ភាព​ហ៊ឺហារ ធ្វើ​ឲ្យ​ស្ត្រី​ម្នាក់​ក្លាយជា​ចំណី​ឥ​ណ្ហា រហូតដល់​កូន​គ្មាន​ឪពុក​ហៅ​

, , Leave a comment

11251881_604469882988788_8254775406845099151_n

​នេះ​គឺជា​ឆាកជីវិត​របស់​នារី​វ័យក្មេង ម្នាក់​ដែល​ធ្លាក់ខ្លួន​ត្រូវគេ​ជួញដូរ​ឆ្លងដែន យកទៅ​បម្រើការ​តាម​ហាង និង​ត្រូវគេ​យក​លក់​ឲ្យ​ផ្ទះបន ត្រូវគេ​រំលោភ​រហូត​មាន​ផ្ទៃពោះ​ទៀត​។ ពិសី [​ឈ្មោះ​អ្នកនិពន្ធ​ដាក់​ឲ្យ ស្រុកកំណើត​នៅ ខេត្តបន្ទាយមានជ័យ ដែនដី​ជាន់​ព្រំដែន​កម្ពុជា​-​ថៃ​។​

 

​ពិសី​បាន​រៀបរាប់ថា កន្លងមក​នាង​តែងតែ​លួច​ឆ្លងដែន​ខុសច្បាប់ ទៅធ្វើ​ការ​នៅ​ប្រទេស​ថៃ​តាំងពី​ឆ្នាំ​២០០៩​មកម្ល៉េះ​។ ដោយ​ជីវភាព​ក្រុមគ្រួសារ​ខ្វះខាត នាង​ក៏​សម្រេចចិត្ត​ឈប់រៀន​នៅត្រឹម​ថ្នាក់​ទី​៣​ហើយក៏​ប្រកបមុខរបរ​ជា​កម្មក​រ​ដើរ​ស៊ីឈ្នួល ច្រូតកាត់​គ្រប់​ច្រកល្ហក​ទៅតាម​រដូវ​កាល​។ ពេលដែល​នាង​មាន​អាយុ​១៩​ឆ្នាំ ស្ថិតនៅក្នុង​វ័យ​ពេញក្រមុំ​ដ៏​ស្រស់ស្អាត មាន​ប្រុសៗ ក្នុងភូមិ​បាន​សុំ​ស្រឡាញ់​នាង​យ៉ាងច្រើន តែ​នាង​មិន​ព្រម​។​

 

​ដោយ​ជីវភាព​គ្រួសារ​នាង​លំបាក​ពេក នាង​ក៏​សម្រេចចិត្ត​ទៅធ្វើ​ការ​ដោយ​ខុសច្បាប់ ព្រោះ​ឃើញ​អ្នកភូមិ​របស់​នាង​គេ​មកពី​ប្រទេស​ថៃ​មាន​លុយ​ប្រាក់ ចាយ​ហ៊ឺហា ទិញ​ម៉ូតូ​ម៉ូដ​ថ្មីៗ ជិះ​ដើរលេង​នា​រដូវ​បុណ្យទាន​ផ្សេងៗ​។ ដោយ​ឃើញ​គេ​មានបាន នាង​ក៏​គិតថា បើ​អាត្មាអញ​មាន​ប្រាក់​ច្រើន​ដូច​គេ ប្រាកដជា​អាចជួយ​កាត់បន្ថយ​ភាពលំបាក​បាន​មួយចំនួន ជាក់​ជាមិនខាន ព្រោះ​នៅក្នុង​ស្រុកភូមិ​របស់​នា​ង​ក្រៅពី​ដើរ​ស៊ីឈ្នួល​ច្រូតស្រូវ និង​កាច់​ពោត ក៏​អស់​ការងារ​ធ្វើ ក្រៅតែពី​ដើរ​ស៊ីឈ្នួល​គេ គឺ​នាង​មិនអាច​ធ្វើ​អ្វី​បាន​ទៀត​ទេ ព្រោះ​នាង​រៀនសូត្រ​បានត្រឹមតែ​ថ្នាក់​ទី​៣​ក៏​ឈប់​។​

