ផែនទី​ដែល​បក្ស​សង្គ្រោះ​ជាតិ​ទិញ នឹង​ប្រគល់​ទៅ​ឲ្យ​រាជបណ្ឌិត្យសភា​នៅថ្ងៃនេះ​

, , Leave a comment

​រាជធានី​ភ្នំពេញ : គណបក្ស​សង្គ្រោះ​ជាតិ​នឹង​ប្រគល់​ផែនទី​ដែល​ខ្លួន​បាន​ទិញ​មកពី​ប្រទេស​បារាំង​ទៅដល់​រាជរដ្ឋាភិបាល​កម្ពុជា ព្រះមហាក្សត្រ និង​រាជបណ្ឌិត្យសភាកម្ពុជា​នៅ​ថ្ងៃ​ចន្ទ​ទី​១០ ខែសីហា​ឆ្នាំ​២០១៥ នេះ ដើម្បី​យកទៅ​ផ្ទៀងផ្ទាត់​ជាមួយ​ផែនទី​របស់​រាជរដ្ឋាភិបាល និង​ផែនទី​ដែល​ខ្ចី​ពី​អង្គការសហប្រជាជាតិ ដើម្បី​បញ្ជាក់ថា មួយណា​ជា​ផែនទី​ដែល​ត្រឹមត្រូវ​។ នេះ​បើ​យោងតាម​ការ​ឲ្យ​ដឹង​របស់​មន្ត្រីជាន់ខ្ពស់​គ​ណ​សង្គ្រោះ​ជាតិ​។​

 

​លោក អ៊ូ ច័ន្ទ​ឫទ្ធិ មន្ត្រីជាន់ខ្ពស់​របស់​គ​ណ​បក្ស​សង្គ្រោះ​ជាតិ​បាន​ឲ្យ​ដឹង​នៅ​ថ្ងៃ​សៅរ៍ ទី​៨ សីហា ឆ្នាំ​២០១៥ ថា គណបក្ស​សង្គ្រោះ​ជាតិ​នឹង​ប្រគល់​ផែនទី​ដែល​ខ្លួន​បាន​ទិញ​នៅក្នុង​ប្រទេស​បារាំង​ទៅដល់​រាជរដ្ឋាភិបាល​កម្ពុជា​ព្រះមហាក្សត្រ និង​រាជបណ្ឌិត្យសភាកម្ពុជា​នៅ​ថ្ងៃ​ចន្ទ​ដើម​សប្តាហ៍​ក្រោយ​។ ការផ្តល់​នេះ គឺ​ដើម្បី​យកទៅ​ផ្ទៀងផ្ទាត់​ជាមួយ​ផែនទី​របស់​រាជរដ្ឋាភិបាល និង​ផែនទី​ដែល​ខ្ចី​ពី​អង្គការសហប្រជាជាតិ ដើម្បី​បញ្ជាក់ថា​មួយណា​ជា​ផែនទី​ដែល​ត្រឹមត្រូវ​។ ផែនទី​ដែល​គណបក្ស​សង្គ្រោះ​ជាតិ​គ្រោង​ផ្តល់​ឲ្យ​ស្ថាប័ន​ពាក់ព័ន្ធ​ទាំងនេះ គឺជា​ផែនទី​បង្ហាញ​ពី​ព្រំដែន​កម្ពុជា​វៀតណាម​ខ្នាត ១/១០០.០០០(​មួយ​លើ​មួយរយ​ពាន់​) បែប​ឌីជីថល​(Digital) ចំនួន​២៦​ផ្ទាំង ដែល​លោក សម រង្ស៊ី ប្រធាន​គណបក្ស​សង្គ្រោះ​ជាតិ​បាន​ទិញ​នៅក្នុង​ប្រទេស​បារាំង​ក្នុងតម្លៃ​១៦៨​ដុល្លារ​អាមេរិក​។ ការសម្រេច​ផ្តល់​ផែនទី​របស់​គណបក្ស​ស​ង្គ្រោះ​ជាតិ​នេះ គឺ​បាន​ធ្វើឡើង​បន្ទាប់ពី​លោក បាន​គី​មូ​ន អគ្គលេខាធិការ​អង្គការសហប្រជាជាតិ​កាលពី​ថ្ងៃទី​៥ ខែសីហា ឆ្នាំ ២០១៥ បានសម្រេច​ឲ្យ​រដ្ឋាភិបាល​កម្ពុជា​ខ្ចី​ផែនទី​ដែល​ខ្លួន​បាន​តម្កល់ទុក នៅ​អង្គការសហប្រជាជាតិ និង​បន្ទាប់ពី​ប្រមុខ​រាជរដ្ឋាភិបាល​កម្ពុជា​អំពាវនាវ​ឲ្យ​គណបក្សប្រឆាំង​បង្ហាញ​នូវ​ផែនទី​ដែល​ខ្លួន​មាន​នេះ​ផងដែរ​។​

