លោក ហោ ណាំហុង អញ្ជើញ​ជា​អធិបតី វេទិកា​ប​ឋ​កថា​ស្តីពី បទពិសោធ​នៃ​យុទ្ធសាស្ត្រ​ផ្លូវច្បាប់​ដើម្បី​ការពារ​ប្រាសាទ និង​តំបន់ ប្រាសាទព្រះវិហារ នៅ​តុលាការ​យុត្តិធម៌​អន្តរជាតិ​

, , Leave a comment

11-11-2015 (2)

​រាជធានី​ភ្នំពេញ : តំណាង​សហគមន៍​មិត្ត​ប្រាសាទព្រះវិហារ កាលពី​ព្រឹក​ថ្ងៃទី​១០ ខែវិច្ឆិកា ឆ្នាំ​២០១៥ ម្សិលមិញ​នេះ បានរៀបចំ​វេទិកា​មួយ​ស្តីពី​បទពិសោធ​នៃ​យុទ្ធសាស្ត្រ​ផ្លូវច្បាប់ ដើម្បី​ការពារ​ប្រាសាទ និង​តំបន់​ប្រាសាទព្រះវិហារ​នៅ​តុលាការ​យុត្តិធម៌​អន្តរជាតិ (ICJ) នៅ​វិទ្យាស្ថាន​បច្ចេកវិទ្យា​កម្ពុជា ហៅ​កាត់​តិច​ណូ​ដោយមាន​សិស្ស និស្សិត ចូលរួម​ប្រមាណ​ជាង​៨០០​នាក់​មកពី​បណ្តា​សាកលវិទ្យាល័យ និង​គ្រឹះស្ថាន​អប់រំ​មួយចំនួន​នៅក្នុង​រាជធានី​ភ្នំពេញ​។ នេះ​បើ​យោងតាម​ការចុះផ្សាយ​រប​ស់​គេហទំព័រ​ទីភ្នាក់ងារសារព័ត៌មាន​កម្ពុជា (AKP)​។​

 

​កម្មវិធី​នោះ​រៀបចំឡើង​ក្រោម​អធិបតីភាព​លោក​ឧបនាយករដ្ឋមន្ត្រី ហោ ណាំហុង រដ្ឋមន្ត្រី​ក្រសួងការបរទេស និង​សហប្រតិបត្តិការ​អន្តរជាតិ ហើយ​ក៏មាន​អញ្ជើញ​ចូលរួម​ពី​លោក សុខ ស៊ីផាន់ណា រដ្ឋលេខាធិការ​ទីស្តីការគណៈរដ្ឋមន្ត្រី លោក រស់ ចន្ទ្រា​បុត្រ ប្រធាន​សមាគមន៍​មិត្ត​ប្រាសាទព្រះវិហារ លោក សួស យ៉ា​រ៉ា អ្នកតំណាងរាស្ត្រ​ខេត្តព្រះវិហារ និង​អ្នកពាក់ព័ន្ធ​ដទៃទៀត​ផងដែរ​។​

 

​លោក ផៃ ស៊ី​ផាន អគ្គលេខាធិការ​សហគម​ន៍​មិត្ត​ប្រាសាទព្រះវិហារ​មានប្រសាសន៍ថា​យើង​មាន​សេចក្តី​សោម​ន្ស​រីករាយ​យ៉ាងខ្លាំង​ឥតឧបមា​ចំពោះ​ជោគជ័យ​ជា​ប្រវត្តិសាស្ត្រ​នូវ​ស្នាដៃ​របស់លោក​ឧបនាយករដ្ឋមន្ត្រី នៅលើ​សមរភូមិ​តុលាការ​យុត្តិធម៌​អន្តរជាតិ (ICJ) នាទី​ក្រុងឡាអេ ប្រទេស​ហូ​ឡង់ លើ​បណ្តឹងសុំ​របស់​ព្រះរាជាណាចក្រ​កម្ពុជា​ឲ្យ​បកស្រាយ​លើ​សាលដីកា​ថ្ងៃទី​១៥ ខែមិថុនា ឆ្នាំ​១៩៦២ ពាក់ព័ន្ធ​នឹង​រឿងក្តី​ប្រាសាទព្រះវិហារ​រវាង​ក​ម្ពុ​ជា និង​ថៃ ដែល​លោក​ឧបនាយករដ្ឋមន្ត្រី ហោ ណាំហុង បាន​នាំ​ជ័យជម្នះ​យ៉ាង​ត្រចះត្រចង់ និង​ជា​ប្រវត្តិសាស្ត្រ​ជូន​ជាតិ​មាតុភូមិ​កាលពី ថ្ងៃទី​១១ ខែវិច្ឆិកា ឆ្នាំ​២០១៣ កន្លងទៅ​។​

