មូលហេតុ​នៃ​អំពើ​ក្បត់ចិត្ត និង​ស្នេហា​លួចលាក់​

, , Leave a comment

​ស្វែងយល់ : ការរស់នៅ​ក្នុង​ភាពមានបាន សុ​ខុ​ដុមរ​មនា និង​មានយស់​សក្តិ​ខ្ពង់ខ្ពស់ គឺជា​អ្វីដែល​នារី​ស្ទើ​តែ​ទាំងអស់​ប្រាថ្នា​ចង់បាន រហូត​ទាល់​តែមាន​បុរស​មួយចំនួន​បាន​ប្រើប្រាស់​ម​ហិ​ច្ឆិ​តា​មួយ​នេះ​ធ្វើជា​អន្ទាក់ ដើម្បី​សម្រេច​បំណង​កាមគុណ​របស់ខ្លួន​ទៅលើ​នារី​ក្រីក្រ ហើយ​ដោយសារតែ​អន្ទាក់​ទាំងនេះ​បាន​រុញច្រាន​នារី​ក្មេងៗ​ជាច្រើន​ឲ្យ​ធ្លាក់ខ្លួន​ជា​ស្រី​កំណាន់ (​ជួនកាល​ដោយ​បំណង ជួនកាល​ដោយ​មិនដឹង​ខ្លួន​) យ៉ាងច្រើន​។ តើ​វា​ជា​កំហុស​មែន​ទេ​? ហើយ​តើ​ជា​កំហុស​របស់​អ្នកណា​?

 

​បើសិនជា​យើង​បដិសេធថា វា​មិនមែនជា​កំហុស វា​ទាល់​តែមាន​អំណះអំណាង​ច្បាស់លាស់​សមរម្យ​មួយ ប៉ុន្តែ​ជានិច្ចកាល​គេ​តែង​បានឮ​ការបែកបាក់​គ្រួសារ​ប្តី​-​ប្រពន្ធ ការ​ចងអាឃាត​ព្យាបាទ​គ្នា ការសម្លាប់​ខ្លួន តែង​កើត​ឡើងជា​ញឹក​ញ៉ាប់​។ បើទោះជា​ករណី​ជាច្រើន​មិនត្រូវ​បាន​គេ​អះអាង​ឲ្យ​ប្រាកដប្រជា តែ​វា​ច្បាស់​ណាស់​ថា បាន​កើតឡើង​ព្រោះតែ​ផល​នៃ​ការ​ប្រ​ថ្នា​កាមគុណ​ហួសហេតុ​របស់​បុគ្គល (​ប្រុស​និង​ស្រី​)​។​

 

​បើសិនជា​យើង​ទទួលស្គាល់ថា ម​ហិ​ច្ឆិ​តា និង​អន្ទាក់​ទាំងនោះ គឹជា​កំហុស នោះ​យើង​និង​មើលឃើញ​ផ្លូវ​គាំទ្រ​ជាច្រើន​ដោយ​ផ្អែកទៅលើ​ស្ថានភាព​ប្រពៃណី និង​បរិយាកាស​សង្គម​ដែល​គេ​កំពុង​រស់នៅ ប៉ុន្តែ​គេ​ពុំបាន​អះអាងថា វា​ជា​កំហុស​របស់​សាមីជន​នោះទេ ព្រោះ​ជា​ច្បាប់ធម្មជាតិ ជួនកាល​វា​គ្រាន់តែ​ជាការ​គូសវាស​ខុសឆ្គង​របស់​ព្រះព្រហ្ម​លិខិត ឬ​គ្រាន់តែ​ជា​ផល​នៃ​កម្ម​របស់​បុគ្គល​ដែល​បាន​សាង​ពីមុនមក​ប៉ុណ្ណោះ នេះ​បើ​ផ្អែ​ល​ទៅលើ​ទស្សនៈ សាសនា និង​ជំនឿ​។ ព្រោះ​រឿង​តែ​រឿងនេះ​ទើប​បុគ្គល​អ្នកប្រព្រឹត្ត​ផ្ទាល់ នៅពេលដែល​បញ្ហា​បានមក​ដល់ គេ​ពុំដែល​ទទួលខុសត្រូវ​ថា​ជា​ទង្វើ​ពិតប្រាកដ​របស់ខ្លួន​ទេ តែ​គេ​បែ​ជា​ទម្លាក់​វា​ទៅលើ ទេវតា ព្រះឥន្ទ ព្រះព្រហ្ម យមបាល អ្នកតា ទៅវិញ​។ ប្រការ​នេះហើយ ដែល​ធ្វើ​ឲ្យ​អ្នកប្រព្រឹត្តិ​មួយចំនួន​ត្រូវបាន​លើកលែងទោស​ដោយ​ស្ងាត់ៗ (​ការមិន​ដេញ​ដោយ​) រឺ​ត្រូវបាន​អធ្យាស្រ័យ​ទាំងស្រុង​ពី​ជន​រង​អំពើ​។​