 

​លោក អ៊ូ ច័ន្ទ​ឫទ្ធិ បាន​បញ្ជាក់ថា ការប្រគល់​ផែនទី​នេះ គឺ​ដើម្បី​យកទៅ​ផ្ទៀងផ្ទាត់​ជាមួយ​ផែនទី​ដែល​រាជរដ្ឋាភិបាល​កំពុង​ប្រើប្រាស់​សព្វថ្ងៃ និង​ផែនទី​ដែល​អង្គការសហប្រជាជាតិ​ឲ្យ​រាជរដ្ឋាភិបាល​ខ្ចី ដើម្បី​បញ្ជាក់ថា​មួយណា​ត្រឹមត្រូវ​និង​រក​ចំណុច​រួមមួយ​ដែល​អាច​ទទួលយកបាន​ទាំងអស់គ្នា​។​

 

​គួរ​បញ្ជាក់ថា​កន្លងមក​ក្រុមតំណាងរាស្ត្រ​គណបក្ស​សង្គ្រោះ​ជាតិ​បាន​ចោទ​រាជរដ្ឋាភិបាល​កម្ពុ​ជា​ថា ប្រើប្រាស់​ផែនទី​ក្លែងក្លាយ​ក្នុងការ​បោះបង្គោល​ព្រំដែន​ជាមួយ​វៀតណាម ដែល​បានធ្វើ​ឲ្យ​កម្ពុជា​ខាតបង់​ទឹកដី​។ ការលើកឡើង​របស់​ស​មា​ជិ​ក​តំណាងរាស្ត្រ​បក្សប្រឆាំង​ធ្វើ​ឲ្យ​រាជរដ្ឋាភិបាល​កម្ពុ​ជាស​ម្រេច​ចិត្ត​ខ្ចី​ផែនទី​ពី​អង្គការសហប្រជាជាតិ និង​ប្រទេស​មហាអំណាច​ចំនួន​៣ ដើម្បី​យកមក​ធ្វើការ​ផ្ទៀងផ្ទាត់​ជាមួយ​ផែនទី ដែល​រាជរដ្ឋាភិបាល​កំពុង​ប្រើប្រាស់​ដោះស្រាយ​បញ្ហា​ព្រំដែន​ជាមួយ​ប្រទេស​វៀតណាម​។ រាជរដ្ឋាភិបាល​កម្ពុជា​បាន​បង្កើត​គណៈកម្មការ​ចំពោះ​កិច្ច​មួយ​ដែលមាន លោក ឧបនាយករដ្ឋមន្ត្រីរ​ដ្ឋ​មន្ត្រី​ក្រសួងការបរទេស​លោក ហោ ណាំហុង ជា​ប្រធាន​, លោក​ទេសរដ្ឋមន្ត្រី វ៉ា គឹមហុង ប្រធាន​គណៈកម្មការ​ចម្រុះ​កិច្ចការ​ព្រំដែន និង​លោក អ៊ឹម ឈុនលឹម រដ្ឋមន្ត្រីក្រសួង​ដែនដី​ជា​អនុប្រធាន​។ គណៈកម្មការ​នេះ​នឹង​ចាត់ចែង​សម្របសម្រួល​ការទទួល​ប្រគល់​និង ការពិនិត្យ​ផ្ទៀងផ្ទាត់​ផែនទី​របស់​អង្គការ សហប្រជាជាតិ ដោយមាន​ការចូលរួម​ពី​គណបក្សប្រឆាំង រាជបណ្ឌិត្យសភាកម្ពុជា និង​អ្នកជំនាញ​ការងារ​ផែនទី​ជាតិ និង​អន្តរជាតិ​ផងដែរ ដើម្បី​ឲ្យ​ការផ្ទៀងផ្ទាត់​ធ្វើឡើង​ប្រកបដោយ​តម្លាភាព និង​ភាពត្រឹមត្រូវ​។​

 

