កូនស្រី​គួរតែ​វិលវៃ​មករក​សម្បុក​វិញ​

, , Leave a comment

​ស្ត្រី​ឯកោ​ម្នាក់ ខ្លោចចិត្ត អាណិត​ខ្លួន រស់​រងទឹក​ភ្នែក​ដោយ​សារ​តែ​កូនស្រី​តែ​ម្នាក់​គត់​របស់គាត់ ដាច់ចិត្ត​វេច​បង្វេច ចុះ​ចេញពីផ្ទះ​ទៅ​រួមរស់​ជាមួយនឹង​បុរស​ជនជាតិ​បរទេស​ម្នាក់​។ទំនាក់ទំនង​ស្នេហា​ដូច​ផ្លេកបន្ទោរ​ជាមួយ​បុរស​បរទេស​រូបនោះ​បានធ្វើ​ឲ្យ​កូនស្រី​ក្លាយទៅជា​កូន​អកតញ្ញូ​។ ម្តាយ​ខំប្រឹងប្រែង រកស៊ី​បោក​ខោអាវ កោសខ្យល់​ឲ្យ​គេ ដើម្បី​រកប្រាក់​មក​ចិញ្ចឹម និង​ឲ្យ​កូន​រៀន​បាន​ជិត​ចប់​មហាវិទ្យាល័យ ប៉ុន្តែ​ចុង ក្រោយ​គ្មាន​លទ្ធផល សល់​តែ​ទឹកភ្នែក​ទាំងថ្ងៃទាំងយប់​។​

 

​ចាប់ផ្តើម​រំឭក ទឹកភ្នែក​ចាប់​ហូរ​។ នេះ​គឺជា​ស្ថានភាព​ដ៏​ខ្លោចផ្សា​របស់​អ្នក​មីង ច​ន្ធូ [​ឈ្មោះ​អ្នកនិពន្ធ​ដាក់​ឲ្យ​]​។ តាមពិត គាត់​ជា​ស្ត្រី​មេម៉ាយ​គ្មាន​កូន និង​សាច់ញ្ញាតិ​នឹង​គេ​នោះទេ ហេតុនេះ​គាត់​ក៏មាន​គំនិត​ចង់រក​កូនកំព្រា​ម្នាក់​មក​ចិញ្ចឹម​គ្រាន់​បានជា​គ្នា ម្យ៉ាង​ការសុំ​កូនកំព្រា​មក​ចិញ្ចឹម​បែបនេះ​ក៏​វា​ជា​រឿង​មួយ​ល្អ​ផងដែរ​។ នៅពេលនោះ​ដោយ​ឃើញ​គាត់​មានបំណង​បែបនេះ មាន​បុរស​ម្នាក់​ដែល​រស់នៅក្នុង​ទីក្រុង​ភ្នំពេញ​បាន​ណែនាំ​គាត់​ឲ្យ​ទៅយក​ក្មេងស្រី​ម្នាក់​កំព្រា​ទាំង​ឪពុក​ទាំង​ម្តាយ មក​ចិញ្ចឹម​។ គ្រាន់តែ​បានឮ​ដូច​នោះ​គាត់​មាន ការ​ត្រេកអរ​មែនទែន ហើយ​ក៏បាន​ទៅសុំ​ក្មេងស្រី​នោះមក​ចិញ្ចឹម​តាម​ការណែនាំ​។ ក្មេងស្រី​នោះ​មាន​អាយុ​ប្រាំពីរ​ឆ្នាំ​ទៅហើយ ដូចនេះ​ពេល​យក​នាង​មក​នៅ​ជាមួយ​នោះ នាង​ដឹងថា គាត់​មិនមែនជា​ម្តាយបង្កើត​របស់​នាង​ដែរ​។ ទោះបីយ៉ាងណា​ក៏​គាត់​ចាត់ទុក​នាង​ដូចជា​កូនបង្កើត​ចេញពី​សាច់​របស់គាត់​អីចឹង ដែរ​ដោយបាន​ដាក់ឈ្មោះ​ថ្មី​ឲ្យ​នាង​ថា លក្ខិណា​។​

