រដ្ឋាភិបាល​កង្វល់​ពី​កង្វះ​ទឹក​ស្រោចស្រព​ស្រូវ​រដូវវស្សា និង​រដូវប្រាំង​ឆ្នាំ​២០១៥

, , Leave a comment

11222695_1005582959484083_3030197104665960682_n

​រាជធានី​ភ្នំពេញ : ដោយសារ​ឆ្នាំ​២០១៥​នេះ​មាន ភ្លៀង​ធ្លាក់​តិចតួច និង​ទឹកទន្លេ​មាន​កម្ពស់ ទាប​បើ​ធៀប​ទៅនឹង​ឆ្នាំមុនៗ​ដែល​ប្រការនេះ​អាច​បង្ក​ឲ្យ​មាន​ផលប៉ះពាល់​យ៉ាងខ្លាំង​ដល់​ការប្រើប្រាស់​ទឹក​ក្នុង​វិស័យ​កសិកម្ម ជាពិសេស​ការដាំដុះ​ស្រូវ​រដូវវស្សា​។ នេះ​បើ​យោងតាម​ទីភ្នាក់ងារសារព័ត៌មាន​កម្ពុជា (AKP)​។​

 

​គណៈកម្មាធិការ​គោលនយោបាយ​សេដ្ឋកិច្ច និង​ហិរញ្ញវត្ថុ​បើក​កិច្ចប្រជុំ​ជាមួយ អន្តរក្រសួង​ពាក់ព័ន្ធ​ក្រោម​អធិបតី លោក គាត ឈន់ ឧបនាយករដ្ឋមន្ត្រី​ប្រចាំការ និង ជា​ប្រធាន​គណៈកម្មាធិការ​គោលនយោបាយ សេដ្ឋកិច្ច និង​ហិរញ្ញវត្ថុ និង​លោក​ឧបនាយករដ្ឋមន្ត្រី យឹម ឆៃលី ប្រធាន​ក្រុមប្រឹក្សា ស្តារ​អភិវឌ្ឍន៍​វិស័យ​កសិកម្ម និង​ជនបទ នៅ​ថ្ងៃទី​១៩ ខែតុលា ឆ្នាំ​២០១៥​ដើម្បី​ពិភាក្សា​អំពី​បញ្ហា​ការប្រើប្រាស់​ទឹក និង វិធានការ​រក្សា​ទឹក​ទុក​សម្រាប់​ស្រោចស្រព​ស្រូវ​រដូវប្រាំង​ឱ្យបាន​ទាន់ពេលវេលា ។​

 

​លោក​ឧបនាយករដ្ឋមន្ត្រី គាត ឈន់ បាន លើកឡើងថា រាជរដ្ឋាភិបាល​មាន​កង្វល់ អំពី​ស្ថានភាព​វិស័យ​កសិកម្ម​ដោយសារ នៅ​ឆ្នាំ​២០១៥ នេះ​មាន​ភ្លៀង​ធ្លាក់​តិចតួច និង​កម្ពស់​ទឹកទន្លេ​មាន​កម្រិត​ទាប​ខុស ធម្មតា បើ​ធៀប​នឹង​បណ្តា​ឆ្នាំមុនៗ​ដែល ប្រការនេះ​អាច​បង្កឱ្យមាន​ផលប៉ះពាល់​ខ្លាំង​ដល់​ការប្រើប្រាស់ ទឹក​ក្នុង​វិស័យ​កសិកម្ម ជាពិសេស​ការដាំដុះ​ស្រូវ រដូវប្រាំង​នាពេល ខាងមុខ និង​នាំឱ្យមាន​ផលប៉ះពាល់​ខ្លាំង ដល់​ជីវភាព​រស់នៅ​របស់​ប្រជាពលរដ្ឋ​ក្នុងករណី​មិនមាន​វិធានការ​សមស្រប និង ទាន់ពេលវេលា​។ ដើម្បី​ការដោះស្រាយ បញ្ហា​ទាំងនេះ​ទាមទារ​ឱ្យមាន​ការរៀបចំ​វិធានការ​ជាក់ស្តែង និង​បន្ទាន់​ដោយមាន ការរៀបចំ​កញ្ចប់​ថវិកា​សមស្រប និង​មានការ​ចូលរួម​ពី​ភាគី​ពាក់ព័ន្ធ​ទាំងអស់​ដើម្បី​ទប់ទឹក​ទុក​សម្រាប់​ប្រើប្រាស់​ក្នុង​រដូវវស្សា និង​រដូវប្រាំង​នាពេលខាងមុខ​ដោយ​ពិនិត្យ តាម​ស្ថានភាព​ជាក់ស្តែង​។ ជាមួយគ្នានេះ ដែរ​លោក​ឧបនាយករដ្ឋមន្ត្រី​ប្រចាំការ​បានស្នើ​ឱ្យ​អង្គប្រជុំ​ចូលរួម​ពិនិត្យ និង​ពិភាក្សា ឱ្យបាន​សកម្ម និង​លម្អិត​ព្រមទាំង​ផ្តល់​ធាតុ ចូល​ដើម្បី​អាច​កំណត់​ទិសដៅ និង​បន្ទាត់​ដ្ឋា​ន​រួម​សម្រាប់​អនុវត្តតាម​ការសម្រេច​ដ៏ ខ្ពង់ខ្ពស់​របស់​សម្តេច​តេ​ជោ​នាយករដ្ឋមន្ត្រី​។​

