សេចក្តីស្រេកឃ្លាន បំពេញតណ្ហា តុលាការ បំបាក់ទឹកចិត្ត​អាជ្ញាធរ និង​សមត្ថកិច្ច​ខេត្តក្រចេះ​

, , Leave a comment

CH-00462

​ខេត្តក្រចេះ : បន្ទាប់ពី​កម្លាំង​សមត្ថកិច្ច​បាន​ខិតខំ​ប្រឹងប្រែង​បង្កា​ប​មុខសញ្ញា​ជួញដូរ និង​ចែកចាយ​គ្រឿងញៀន យ៉ាងសកម្ម​តាម​មូលដ្ឋាន នៅតាម​ស្រុក​មួយចំនួន​របស់​ខេត្ដ​ក្រចេះ​។ ថ្មីៗ​នេះ​សាលាដំបូង​ខេត្ដ​ក្រចេះ បែរជា បំបាក់ទឹកចិត្ត​អាជ្ញាធរ និង​សមត្ថកិច្ច​ខេត្តក្រចេះ ដោយ​តុលាការ​ធ្វើការ​ដោះលែង​ជនល្មើស​ជា​បន្ត​បន្ដបន្ទាប់​។​

 

​យោងតាម​ប្រភពព័ត៌មាន​ដែល​លួច​បង្ហើប​ពី​សមត្ថកិច្ច​ខេត្ដ​ក្រចេះ បាន​ឲ្យ​ដឹងថា ត្រឹមតែ​មួយខែ​ក្នុង​ខែតុលា ឆ្នាំ​២០១៥​នេះ តុលាការ​ខេត្ដ​ក្រចេះ បាន​ដោះលែង​មុខសញ្ញា​ជួញដូរ និង​ចែកចាយ​គ្រឿងញៀន រហូត ដល់​៨​នាក់​ក្រោយពី​សម្រេច​ឃុំខ្លួន​ដាក់ពន្ធនាគារ​មិនទាន់​ក្ដៅ​ចុង​ច្រមុះ​ផង ដោយ​ក្នុងនោះ​ក្រុង​ក្រចេះ​៤​នាក់ ស្រុក​ឆ្លូង​ម្នាក់ ស្រុក​ព្រែក​ប្រសព្វ​ពីរ​នាក់ និង​ស្រុក​ចិត្រ​បុរី​ម្នាក់​។ ទង្វើ​នេះ​បានធ្វើ​ឲ្យ​អាជ្ញាធរ និង​សមត្ថកិច្ច​បាក់ទឹកចិត្ដ និង​គ្មាន​កម្លាំងកំហែង ទៅ​បង្ក្រាប​ករណីនេះ បន្ដទៀត​នោះឡើយ។​

 

​សមត្ថកិច្ច​បានបញ្ជាក់​ថា «​មាន​កម្លាំងកំហែង​អ្វី​ទៅ​បង្ក្រាប​ទៀត​ចំពោះ​ករណី​គ្រឿងញៀន​នេះ បើ​ចាប់បាន​បញ្ជូនទៅ​តុលាការ​មិនទាន់បាន​ប៉ុន្មាន​ថ្ងៃ​ផង ត្រូវ​តុលាការ​ដោះលែង​ឲ្យ​មកវិញ ទៅហើយ​រួច​ពួកវា​បន្ដ​ចែកចាយ​ប្រើប្រាស់​នៅ​ជា​ដដែល​»​។ ចំណាត់ការ​ដ៏​ធូរ​លុង​របស់​តុលាការ​ខេត្ដ​ក្រចេះ បានធ្វើ​ឲ្យ​មិន​ថា តែ​អាជ្ញាធរ​សមត្ថកិច្ច​នោះទេ ពោល​ប្រជាពលរដ្ឋ​ទូទៅ បានបង្ហាញ​ការព្រួយបារម្ភ យ៉ាងខ្លាំង​អំពី​ការរីក សាយភាយ​ករណី​គ្រឿងញៀន តាម​មូលដ្ឋាន​របស់​ពួកគេ ដែល​ធ្វើ​ឲ្យ​មាន​អសន្ដិសុខ​កើត ឡើងជា​បន្ដបន្ទាប់ ដូចជា​ករណី​ប្លន់​លួច និង​អំពើហិង្សា​ជាដើម​។​

