លោក សាន សាធុកា មន្ត្រីនគរបាល​សេដ្ឋកិច្ច​ក្រសួង ប្រើ​តួនាទី​ទៅ​ស្មូម និង​ជំរិត​ទារលុយ​ពី​ម្ចាស់​ស្ថានីយ​ទិញ​ប្រេង​អត់​ពន្ធ​យកមក​លក់​ខុសច្បាប់ (​វីដេអូ​)

, , Leave a comment

111

​រាជធានី​ភ្នំពេញ : បុរស​ម្នាក់​ស្លៀកពាក់​ខោអាវ​ឈុត​ដែល​គេ​អះអាងថា ជា​លោក សាន សាធុកា ជា​មន្ត្រីនគរបាល​សេដ្ឋកិច្ច ក្រសួងមហាផ្ទៃ បាន​ទៅធ្វើ​សកម្មភាព​យកលុយ​ពី​ម្ចាស់​ស្ថានីយ​លក់​ប្រេង មួយកន្លែង ត្រូវបាន​គេ​បង្ហោះ​នៅក្នុង​បណ្តាញ​សង្គម​ដែលមាន​រយៈពេល​១​នាទី និង​២២​នាទី​។​

 

​នៅក្នុង​ឃ្លឹប​វីដេអូ​នេះ​បានបង្ហាញ​សកម្មភាព ជា​មន្ត្រីនគរបាល​សេដ្ឋកិច្ច ចូលទៅក្នុង​ស្ថានីយ​ប្រេង​មួយកន្លែង ហើយ​ត្រូវបាន​ស្ត្រី​ម្នាក់​យកលុយ​មក​ហុច ឲ្យ​ដៃ​ពីរ​ត្រូវបាន​គេ​អះអាងថា​រូប​បុរស​នោះ គឺជា​មន្ត្រីនគរបាល​សេដ្ឋកិច្ច​ក្រសួង ឈ្មោះ សាន សាធុកា ទៅ​ទារលុយ​ពី​ម្ចាស់ ស្ថានីយ​ប្រេង​មួយកន្លែង នៅតាម​បណ្តោយ​ផ្លូវជាតិ​លេខ​២១B ស្ថិតក្នុង​ស្រុក​ស្អាង ខេត្តកណ្តាល​។​

 

​បុរស​ខាងលើ​ដែល​គេ​ស្គាល់ឈ្មោះ សាន សាធុកា ត្រូវបាន​ថ្នាក់លើ​របស់ខ្លួន​បញ្ជា​ឲ្យ​ចុះ ទៅ​ឃ្លាំមើល​បទល្មើស​សេដ្ឋកិច្ច នៅតាម​បណ្ដោយ​ផ្លូវជាតិ​លេខ​២១ បាន​ដើរ​បង្គាប់​ឲ្យ ឈ្មួញ​រកស៊ី​ដឹកទំនិញ​ចេញ ចូល​ពី​ប្រទេស​វៀតណាម ទាំង​តាម​រថយន្ត​ក៏​ដូច តាម​ទូក​បង់លុយ​ទៅ​ឲ្យ​ពួកខ្លួន​ទៅតាម​ក្បាល​រថយន្ត ឬ​ក្បាលទូក​ជា​រៀងរាល់ថ្ងៃ​គ្មាន​ឲ្យ​រួច​មួយ​ឡើយ រីឯ​ឃ្លាំង​ស្តុក​ទំនិញ​នាំចេញ ចូល រួមទាំង​ស្ថានីយ​លក់​ប្រេង នៅតាម​ផ្លូវជាតិ​លេខ​២១​បេ ក្នុងស្រុក​ស្អាង និង​ស្រុក​កោះធំ​ក៏ត្រូវ​បាន​ឈ្មោះ សាន សាធុកា កំណត់​ឲ្យ​បង់លុយ​ប្រចាំខែ គ្មាន​ឲ្យ​រួច​មួយ​ដែរ ក្រោមលេស​ស្តុក​ទំនិញ ឬ​លក់​ប្រេង​នាំចូល​អត់​បង់ពន្ធ​។​

 

​ជាក់ស្ដែង​ដូច​មាន​រូប​ក្នុង​វីដេអូ​ឃ្លី​ប​ស្រាប់ ដែល​គេ​អះអាងថា ឈ្មោះ សាន សាធុកា ទៅ​ទារលុយ​ពី​ម្ចាស់​ស្ថានីយ​លក់​ប្រេង​មួយកន្លែង នៅតាម​ផ្លូវជាតិ​លេខ​២១ ស្ថិតក្នុង​ស្រុក​ស្អាង បាន​ចំនួន​៥០​ដុល្លារ រួមទាំង​កន្លែង​ផ្សេងៗ​ទៀត ចាប់ពី​២០​ដុល្លារ រហូតដល់​១០០​ដុល្លារ​ក្នុង​មួយខែៗ​។​