 

​បើទោះបីជា​គាត់​មិន​ធ្លាប់​មានកូន​នឹង​គេ​ក៏ពិតមែន តែ​គាត់​ដឹង​ពី​តួនាទី​របស់​ឪពុកម្តាយ​ចំពោះ​កូន ដូចនេះ​គាត់​បាន​បញ្ជូន​កូនស្រី​ចិញ្ចឹម​នោះ​ទៅ សាលារៀន រីឯ​គាត់​ខំប្រឹង​រកស៊ី​ដើម្បី​ក្តីសង្ឃឹម​នៃ​គ្រួសារ​ថ្មី​មួយ​នេះ ដោយ​គាត់​ទូល​ផ្លែឈើ​លក់ ក្រៅពីនេះ​គាត់​បោក​ខោអាវ និង​កោសខ្យល់​ឲ្យ​គេ​។ ពេលវេលា​ចេះតែ​កន្លងផុតទៅ​ជាមួយនឹង​ការរស់នៅ​ប្រកបដោយ​សេចក្តីសុខ​ពីរ​នាក់​ម្តាយ និង​កូនស្រី​។ កូនស្រី​រៀន​ចប់​សាលាបឋមសិក្សា បន្ត​ចូល​វិទ្យាល័យ ចប់​វិទ្យាល័យ បន្ត​ចូលរៀន​នៅ​មហាវិទ្យាល័យ ទៀត​។ គាត់​ពិត​ជាមាន​មោទកភាព ចំពោះ​គ្រួសារ​ដ៏​តូច​មួយ​របស់គាត់​ណាស់ ព្រោះ​គាត់​មានលទ្ធភាព​ឲ្យ​កូនស្រី​រៀន​បាន​ខ្ពស់ ខណៈដែល​កូន គេ​ខ្លះទៀត​មិន​ទាំង​ចប់​វិទ្យាល័យ ផង​ដោយសារ​បញ្ហា​ជីវភាព ម្យ៉ាងវិញទៀត​គាត់​រំពឹង ទុក​យ៉ាង​មុតមាំ​ថា កូនស្រី​គាត់​ប្រាកដ​ជាមាន​អនាគត​ល្អ ហើយ​សាង​កេរ្តិ៍ឈ្មោះ​ឲ្យ​គ្រួសារ និង​មើលថែរក្សា​តបស្នង​សងគុណ គាត់​វិញ​នៅពេល​គាត់​ចាស់​។​

 

