សម្រាប់​សិស្ស​ប្រឡង​សញ្ញាបត្រ​ទុតិយភូមិ​មកពី​ខេត្ត អង្គការ​សង្គម​ស៊ីវិល​សុំ​ឲ្យ​ក្រសួង​អប់រំ​ផ្តល់​កន្លែង​ស្នាក់​

, , Leave a comment

​រាជធានី​ភ្នំពេញ : អង្គការ​សង្គម​ស៊ីវិល​សំណូមពរ​ឲ្យ​ក្រសួង​អប់រំ យុវជន និង​កីឡា រៀបចំ​កន្លែង​ស្នាក់អាស្រ័យ​រយៈពេល​ខ្លី ១​ថ្ងៃ ២​ថ្ងៃ សម្រាប់ បេក្ខជន​ប្រឡង​បាក់​ឌុប​មកពី​ខេត្ត​រាជធានី​ឆ្ងាយៗ នៅ​ទូទាំងប្រទេស ដើម្បី​ឲ្យ​ពួកគេ​កាត់បន្ថយ​ការចំណាយ និង​មាន អារម្មណ៍ល្អ​នៅពេល​ប្រឡង​។​

 

​លោក ឆើ​ន ដា​រិ​ទ្ធ មន្ត្រី​អង្គការក្រៅរដ្ឋាភិបាល​ប​ម្រើ​ផ្នែក​អប់រំ ចង់​ស្នើសុំ​ក្រសួង​អប់រំ ឲ្យ​បង្កើត​មាន​កន្លែង​ស្នាក់នៅ​រយៈពេល​ខ្លី​ជូន​ដល់​សិស្ស​មកពី​ឆ្ងាយៗ សម្រាប់​ប្រឡង​បាក់​ឌុប​ខាងមុខនេះ ដើម្បី​រួមចំណែក​កាត់បន្ថយ​ការចំណាយ​របស់​បេក្ខជន ព្រោះ​បេក្ខជន​ប្រឡង​ភាគច្រើន​ជា​សិស្ស​កូន​កសិករ​ក្រីក្រ​។ លោក​បន្តថា ការស្នើសុំ​នេះ ប្រសិនបើ​ក្រសួង​អប់រំ និង​ផ្នែក​ពាក់ព័ន្ធ​អាច​ដោះស្រាយបាន គឺជា​ដំណោះស្រាយ​មួយ​ដ៏​ល្អ​សម្រាប់​សិស្ស​មាន​ទីលំនៅ​ឆ្ងាយ​ពី​មណ្ឌល​ប្រឡង ធ្វើ​ឲ្យ​ពួកគេ​ចំណេញ​ពេលវេលា​មាន​អារម្មណ៍​ស្ងប់ស្ងាត់​មិនមាន​ការភ័យខ្លាច​ធ្វើដំណើរ កកស្ទះ​ចរាចរណ៍ ឬក៏​គ្រោះថ្នាក់​ចរាចរ​កើតឡើង​ជាយថាហេតុ​។​

 

​លោក សន ជ័យ នាយក​ប្រតិបត្តិ​សម្ព័ន្ធ​គណនេយ្យភាព​សង្គម​អាស៊ី​បូព៌ា ក៏មាន​បំណង​ចង់​ឲ្យ​ក្រសួង​មាន​រៀបចំ​កន្លែង​ស្នាក់នៅ​ជូន​បេក្ខជន​ប្រឡង​បាក់​ឌុប​នេះដែរ សម្រាប់​សិស្ស​មកពី​ស្រុក​ឆ្ងាយ​តាម រាជធានី​ខេត្ត​របស់​បេក្ខជន​ប្រសិន​អាចធ្វើ​ទៅបាន​។ លោក​បន្តថា ការចង់បាន​របៀបនេះ ព្រោះ​កាលពី​ប្រឡង​បាក់​ឌុប​ឆ្នាំ​២០១៤​កន្លង​ទៅបាន​ពិនិត្យឃើញថា​មាន​ម្ចាស់​ផ្ទះសំណាក់​មួយចំនួន​ឆ្លៀត​ដំឡើងថ្លៃ ក្នុងអំឡុងពេល​បេក្ខជន​ប្រឡង​មកពី​ឆ្ងាយៗ មក​ជួល​ផ្ទះ​ស្នាក់នៅ ដែល​ទង្វើ​នេះ​បង្ក​ផលប៉ះពាល់​ធ្ងន់ធ្ងរ​ដល់​ជីវភាព​បេក្ខជន ព្រោះ​ពួកគេ​ភាគច្រើន​ជា​សិស្ស​មាន​ជីវភាព​ខ្សត់ខ្សោយ ជា​កូន​កសិករ​ក្រីក្រ​មកពី​តាម​បណ្តា​ស្រុក ខេត្ត បើ​នៅ​រាជធានី​ក៏មាន​បេក្ខជន​មកពី​បណ្តា​ខណ្ឌ​ជាយក្រុង​ដែរ​។​

