បេ​ក្ខ​នារី​ម្នាក់​ឈឺពោះ​សម្រាលកូន ពេល​ប្រឡង​បាក់​ឌុប និង​មាន​អ្នកសន្លប់​ជិត​៧០​នាក់ នា​សម័យ​ប្រឡង​បាក់​ឌុប​ថ្ងៃទី​២

, , Leave a comment

​រាជធានី​ភ្នំពេញ : មានរឿង​គួរ​ឲ្យ​ភ្ញាក់ផ្អើល​មួយ​នៅ​ថ្ងៃទី​២ នៃ​ប្រឡង​បាក់​ឌុប​ឆ្នាំនេះ​ដោយមាន​បេ​ក្ខ​នារី​ម្នា​ក់នៅ​មណ្ឌល​អនុវិទ្យាល័យ​ជាស៊ីម​ស្មាច់មានជ័យ ខេត្តកោះកុង​បាន ឈឺពោះ​សម្រាលកូន ដោយ​ពុំបាន​ប្រឡង​មួយ​វិញ្ញាសា​ចុងក្រោយ​នៃ​ថ្ងៃ​បញ្ចប់​។ លោក រស់ សា​លីន អ្នកនាំពាក្យ​ក្រសួង​អប់រំ​បាន​ឲ្យ​ដឹង​កាលពី​យប់​ថ្ងៃទី​២៥ ថា ពិតជា​មាន​បេ​ក្ខ​នារី​ម្នាក់ ដែល​ឈឺពោះ​សម្រាលកូន​ស្របពេល​កំពុង​ប្រឡង នៅ​មណ្ឌល​អនុវិទ្យាល័យ ជា ស៊ីម ស្មាច់មានជ័យ ខេត្តកោះកុង ដោយ​ពុំបាន​ប្រឡង​មួយ​វិញ្ញាសា​ចុងក្រោយ​នា ថ្ងៃ​បញ្ចប់​នេះ​ពិតប្រាកដ​មែន ហើយ​បេ​ក្ខ​នារី​នោះបាន​បញ្ជូនទៅ​មន្ទីរពេទ្យ​ដើម្បី​សម្រាលកូន​រួចហើយ​ដែរ​។ អ្នកនាំពាក្យ​រូបនេះ​បាន​បន្តថា «​បេ​ក្ខ​នារី​ដែល​ឈឺពោះ​សម្រាលកូន​នេះ គឺជា​បេក្ខជន​បំពេញវិជ្ជា ដាក់ពាក្យ​ប្រឡង ដូច្នេះ​ករណី​គាត់​ឈឺពោះ​មិនបាន​ប្រឡង​នេះ គឺ​មិនអាច​ឲ្យ​គាត់​ប្រឡង​ម្ដងទៀត​បានទេ គឺ​ឱកាស​ប្រឡង​បានតែ​ម្ដង​ទេ​»​។​

 

​នៅពេល​សួរថា តើ​មូល​ហេតុអ្វី​បានជា​ក្រសួង​អនុញ្ញាត​ឲ្យ​បេក្ខជន​មាន​ផ្ទៃពោះ​ចូលរួម​ប្រឡង​លោក រស់ សា​លីន បាន​ពន្យល់ថា​ចំពោះ​បេក្ខជន​ស្វែ​រិ​ន និង​បំពេញវិជ្ជា ក្រសួង​មិនបាន​កំណត់​ទេ ទោះបីជា​បេក្ខជន​នោះ​មាន​ផ្ទៃពោះ ក៏ដោយ​តែបើ​បេក្ខជន​ធម្មតា​ក្រសួង​ក៏​មិន​អនុញ្ញាត​ឲ្យ​ដែរ​។​

 