​ផ្សារ​រាត្រី​ជួប​បុរស​បរទេស​
​បន្ទាប់ពី​ប្រឡង​ចប់​បាក់​ឌុប កូនស្រី​បានសម្រេច ចិត្ត​ចូលរៀន​បង់ថ្លៃ​ផ្នែក​គ្រប់គ្រង នៅ​សាកលវិទ្យាល័យ ដោយ​នៅក្នុង​ឆ្នាំ​ទីមួយ  និង​ទី​ពីរ សាលា​តម្រូវ​ឲ្យ​បង់​តម្លៃ​២៨០​ដុល្លារ​អាមេរិក​ក្នុង​មួយឆ្នាំ ប៉ុន្តែ​ក្នុង​ឆ្នាំ​សិក្សា​ទី​បី​មិនទាន់​ទាំង​បាន​បង់ថ្លៃ​សាលារៀន​ផង​ក៏មាន​បញ្ហា​កើតឡើង​រវាង​គាត់ និង​កូនស្រី​បណ្តូលចិត្ត​។ អ្នក​មីង ច​ន្ធូ បាន​បន្ត​ឲ្យ​ដឹង​ទៀតថា ដោយសារតែ​ស្រឡាញ់​កូន​គាត់​មិនសូវ​ជា​បើក​សេរីភាព​ឲ្យ​កូន​ដើរហើរ​សេរី​នោះទេ ប៉ុន្តែ​ចំពោះ​ការចំណាយ​ពេល​លើ​ការសិក្សា​វិញ គាត់​មិនដែល​ហាមឃាត់​នោះទេ ។ នៅ​ថ្ងៃមួយ កូនស្រី​គាត់​បាន​សុំ​ការអនុញ្ញាត​ពី​គា​ត់ទៅ​ដើរលេង​នៅ​ផ្សារ​រាត្រី​ជាមួយ​មិត្តភក្តិ​នៅ​ជិត​ផ្សារ​ចាស់​។ គាត់​និយាយថា “​បើសិនជា​ខ្ញុំ​មិន​ឲ្យ​កូន​ទៅលេង​ផ្សារ​នោះទេ ប្រហែល​ក៏​មិន​មានរឿង​ប្រេះស្រាំ​នៅក្នុង​គ្រួសារ​កើតឡើង​បែបនេះ​ដែរ ខ្ញុំ​ស្តាយ​ណាស់​” ។ ដោយ​កូនស្រី លក្ខិណា ចេះ​ភាសា អង់គ្លេស​អាច​ប្រើការ​បានការ​ដើរលេង​នៅ​ផ្សា​រាត្រី​នោះ​ហើយ ដែល​កូនស្រី​គាត់​បាន​ជួប និង​ស្គាល់គ្នា​ជាមួយ​ជនបរទេស​ម្នាក់​នោះ​។​

 

​ទំនាក់ទំនង​ក៏​កើតមាន​រវាង​ពួកគេ​ទាំងពីរ​នាក់ មានពេលខ្លះ​ជនបរទេស​នោះបាន​ទៅដល់​សាលារៀន ដើម្បី​សុំ​កូនស្រី​គាត់​ផឹក​កាហ្វេ​ជាមួយ​ទៀតផង​។ នៅពេលដែល​ពិធីបុណ្យ​ឆ្លង​ឆ្នាំ​នៅ​ម្តុំ​រមណីយដ្ឋាន​ប្រវត្តិសាស្ត្រ​វត្តភ្នំ អ្នក​មីង​ចង់​ស្គាល់​បុរស​ម្នាក់​នោះ ដើម្បី​មើល​ពី​អត្តចរិត​ឫក​ញ​ថា តើ​គួរ​រាប់អាន​ឬ​យ៉ាងណា ព្រោះថា គាត់​តែងតែ​អប់រំ​កូន​ម្តង​ហើយ​ម្តងទៀត​ពី​ការ​សេពគប់​មិត្ត បើ​ប៉ះ​ល្អ​ទាញ​យើង​ឲ្យ​ដើរ​ផ្លូវ​ល្អ ប៉ុន្តែ​បើ​ប៉ះ​អាក្រក់​វិញ​កូន​យើង​ក៏​អាក្រក់​ដែរ​។​

 

​ម្យ៉ាងវិញទៀត​គាត់​ខ្លាច​កូន​គាត់​ចាញ់បោក​គេ​ផង​។ អ្នក​មីង​ក៏​ឲ្យ​កូនស្រី​ហៅ​ជនបរទេស​នោះ​មកជួប​នៅពេល​ដើរ​កម្សាន្ត​នៅក្នុង​ពិធីបុណ្យ​នោះ ហើយ​គាត់​ក៏​សាកសួរ​ពី​ទំនាក់ទំនង​នោះ​ថា រាប់​កូនស្រី​គាត់​ទុកដូចជា​អ្វី​? ជនបរទេស​នោះ​ក៏​ឆ្លើយ តាមរយៈ​ការបកប្រែ​របស់​កូន​គាត់​ថា រាប់អាន​ទុកជា​មិត្តភក្តិ ប៉ុន្តែ​ថ្ងៃក្រោយ​មិនដឹង​ជា​ទៅជា​អ្វី​នោះទេ​។ ថ្ងៃក្រោយ​មកទៀត​កូនស្រី​គាត់​បាន​ប្រាប់​គាត់​ថា ជនបរទេស​នោះ​ឲ្យ​នាង​ទៅ​បកប្រែ​ភាសា​អង់គ្លេស​ឲ្យ​គាត់​នៅតាម​ផ្សារ​នានា​នៅក្នុង​ទីក្រុង​ភ្នំពេញ ព្រោះថា​បុរស​នោះ​មានមុខ​របរ​បោះ​ដុំ​សាច់មាន់​។ ការបកប្រែ​នោះគេ​គិតថ្លៃ​ឲ្យ​មួយ​ម៉ោង​មួយ​ដុល្លារ​អាមេរិក​។​