 

​លោក រស់ សា​លីន អ្នកនាំពាក្យ​ក្រសួង​អប់រំ យុវជន និង​កីឡា បាន​ឲ្យ​ដឹងថា បញ្ហា​ចង់​ឲ្យ​ក្រសួង​មាន​រៀបចំ​កន្លែង​ស្នាក់​ជូន​បេក្ខជន​ប្រឡង​បាក់​ឌុប​មកពី​រាជធានី​ខេត្ត​ឆ្ងាយៗ​នៅ​ទូទាំងប្រទេស​រយៈពេល​ខ្លី​នេះ កន្លងមក​ក្រសួង​កំពុង​សិក្សា​រក​ដំណោះស្រាយ​ដែរ តែ​ពុំមាន​លទ្ធភាព​រៀបចំ​បាន​នោះទេ​។ ក្រសួង​ធ្លាប់បាន​ពិនិត្យមើល​អគារសិក្សា​នៅ​ទំនេរ ធ្វើជា​កន្លែង​ស្នាក់នៅ​ជូន​បេក្ខជន​ដែរ តែ​អគារ​ទាំងនោះ មិន​ធានា​សុវត្ថិភាព​គ្រប់គ្រាន់​ដល់​បេក្ខជន​។ ប៉ុន្តែ​ទោះជា​យ៉ាងណា​នោះ​លោក​បាន​អំពាវនាវ​ដល់​អាជ្ញាធរ​មូលដ្ឋាន ជួយ​ផ្សព្វផ្សាយ​ដល់​ម្ចាស់​សេវាកម្ម​ស្នាក់នៅ​ទូទាំង​រាជធានី​ខេត្ត មេត្តា​កុំ​ឆ្លៀតឱកាស​ដំឡើងថ្លៃ ដើម្បី​ចូលរួម​ការកាត់បន្ថយ​ការចំណាយ​របស់​បេក្ខជន​មក​ប្រឡង​នេះ​។​

 

​លោក ស្រី ហួត យ៉ា​រី ប្រធាន​មន្ទីរអប់រំ​រាជធានី​ភ្នំពេញ បាន​យល់ស្រប​ដូច​ក្រសួង​ដែរ ព្រោះ​ការងារ​នេះ​ជា​កម្មវិធី​ថ្មី​មិនទាន់​មានលទ្ធភាព​គិតដល់​ចំណុច​នេះ​នៅឡើយ​។ លោកស្រី​បន្តថា ចំពោះ​បេក្ខជន​ប្រឡង​នៅ​រាជធានី​ភ្នំពេញ​មិនមាន​បញ្ហា​ចោទឡើង​ទេ គឺ​នៅ​ថ្ងៃ​ប្រឡង​មាន​ឪពុក ម្តាយ អាណាព្យាបាល និង​បង​ប្អូនគេ​ជូន​មក ដើម្បី​ជួយផ្តល់​ទឹកចិត្ត​ផង និង​កាត់​ចំណាយ​ការជួល​ផ្ទះ​ស្នាក់នៅ​ផង​គ្រាន់តែ​ជួប​ការលំបាក​វេច​ខ្ចប់​បាយ​មក​ហូប​ប៉ុណ្ណោះ​។ ប៉ុន្តែ​នៅតាម​បណ្តា​ខេត្ត វា​ខុស​ដាច់​ឆ្ងាយ​ពី​រាជធានី ដូច្នេះ​កន្លងមក​ក៏​ដូចគ្នា​ដែរ​រដ្ឋ​មិនទាន់មាន​វិធានការ​ដោះស្រាយ​ជូន​អំពី​បញ្ហា​នេះ​នៅឡើយ ដូច​សង្គម​ស៊ីវិល​ស្នើឡើង​ទេ វា​ខុសពី​និស្សិត​មកពី​ខេត្ត​ឆ្ងាយៗ បាន​ចូលរៀន​នៅ​សាកលវិទ្យាល័យ​មាន​រដ្ឋាភិបាល​ជួយ​ដោះស្រាយ ជូន​ប៉ុន្តែ​មិន​ទាំងអស់​នោះទេ​៕

 

Leave a Reply

(*) Required, Your email will not be published