ខៀវ កាញារីទ្ធ ៖ គ្រឿង​ស្រវឹង​កំពុង​បំពុល​យុវវ័យ​កម្ពុជា​លើសពី​៥០​ភាគរយ​

, , Leave a comment

​រាជធានី​ភ្នំពេញ : លោក​វេជ្ជបណ្ឌិត មុំ គង់​នាយក​ប្រតិបត្តិ​អង្គការ​ចលនា ដើម្បី​សុខភាព​កម្ពុជា​បាន​ជម្រាប​នៅក្នុង​ជំនួប​ពិភាក្សា​ការងារ​ជាមួយ​លោក ខៀវ កាញារីទ្ធ រដ្ឋមន្ត្រីក្រសួង​ព័ត៌មាន​កាលពី​ព្រឹក​ថ្ងៃទី​១៨ ខែ សីហា ឆ្នាំ​២០១៥ នៅ​ទីស្តីការក្រសួង​ព័ត៌មាន​។ នេះ​បើ​យោងតាម​គេហទំព័រ​ទីភ្នាក់ងារសារព័ត៌មាន​កម្ពុជា AKP​។​

 

​លោក​វេជ្ជបណ្ឌិត បាន​លើកឡើងថា តាមរយៈ​ការស្ទង់មតិ​ប្រជាជន​កម្ពុជា​ស្តីពី​គ្រឿង​ស្រវឹង​ក្នុង​មនុស្សពេញវ័យ​លើសពី ៥០​ភាគរយ​ដែល​ធ្លាប់បាន ទទួលទាន​គ្រឿង​ស្រវឹង ហើយ​អ្នកប្រើប្រាស់​គ្រឿង​ស្រវឹង​ទាំងនោះ គឺ​ភាគច្រើន​យុវជន​។ ដោយ​ពិនិត្យឃើញ​ការកើនឡើង​នៃ​ចំនួន​អ្នកប្រើប្រាស់​គ្រឿង​ស្រវឹង​នេះ អង្គការ​ចលនា​ដើម្បី​សុខភាព​កម្ពុជា បាន​ខិតខំ​ធ្វើការ​អប់រំ​និង​ពន្យល់​ដល់​ប្រជាជន​អំពី​ផលប៉ះពាល់​នៃ​ការប្រើប្រាស់​គ្រឿង​ស្រវឹង​ដែល​ធ្វើ​ឲ្យ​មាន​ជំងឺ​ប្រមាណ​២០០​ប្រភេទ ដូចជា​ជំងឺមហារីក​បំពង់​អាហារ មហារីក​ថ្លើម លើស​សំពាធ​ឈាម ស្ទះ​សរសៃឈាម បេះដូង ខួរក្បាល ជំងឺ​ក្រិន​ថ្លើម​ជាដើម​។ លោក​វេជ្ជបណ្ឌិត​បានបញ្ជាក់​ថា នៅ​កម្ពុជា​គ្រឿង​ស្រវឹង​ជា​មូលហេតុ​ចម្បង​ទី​២​បណ្តាល​ឲ្យ​មាន​គ្រោះថ្នាក់​ចរាចរ ហើយ​រៀងរាល់ឆ្នាំ​ត្រូវ​ខាតបង់​ថវិកា​ប្រមាណ​៤៤​លាន​ដុល្លារ​អាមេរិក​ដោយសារ​គ្រោះថ្នាក់​ចរាចរ​នេះ​។​

 

​ជាមួយគ្នានេះដែរ​ការសេព​គ្រឿង​ស្រវឹង​ក៏​នាំ​ឲ្យ​កើតមាន​អំពើហិង្សា​ផ្សេងៗ​ជាច្រើន​ទៀត​នៅក្នុង​គ្រួសារ និង​ជាមួយ​អ្នកដទៃ​ផងដែរ​។ ពាក់ព័ន្ធ​ទៅនឹង​បញ្ហា​ផ្សាយពាណិជ្ជកម្ម​អំពី​គ្រឿង​ស្រវឹង​ដែល​លោក​វេជ្ជបណ្ឌិត​បានលើកឡើង​នោះ​លោក​រដ្ឋមន្ត្រី ខៀវ កាញារីទ្ធ បាន​បញ្ជាក់ថា ការផ្សាយពាណិជ្ជកម្ម​ទា​ក់​ទង​ទៅនឹង​គ្រឿង​ស្រវឹង​ក្រសួង​ព័ត៌មាន បាន​ខិតខំ​ធ្វើការ​ហាមឃាត់​ដល់​វិទ្យុ និង​ទូរទស្សន៍​ទាំងអស់​ធ្វើការ​ផ្សាយ ពាណិជ្ជកម្ម​ក្នុង​ម៉ោង​មាស​ពី​ម៉ោង​៦ និង ៣០​នាទី​ល្ងាច​ដល់​ម៉ោង​៨​និង​៣០ នាទី​យប់​។​

