក អេង ឆៃអ៊ាង ពេលដែល​ខ្ញុំ​កំពុងធ្វើដំណើរ ឆ្ពោះទៅ​ព្រលានយន្តហោះ​ទីក្រុង អ៊ី​ន​ឆុន (Incheon) ប្រទេស​កូរ៉េខាងត្បូង ដើម្បី​ឡើង​យន្តហោះ​ក្រុមហ៊ុន​អាកាសចរណ៍ Korean Air វិល​ត្រឡប់មក​ប្រទេស​កម្ពុជា​វិញ​។​

 

២- នៅ​ថ្ងៃទី ១៦ វិច្ឆិកា​ដដែល​នោះ មាន​តំណាង​ជាន់ខ្ពស់ នៃ​ប្រទេស​ធំៗ​ពីរ ជា​មិត្ត ក៏បាន​ស្នើ​ឲ្យ​ខ្ញុំ​ពន្យា​ការវិលត្រឡប់​របស់ខ្ញុំ មួយ​រយៈពេល​ដូចគ្នា​អញ្ចឹង​ដែរ ពីព្រោះ​គេ​កំពុងតែ​ខិតខំ​ជួយ​រក​ដំណោះស្រាយ​ចំពោះ​វិបត្តិ​នយោបាយ នៅ​ប្រទេស​កម្ពុជា ដែលមាន​សភាព​កាន់តែ​តានតឹង​។ គេ​បាន​ពន្យល់​ខ្ញុំ​ថា បើ​ខ្ញុំ​វិលត្រឡប់​ទៅ​ប្រទេស​កម្ពុជា​វិញ នៅ​ថ្ងៃទី​១៦ វិច្ឆិកា​នោះ សភាពការណ៍​ច្បាស់​ជា​កាន់តែ​ស្មុគស្មាញ​ថែមទៀត ហើយ​គេ​នឹង​ជួប​ការលំបាក​កាន់តែខ្លាំង​។ មានន័យថា បើ​ខ្ញុំ​នៅក្រៅ​ប្រទេស គេ​ងាយស្រួល​ជួយ​យើង​ជាង​។​

 

៣- នៅ​ព្រឹក​ថ្ងៃទី ១៦ វិច្ឆិកា​ដដែល​នោះដែរ គណៈកម្មាធិការ​អចិន្ត្រៃយ៍​នៃ​រដ្ឋសភា ដែល​មានតែ​សមាជិក​មកពី​គណបក្ស​ប្រជាជន​កម្ពុជា​ចូលរួម បានសម្រេច​បណ្តេញ​ខ្ញុំ​ចេញពី​រដ្ឋសភា ដែលជា​ហេតុ​ធ្វើ​ឲ្យ​ខ្ញុំ​បាត់បង់​នូវ​អភ័យឯកសិទ្ធិសភា​រប​ស់​ខ្ញុំ​។ ហេតុការណ៍​ចុងក្រោយ​នេះ នាំមក​នូវ​អតុល្យភាព​កាន់តែខ្លាំង​ក្នុងការ​តទល់​គ្នា ហើយ​ជា​អំពើ​អយុត្តិធម៌​មួយទៀត​ចំពោះ​ខ្ញុំ ដែល​ធ្វើ​ឲ្យ​ខ្ញុំ​បាត់បង់​ទាំងស្រុង នូវ​លទ្ធភាព​ការពារ​ខ្លួន​តាមផ្លូវ​ច្បាប់​។ ក្នុងការ​ប្រយុទ្ធ​តស៊ូ​នីមួយៗ យើង​មិនត្រូវ​ឲ្យ​គូបដិបក្ខ ជា​អ្នក​ជ្រើសរើស​សមរភូមិ និង​ជា​អ្នកកំណត់​លក្ខខណ្ឌ​នៃ​ការ​តទល់​គ្នា តាមតែ​អំពើ​ចិត្ត​របស់គេ​ទេ​។​

 

​ទាក់ទង​បញ្ហា​នេះដែរ មន្ត្រី​អ្នកនាំពាក្យ​គណបក្ស​សង្គ្រោះ​ជាតិ លោក យ៉ែម ប៉ុ​ញ្ញ ប្ញ​ទ្ធិ បាន​អះអាងថា​អនុប្រធាន​គណបក្ស សង្គ្រោះ​ជាតិ លោក កឹម សុខា នឹង​មកដល់​ប្រទេស​កម្ពុជា​វិញ​នៅវេលា​ម៉ោង​២​និង​៤០ នាទី​រសៀល​ថ្ងៃទី​២៤ ខែវិច្ឆិកា ឆ្នាំ​២០១៥​។ លោក​បញ្ជាក់ថា​លោក​អនុប្រធាន កឹម សុខា នឹង​ត្រឡប់មក​កម្ពុជា​វិញ​ជាមួយ​តំណាងរាស្ត្រ​ពីររូប គឺ​លោក គង់ សភា និង​លោក ញ៉យ ចំរើន ដែល​កំពុង​សំរាក​ព្យាបាល​នៅ ប្រទេស​ថៃ​ហើយ​នៅពេលនេះ​លោក​អនុប្រធាន​បាន​មកដល់​ប្រទេស​ថៃ​ហើយ​៕

24-11-2015

 

Leave a Reply

(*) Required, Your email will not be published