 

​ជាមួយនឹង​ការលើកឡើង​ខាងលើ​នេះដែរ លោក ផៃ ស៊ី​ផាន បាន​ថ្លែងអំណរគុណ​ដ៏​ខ្ពង់ខ្ពស់​ចំពោះ​សម្តេច​អគ្គមហាសេនាបតី តេ​ជោ ហ៊ុន សែន ដែល​បាន​បង្កលក្ខណៈ​ឲ្យ​តំបន់​មរតក​ជា​ប្រវត្តិសាស្ត្រ​នេះ និង​ខ្សែ​ព្រំដែន រវាង​កម្ពុជា និង​ថៃ​ក្លាយជា​ព្រំដែន សន្តិភាព ដៃគូ​សហប្រតិបត្តិការ និង​ការអភិវឌ្ឍ​។​

 

​ក្នុង​ពិធី​នោះដែរ លោក​ឧបនាយករដ្ឋមន្ត្រី ហោ ណាំហុង បាន​រម្លឹក​ឡើងវិញ​ពី​ការឈ្លានពាន​របស់​ថៃ​ចូលកាន់​កាប់​ប្រាសាទព្រះវិហារ​នៅ​ឆ្នាំ​១៩៥៤ និង​សាលក្រម​ឆ្នាំ​១៩៦២ របស់​តុលាការ​យុត្តិធម៌​អន្តរជាតិ​ដូចជា ក្រោយ​ប្រទេស​កម្ពុជា​បានទទួល​ឯករាជ្យ​ពី​បារាំង នៅ​ថ្ងៃ​៩ ខែវិច្ឆិកា ឆ្នាំ​១៩៥៣ ថៃ​បាន​ចូលកាន់​កាប់​ប្រាសាទព្រះវិហារ​នៅ​ឆ្នាំ​១៩៥៤ ជាដើម​ហើយ​ពេលនោះ​ព្រះករុណា ព្រះមហាវីរក្សត្រ ព្រះ​បរម​រតន​កោដ្ឋ បាន​ប្តឹងទៅ​តុលាការ​យុត្តិធម៌​អន្តរជាតិ​នៅ​ថ្ងៃទី​៦ ខែតុលា ឆ្នាំ​១៩៥​។​

 