 

​អ្នក​មីង​ក៏​យល់ព្រម ប៉ុន្តែ​គាត់​ហាម​កូន​ហើយ​ហាម​ទៀត​កុំ​ឲ្យ​ហូប​អ្វី ផ្តេសផ្តាស​ជាមួយ​គេ ប្រយ័ត្ន​គេ​ដាក់​ថ្នាំ ហើយ​ប្រព្រឹត្ត​អំពើ​មិន​គប្បី​ណាមួយ​។ ទៅ​បកប្រែ​ភាសា​អង់គ្លេស​ឲ្យ​បាន​ប្រហែល​ជិត​២០​ថ្ងៃ ជនបរទេស​នោះបាន​សុំ​ឲ្យ លក្ខិណា ទៅធ្វើ​ការ​ឲ្យ​គេ​ដោយ​សន្យាថា ឲ្យ​គ្រប់គ្រង​ការបោះ​ដុំ​លក់​សាច់មាន់ នោះ​តែម្តង​។ លក្ខិណា ពិតជា​ចង់​ធ្វើការ​ងារ​នោះ​មែនទែន ប៉ុន្តែ​ចំពោះ​អ្នក​មីង​វិញ​ជំទាស់​ដោយ​គាត់​យល់ឃើញថា ខ្លាច​កូន​មិនមាន​សមត្ថភាព គ្រប់គ្រាន់​ក្នុង​ការងារ​នោះ ហើយ​នាំ​ឲ្យ​មាន​បញ្ហា​ណាមួយ​កើតឡើង ម្យ៉ាង​មកពី​គាត់​មានការ​សង្ស័យ​ពី​ទំនាក់ទំនង​របស់គេ​ហាក់ដូចជា​មិន​ស្រួល​។​

 

​កូនស្រី​ចុះចោល​ម្តាយ​ទៅ​រួម​ទ្រនំ​ជាមួយ​ជនបរទេស ក្រោយពី​ដឹង​ពី​ទំនាក់ទំនង​មិនធម្មតា​របស់​កូនស្រី ជាមួយ​ជនបរទេស​នោះមក អ្នក​មីង​បាន​និយាយ​ទូន្មាន​កូន​ម្តងទៀត​ឲ្យ​ឈប់​ទាក់ទង និង​ឈប់​ទៅធ្វើ​ការ ព្រោះថា​ជន​ម្នាក់​នោះ​មើលទៅ​មិនមែនជា​មនុស្ស​ល្អ​នោះទេ ប៉ុន្តែ​កូនស្រី​គាត់​មិន​ស្តាប់​គាត់​នោះទេ ។ គាត់​គ្មាន​ជម្រើស​ក៏​ដក​ទូរស័ព្ទ​កូនស្រី​គាត់​ទុក ដើម្បី​កុំ​ឲ្យ​គេ​មាន​ទំនាក់ទំនង​គ្នា ហើយ​គាត់​ក៏ត្រូវ​ការប្រើ​ទូរស័ព្ទ​នៅក្នុង​ការរកស៊ី​ដែរ​។​

 

