ប្រជាពលរដ្ឋ​រិះគន់​រថយន្ត​ប្រមូល​សំរាម​របស់​ក្រុមហ៊ុន​ស៊ីន​ទ្រី ចំពោះ​ការហូរ​ទឹកស្អុយ​

, , Leave a comment

​រាជធានី​ភ្នំពេញ : ប្រជាពលរដ្ឋ​ទូទាំង​ខណ្ឌចំការមន​បាន​រិះគន់​ខ្លាំង​ចំពោះ​ការហូរ​ទឹកស្អុយ​ចេញ​មកពី​រថយន្ត​ប្រមូល​សំរាម​របស់​ក្រុមហ៊ុន​ស៊ីន​ទ្រី​មកលើ​ផ្លូវ​សាធារណៈ​និង​មុខផ្ទះ​អ្នករស់នៅ​តាម​បណ្តោយ​ផ្លូវ​។ ប្រជាពលរដ្ឋ​ដែល​រស់ក្នុង​មូលដ្ឋាន​នីមួយៗ​បានស្នើ​ដល់​អាជ្ញា​ធរមាន​សមត្ថកិច្ច​ជួយ​ណែនាំ និង​ទប់ស្កាត់ បញ្ហា​ដែល​ធ្វើ​ឲ្យ​ប៉ះពាល់​បរិស្ថាន និង​អនាម័យ​មួយ​នេះ​។ ប្រជាពលរដ្ឋ​បានលើកឡើង​ដូចៗ​គ្នា​ថា នៅពេល​ឡាន​ប្រមូល​សំរាម​ស៊ីន​ទ្រី​ទៅដល់​ទីកន្លែង​ណា​គឺមាន​ក្លិនស្អុយ​អសោច​ដល់ទី​កន្លែង នោះ ដោយសារតែ​រថយន្ត​នោះ​គ្មាន​វិធី​ការពារ​មិន​ឲ្យ​ទឹកស្អុយ​កើតចេញពី​សំរាម​ដែល​តាំង​ហូរ​ចេញមកក្រៅ​។ ការរិះគន់​នេះ​ធ្វើឡើង​ក្នុង​វេទិកាសាធារណៈ​របស់​ខ​ណ្ឌ​ចំការមន​នៅ​ព្រឹក​ថ្ងៃ​ចន្ទ​នេះ ដែលមាន​ការចូលរួម​ពី​លោកស្រី ម៉ក់ វណ្ណ​ស៊ីថា អភិបាលរង​សាលា​រាជធានី​ភ្នំពេញ លោក ប្រាក់ ចាន់​ធឿន ប្រធាន​ក្រុមការងារ​ថ្នាក់ ជាតិ ចុះជួយ​ខណ្ឌចំការមន និង​លោក ជួប ខុន សមាជិក​ក្រុមប្រឹក្សា​រាជធានី។​

 

​ប្រជាពលរដ្ឋ​លើកឡើង​ទៀតថា ឡាន ស៊ីន​ទ្រី​ជាង​៥០​ភាគរយ តែង​បង្ហូរទឹក​កខ្វក់​នេះ​តាមផ្លូវ​សាធារណៈ មុខផ្ទះ​ប្រជាពលរដ្ឋ និង​មុខ​ភោជនីយដ្ឋាន​ដែល​ធ្វើ​ឲ្យ​ពួកគាត់​ពិបាក​នឹង​ទទួលយកបាន​នូវ​សកម្មភាព ដែល​កើត​ឡើងជា​រៀងរាល់ថ្ងៃ​បែបនេះ​។ ប្រជាពលរដ្ឋ​បាន​រិះគន់​ទៀតថា ក្រុមហ៊ុន ស៊ីន​ទ្រី​ដែលជា​អ្នកទទួលបន្ទុក​ប្រមូល​សំរាម ក្នុង​រាជធានី​ភ្នំពេញ​គ្មាន​ការទទួលខុសត្រូវ​។​

 