​គ្រាន់តែ​ក្នុង​រយៈពេល​ពីរ​ថ្ងៃ​នៃ​ដំណើរការ​ប្រឡង​បាក់​ឌុប​នេះ​មាន​បេក្ខជន​ប្រមាណ​ជិត​៧០​នាក់​មាន​បញ្ហា​សុខភាព​ខ្លះ​ដួលសន្លប់​ខ្លះទៀត​មាន​អាកា​រៈ​វិលមុខ​ក្អួត​ច​ង្អៀ​រ​តែ​ភាគច្រើន​ក្នុង​ចំ​ណោ​ម​​ពួកគេ​ទាំង​នោះបាន​ត្រឡប់​ទៅ​ប្រឡង​វិញ​បន្ទាប់ពី​មានការ​ជួយសង្គ្រោះ​បឋម​ពី​គ្រូពេទ្យ​រួចមក​។ តែមាន​មួយចំនួន​តូច​ដោយសារ​អាកា​រៈ​ជំងឺ​មិនទាន់​ប្រសើរ​មិនអាច​ត្រឡប់​ទៅ​ប្រ​ឡង​​វិញ​បានឡើយ​។ តាម​ទំព័រ​ហ្វេ​ស​ប៊ុ​ករ​បស់​ក្រសួង​អប់រំ​បាន​ឲ្យ​ដឹងថា​គិត​ត្រឹម​ព្រលប់​ថ្ងៃទី​២៥​ម្សិលមិញ​នេះ​មាន​បេក្ខជន​ចំនួន​៤៩​នាក់​មាន​បញ្ហា​សុខភាព​ក្នុងអំឡុង​ដំណើរការ​សំ​ណេរ​​ក្នុងនោះ​មាន​១៨​នាក់​បានកើត​ឡើង​នោះ​ពេលព្រឹក​ដោយមាន​បេក្ខជន​៣​នាក់​ដោយសារ​បញ្ហា​សុខភាព​មិនអាច​ត្រឡប់មក​ប្រឡង​វិញ​បានទេ​។​

 

​ចំណែក​នៅពេល​រសៀល​ថ្ងៃទី​២៥ សីហា ឆ្នាំ​២០១៥​មាន​បេក្ខជន​ប្រឡង​៣១​នាក់​នៅ​មណ្ឌល​រាជធានី​ភ្នំពេញ ខេត្តក្រចេះ កំពង់ចាម សៀមរាប ត្បូងឃ្មុំ កោះកុង កំពង់ស្ពឺ កណ្តាល កំពត កែប កំពង់ធំ ពោធិ៍សាត់ កណ្ដាល កំពង់ឆ្នាំង ព្រះវិហារ​បាត់ដំបង និង​ខេត្តព្រៃវែង​មាន​បញ្ហា​សុខភាព​។ ក្នុងចំណោម​បេក្ខជន​៣១​នាក់​នោះ​មាន​បេ​ក្ខ​នារី​ម្នាក់​នៅ​មណ្ឌល​អនុវិទ្យាល័យ​ជាស៊ីម​ស្មាច់មានជ័យ ខេត្តកោះកុង​បាន ឈឺពោះ​សម្រាលកូន ដោយ​ពុំបាន​ប្រឡង​មួយ​វិញ្ញាសា​ចុងក្រោយ​នៃ​ថ្ងៃ​បញ្ចប់​ទៀតផង​។ ចំណែក​កាលពី​ថ្ងៃ​ប្រឡង​បាក់​ឌុប​ថ្ងៃទី​១ ក៏មាន​បេក្ខជន​ចំនួន​១៩​នាក់​បាន​មាន​បញ្ហា​សុខភាព​ផងដែរ​ក្នុងនោះ​មាន​បេក្ខជន​១៨​នាក់​អាចមាន​លទ្ធភាព​ប្រឡង​ឡើងវិញ​បាន​។ តែ​បេក្ខជន​ម្នាក់ទៀត​មិនអាច​ចូលរួម​ប្រឡង​បានទេ​។​

 

