ការ​ជម្នះ និង​ផលវិបាក​នៃ​ការប្រើប្រាស់​គ្រឿងញៀន​

, , Leave a comment

​ការគិតគូរ​ពី​បញ្ហា​សុខភាព​គឺជា​រឿង​ដ៏​សំខាន់​សម្រាប់​មនុស្ស​នាពេល​បច្ចុប្បន្ន ជាពិសេស​យុវវ័យ ពីព្រោះ​ពួកគេ​ជា​ទំពាំង​ស្នង​ឫស្សី ពួកគេ​ជា​សសរទ្រូង​សម្រាប់​គ្រួសារ និង​សង្គមជាតិ​។ប៉ុន្តែ​យុវវ័យ​នាពេល​បច្ចុប្បន្ន​មិនសូវ​យកចិត្តទុកដាក់​ពី​បញ្ហា​សុខភាព​ឡើយ​។ សម្រាប់​យុវវ័យ​មួយចំនួន​បាន​បណ្តោយ​ខ្លួន​ឲ្យ​ធ្លាក់​ក្នុងស្ថានភាព​មួយ​ដូចជា ធ្វើ​ការឆក់ប្លន់ លេងល្បែង​ស៊ីសង ញៀន​ស្រា និង​ជាពិសេស​ប្រើប្រាស់​គ្រឿងញៀន ដែល​ទាំងអស់នេះ​បានធ្វើ​ឲ្យ​បាត់បង់​នូវ​អនាគត​ដ៏​ភ្លឺស្វាង​របស់​ពួកគេ​។ ដោយ​មូលហេតុ​ដូច្នេះ​យុវវ័យ​គ្រប់រូប​ត្រូវតែ​ស្វែងយល់​ឲ្យ​បាន​ច្បាស់​ពី​ផលវិបាក​នៃ​ការប្រើប្រាស់​គ្រឿងញៀន និង​វិធីសាស្ត្រ​ជម្នះ​វា​។​

 

​តើ​អ្វី​ទៅជា​គ្រឿងញៀន​? គ្រឿងញៀន​មាន​សណ្ឋាន​ដូចម្តេចខ្លះ​?
​ជាការ​ពិតណាស់​គ្រឿងញៀន​គឺជា​រុក្ខជាតិ ឬ​សារធាតុ​ចម្រាញ់​ចេញពី​រុក្ខជាតិ ឬ​សារ​ធាតុគីមី​ដែល​ធ្វើ​ឲ្យ​មានការ​ផ្លាស់ប្តូរ​នូវ​មុខងារ​ផ្សេងៗ​របស់​សារពាង្គកាយ​មនុស្ស ឬ​សត្វ ហើយ​ជាពិសេស​វា​ធ្វើ​ឲ្យ​មានការ​ប្រែប្រួល​ប្រព័ន្ធ​សរសៃប្រសាទ និង​ខួរក្បាល​នៅពេល​ប្រើ​វា​។ គ្រឿងញៀន​មាន​ពីរ​ប្រភេទ​គឺ គ្រឿងញៀន​ធម្មជាតិ​៖ អាភៀន (​ផ្កា ផ្លែ​អាភៀន ជ័រ​អាភៀន​ខ្មៅ និង​ហេ​រ៉ូ​អ៊ី​ន​គ្រាប់​) កញ្ឆា (​ដើម ស្លឹក ជ័រ​កញ្ឆា និង​ប្រេង​កញ្ឆា​) រុក្ខជាតិ​កូ​កា និង​ថ្នាំជក់​។​គ្រឿងញៀន​សំយោគ​៖ កូកាអ៊ីន​បាស (​បានមកពី​ការបន្ថែម​សារធាតុ​គីមី​) អំ​ហ្វេ​តា​មីន និង​ពពួក​មេ​តំ​ហ្វេ​តា​មីន អ៊ិ​ច​ស្តា​ស៊ី កាវ បារី (​មាន​ផ្ទុក​សារធាតុ​គីមី​ជាង ៤០០០​ប្រភេទ ហើយ​ធ្វើ​ឲ្យ​អ្នក​ជក់​ញៀន​ខ្លាំង​ដោយ​ជាតិ​នីកូទីន​) និង​គ្រឿង​ស្រវឹង (​ទឹកត្នោតជូរ ស្រា ស្រា​បៀរ​)​។ ប្រភេទ​នៃ​គ្រឿងញៀន​ទាំងអស់​សុទ្ធតែ​ធ្វើ​ឲ្យ​មានការ ប៉ះពាល់​ដល់​សុខភាព​របស់​មនុស្ស​ជាខ្លាំង​នៅពេលដែល​ពួកគេ​បាន​ប្រើប្រាស់​វា​។​

 