 

​គួរ​រម្លឹក​ដែរ​ថា ចាប់តាំងពី​លោក សួរ គឹម​លី ត្រូវបានតែងតាំង​ជា​ប្រធាន​ផ្នែក​ប្រតិបត្តិ​នគរបាល​សេដ្ឋកិច្ច ក្រសួងមហាផ្ទៃ ចុះ​ស្រាវជ្រាវ​បទល្មើស ប្រចាំខេត្ត​កណ្តាល ទទួលបន្ទុក​ផ្នែក​ទំនិញ គេ​សង្កេតឃើញ​ក្រុម​ឈ្មួញ​មួយចំនួន ដែល​រកស៊ី​ដឹកជញ្ជូន​ទំនិញ ឆ្លងកាត់​ផ្លូវជាតិ​លេខ​២១​បេ ពី​ច្រកព្រំដែន​ជ្រៃ​ធំ មកកាន់​ក្រុង​តាខ្មៅ ខេត្តកណ្តាល សម្តែង​ភាព​ក្តៅក្រហាយ​សឹង​គ្រប់ៗ​គ្នា ចំពោះ​ការ​កោសរូស បង្ខំ​ឲ្យ​បង់លុយ​តាមតែ​អំពើ​ចិត្ត ពី​សំណាក់​នគរបាល​សេដ្ឋកិច្ច ក្រសួងមហាផ្ទៃ ក្រោម​បញ្ជា​របស់លោក សួស គឹម​លី ហើយ​គេ​មិនដឹងថា មន្ត្រីនគរបាល​ដែល​ដាក់​ប៉ុស្តិ៍​ជជុះ​ជាប់​ជាប្រចាំ តាមផ្លូវ​ជាតិ​លេខ​២១​បេ បង់ថ្លៃ​ទិញ​ប៉ុស្តិ៍​ជូន​លោក សួរ គឹម​លី ក្នុង​មួយខែ​ប៉ុន្មាន​នោះទេ ទើប​ពួកគេ​មានអំណាច​ធ្វើ​អ្វីៗ តាមតែ​ទំនើងចិត្ត​។​

 

​ពេលខ្លះ​កូនចៅ​របស់លោក សាន សាធុកា នៅ​ចំណុច​ផ្លូវជាតិ​លេខ​២១​បេ បាន​យក​ឥទ្ធិពល​អំណាច របស់​ប្រធាន​នាយកដ្ឋាន ទៅប្រើ​ប្រាស់​ក្នុងការ​កោសរូស បង្ខំ​ឲ្យ​អ្នករកស៊ី​ដឹកជញ្ជូន​ទំនិញ​បង់លុយ តាមតែ​ទំនើងចិត្ត តាមរយៈ​ការដាក់​ប៉ុស្តិ៍​ជជុះ ការ​ប្រដេញ​ឡាន​ដឹកទំនិញ ឲ្យ​ចូល​បង់លុយ និង​ការកៀងគរ​ក្រុម​ឈ្មួញ ឲ្យ​ចូល​បង់​ខែ ។ ទោះជា​លោក សួរ គឹម​លី ទទួលបាន​តំណែង​ជា ប្រធាន​នគរបាល​សេដ្ឋកិច្ច​ក្រសួងមហាផ្ទៃ ទទួល​ផ្នែក​ត្រួតពិនិត្យ​ទំនិញគេចពន្ធ នៅក្នុង​ខេត្តកណ្តាល ក៏ពិតមែន ប៉ុន្តែ​លោក សួរ គឹម​លី មិនសូវ​ចុះទៅពិនិត្យ​ស្ថានភាព​ជាក់ស្តែង ឬ​ឃ្លាំមើល​សកម្មភាព មន្ត្រីក្រោមឱវាទ​នោះទេ គឺ​លោក សួរ គឹម​លី បាន​ដេញថ្លៃ​ប៉ុស្តិ៍​តាមផ្លូវ​ជាតិ​សំខាន់ៗ ឲ្យ​ទៅ​មន្ត្រី​ជំនិតៗ​បង្ក​ព្យុះភ្លៀង តាមតែ​អំពើ​ចិត្ត​។​

 

