លោក អូន ព័ន្ធមុនីរ័ត្ន រដ្ឋមន្ត្រីក្រសួង​សេដ្ឋកិច្ច និង​ហិរញវត្ថុ គួរ​មាន​វិធានការ​បែបណា ដើម្បី​លុបលាង​ភាពអាម៉ាស ករណី រថយន្ត ម៉ូតូ គេចពន្ធ​ចូលមក​លក់​ពេញ​ប្រទេស​

, , Leave a comment

28-10-2015

​រាជធានី​ភ្នំពេញ : កម្លាំង​គយ​ចល័ត នៃ​នាយកដ្ឋាន​បង្ការ និង​បង្ក្រាប​បទល្មើស​នៃ​អំពើ​គេចពន្ធ សហការ​ជាមួយ​កម្លាំង​អាវុធហត្ថ ក្រុងភ្នំពេញ (​ខណ្ឌ​៧​មករា​) និង​កម្លាំង​អាវុធហត្ថ​លើ​ផ្ទៃ​ប្រទេស ព្រមទាំង​អាជ្ញាធរ​មូលដ្ឋាន សម្រប​ស ម្រួ​ល ដោយ ព្រះរាជអាជ្ញារង រាជធានី​ភ្នំពេញ លោក មាស ច័ន្ទ​ពិសិដ្ឋ បាន​ចាប់​ទុក​ឃាត់​ម៉ូតូ​ស៊េរី​ទំនើបៗ​ចំនួន​៤៩​គ្រឿង ដែល​អត់​បាន​បង់ពន្ធ ស្ថិតនៅ​ផ្ទះ​លេខ​១៤​អឺ​អូ ផ្លូវ​លេខ​២៦០ សង្កាត់​វាលវង់ ខណ្ឌ​៧​មករា ម្តុំ​រោងកុន​គីរីរម្យ​។ នេះ​បើ​យោងតាម​មន្ត្រី​គយ​ចល័ត ដែល​ចុះ​ចាប់​ម៉ូតូ​ខាងលើនេះ​ថ្លែងប្រាប់​ឲ្យ​ដឹង​យ៉ាង​ដូច្នេះ នៅ​ល្ងាច​ថ្ងៃទី​២៧ ខែតុលា ឆ្នាំ​២០១៥​។​

 

​ករណី​ខាងលើនេះ​បានបញ្ជាក់​យ៉ាងច្បាស់​ពី​ភាពកម្សោយ និង​អសមត្ថភាព​របស់​មន្ត្រី​គយ ដែល​ប្រចាំការ​នៅតាម​ព្រំដែន​។ បើ​គិត​ឲ្យ​ច្បាស់​ទៅ​ម៉ូតូ​អត់​ពន្ធ​ទាំងអស់នោះ មិនអាច​លាក់​ក្នុង​ស្បែកជើង​របស់​អ្នករត់ពន្ធ​បានទេ​។ បើ​គ្មាន​មន្ត្រី​គយ​នៅតាម​ព្រំដែន តាម​ច្រក​នានា បើកដៃ​ឲ្យ​ដឹកជញ្ជូន​ចូលមក ដោយ​មិន​បង់ពន្ធ តើ​វា​មក​រួច​ដែរ​ទេ​? ករណីនេះ​បើ​ចាប់បាន​មួយគ្រឿង គឺ​ត្រូវ​ចាប់​មេ​គយ​ម្នាក់​យកទៅដាក់​ពិន័យ បើសិនជា​គយ​ចល័ត អាច​រកឃើញ ម៉ូតូ​អត់​បង់ពន្ធ​ទាំងនោះ ហេតុ​អី​ក៏​គយ​មិនអាច​រក​ឲ្យ​ឃើញថា វា​ចូលមក​តាម​ច្រក​ណា ពេលណា និង​ដោយ​លោក​គយ រូប​ណា​ជា​អ្នក​ជួយ​សម្របសម្រួល​ផង​ទៅ​?

 

​តើ​អង្គភាព​ប្រឆាំង​អំពើពុករលួយ​អាច​រកឃើញ​មន្ត្រី​គយ ដែល​ស៊ីលុយ​រត់ពន្ធ​ទាំងនោះ​បានដែរ​ទេ ? តើ​លោក​រដ្ឋមន្ត្រី ក្រសួង​សេដ្ឋកិច្ច និង​ហិរញវត្ថុ នឹក​មិនឃើញ​ពី​កំហុស​របស់​មន្ត្រី​គយ នៅតាម​ច្រក​ដែល​ឃុបឃិត​ឲ្យ​ទំនិញ​គេច​រត់ពន្ធ​ហូរ​ចូល​ឬ​បែបណា ? ដើម្បី​ឲ្យ​ច្បាប់​របស់​យើង អាចមាន​តម្លាភាព លោក អូន ព័ន្ធមុនីរ័ត្ន ត្រូវតែ​វែកមុខ និង​ចាប់​មន្ត្រី​គយ ដែល​ឃុបឃិត ស៊ីលុយ​ឈ្មួញ​រត់ពន្ធ​ឡាន ទាំងនោះ ហើយ​បង្ហោះ​ព័ត៌មាន​ចេញមក​ផង​។​

 

​យ៉ាងណាក៏ដោយ គេ​សង្កេតឃើញថា ការហូរចូល​នូវ​ទំនិញ ប្រភេទ​គ្រឿងសំណង់ ភេសជ្ជៈ ថ្នាំពេទ្យ គ្រឿង​អេឡិចត្រូនិក គ្រឿង​ចាប់ហួយ របស់​ឈ្មួញ​ធំៗ មកពី​តាម​ច្រកព្រំដែន កំពុង​បំផ្លាញ​ចំណូល​ថវិកាជាតិ គួរ​ឲ្យ​ព្រួយបារម្ភ ដែល​អគ្គនាយក​គយ គួរ​រិះរក​វិធី​ទប់ស្កាត់ ឲ្យ​មាន​ប្រសិទ្ធភាព​។ ពោលគឺ​ប្រជាពលរដ្ឋ​ចង់ឃើញ លុយ​ក៏បាន​បង់​ចូល​រដ្ឋ មន្ត្រី​គយ​ពុករលួយ ក៏​ត្រូវបាន​ផ្តន្ទាទោស ហើយ​គ្រប់ៗ​គ្នា នឹង​បន្ត​ឃ្លាំមើល​រឿងនេះ រហូតដល់​ទីបញ្ចប់​៕

28-10-2015 (1)

 

Leave a Reply

(*) Required, Your email will not be published