​ទាក់ទង​នឹង​ការ​ការចុះបញ្ជី​ប្រាសាទព្រះវិហារ ជា​បេតិកភណ្ឌ​ពិភពលោក​លោក​ឧបនាយករដ្ឋមន្ត្រី ហោ ណាំហុង បាន មានប្រសាសន៍ថា រាជរដ្ឋាភិបាល​កម្ពុជា បានស្នើ​ចុះបញ្ជី​ប្រាសាទព្រះវិហារ​ជា​បេតិកភណ្ឌ​ពិភពលោក​នៅពេលនោះ​ថៃ​បាន​ប្រឆាំង​ជំទាស់​ហើយ​ទាមទារ​ឲ្យ​ធ្វើការ​ចុះបញ្ជី​រួមគ្នា​។ បន្ទាប់ពី​ការចុះបញ្ជី​ប្រាសាទព្រះវិហារ​ជា​បេតិកភណ្ឌ​ពិភពលោក​នៅ​ថ្ងៃទី​៧ កក្កដា ២០១១ កងទ័ព​ថៃ​ក្រោម​ការដឹកនាំ​របស់​រដ្ឋា​ភិ​បាល​អាប់​ភិ​ស៊ីត (Abbhisit) បាន​ឈ្លានពាន​តំបន់​ព្រះវិហារ​ជា​បន្តបន្ទាប់​នៅ​ថ្ងៃទី​១៥ ខែតុលា ឆ្នាំ​២០០៨ នៅ​ថ្ងៃទី​៣ ខែមេសា ឆ្នាំ​២០០៩  និង​ថ្ងៃទី​៤ ដល់ទី​៧ ខែកុម្ភៈ ឆ្នាំ​២០១១​។ បន្ទាប់មក​ថៃ​បានធ្វើការ​វាយប្រហារ​នៅតាម​បណ្តោយ​ព្រំដែន​ក្នុង​តំបន់​ផ្សេងៗ​ទៀត​នៅ ថ្ងៃទី​២២ ខែមេសា ដល់​ថ្ងៃទី​៣ ខែឧសភា ឆ្នាំ​២០១១​។ ក្រសួងការបរទេស​ថៃ​បានទាមទារ​តំបន់​៤,៦​គម​២ នៅ​ខែមិថុនា ឆ្នាំ​២០០៨ (​មុន គណៈកម្មាធិការ​បេតិកភណ្ឌ​ពិភពលោក​ទទួលយក​ប្រាសាទព្រះវិហារ​ជា​បេតិកភណ្ឌ​ពិភពលោក​)​។​

 

​ដោយ​ផ្អែកលើ​មាត្រា​៩៤ នៃ​ធម្មនុញ្ញ​អង្គការសហប្រជាជាតិ​ដែល​បាន​ចែងថា “ ក្នុងករណី​ភាគី​ណាមួយ​មិនបាន​បំពេញ​កាតព្វកិច្ច​តាម​សាលក្រម​របស់​តុលាការ​យុត្តិធម៌​អន្តរជាតិ ភាគី​មួយទៀត​អាច​ប្តឹងទៅ​ក្រុមប្រឹក្សាសន្តិសុខ​អង្គការសហប្រជាជាតិ​” សម្តេច​អគ្គមហាសេនាបតី​តេ​ជោ បាន​ចាត់​ឲ្យ​រូបលោក​ធ្វើដំណើរ​ទៅ​ក្រុមប្រឹក្សាសន្តិសុខ​អង្គការសហប្រជាជាតិ​នៅ​ថ្ងៃទី​១៤ កុម្ភៈ​២០១១​។ ក្រុមប្រឹក្សាសន្តិសុខ​អង្គការសហប្រជាជាតិ បានសម្រេច​ឲ្យ​មានការ​ឈប់​បាញ់​គ្នា​ជា​អចិ​ន្រៃ្ត​យ៍​ហើយ​ប្រគល់​ឲ្យ​អាស៊ាន​ធ្វើជា អ្នកសម្របសម្រួល​។ លោក​ឧបនាយក រដ្ឋមន្ត្រី​បន្តថា ប្រទេស​ឥណ្ឌូណេស៊ី ដែល​ពេលនោះ​ជា​ប្រធាន​អាស៊ាន​បាន​កោះប្រជុំ​រដ្ឋមន្ត្រីការបរទេស​អាស៊ាន នៅ​ថ្ងៃទី​២២ ខែកុម្ភៈ ២០១១ ហើយ​បានសម្រេច​បង្កើតឡើង​នូវ​ក្រុម​សង្កេតការណ៍​អាស៊ាន ហើយ កម្ពុជា​បាន​ឯកភាព​ទទួលយក “​បែបបទ​បច្ចេកទេស​” ដែល​ស្នើឡើង​ដោយ​ឥណ្ឌូណេស៊ី​ចំនួន​៨​លើក ក៏ប៉ុន្តែ​ភាគី​ថៃ​មិនដែល​ឆ្លើយតប​ម្តងណា​ឡើយ​។​

 