 

​យោងតាម​សេចក្តីប្រកាស​ព័ត៌មាន​បាន ឲ្យ​ដឹងថា លទ្ធផល​នៃ​កិច្ច​ប្រជុំបាន​បូកសរុប​មតិរួម​សំខាន់ៗ​ដើម្បី​រិះរក​មធ្យោបាយ និង វិធានការ​ដោះស្រាយ​មានដូចជា​៖ ១-​ជា កិច្ចការ​បន្ទាន់ និង​ចាំបាច់ គឺ​ការ​ខ្ចប់​ទឹក​ទុក សម្រាប់​ប្រើប្រាស់​ស្រូវ​រដូវវស្សា និង​រដូវ ប្រាំង​ដោយ​ធ្វើ​ការត្រួត​ពិនិត្យមើល​ឡើងវិញ​អំពី​តំបន់​អាទិភាព​ខ្ពស់​ដើម្បី​ចាត់វិធានការ ដោះស្រាយ​ជាក់ស្តែង​ដោយ​ពិនិត្យ​លទ្ធភាព​បូមទឹក​ទៅកាន់​តំបន់​ទាំងនោះ ឬ​តំបន់​ដែល អាច​ផ្ទុក​ទឹកបាន​ថែមទៀត​, ២-​ប្រើប្រាស់ កម្លាំង​សរុប (​ចម្រុះ​) រួមមាន​អាជ្ញាធរ មូលដ្ឋាន​, ក្រុមការងារ​ថ្នាក់ជាតិ​, ក្រសួង​-​ស្ថាប័ន​ពាក់ព័ន្ធ​ដើម្បី​ការងារ ការពារ​/​សង្គ្រោះ ស្រូវវស្សា កំណត់​កន្លែង​ដែល​អាចមាន ការខូចខាត​ធ្ងន់ធ្ងរ​ដើម្បី​រៀបចំ​វិធានការ​ដោះស្រាយ​បន្ទាន់​ក៏ដូចជា​មាន​វិធានការ ត្រៀម​បម្រុង​សម្រាប់​បង្ការ​/ កម្ចាត់​សត្វល្អិត​, ៣-​សម្រាប់​រដូវប្រាំង​ត្រូវ​ប្រើប្រាស់​ទឹក​ដែល នៅ​សេសសល់​ពី​រដូវវស្សា​ឱ្យអស់​លទ្ធភាព និង​បំផុស​ឱ្យ​ប្រជាជន​ឱ្យ​ចូលរួម​បង្កបង្កើនផល​នៅ​កន្លែង​ណា​ដែល​អាច​ធ្វើបាន​។ ចំពោះ​កន្លែង​ដែល​ធ្លាប់ធ្វើ​ស្រូវប្រាំង​ត្រូវមាន​ការយកចិត្តទុកដាក់​ខ្ពស់ និង​មាន​វិធានការ ដោះស្រាយ​នៅ​កន្លែង​នោះ​ដាក់ចេញ​នូវ វិធានការ​ជាក់ស្តែង​ច្បាស់លាស់​, ៤​ក្រសួង កិច្ច និង​ហិរញ្ញវត្ថុ​ត្រៀម​ដោះស្រាយ​ជូន ភ្លាមៗ និង​ផ្តល់​ថវិកា​បន្ថែម​សម្រាប់​ការ ចំណាយ​ទៅលើ​ទិញ​ប្រេងឥន្ធនៈ​បន្ថែម សម្រាប់​បូមទឹក​ទៅកាន់​តំបន់​ដែល​ពុំមាន​ទឹក រួមទាំង​ការដោះស្រាយ​បញ្ហា​រួមផ្សំ ដូចជា​ការស្តារ​ទំនប់​/​ប្រឡាយ​។​ល​។ ទៅ តាម​ស្ថានភាព​ជាក់ស្តែង ។ ក្នុងឱកាស​នោះដែរ​លោក​ឧបនាយករដ្ឋមន្ត្រី​ប្រចាំការ ក៏បាន​ស្នើឱ្យ​អង្គប្រជុំ​ត្រូវ​ប្រកាន់​ភ្ជាប់​នូវ​ស្មារតី និង​ការសម្រេច​របស់ អង្គប្រជុំ​ដើម្បី​អនុវត្តតាម​មុខសញ្ញា​រៀងៗ​ខ្លួន​ប្រកបដោយ​ភាពប្រាកដនិយម​, ជំហរ ម៉ឺងម៉ាត់ និង​ស្មារតី​ទទួលខុសត្រូវ​ខ្ពស់​៕

21-10-2012 21-10-2012 (1)

 

Leave a Reply

(*) Required, Your email will not be published