 

​បើតាម​ការបញ្ជាក់​ពី សមត្ថកិច្ច​មុខសញ្ញា​ជួញដូរ​គ្រឿងញៀន ដ៏​សកម្ម​ម្នាក់​នៅ​ឃុំ​កន្ទួត ស្រុក​ចិត្រ​បុរី ឈ្មោះ អោក វណ្ណា ហៅ​ចិន អាយុ​២៩​ឆ្នាំ ដែល​ត្រូវបាន​ចាប់ខ្លួន​កាលពី ថ្ងៃទី​២៩ ខែសីហា ឆ្នាំ​២០១៥ ជាមួយនឹង​ថ្នាំ ញៀន​ជាច្រើន​កញ្ចប់​នោះ ត្រូវបាន​លោកស្រី គឹម សុគន្ធា ចៅក្រម​ស៊ើបសួរ​សាលាដំបូង ខេត្ដ​ក្រចេះ សម្រេច​ដោះលែង​កាលពីដើម ខែតុលា​កន្លងទៅ។​

 

​យោងតាម​ដីកា ដាក់​ជន​ត្រូវ​ចោទ​ឲ្យ​ស្ថិតនៅ ក្រោម​ការត្រួតពិនិត្យ តាមផ្លូវ​តុលាការ​របស់លោក​ស្រី គឹម សុគន្ធា ចៅក្រម​ស៊ើបសួរ​សាលាដំបូង ខេត្ដ​ក្រចេះ និង​ព្រះរាជអាជ្ញារង លោក ហាក់ ហ៊ាន់ ចុះ​ថ្ងៃទី​៧ ខែតុលា ឆ្នាំ​២០១៥ បានសម្រេច​ឲ្យ​ឈ្មោះ អោក វណ្ណា ហៅ​ចិន អាយុ​២៩​ឆ្នាំ រស់នៅ​ភូមិ​កន្ទួត ឃុំ​កន្ទួត ស្រុក​ចិត្រ​បុរី ដែល​ត្រូវបាន​ចោទ ប្រកាន់​ពីបទ «​រក្សាទុក​ដឹកជញ្ជូន​ដោយ​ខុស ច្បាប់​នូវ​សា​ធាតុ​ញៀន​» មាន​សេរីភាព​ឡើងវិញ។​

 

​ដោយឡែក​មុខសញ្ញា​ជួញដូរ​នៅ ឃុំ​ឫស្សីកែវ ស្រុក​ព្រែក​ប្រសព្វ ចំនួន​២​នាក់ ម្នាក់​ឈ្មោះ នួន ប៉ែត អាយុ​២៥​ឆ្នាំ និង​ម្នាក់ទៀត​ឈ្មោះ ស្រ៊ី​ម សោភ័ណ អាយុ​២២​ឆ្នាំ ដែល​ត្រូវបាន​ចាប់ខ្លួន កាលពី​ថ្ងៃទី​១៣ ខែតុលា ឆ្នាំ​២០១៥ ក៏ត្រូវ​បាន​តុលាការ​ដោះលែង មកវិញ​នៅ​ថ្ងៃ ទី​១៦ ខែតុលា ពោល​បាន​ត្រឹម​៣​ថ្ងៃ​ប៉ុណ្ណោះ​។​

 

​ចំពោះ​ករណីនេះ មិនទាន់មាន​ការបំភ្លឺ​ពី​ប្រធាន​តុលាការ និង​ព្រះរាជអាជ្ញា ខេត្ដ​ក្រចេះ​បាន​នៅឡើយ​នោះទេ​៕

CH-00464 CH-00465

 

Leave a Reply

(*) Required, Your email will not be published