 

​ម្យ៉ាងវិញទៀត នៅ​ស្រុក​ខ្មែរ​យើង​សូម្បីតែ​ការងារ​ជូត​សម្អាត​ឲ្យ​ក្រុមហ៊ុន​ផ្សេងៗ​ក៏​ពិបាក​រក​ផង​។ ថ្ងៃមួយ​ក៏បាន​មកដល់ ដោយមាន​បងប្អូន​ខ្មែរ​ដែលជា​កម្មករ​ដូចគ្នា​បាន​បបួល​នាង [​ពិសី​] ឲ្យ​ទៅធ្វើ​ការ​នៅ​ប្រទេស​ថៃ គេ​ថា ធ្វើការ​នៅ​ប្រទេស​ថៃ​បាន​ប្រាក់​ច្រើន មួយខែ​ពី ៦០០០​បាទ ទៅ​៨០០០​បាទ​។ ដោយ​នាង​ខ្វះ​ការយល់ដឹង​ម្យ៉ាង​យល់ឃើញថា បើ​មាន​ប្រាក់​ច្រើន​អាចជួយ​ដល់​ឪពុកម្តាយ​បាន នាង​ក៏​ទៅតាម​គេ​។ មិនយូរប៉ុន្មាន​នាង​ក៏​អា​ចរក​ការងារ​បានធ្វើ​នៅក្នុង​ភោជនីយដ្ឋាន​មួយ​នៅក្នុង​ទីក្រុង​បាងកក ប្រទេស​ថៃ គឺ​ធ្វើការ​ក្នុង​ហាង​លក់​ម្ហូបអាហារ ដែល​នៅក្នុង​ហាង​នោះ​មាន​នារី​ខ្មែរ​យើង​ធ្វើការ​ខ្លះ​ដែរ ដែល​ពួកគេ​ទទួលបាន​ប្រាក់ខែ​តែ​៥០០០​បាទ​ក្នុង​មួយខែ​។ នៅក្នុង​ប្រទេស​ថៃ ពួកក្មេងៗ យុវវ័យ​អាយុ​១៦-១៧ ឆ្នាំ ដើរលេង​ច្រើនណាស់ គឺ​ក្រុម​កំលោះ​ថៃ​ទាំងនោះ​មកជួយ​ទិញ​ម្ហូបអាហារ នៅ​ហាង​នាង​លក់​ម្ហូប​រៀងរាល់ថ្ងៃ នាង​ក៏បាន​ស្គាល់ ពួកគេ​ទាំង​នោះដែរ ពេលខ្លះ​ពួកគេ​ក៏​មក​និយាយ លេងសើច​សុំ​រាប់អាន សុំ​ស្រឡាញ់​នាង​ក៏មាន​ពេល បាន​ស្គាល់​ពួក​ស្ទាវៗ​នោះ​ហើយ នាង​ត្រូវបាន​គេ បបួល​ដើរលេង​ក្រោយពី​នាង​សម្រាក​ពី​ការងារ​ជា​ញឹកញាប់​។​

 