 

​បច្ច័យ​ជាហេតុ​
​ការស្រឡាញ់ និង​ស្នេហា គឺជា​របស់​ពិសិដ្ឋ​មួយ ដែល​មនុស្ស​គ្រប់រូប​ត្រូវតែ​ទទួលបាន និង​ត្រូវ​ចែករំលែក​ឲ្យ​គ្នា​ឲ្យ​បាន​គ្រប់គ្រាន់ ប៉ុន្តែ​ស្ថានភាព​បុគ្គល និង​បរិយាកាស​នៅ​ជុំវិញខ្លួន បានធ្វើ​ឲ្យ​មនុស្ស​បង្កើត​បំណងប្រាថ្នា​នានា ដែល​ជួនកាល​បំណងប្រាថ្នា​ទាំងនោះ គឺ​ពិត​ជាធំ​ណាស់​ធំ​រហូត​ខ្លួនឯង​មិនអាច​សម្រេចបាន​។ ចំពោះ​មនុស្ស​ស្រី អំណោយទាន គឺជា​រតនៈសម្បត្តិ​ប្រចាំជីវិត (​អំណោយទាន ៖ សម្រស់​ទាំង​៥​ប្រការ​របស់​មនុស្ស​ស្រី​មាន សក់ ភ្នែក ស្បែក ឆ្អឹង និង វ័យ​) ព្រោះ​អំណោយទាន​ទាំងនោះ មិនមាន​នៅលើ​ខ្លួន​បុរស​នោះទេ ជាហេតុ​ធ្វើ​ឲ្យ​បុរស​ជាច្រើន​កាប់សម្លាប់​គ្នា ដើម្បី​ដណ្តើមយក​អំណោយទាន​ទាំងនោះ​មកជា​កម្ម​សិទ្ធ​ផ្ទាល់​របស់ខ្លួន ហើយដោយ​ភាព​លោភលន់ និង​ចំណង់​កាមគុណ គេ​មិន​ត្រឹមតែ​ដណ្តើម​ឲ្យ​ឈ្នះ​ទេ គឺ​នៅ​ត្រូវ​ដណ្តើមយក​ឲ្យ​បាន​ច្រើន​ទៀតផង​។ អ្វីដែល​គេ​ត្រូវ​យកមក​ធ្វើជា​អាវុធ និង​សមរភូមិ​ប្រយុទ្ធ​នោះ​មានដូចជា ទ្រព្យសម្បត្តិ រូបសម្បត្តិ បុណ្យ​សក្តិ និង​អំណាច ព្រោះ​របស់​ទាំងនោះ​គឺជា​ម​ហិ​ច្ឆិ​តា​របស់​មនុស្ស​ស្រី​គ្រប់រូប​។​

 