​តើ​ការប្រើប្រាស់​គ្រឿងញៀន​ផ្តល់នូវ​ផលប៉ះពាល់​ដល់​អ្វីខ្លះ​?
-​ផលប៉ះពាល់​ទៅលើ​បុគ្គល​អ្នក​ប្រើ​៖ មានដូចជា​ប៉ះពាល់​ទៅលើ​សុខភាព​ផ្លូវកាយ ពោលគឺ​គ្រឿងញៀន​បាន​ជ្រាបចូល ក្នុង​សរីរាង្គ​របស់​មនុស្ស​មា​ន​ថ្លើម បេះដូង តម្រងនោម និង​សួត ហើយ​បង្ក​ឲ្យ​មាន​ជំងឺ​ដោយ​សារធាតុពុល និង​ជំងឺឆ្លង​ផ្សេងៗ រាងកាយ ស្គមស្គាំង ស្លេកស្លាំង មិន​ងងុយដេក មិន​ឃ្លាន​អាហារ និង​កម្លាំង​ចុះថយ​។ សម្រាប់​ស្ត្រី​មាន​ផ្ទៃពោះ ប្រសិនបើ​ប្រើ​គ្រឿងញៀន​អាចមាន ឥទ្ធិពល​ផ្ទាល់​ទៅលើ​ទារក​ក្នុង​ផ្ទៃ ទាំង​រាងកាយ និង​ខួរក្បាល​។ ហើយ​ប្រសិនបើ​ប្រើ​ម្ជុល​សឺ​រុំ​ា​ង​រួមគ្នា​អាចធ្វើ​ឲ្យ​ឆ្លង​មេរោគ​អេដស៍ រលាក​ថ្លើម ប្រភេទ B C និង​ជំងឺ​បូស​ថ្លើម​។ សម្រាប់​សុខភាព​ផ្លូវចិត្ត វា​ផ្តល់នូវ​ផលប៉ះពាល់​ដូចជា សតិ​ស្មារតី​មិន​ប្រក្រតី គ្មាន​ភាពច្បាស់លាស់​នូវ​ការ​ឃើញ ស្តាប់ ការចងចាំ​ថយចុះ ឬ​បាត់បង់​តែម្តង កាច​សាហាវ ឡប់សតិ ឬ​ឆ្កួត​នៅពេលដែល​ប្រើ​វា​យូរពេក​។​

 

-​ផលប៉ះពាល់​ចំពោះ​គ្រួសារ​ ៖ ដូចជា បាត់បង់​កិត្តិយស បំផ្លាញ​ទ្រព្យសម្បត្តិ​គ្រួសារ បង្ករ​ការភ័យខ្លាច អំពើហិង្សា ខាតបង់​ថវិការ និង​គ្រោះថ្នាក់​ដល់​គ្រួសារ​ជាដើម​។​
-​ផលប៉ះពាល់​ចំពោះ​សង្គម​ ៖ មានដូចជា បង្ក​នូវ​អំពើ​អសីលធម៌​ផ្សេងៗ (​អំពើហិង្សា​ទាក់ទង​នឹង​យេនឌ័រ និង​ផ្លូវភេទ​) គ្រោះថ្នាក់​ចរាចរ ប្រព្រឹត្ត​អំពើ​ឆក់​ប្លន់ និង​បទឧក្រិដ្ឋ​ផ្សេងៗ រួមទាំង​បាត់បង់​ធនធានមនុស្ស​ទៀតផង​។​

 

​តើ​ត្រូវធ្វើ​ដូចម្តេច​ដើម្បី​ជម្នះ​ខ្លួន​ពី​ការប្រើប្រាស់​គ្រឿងញៀន​?
​ដើម្បី​ជម្នះ​ឲ្យ​ផុតពី​ការប្រើប្រាស់​គ្រឿងញៀន​នោះ​មនុស្ស​គ្រប់រូប ជាពិសេស​យុវវ័យ​ត្រូវធ្វើ​ការសម្រេច ចិត្ត​ឲ្យ​បានច្បាស់លាស់ និង​ប្រាកដថា​ឈប់​ប្រើ​គ្រឿងញៀន ចៀសវាង​ឲ្យ​ឆ្ងាយ​ពី​អ្នក​ប្រើបាស់​គ្រឿងញៀន និង​ទៅ​ជួប​អ្នកផ្តល់​ប្រឹក្សា ដើម្បី​ពិភាក្សា​អំពី​របៀប​ផ្តាច់ការ​ញៀន​នៅ​មន្ទីរពេទ្យ ឬ​មជ្ឈមណ្ឌល​ផ្តាច់​គ្រឿងញៀន​។​

 

​វិធី​ការពារ​ខ្លួន​កុំ​ឲ្យ​ប្រើប្រាស់​គ្រឿងញៀន​គឺ​កុំ​សាកល្បង​នឹង​គ្រឿងញៀន​សូម្បី​តែម្តង ពីព្រោះ​គ្រឿងញៀន​ជាស​ន្ទួ​ច​ស្ទូច​អ្នក​ឲ្យ​ញៀន កុំ​សេពគប់​មិត្តភក្តិ​ប្រើប្រាស់​គ្រឿងញៀន និង​ចេះ​ជំនាញ​ចរចា បដិសេធ​នៅពេល​មាន​មិត្តភក្តិ​អូសទាញ​ឲ្យ​ប្រើប្រាស់​គ្រឿងញៀន​។​មនុស្ស​គ្រប់រូប​ត្រូវ​ឆ្លើយថា​ទេ​ចំពោះ​គ្រឿងញៀន​!!!

ផលវិបាក​នៃ​ការប្រើប្រាស់​គ្រឿងញៀន​

ផលវិបាក​នៃ​ការប្រើប្រាស់​គ្រឿងញៀន​

ផលវិបាក​នៃ​ការប្រើប្រាស់​គ្រឿងញៀន​

ផលវិបាក​នៃ​ការប្រើប្រាស់​គ្រឿងញៀន​

អត្ថបទ អង្គការ​រ៉ា​ក់​

 

Leave a Reply

(*) Required, Your email will not be published