​ពីដំបូង​នាង​បាន​ផ្ញើ​ប្រាក់​ឲ្យ​ម្តាយ និង​ប្អូនៗ​នៅ ផ្ទះ​មួយខែ​ពីរ​បី​ពាន់​បាទ តែ​ជា​កម្ម​អកុសល ហាង​នោះ​ត្រូវបាន​បិទទ្វារ​ជា​បណ្តោះអាសន្ន ព្រោះ​ថៅកែ​ហាង​មានរឿង​ជាប់​ពាក់ព័ន្ធ​ជាមួយ​គ្រឿងញៀន​។​ពេលនោះ​នាង​ក៏​រស់​តែលតោល នាង​ក៏ត្រូវ​ចាញ់បោក​ប្រុស​ម្នាក់​យក​នាង​លក់​ឲ្យ​ផ្ទះបនស្រី​មួយ នាង​បន្ត​រស់ក្នុង​ផ្ទះបន​បានតែ​រយៈ​ជាង​មួយខែ​ក៏​រត់​ចេញមកក្រៅ ក្រោយមក​ក៏បាន​ស្គាល់​ថៅកែ​ម្នាក់​គេ​ឲ្យ​ធ្វើការ​ទៀត​។ ចំណែក​មិត្តភក្តិ​នាង​ក៏បាន​បែក​គ្នា​ស្វែងរក​ហាង​ថ្មី​ដើម្បី​ធ្វើការ​ជា​បន្ត​។ ពិសី ក៏បាន​ស្គាល់​ថៅកែ​ម្នាក់ គេ​ឲ្យ​នាង​នៅ​ធ្វើជា​អ្នក​រៀប​បន្ទប់ ដោយ​ឲ្យ​ប្រាក់ខែ​ត្រឹមតែ​៤៥០០​បាទ​ប៉ុណ្ណោះ​។ ថ្ងៃមួយ​នាង​បាន​ទៅ​រៀបចំ​បន្ទប់​ឲ្យ​កូនប្រុស​ថៅកែ​ថៃ អាយុ​១៧​ឆ្នាំ ខណៈពេល​នាង​កំពុងតែ​ជូត​លាង​សម្អាត​បន្ទប់ ស្រាប់តែ​កូនប្រុស​ថៅកែ​បាន ចាប់បង្ខំ​រំលោភ​នាង​។ ដោយហេតុ​នាង​ជា​ស្រី​ខ្វះ ការអប់រំ នាង​ក៏​មិន​ហ៊ាន​ប្រាប់​ថៅកែ​ទេ ខ្លាច​គេ​ដេញ​ចោល ព្រោះ​ការងារ​ពិបាក​រក​ខ្លាំងណាស់ នាង​ស៊ូ​ខាំមាត់សង្កត់ចិត្ត​មួយថ្ងៃៗ នាង​មានតែ​ទឹកភ្នែក​ហូរ​ជោក​ផែនថ្ពាល់​តែប៉ុណ្ណោះ ដើម្បី​បញ្ជាក់​ពី​ភាពឈឺចាប់​។ ពេល​បានឃើញ​សភាព​ដូច្នោះ កូន​ថៅកែ​ក៏​ហៅ​នាង​ទៅប្រាប់​ដោយ​ស្ងាត់ៗ​ថា គេ​ស្រឡាញ់​នាង​ហើយ ពេលខ្លះ​គេ​ក៏​បបួល​នាង​ទៅ​ចម្ការ ហើយ​កូន​ថៅកែ​ថៃ​រូបនោះ​មានឱកាស​បាន​បបួល​នាង​រួមភេទ​ជាច្រើន​ដង​រហូត​នាង​មានគភ៌​ក្នុង​ផ្ទៃ​។ ថ្ងៃមួយ​ថៅកែ​ស្រី​បានដឹង​រឿងនេះ​ដោយ​គេ​បានឃើញ​សភាព​ផ្ទៃពោះ​របស់​នាង​ខុសពី​ប្រក្រតី ចំណែក​ទឹកមុខ​ក៏មាន​សភាព​ស្លេកស្លាំង ដែល​កាលនោះ​នាង​ទើប​តែមាន​ផ្ទៃពោះ​ត្រឹមតែ​បួន​ខែ ចំណែក​ការងារ​ត្រូវ​ថៅកែ ស្រី​ជា​ជនជាតិ​ថៃ​រូប នោះ​រឹតតែ​បន្ថែម​ឡើងៗ  តែ​នាង​នៅ​ស៊ូទ្រាំ​ដើម្បី បាន​ប្រាក់​ជូន​ម៉ែ​នៅឯ​ស្រុក​។​

 