​លោក​វេជ្ជបណ្ឌិត សុខ សុគន្ធ ប្រធាន​មន្ទីរ​សុខាភិបាល​រាជធានី​ភ្នំពេញ​បាន​ឲ្យ​ដឹង​កាលពី​រសៀល​ថ្ងៃទី​២៥ ជា​ថ្ងៃ​ប្រឡង​ទី​២​ថា​សរុប​ទាំងពីរ​ថ្ងៃ​នៃ​ការប្រឡង​មាន​បេក្ខជន​ប្រឡង​នៅ​មណ្ឌល​រាជធានី​មាន​បញ្ហា​សុខភាព​ចំនួន​៥​នាក់​ក្នុងនោះ​នៅ​ថ្ងៃទី​២៥ សីហា មាន​៣​នាក់ និង​បេក្ខជន​២​នាក់​បាន​ដួលសន្លប់​កាលពី​ថ្ងៃ​ប្រឡង​ថ្ងៃ​ទីមួយ​។​

 

​កាលពី​ព្រឹក​ថ្ងៃទី​២៥ ខែសីហា ឆ្នាំ​២០១៥​នេះដែរ លោក រឹម រ៉េត នាយក​វិទ្យាល័យ សម្តេច​តេ​ជោ ហ៊ុន សែន សំរោង រាជធានី​ភ្នំពេញ និង​ជា​អនុប្រធាន​មណ្ឌល​ប្រឡង​វិទ្យាល័យ​ផ្សារ​ដើមថ្កូវ​ដែល​បាន​សន្លប់​ក្នុង ពេល​បំពេញ ភារកិច្ច​បាន និង​កំពុង​សម្រាក​ព្យាបាល​នៅ​មណ្ឌល​សុខភាព​ផ្សារ​ដើមថ្កូវ​។ តាម​ទំព័រ​ហ្វេ​ស​ប៊ុន​របស់​ក្រសួង​អប់រំ​បាន​ឲ្យ​ដឹង​ទៀតថា សម្រាប់​ដំណើរការ​សំណេរ​នៃ​ការប្រឡង​សញ្ញាបត្រ​មធ្យមសិក្សា​ទុតិយភូមិ​ចំណេះ​ទូទៅ និង​បំពេញវិជ្ជា​សម័យ​ប្រឡង​រយៈពេល​២​ថ្ងៃនេះ​បាន​ប្រព្រឹត្តទៅ​ប្រកប​ស្ងប់ស្ងាត់ សន្តិសុខ​សណ្ដាប់ធ្នាប់ និង​របៀបរៀបរយ​ល្អ​ពុំមាន​បាតុភាព​មិន​ប្រក្រតី​ណាមួយ​កើតមាន​គួរ​ឲ្យ​កត់សម្គាល់​ឡើយ ក្រោម​ការចូលរួម​សង្កេតការណ៍​ពី​អង្គភាព​ប្រឆាំង​អំពើពុករលួយ សហភាព​សហព័ន្ធ​យុវជន​កម្ពុជា និង​ដៃគូ​អភិវឌ្ឍ​វិស័យ​អប់រំ​នានា​។ បន្ទាប់ពី​ប្រឡង​ចប់​ប្រធាន​គណៈមេប្រយោគ និង​គណៈកម្មការ​អប្បមាទ​ទូទាំងប្រទេស​បាន​រៀបចំ​ដឹកជញ្ជូន​យក​វិញ្ញាសា​បេក្ខជន​ដែល​បាន​ប្រឡង​រួច​ពី​មណ្ឌល​ប្រឡង​នីមួយៗ ក្នុង​ថ្ងៃទី​២​ដំណើរការ​សំណេរ​ថ្ងៃទី​២៥ ខែសីហា ឆ្នាំ​២០១៥​នេះ​យកទៅ​ផ្ញើទុក នៅ​សាលា​រាជធានី ខេត្ត​ដោយ​សុវត្ថិភាព​។​

 

​គួរ​បញ្ជាក់ថា​ឆ្នាំនេះ​មាន​បេក្ខជន​ដែល​បាន​ចុះឈ្មោះ​ប្រឡង​ក្រោយពេល​ដក​បេក្ខភាព​សរុប​ចំនួន ៨៤ ៩៣០​នាក់ ស្រី ៤០៩៧២​នាក់ មាន​មណ្ឌល​ប្រឡង​សរុប ចំនួន​១៥០​មណ្ឌល ចែកចេញជា​៣៤២៧ បន្ទប់​៕

 

 

Leave a Reply

(*) Required, Your email will not be published