​លោក​ឧបនាយករដ្ឋមន្ត្រី ហោ ណាំហុង បានបញ្ជាក់​ទៀតថា ដោយសារតែ ការបន្ត​រំលោភបំពាន​ពី​ភាគី​ថៃ កម្ពុជា​បានដាក់​សំណើ​ទៅ​តុលាការ​យុត្តិធម៌​អន្តរជាតិ​នៅ​ថ្ងៃទី​២៨ ខែមេសា ២០១១​ស្នើ​ធ្វើ ការបកស្រាយ​សាលក្រម​ឆ្នាំ​១៩៦២​និង​ដាក់ចេញ​វិធានការ​បណ្តោះអាសន្ន​ប្រឆាំងនឹង​ការវាយលុក​របស់​ថៃ​ហើយ​នៅ​ថ្ងៃទី​១៨ ខែកក្កដា ឆ្នាំ​២០១១ តុលាការ​បានដាក់​ចេញ​វិធានការ​បណ្តោះអាសន្ន​។ លោក ឧបនាយករដ្ឋមន្ត្រី​បន្តថា កម្ពុជា​ប្តឹងទៅ​តុលាការ​យុត្តិធម៌​អន្តរជាតិ ដោយ​ផ្អែកលើ​មាត្រា​ទី​៦០(​លក្ខន្តិកៈ​តុលាការ​) ដែល បាន​កំណត់ថា ភាគី​ណា​ក៏មាន​សិទ្ធិ​ស្នើសុំ អោយធ្វើ​ការបកស្រាយ​សាលក្រម​របស់​តុលាការ​បានដែរ​។ ដោយ​ផ្អែក​ការរំលោភ​របស់​ថៃ​លើ​សាលក្រម​តុលាការ​ឆ្នាំ​១៩៦២ ការឈ្លានពាន​របស់​ថៃ​និង​ការធ្វើ​ឲ្យ​ខូចខាត​ដល់​បេតិកភណ្ឌ​ពិភពលោក​។ តុលាការ​បានធ្វើ​សវនាការ​ផ្ទាល់មាត់​ចំនួន​២​លើក​លើក​ទី​១ នៅ​ថ្ងៃទី ៣០-៣១ ខែឧសភា ឆ្នាំ​២០១១ និង​លើក​ទី​២ ថ្ងៃទី​១៥ ដល់ ១៩ ខែមេសា ឆ្នាំ​២០១៣​។​

 

​រដ្ឋមន្ត្រីការបរទេស​កម្ពុជា​បានលើកឡើង​ទៀតថា ក្នុង​សវនាការ​ផ្ទាល់មាត់​ចុងក្រោយ​ថ្ងៃទី​១៥ ដល់ ១៩ ខែមេសា ឆ្នាំ​២០១៣​កម្ពុជា​បានលើកឡើង​ពី​ការ​សន្និដ្ឋានថា ផែនទី​ឧបសម្ព័ន្ធ​១ បង្ហាញ​ពី​ខ្សែ​ព្រំដែន រវាង​ប្រទេស​ទាំងពីរ​ដូច​បានលើកឡើង​ក្នុង​អង្គហេតុ​នៃ​សាលក្រម​ឆ្នាំ​១៩៦២ ការ មិន​ឯកភាពគ្នា​លើ​អត្ថន័យ និង​វិសាលភាព​របស់​សាលក្រម​ឆ្នាំ​១៩៦២  អង្គច្បាប់ និង អង្គហេតុ​មិនអាច​បំបែកចេញ​ពីគ្នា​បាន ឡើយ ថៃ​ត្រូវ​ដកទ័ព​ចេញពី​តំបន់​ជុំវិញ​ប្រាសាទ​ដូច​បានកំណត់​ក្នុង​កថាខណ្ឌ​ទី​២ នៃ​អង្គច្បាប់​សាលក្រម​១៩៦២​ដែល​បាន​កំណត់ថា ”​ថៃ​មាន​កាតព្វកិច្ច​ដក​ទាហាន នគរបាល ឆ្មាំ​ចេញពី​ប្រាសាទ និង​តំបន់ ជុំវិញ​ប្រាសាទ​ដែល​ស្ថិតក្នុង​ទឹកដី​ក្រោម​អធិបតេយ្យ​កម្ពុជា​” ហើយ​ថៃ​ត្រូវបំពេញ​កាតព្វកិច្ច​នេះ​ជា​រៀងរហូត​។​