​ចំណែក​កូន​ថៅកែ​ស្រី​នោះ​ក៏បាន​ប្រាប់​ម្តាយ​របស់គេ​ថា គេ​ត្រូវតែ​យក​នាង​ធ្វើជា​ភរិយា ព្រោះ​គេ​ជា​អ្នកធ្វើ​ឲ្យ​នាង​មាន​ផ្ទៃពោះ​។ ថៅកែ​ស្រី​និយាយថា នាង​នោះ ជា​កូន​ខ្មែរ ចំណែក​ឯង​ជា​ថៃ ហើយ​នាង​នោះ​គ្រាន់តែ​ជា​កម្មករ​យើង​ទេ ដោយ ឡែក​ឯង​នៅ​រៀន​នៅឡើយ ដើម្បី​ឲ្យ​ចប់​រឿង​គឺ​អញ​ត្រូវ​បញ្ឈប់​ការងារ​នាង​នោះ បើ​នាង​នៅក្នុង​ផ្ទះ​អញ​ទៀត​ឯង មុខជា​លែង​ទៅ​រៀន​ទៀតហើយ​។ បន្ទាប់ពី​ថៅកែ​ស្រី បានប្រកែក​តឹង​មាត់​តឹង​ក​ជាមួយ​កូនប្រុស​បាន​បី​ថ្ងៃ ស្រាប់តែ​ថៅកែ​ស្រី​ហៅ​នាង​ឲ្យ​មក​បើក​ប្រាក់ខែ ហើយ​ប្រាប់​នាង​ថា “​ឥឡូវនេះ​ផ្ទះ​យើង​លែង​ត្រូវការ​កម្មករ​ទៀតហើយ ខ្ញុំ​បើក​ប្រាក់ខែ​ឲ្យ​ឯង​លើស​ចំនួន​បី​ខែ​ដើម្បី​ឲ្យ​ឯង​ងាយស្រួល​ស្វែងរក​ការងារ​ផ្សេងទៀត​ធ្វើ​”​។ ដោយឡែក​កូនប្រុស​ថៅកែ​ស្រី​បាន​ទូរស័ព្ទ​ទៅរក​នាង ហើយ​បាន​ជួល​បន្ទប់​ឲ្យ​នាង​ស្នាក់នៅ​ដោយ​និយាយថា បើ​នាង​ស្រឡាញ់​រូបគេ សូម​នាង​កុំ​យក​កូន​ចេញ ព្រោះ​នាំ​តែមាន​បាបកម្ម ចាំ​គេ​ជា​អ្នក​ជួយ​ចិញ្ចឹម ព្រោះ​គេ​ចង់​បានកូន​។ ក្រោយមក​មិនយូរប៉ុន្មាន​នាង​ក៏​ឈឺ ពោះ​សម្រាលកូន​ហើយ ក៏បាន​ទូរស័ព្ទ​ទៅប្រាប់​ប្តី​ថា ឥឡូវនេះ​នាង​កំពុងតែ​ឈឺពោះ​ខ្លាំងណាស់ បើ​ប្តី​គេ​មិន​មក​ទេ​ពេទ្យ​គេ​មិន​ទទួល​ឡើយ ព្រោះ​នាង​ជា​ស្ត្រី​ខ្មែរ​ភ្លាមនោះ​ប្តី​របស់​នាង​ក៏បាន​មក យក​នាង​ទៅ​ដេក​សម្រាលកូន​នៅ​មន្ទីរពេទ្យ​មួយ​នៅ​ឆ្ងាយ​ពី​ក្រុង ។ ក្រោយពី​សម្រាល​រួចមក​ស្រាប់តែ​គ្រូពេទ្យ​សួរ​នាង​ថា តើ​មាន​បងប្អូន​មក​គិត​ប្រាក់​ឲ្យ​ថ្លៃ​ថ្នាំពេទ្យ​ទេ ? នាង​ថា “​ខ្ញុំ​មាន​ប្តី ចាំ​ខ្ញុំ​ទូរស័ព្ទ​ទៅរក​ប្តី​ខ្ញុំ​” ពេល​នាង​ទូរស័ព្ទ​ទៅប្រាប់​ថា “​សូម​បង​យកប្រាក់​មក​បង់​ឲ្យ​ថ្លៃ​ថ្នាំ​ផង​” ស្រាប់តែ​គេ​និយាយ ថា បើ​មាន​ប្រាក់​បង់​ឲ្យ​ពេទ្យ​ទៅ ព្រោះ​គេ​មិនមាន​អ្វី​ត្រូវ​ពាក់ព័ន្ធ​ជាមួយ​នាង​ទៀត​ទេ ព្រោះ​គេ​មិនត្រូវ​ការ​មាន​ប្រពន្ធ​កូន​ទេ មិនទាន់​គ្រប់​អាយុ​នឹង​ទទួលខុសត្រូវ​នៅឡើយ ហើយ​ម្យ៉ាងទៀត​គេ​ជាប់​រៀន​មិនមាន​ប្រាក់​ឲ្យ​ទៀត​ទេ​។​