​បើ​យើង​តាម​ស្ថានភាព​ជាក់ស្តែង ជួន​ការ​អំពើ​ផិតក្បត់ និង​ការ​គេង​ប្រវ័ញ្ច​លើ​កាមគុណ វា​មិន​កើតឡើង​ដោយសារតែ​ទ្រព្យសម្បត្តិ រូបសម្បត្តិ ឬ​បុណ្យ​សក្តិ​នោះទេ ប៉ុន្តែ​វា​បាន​កើតឡើង​ដោយសារតែ​ឧបការៈ​របស់​បុគ្គល​ទាំងពីរ មានដូចជា​ការធ្វើការ​ជាមួយគ្នា ការរស់នៅ​ផ្ទះ​តែមួយ ការយក​អាសារ​គ្នា​យប់​ថ្ងៃ និង​ការចែករំលែក​ពត៌មាន​ផ្ទាល់ខ្លួន​ឲ្យ​គ្នា​ទៅវិញទៅមក​ដោយ​មិនដឹង​ខ្លួន​។​

 

​ដោយឡែក​ការសន្យា (​ភាគច្រើន​ត្រូវបាន​ធ្វើឡើង​ដោយ​បុរស​) ក៏​ជា​មូ​លេ​ហ​តុ​នៃ​អំពើ​ផិតក្បត់ និង​ជំរុញ​ឲ្យ​មាន​ស្នេហា​លួចលាក់​បានដែរ​។ ជាការ​ពិត ការសន្យា ត្រូវបាន​គេ​បែក​ចែក​ទៅតាម​កម្រិត​ម​ហិ​ច្ឆិ​តា​របស់​មនុស្ស​ស្រី ឬ​ប្រុស ដែលមាន​ដូចជា ការផ្តល់​កម្ម​សិទ្ធ​លើផ្ទះ​សម្បែង ក្រុមហ៊ុន ឬ​ទ្រព្យសម្បត្តិ​គ្រួសារ ឬ​ការ​រៀបការ​ពេញ​ច្បាប់ ចូលក្នុង​វង្ស​ត្រកូល​ជាដើម​។​ល​។​

 

​ផល​តបស្នង​
​ពាក្យ​ទំនៀម​ខ្មែរ​បុរាណ​លោក​បាន​ស្រដី​ថា ៖ «​មិនឃើញ​ក្តា​រម​ឈូ​ល មិន​ស្រក់​ទឹកភ្នែក​»​។ នៅពេល​បុគ្គល​មើល​មិនទាន់​ឃើញ​ផល​នៃ​អំពើ​បាប បុគ្គល​នោះ​យល់ថា អំពើ​បាប​គឺជា​ទឹកឃ្មុំ ឬ​ជា​ផ្កា លុះត្រា​ណា​តែ​អំពើ​បាន​ហុច​ផល ទើប​បុគ្គល​ដឹងថា វា​គឺជា​លាមក​យ៉ាងពិត​ប្រាកដ​»​។​

 

​អាពាហ៍ពិពាហ៍ មិន​ត្រឹមតែ​ផ្សារភ្ជាប់​ចំណង​នៃ​វង្ស​ត្រកូល​ពីរ​ឲ្យ​មកជា​មួយ​វង្ស​ត្រ​កូន​នោះទេ តែ​វា​ក៏​ជា​ចំណង​ជាតិ​ពន្ធ​រាប់រយ​តំណរ​ទៅមុខទៀត​ដែរ ដូច្នេះ​បើ​អ្នក​ណាមួយ​ចូលទៅ​ផ្តាច់ចំណង​ជាតិពន្ធុ​នោះ គឺ​ឈ្មោះថា​ជា​មារ​ដែលមាន​ចិត្ត​បាប​។ តែ​ដរាបណា​ចំណង​អា​ពា​ហ៌​ពិ​ពា​ហ៌​ត្រូវបាន​កាត់ផ្តាច់​ជា​ស្ថាពរ ទើប​ជាតិ​ពន្ធ​ត្រូវបាន​កាត់ផ្តាច់ ដូច្នេះ​បើ​អ្នកណា​ចូលទៅ​សាង​កម្ម​បន្ទាប់​នោះ គឺ​មិន​ឈ្មោះថា​ជា “​មារ​”​ទេ​។​

