របៀប​នៃ​ការសំពះ​

, , Leave a comment

10-9-2015 (1) 10-9-2015

​រាជធានី​ភ្នំពេញ : ការទទួល​ស្វាគមន៍​ការបង្ហាញ​ភាពរួស​រាយ​រាក់ទាក់ និង​ការគោរព​គ្នា​ទៅ វិញ​ទៅមក គេ​តែង​សង្កេតឃើញ​ជនជាតិខ្មែរ​យើង​មាន​ទម្លាប់​លើកដៃ​សំពះ​គ្នា​។ ការសំពះ​របស់​ប្រជាជន​ខ្មែរ ក៏មាន​បង្ហាញ​តាមរយៈ​ស្នាដៃ​ចម្លាក់​ដែល​បាន​បន្សល់ទុក​នៅលើ​ជញ្ជាំង​ប្រាសាទ​នានា​ផងដែរ​ពោល​ដូចជា​ចម្លាក់​ទេព​អប្សរា​សំពះ​នៅលើ​ប្រាង្គ​ប្រាសាទបាយ័ន​ដែល​ស្នាដៃ​ចម្លាក់​នេះ​បង្ហាញ​ពី​ការលើកដៃ​ទាំងសងខាង​ផ្គុំ​ចូលគ្នា​សំពះ​នោះ​ពុំមែន​សម្តែង​នូវ​ការដឹង​កំហុស ឬ​សុំ​ខមាទោស​ណាមួយ​នោះឡើយ ប៉ុន្តែ​វា​បានបង្ហាញ​នូវ​អត្តចរិត​គួរសម​សុភាព​ទន់ភ្លន់ និង​ជា​ទម្លាប់​នៃ​ការគោរព​គ្នា​របស់​ខ្មែរ​យើង​។​

 

​ជនជាតិខ្មែរ​យើង​ចេះ​សំពះ និង​មាន​ទម្លាប់​មួយ​នេះ តាំងពី​យូរយារ​ណាស់​មកហើយ​គឺ​ចាប់តាំងពី​មុន​គ្រិស្តសករាជ​ទៅទៀត​។ ការសំពះ ដើម្បី​បង្ហាញ​នូវ​ការដឹងគុណ ការ​រំលឹក​គុណ កតញ្ញូ ស្វាមីភក្តិ ភាពស្មោះត្រង់ រួមផ្សំ​ជាមួយ​មនោសញ្ចេតនា​ស្រឡាញ់ រាប់អាន​ដ៏​ស្មោះស្ម័គ្រ និង​យ៉ាង​ជ្រាលជ្រៅ​បំផុត​។ ការសំពះ​សួរ សំពះលា គឺ​តម្រូវ​ចាប់ផ្តើម​ដោយ​កិរិយា សំពះ​ជាមុន​រួច​ទើប​បន្លឺសំឡេង​សួរសុខទុក្ខ​។ ការសំពះ​ការសំពះ​ផ្ទឹម ឬ​សំពះ​សុំ​ពេលា គឺ​រៀបចំ​ធ្វើ​ក្នុង​ពិធី​អាពាហ៍ពិពាហ៍​ទុកដាក់​កូនចៅ​ដែល​ពិធី​ទាំងអស់នោះ សម្ដៅ​ធ្វើការ​អប់រំ​ខាង​ផ្លូវ​ចិត្តគំនិត​ជាធំ​។ ចំណែក​ឯការ សំពះគ្រូ ឬ​ពិធី​រំលឹក​គុណគ្រូ គឺជា​ពិធី​មួយ​រៀបចំឡើង​ដើម្បី​ជាការ​ថ្លែងអំណរគុណ ឬ​រំលឹក​ដល់​គុណគ្រូ​បាធ្យាយ ដែល​ធ្លាប់​បានផ្តល់​ចំណេះដឹង និង​ផ្តល់​ការអប់រំ​ដល់​ខ្លួន​ពីមុនមក​។​

 

​យោងតាម​គេហទំព័រ វិ​គី​ភី​ឌា សំពះ គឺជា​ការលើកដៃ​ទាំងពីរ​ផ្គុំ​ម្រាម​ទាំង​១០ ឆ្ពោះ​ត្រង់​ទៅរក​បុគ្គល ទៅរក​ទី​ឬ​វត្ថុ​ដែល​គោរព​។ ការ សំពះ ចែកជា​ដំណាក់កាល​ការសំពះ ដែល​ដាក់​ចុង​ម្រាម​ត្រឹម​ដើមទ្រូង គឺ​ប្រើ​សម្រាប់​អ្នក​ដែលមាន​ឋានៈ​ប្រហាក់ប្រហែល វ័យ​ប្រហាក់ប្រហែល ឬ​មិត្តភក្តិ​ជាដើម​។ ការ សំពះ ចុង​ម្រាម​ត្រឹម មាត់ គឺ​ប្រើ​ជាមួយ​អ្នក​ដែលមាន​ថ្នាក់​ខ្ពស់ជាង វ័យចាស់​ជាង ឬ​ថៅកែ​ចៅហ្វាយនាយ​។ ការ សំពះ ចុង​ម្រាម​ត្រឹម​ចុង​ច្រមុះ​គឺ​ប្រើ​ជាមួយ​ឪពុកម្តាយ ជីដូន​ជីតា អាណាព្យាបាល គ្រូ​បា​អាចារ្យ ឬ​អ្នកមានគុណ​។ ការ សំពះ ចុង​ម្រាម​ត្រឹម​ចិញ្ចើម គឺ​ប្រើ​ជាមួយ​ស្តេច ឬ​ព្រះសង្ឃ (​នេះ​ជាការ​ក្រាប បង្គំ​គាល់ ឬ​ថ្វាយបង្គំ​)​។ រីឯ​ការ សំពះ​ដែល​ដៃ​ផ្គុំ​លើ​ចិញ្ចើម គឺ​ប្រើ​ជាមួយ​ព្រះ ព្រហ្ម ព្រះឥន្ទ ទេវតា អ្នកតា ឬ​អវតារ​ផ្សេងៗ​៕

 

Leave a Reply

(*) Required, Your email will not be published