 

​នៅពេល​បានឮ​សំឡេង​ប្តី​នាង​និយាយ​បែបនេះ នាង​ដួលសន្លប់​នៅ​ហ្នឹង​កន្លែង ប្រមាណ​ជា​ពីរ​ម៉ោង​ក្រោយមក ពួក​ពេទ្យ​ថៃ​បានមក​សួរនាំ​នាង​ទៀតថា បើ​ស្អែក​នេះ​នាង​មិនមាន​ប្រាក់​ឲ្យ​ថ្លៃ​ថ្នាំ​ទេ យើង​នឹង​បញ្ជូន​នាង​ទៅ​ប្រទេស​ខ្មែរ​វិញ​ហើយ ។ ស្អែក​ឡើង​ប៉ូលិស​ថៃ​មក​នាំ​នាង និង​កូន​ទើប​ឆ្លងទន្លេ​រួច យកទៅដាក់​ក្នុង​គុក​ជាមួយ​ពួកកម្មករ​ខ្មែរ​ដទៃទៀត​ប្រមាណ​ជា​៣០០​នាក់ ហើយ​បញ្ជូន​ឡើង​ឡាន​មក​តាម​ច្រក​អន្តរជាតិ​ក្រុង​ប៉ោយប៉ែត​។​

 

ពិសី បាន​បន្តទៀតថា “​ពេលនេះ ខ្ញុំ​មិនដឹង​ជា​ទៅណា​ទេ បើ​ទៅផ្ទះ​មិនដឹង​ជា​ទៅ​ដើម្បី​អ្វី ព្រោះ​កូន​ខ្ញុំ​នេះ​វា​គ្មាន​ឪពុក នាំ​តែ​ខ្មាស​អ្នក​ស្រុកភូមិ ម្យ៉ាង​ប្រាក់​ក៏​គ្មាន​សូម្បី​តែមួយ​សេន​ក៏​គ្មាន​ដែរ ចំណែក​ម្តាយ និង​ឪពុក​នាង​ខ្ញុំ ពួកគាត់​មិនដែល​នៅផ្ទះ​ទេ គឺ​ចេញទៅ​ធ្វើការ​នៅតាម​ព្រំដែន​បាត់ទៅហើយ​” ។ នាង​និយាយ​បណ្តើរ​ស្រែកយំ​បណ្តើរ គួរ​ឲ្យ​អាសូរ​ដល់​នាង​ណាស់ កម្មក្រាស់​ទៅ​ប្រទេស​ថៃ​ពីរ​ឆ្នាំ​ពេល​ត្រឡប់មកវិញ​បានកូន​មួយ​គ្មាន​ឪពុក​ទទួលខុសត្រូវ​ទៀត​៕

 7783a839-af30-4405-816d-6923a08fa912

 

Leave a Reply

(*) Required, Your email will not be published