​ផ្ទុយទៅវិញ​ការដក​ទូរស័ព្ទ​ទុក បែប​នោះ​វា​បាន​បែកធ្លាយ​នូវ​រឿង​មួយ​ដែល​ធ្វើ​ឲ្យ​គាត់​មិន​សប្បាយចិត្ត​ទាល់តែសោះ និង​ធ្វើ​ឲ្យ​គាត់​អស់សង្ឃឹម​យ៉ាងខ្លាំង នោះ​គឺ​មិត្តភក្តិ​ទូរស័ព្ទ​មករក​នាង​ហើយ​គាត់​ក៏​លើក​ទូរស័ព្ទ​ឆ្លើយ​។ មិត្តភក្តិ​ដែល​ទូរស័ព្ទ​មក​នោះ​សួរថា អ្នក​មីង​ជា​អ្នកណា គាត់​ប្រាប់ថា​ម្តាយ​លក្ខិណា​។ ភ្លាមៗ​នោះ មិត្តភក្តិ​បាន​ប្រាប់​គាត់​ថា “​លក្ខិណា ថា​មីង​មិនមែនជា​ម្តាយបង្កើត​របស់គេ​ទេ​”​។ គ្រាន់តែ​ឮ​ពាក្យ​ថា​មិនមែន​ម្តាយបង្កើត​អ្នក​មីង ច​ន្ធូ ញ័រ​ដើមទ្រូង​ញ័រ​ដៃ​រក​ញ​ក្យ​និយាយ​មិន​ចេញ​ដោយ​គាត់​នឹក​ហួសចិត្ត មិន​នឹកស្មានថា កូនស្រី​ធ្វើបែបនេះ​សោះ​។ គាត់​មិនដែល​រំឭក​ពី​រឿង​ណាមួយ​ដែល​ធ្វើ​ឲ្យ​ប៉ះ​ញល់​អារម្មណ៍​កូនស្រី​ទេ គឺមាន​តែ​ខំ​ផ្តល់​ភាពកក់ក្តៅ​ឲ្យ​នាង​ចាត់ទុក​ដូចជា កូន​ចេញពី​សាច់​គាត់​។ គាត់​ចេះតែ​គិតពី​រឿង​ផ្សេងៗ ទៀត​ដោយ​មិនដឹងថា លក្ខិណា បានធ្វើ​រឿង​អ្វីខ្លះ​ទេ​នៅ​ខាងក្រៅ​ផ្ទះ​។ ម្យ៉ាងវិញទៀត​ជនបរទេស​នោះ​ចេះ តែ​តាម​នាង​ទៅ​សាលារៀន និង​ជួនកាល​តាម​ដល់ផ្ទះ ហើយ​ថែមទាំង​ហ៊ាន​និយាយថា អ្នក​មីង​បំបិទ​សិទ្ធិសេរីភាព​កូនស្រី​ទៀតផង​។ ដោយ​ខ្លាច​ញាតិមិត្ត​ជិតខាង​គេ​មើល​មក​មិន​សម​នឹង​ការ​មក​បែបនេះ គាត់​បាន​ហាម​បុរស​បរទេស​នោះ​ឲ្យ​ឈប់​ធ្វើបែបនេះ ហើយ​ថាបើ​ស្រឡាញ់ កូន​គាត់​ឲ្យ​ចូល​ស្តីដណ្តឹង​តាម​ប្រពៃណី​ទៅ​។ ជនបរទេស​នោះបាន​ប្រាប់​គាត់​ថា គេ​ស្រឡាញ់ និង​ថែមទាំង​ចង់​រៀបការ​ជាមួយ​នាង​ទៀតផង ប៉ុន្តែ​អត់​ប្រាក់​។​

 