​មន្ត្រី​អាជ្ញាធរ​ក្នុង​ខណ្ឌ​បានទទួល​យក​នូវ​ការរិះគន់​នេះ និង​បាន​ចាត់​ឲ្យ​ក្រុមការងារ​យក​បញ្ហា​នេះ​ទៅ​ជជែក​ជាមួយ ក្រុមហ៊ុន​ស៊ីន​ទ្រី​ដើម្បី​កែលម្អ​បញ្ហា​ដែល​ប៉ះពាល់​ដល់​សុខភាព​សាធារណៈ​នេះ ឡើងវិញ​។ លោកស្រី ម៉ក់ វណ្ណ​ស៊ីថា មានប្រសាសន៍ថា រាល់​បញ្ហា​ទាំងអស់​ត្រូវមាន​ការចូល​រួម​ពី​គ្រប់ភាគី​ពាក់ព័ន្ធ​បូករួម​ទាំង​វិស័យ​ឯកជន​ដើម្បី​ឲ្យ​ការងារ​ទាំង ឡាយ​ដោះស្រាយ​ប្រកបទៅដោយ​ភាព រលូន​។ លោកស្រី​បញ្ជាក់ថា រាល់​តម្រូវការ ត្រូវ​ពិនិត្យ និង​វិភាគ​ឲ្យ​បាន​ល្អិតល្អន់​ដើម្បី កុំ​ឲ្យ​ប៉ះពាល់​ដល់​ប្រជាពលរដ្ឋ​។​

 

​គួររំឭកថា បញ្ហា​សំរាម​ក្នុង​រាជធានី​ភ្នំពេញ គឺ​ក្រុមហ៊ុន​ស៊ីន​ទ្រី​ជា​អ្នកទទួល​សិទ្ធិ​ម៉ៅការ​ប្រមូលយក​។ យ៉ាងណាក៏ដោយ​ក្រុមហ៊ុន នេះ ក៏​ធ្លាប់​ត្រូវបាន​រាជរដ្ឋាភិបាល​ស្តីបន្ទោស​ពី​ការគ្រប់គ្រង​សំរាម​មិនល្អ​។ របាយការណ៍​អន្តរក្រសួង​ដែល​ចេញ​ដោយ​ទីស្តីការគណៈរដ្ឋមន្ត្រី​កាលពី​ខែកុម្ភៈ ឆ្នាំ ២០១៥ បាន​ស្តីបន្ទោស​ក្រុមហ៊ុន​ស៊ីន​ទ្រី​ថា​មិនមាន​លទ្ធភាព​គ្រប់គ្រាន់​ក្នុងការ​ពង្រឹង​និង​ពង្រីក​ប្រតិ​ប​តិ្ត​ការ​របស់ខ្លួន​ក្នុងការ​ប្រមូល និង​ដឹកជញ្ជូន​សំរាម​កាកសំណល់​រឹង​នៅក្នុង​រាជធានី​ភ្នំពេញ​ឲ្យ​ស្របតាម​ស្ថានភាព​រីកចម្រើន​។ រាជរដ្ឋាភិបាល បាន​ព្រមាន​ថា ប្រសិនបើ​ក្រុមហ៊ុន​ស៊ីន​ទ្រី​មិនបាន​បំពេញ​កាតព្វកិច្ច​តាម​កិច្ចសន្យា រាជរដ្ឋាភិបាល​នឹង​ទុក​ឱកាស​ឲ្យ​ក្រុមហ៊ុន​ផ្សេង​មានលទ្ធភាព​ដេញថ្លៃ​ប្រមូល​សំរាម​ជំនួស​វិញ​។​

 

​គួរ​បញ្ជាក់ថា​ក្រុមហ៊ុន​ស៊ីន​ទ្រី​ជា​សាខា​មួយ​នៃ​សហគ្រាស​កាណាដា​ដែលមាន​ឈ្មោះថា​ស៊ីន​ទ្រែ​ក និង​ទទួលបាន​សិទ្ធិផ្តាច់មុខ​លើ​ការប្រមូល និង​ចោល​សំរាម​នៅក្នុង​រាជធានី​ភ្នំពេញ​ចាប់ពី​ឆ្នាំ​២០០២​បន្ទាប់ពី​បាន​ចុះ​កិច្ចព្រមព្រៀង​ជាមួយ​រដ្ឋាភិបាល​រយៈពេល​៤៩​ឆ្នាំ​៕

cintri

 

Leave a Reply

(*) Required, Your email will not be published