 

​ក្នុងកំឡុងពេល​បុគ្គល​ពីរ​នាក់​កំពុងមាន​ទំនាក់ទំនង​លួចលាក់ មិនមាន​អ្នកណា​ដឹង គេ​ពិតជា​សប្បាយរីករាយ​ណាស់ ពេញចិត្ត​ណាស់ ផ្អែមល្ហែម​ណាស់ និង​ស្រណុក​សុខកាយ​ណាស់​។ គេ​យល់ថា អ្វីៗ​ពិតជា​ស្រស់ស្អាត អ្វីៗ​ពិតជា​សម​តាម​បំណង ប៉ុន្តែ​ពួកគេ​ពិតជា​ភ្លេច​គិតថា គេ​កំពុង​ដើរ​លើផ្លូវ​អា​បាយ​ផ្លូវ​មរណៈ​។ ពិត​ហើយ​នៅពេលដែល​រឿងរ៉ាវ​ទាំងឡាយ​ត្រូវបាន​បែកធ្លាយ អ្នក​ទាំងពីរ បើទោះជា​ចំណងស្នេហា​រឹងមាំ ឬ​ចំណង​អ្វី​ផ្សេងទៀត​មានដូចជា​កូន និង​ទ្រព្យ​ជាដើម រឹងមាំ តែ​ភាព​រីករាយ​របស់គេ​ពិតជា​បាត់​បង់អស់​ទៅហើយ​។ បើសិនជា​ម្ខាងៗ មិន​ព្រម​ដោះលែង​ឲ្យ​គ្នា​ទៅវិញទៅមក គឺ​គេ​ច្បាស់​ណាស់​ថា កំពុង​ធ្វើសង្គ្រាម​សម្លាប់ខ្លួន​ដោយ​ពិត​… តើ​បាន​ប្រយោជន​អ្វី​?

 

​កំហុស​
​ការ​ល្មោភកាម​តណ្ហា​របស់​បុរស គឺជា​ដើមហេតុ​ការ​ប្រាថ្នា​ធំ ស្តុកស្តម្ភ​របស់​នារី គឺជា​ផ្លូវ​។ ការសន្យា​ផ្តល់​ឲ្យ​ដោយ​សន្ធឹកសន្ធាប់ គឹជា​អន្ទាក់ ហើយ​លទ្ធផល​ចុងក្រោយ អ្នក​ដែល​ដើរចូល​អន្ទាក់​ជីវិត គឺ​បុគ្គល​៣​នាក់ ឬ​៤​នាក់ ឬ​៥​នាក់ ឬ​៦​នាក់​… ឬ​៣​វង្ស​ត្រកូល​។​

 

​សូមអ្នក​កុំ​យក​លេស​ថា ព្រោះតែ​អ្នក​ស្រឡាញ់ ទើប​អ្នក​ក្បត់ ព្រោះតែ​ស្នេហា​ទើប​អ្នក​ព្រម ព្រោះតែ​អាណិត​ទើប​អ្នក​ឲ្យ​សោះ ព្រោះ​អ្នក​ដែល​លួចលាក់​កូន​ប្រពន្ធ ប្តី គេ មិន​សមនិង​ប្រើប្រាស់​ពាក្យ​ទាំងនេះ​មក​ដោះសារ​នោះទេ​….​។​

10678640_1584051341843986_1370669500625833231_n

​ដោយ ច​. សម្បត្តិ​(Wiki​ស្នេហ៍​)

 

Leave a Reply

(*) Required, Your email will not be published