 

​ទន្ទឹមនេះ​ក៏បាន​ហាម​មិន​ឲ្យ​ផ្សាយពាណិជ្ជកម្ម​នូវ​សកម្មភាព​ណាមួយ​ដែលជា​ការលើកទឹកចិត្ត​ដល់​អតិថិជន​ឲ្យ​ចង់​សេព​គ្រឿង​ស្រវឹង​ពិសេស​ការទទួល​រង្វាន់​ពី​ការសេព​គ្រឿង​ស្រវឹង​ហើយ​ការចាប់ រង្វាន់ ឬ​ការ​ត្រូវ​រង្វាន់​ពី​ការ​ជាវ​ស្រវឹង​គឺ​យើង អនុញ្ញាត​ឲ្យ​ផ្សាយ​តែ​ពេល​មាន​ពិធីបុណ្យ ធំៗ​ចំនួន​បី​នៅក្នុង​ប្រទេស​កម្ពុជា​ប៉ុណ្ណោះ ។ លោក​រដ្ឋមន្ត្រី​បានបញ្ជាក់​ទៀតថា​ក្រសួង​ព័ត៌មាន​មិនមាន​សិទ្ធិ​ហាមឃាត់​ការផ្សាយពាណិជ្ជកម្ម​គ្រឿង​ស្រវឹង​ទាំងស្រុង​នោះទេ ព្រោះ​វា​មានការ​ប៉ះពាល់​ដល់​ការផលិត​កម្មវិធី​ផ្សេងៗ​របស់​ទូរទស្សន៍​ឯកជន​នានា ដែលមាន​ចំណូល​មកពី​ការផ្សាយពាណិជ្ជកម្ម​គ្រឿង​ស្រវឹង​នេះហើយ​យកទៅ​ទប់​ជាមួយ នឹង​កម្មវិធី​អប់រំ ឬក៏​កម្មវិធី​ផ្សេងៗ​ទៀត​ដែល​មិនមាន​ចំណូល​។​

 

​លោក​រដ្ឋមន្ត្រី​បានបញ្ជាក់​ផងដែរ​ថា ប៉ុន្តែ​បើសិនជា​ច្បាប់​ស្តីពី​ការហាមឃាត់​ការផ្សាយពាណិជ្ជកម្ម​គ្រឿង​ស្រវឹង​នោះ​គឺ​ក្រសួង​នឹង​អនុវត្ត​ដោយ​ហាមឃាត់​វិទ្យុ និង​ទូរទស្សន៍ ទាំងអស់​មិន​ឲ្យ​ផ្សាយពាណិជ្ជកម្ម​អំពី​គ្រឿង​ស្រវឹង​នេះ​បាន ។ ពាក់ព័ន្ធ​ទៅនឹង​សេចក្តីព្រាងច្បាប់​ស្តីពី​គ្រប់គ្រង​គ្រឿង​ស្រវឹង​ដែល​ក្រសួងសុខាភិបាល​ជា​អ្នករៀបចំ​សេចក្តី​ពង្រាង​នោះ លោក​រដ្ឋមន្ត្រី ខៀវ កាញារីទ្ធ បាន​គាំទ្រ​ឲ្យ​មានច្បាប់​នេះហើយ​សូម​ឲ្យ​អ្នករៀបចំ​សេចក្តីព្រាងច្បាប់​នេះ​ពិនិត្យ​ទៅលើ​ផលប៉ះពាល់​នៅពេល​ច្បាប់​នេះ​ចេញ​ជា​ធរមាន​ជៀសវាង នៅពេល​មានច្បាប់​នេះហើយ​មាន​ជន ខិលខូច​មួយចំនួន​យក​ច្បាប់​នេះ​ទៅធ្វើជា​អាជីវកម្ម​ទៅលើ​អ្នក​ស្លូតត្រង់ និង​ប៉ះពាល់​ទៅដល់​វិស័យ​ទេសចរណ៍​ជាដើម​៕

19-8-2015 19-8-2015 (1)

រូបថតៈ ហ៊ុន យុទ្ធគុណ (AKP)

 

Leave a Reply

(*) Required, Your email will not be published