 

​តាម​លោក​ឧបនាយករដ្ឋមន្ត្រី ហោ ណាំហុង បាន​អះអាងថា នេះ​ជា​កំហុស​ធំ​ណាស់​របស់​ថៃ​ដែល​បាន​យក​ផែនទី​ក្រោយ​សាលក្រម​១៩៦២ សម្រាប់​ឆ្លើយតប​នឹង សំណួរ​របស់​ចៅក្រម​ដែល​បាន​សួរ​ពី​ផែនទី ពេល​កម្ពុជា​ដាក់ពាក្យ​ប្តឹងទៅ​តុលាការ​យុត្តិធម៌​អន្តរជាតិ​។ លោក​ឧបនាយករដ្ឋមន្ត្រី​អះអាងថា​លោក​មិន​នឹកស្មានថា “​អ្នកច្បាប់​របស់​ថៃ​ឆោទ​ដល់​ថ្នាក់​ហ្នឹង​ទេ នៅពេល​តុលាការ​យុត្តិធម៌​អន្តរជាតិ​ទីក្រុង​ឡាអេរ (ICJ) សួរ​សម្រេច​ថ្ងៃ​ចុងក្រោយ​ថា ថៃ​ប្រើ​ផែន​ទីណា​ហើយ​កម្ពុជា ប្រើ​ផែនទី ណា​? នៅពេលនោះ​កម្ពុជា​យើង​បាន បញ្ជាក់ថា យើង​បាន​ប្រើ​ផែនទី​ឧបសម្ព័ន្ធ​១ ដែល​ថៃ​ទទួលស្គាល់ និង​អន្តរជាតិ​ទទួលស្គាល់ ស្រាប់តែ​ថៃ បាន​អះអាងថា ប្រើ​ផែនទី​ដែល​គណៈរដ្ឋមន្ត្រី​ថៃ​កំណត់​នៅ​ខែកក្កដា ឆ្នាំ​១៩៦២ គឺ​ក្រោយ​តុលាការ​កាត់ក្តី ១​ខែ ដូច្នេះ​យើង​គិតថា អ្នកច្បាប់​ថៃ​មិនគួរ​ឆោទ​ដល់​ប៉ុណ្ណឹង ពីព្រោះ​តុលាការ​ICJ​បាន សម្រេច​រួចទៅហើយ​ឲ្យ​កម្ពុជា​ឈ្នះ និង​ឲ្យ​ថៃ​ដក​អ្វីៗ​ចេញពី​ប្រាសាទព្រះវិហារ ស្រាប់តែ​អ្នកច្បាប់​ថៃ​បែរជា​លើកយក​ផែនទី​ឯកតោ ភាគី​ដែល​ទើប​ធ្វើ​ក្រោយមក​សំអាង​ទៅវិញ ប៉ុន្តែ​នេះ​ប្រហែលជា​ទេវតា​ជួយ​យើង​”៕

11-11-2015 11-11-2015 (1)

លោក ហោ ណាំហុង ឧបនាយករដ្ឋមន្ត្រី រដ្ឋមន្ត្រីការបរទេស និង​សហប្រតិបត្តិការ​អន្តរជាតិ អញ្ជើញ​ជា​អធិបតី វេទិកា​ប​ឋ​កថា​ស្តីពី “​បទពិសោធ​នៃ​យុទ្ធសាស្ត្រ​ផ្លូវច្បាប់​ដើម្បី​ការពារ​ប្រាសាទ និង​តំបន់​ប្រាសាទ ព្រះវិហារ នៅ​តុលាការ​យុត្តិធម៌​អន្តរជាតិ (ICJ) នៅក្នុង​រយៈពេល​កន្លងមក​” នា​ព្រឹក​ថ្ងៃទី​១០ ខែវិច្ឆិកា ឆ្នាំ​២០១៥ ភ្នំពេញ​។ រូប​ថ​តៈ ស៊ិន សារ៉េត (AKP)​

 

Leave a Reply

(*) Required, Your email will not be published