​គាត់​នឹក​ហួសចិត្ត​ដោយមាន​គេ​និយាយថា គាត់​មិនមែនជា​ម្តាយ​នាង​បង្កើត និង​ដោយ​ការនិយាយ​ណែនាំ​មិន​ស្តាប់ ហើយ​មាន​ការឡើង​ចុះ​ផ្ទះ​គាត់​របស់​បុរស​បរទេស​ផង​នោះ​។ គាត់​ក៏​ប្រាប់ លក្ខិណា ដែលជា​កូនស្រី​ចិញ្ចឹម​ថា “​បើ​កូន​គិតថា កូន​ឯង​មិនមែនជា​កូនបង្កើត​ម៉ែ​ទេ កូន​ឯង​កុំ​ជិះ​ម៉ូតូ​ម៉ែ កុំ​ប្រើ​កុំព្យូទ័រ​យួរដៃ របស់​ម៉ែ​ដែល​ម៉ែ​ទិញ​ឲ្យ​” ។ ចាប់តាំងពី​ថ្ងៃ​នោះមក កូនស្រី​គាត់​ក៏​ឈប់​ប្រើ របស់​ទាំងនោះ​មែន ហើយ​គាត់​ក៏​មិនដឹងថា នាង​ចិត្តដាច់​ហ៊ាន​ចុះ​ចេញពីផ្ទះ​បែប​នោះទេ ។ នៅ​ថ្ងៃ​ដែល​នាង​ចេញពី ផ្ទះ​បាត់​មិនឃើញ​ត្រឡប់មកវិញ​នោះ គាត់​ចុច​ទូរស័ព្ទ​ទៅ​នាង​ស្ទើរ​ពេញ​មួយ​យប់ គឺ​ចុច​ទាល់ តែ​ទូរស័ព្ទ​អស់​ភ្លើង​នៅតែ​នាង​មិន​លើក​ទូរស័ព្ទ​របស់គាត់​ទៀត​។​

 

​យប់នោះ​គាត់​យំ​ដោយ តូចចិត្ត អាណិត​ខ្លួន​ពេក មិនដឹង​ជា ទៅរក​អ្នកណា​មកជួយ​ដោះស្រាយ និង មិនដឹង​ទៅតាមរ​កនាង​នៅឯណា ។ ក្រោយមក​គាត់​ក៏​ស្កា​ត់ទៅ រក​ជួប​នាង​នៅ​សាលារៀន ។ គ្រាន់តែ​ឃើញ​នាង​ភ្លាម គាត់​ខ្លោចចិត្ត អាណិតកូន និង លាន់មាត់​ថា “​អា​ស្រី ម៉េច​ក៏​កូន​ស្គម​ហើយ​ខ្មៅ ម្ល៉េះ ? កូន​ទៅ​នៅឯណា​កូន ?” ។ គ្រាន់តែ​ឮថា​នាង​ទៅ​នៅ​ជាមួយនឹង បុរស​បរទេស​អាយុ ៤៥ ឆ្នាំ​នោះ ភ្លាម គាត់​ស្រឡាំងកាំង​រក​ពាក្យ​និយាយ​ស្ទើរ​មិន​ចេញ ។ គាត់​យល់ថា កូនស្រី​គាត់​ខូចអនាគត​អស់ហើយ ។ អ្វីៗ​ត្រូវ​បាត់​បង់អស់​តែមួយ​ប៉ប្រិច ភ្នែក ។ នៅពេលនោះ គាត់​បាន​យំ អង្វរ​កូនស្រី​ឲ្យ​មក​ផ្ទះ​វិញ បើទោះបី ជាមាន​រឿង​អ្វី​កើតឡើង​ក៏ដោយ គាត់ សុខចិត្ត​ដោះស្រាយ​តាម​ក្រោយ​ឲ្យ តែ​កូន​ព្រម​មកវិញ ប៉ុន្តែ​គាត់​បាន ត្រឹម​សម្រក់​ទឹកភ្នែក និង វិលត្រឡប់ មក​ផ្ទះ​វិញ​ដោយ​អស់សង្ឃឹម​តែ​ម្នាក់ ឯង​តែប៉ុណ្ណោះ​៕

01-9-2015

 

Leave a Reply

(*) Required, Your email will not be published