​ពេលខ្លះ​លោក សាន សាធុកា  បាន​ចាត់ចែង​ឲ្យ​កូនចៅ​របស់គាត់ ចាប់​ឆែកឆេរ​រថយន្ត​មួយចំនួន ដែល​សង្ស័យ​ដឹកឈើ​ខុសច្បាប់ ផ្ទុយ​ពី​ភារកិច្ច​ការងារ​របស់​ខ្លួន ដែល​ទទួល​ផែន​ស្រាវជ្រាវ​បង្ក្រាប ការដឹកជញ្ជូន​ទំនិញគេចពន្ធ និង​ទំនិញ​មាន​ជាតិពុល បង្កើត​ឲ្យ​មាន​ភាពចម្រូងចម្រាស់​ផងដែរ​។​

 

​ពាក់ព័ន្ធ​ការចោទប្រកាន់​ខាងលើនេះ សារព័ត៌​មានកំណើត​ថ្មី​មិនអាច​ធ្វើការ​ទាក់ទង​សុំ​ការបំភ្លឺ​ពី​លោក សាន សាធុកា បានឡើយ​៕

 

 

ធ្លាយរឿង នគរបាលសេដ្ឋកិច្ច ឈ្មោះ សាន សាធុកា ដើរយកលុយដាក់ខែ តាមស…

បច្ចុប្បន្ននេះ ប៉ូលីសសេដ្ឋកិច្ចឈ្មោះ សាន សាធុកា គ្រប់គ្រងលើផ្លូវជាតិ ចំនួនពីរកន្លែង ក្នុងទឹកដីខេត្តកណ្តាលគឺផ្លូវជាតិលេខ២១ និងផ្លូវជាតិលេខ១ ដើម្បីចាំកាក់រថយន្ត-កាណូតដឹក ទំនិញយកលុយជារៀងរាល់ថ្ងៃ ដោយនៅផ្លូវជាតិលេខ១ គេមានកូនចៅមួយក្រុមជួលផ្ទះគេដាក់ប៉ុស្តិ៍ប្រចាំការ នៅខាងកើតក្លោងទ្វារចូលសាលាបណ្ឌិតសភា នគរបាលនៅដីឥដ្ឋ និងផ្លូវជាតិលេខ២១ គេដាក់ប៉ុស្តិ៍នៅក្នុង ស្រុកស្អាងរួមទាំងជិះចល័ត ដើរយកលុយពីរថយន្ត-កាណូតដឹកទំនិញចេញ-ចូលប្រទេសវៀតណាម រួមទាំង កំណត់ឲ្យឃ្លាំងស្តុកទំនិញនាំចូលពីវៀតណាម រួមទាំងស្ថានីយលក់ប្រេងនានាបង់លុយប្រចាំខែ ឲ្យខ្លួនពី២០ដុល្លារ ទៅ១០០ដុល្លារផងដែរ ទៅតាមស្ថានីយធំតូច ដោយលើកហេតុផលថា ម្ចាស់ស្ថានីយទាំងអស់នោះ ទិញប្រេង អត់ពន្ធយកមកលក់ខុសច្បាប់។គេមិនដឹងថាសកម្មភាពដាក់ប៉ុស្តិ៍ និងដើរទារលុយតាមស្ថានីយប្រេង និងឃ្លាំងស្តុកទំនិញខាងលើនេះ គឺមានបញ្ជា ពីមេឬមួយក៏ឈ្មោះ សាន សាធុកា លួចទៅធ្វើដោយខ្លួនឯងនោះទេ។ពាក់ព័ន្ធករណីខាងលើនៅថ្ងៃទី២៤ ខែសីហា ឆ្នាំ២០១៥ មជ្ឈមណ្ឌលព័ត៌មានដើមអម្ពិល មិនអាចទាក់ទងសុំការ បំភ្លឺពីឈ្មោះ សាន សាធុកា បានទេ តែបើតាមមន្ត្រីនគរបាលសេដ្ឋកិច្ច ដែលដើមអម្ពិលទូរស័ព្ទសាកសួរព័ត៌មាន បានប្រាប់ឲ្យដឹងថា បើមានមន្ត្រីនគរបាលសេដ្ឋកិច្ចទៅដាក់ប៉ុស្តិ៍ទៅជំរិតទារលុយពីអ្នករកស៊ីមែននោះ គឺជាការ ឆក់ឱកាសរបស់បុគ្គលតែប៉ុណ្ណោះ មិនមែនជាបញ្ជារបស់ថ្នាក់លើនោះទេ៕

Posted by Komneut Thmey News on Sunday, 23 August 2015

 

Leave a Reply

(*) Required, Your email will not be published