​លោក​បណ្ឌិត សុខ ទូច ប្រធាន​ក្រុម​ស្រាវជ្រាវ​បញ្ហា​ព្រំដែន​នៃ​រាជបណ្ឌិត្យសភាកម្ពុជា​បាន​ថ្លែងថា ក្រុម​ស្រាវជ្រាវ​បញ្ហា​ព្រំដែន​កម្ពុជា នៃ​រាជ្យ​បណ្ឌិត្យសភា​នឹង​យក​ផែន​ទីនេះ​មក​ផ្ទៀងផ្ទាត់​ជាមួយ​ផែនទី​ចំនួន​៦​ទៀត​ដែល​យក​ពី​ប្រភព​ផ្សេងៗ​គ្នា​។ ជាមួយគ្នានេះ​លោក​បណ្ឌិត សុខ ទូច ក៏បាន​បកស្រាយ​ពី​មូលហេតុ​ដែល​លោក​ស្នើ​ឲ្យ​មាន​ការធ្វើ​វិសោធនកម្ម​មាត្រា​២ នៃ​រដ្ឋធម្មនុញ្ញ​ផងដែរ​។ លោក​បណ្ឌិត​បាន​ឲ្យ​ដឹងថា ផែនទី​ដែល​ទទួលបាន​ពី​អង្គការសហប្រជាជាតិ​នាពេលនេះ​វា​មិនមែនជា​ផែនទី​ដែលមាន​ចែង​នៅក្នុង​រដ្ឋធម្មនុញ្ញ​រប​ស់​កម្ពុជា​នោះទេ​។ ក៏ប៉ុន្តែ​វា​ជា​ផែនទី​ដែល​កម្ពុជា​បានដាក់​ប្តឹងទៅ​អង្គការសហប្រជាជាតិ​អំពី​ការឈ្លានពាន​របស់​ប្រទេសជិតខាង និង​ការទម្លាក់​គ្រាប់បែក​របស់​អាមេរិក​ចូលក្នុង​ទឹកដី​កម្ពុជា​នៅ​ឆ្នាំ​១៩៦៤​មាន​១៨​ផ្ទាំង​។ លោក​បន្តថា យើង​ត្រូវ​ការយក​ផែនទី​ទាំង​នោះមក​ធ្វើការ​ផ្ទៀងផ្ទាត់​រវាង​ផែនទី ដែល​យក​ចេញពី​បណ្ណាល័យ​ខុន​ហ្គ្រេ​ស នៅ​អាមេរិក និង​ផែនទី​ដែល​យក​មកពី​ប្រទេស​បារាំង​ថា តើ​យើង​ត្រូវយក​ផែនទី​មួយណា​មក​អនុវត្ត​ហើយ​មក​ប្រៀបធៀប​ជាមួយ​ផែនទី​ដែល​រាជរដ្ឋាភិបាល​បាន​ប្រើប្រាស់​ជាច្រើន​ឆ្នាំ​មកហើយ ដើម្បី​រក​ឲ្យ​ឃើញ​ចំណុច​ខុស និង​ត្រូវ​ហើយ​បើ​ខុស តើ​វា​ចំណេញ​ដល់​ជាតិ​ទេ បើ​ចំណេញ​យើង​យក បើ​មិន​ចំណេញ​យើង​មិន​យក​ទេ​។​

 

​លោក​បណ្ឌិត សុខ ទូច បាន​ឲ្យ​ដឹង​ទៀតថា បច្ចុប្បន្ន​រាជបណ្ឌិត្យសភាកម្ពុជា​មាន​ផែនទី​មកពី​៦​ប្រភព​ជ្សេ​ង​គ្នា ផែនទី​មួយ​មកពី​បារាំង ផែនទី​មួយ​មកពី​អាមេរិក​(​យក​ចេញពី​បណ្ណាល័យ ខុន​ហ្គ្រេ​ស​) ផែនទី​ពី​រាជរដ្ឋាភិបាល​កម្ពុជា ផែនទី​ពី​អង្គការសហប្រជាជាតិ ផែនទី​បានមកពី​លោក ស៊ាន ប៉េង​សែរ និង​ផែនទី​មួយទៀត បានមកពី​បណ្តាសារ ជាតិ ហើយ​នៅ​ថ្ងៃ​ចន្ទ ទី​១០ ខែសីហា​នេះ​គណបក្ស​សង្គ្រោះ​ជាតិ​បាន​សន្យាថា នឹង​ផ្តល់​ផែនទី​មក​ប្រគល់​ឲ្យ​រាជបណ្ឌិត្យសភាកម្ពុជា ដើម្បី​ពិនិត្យ​ផ្ទៀងផ្ទាត់​។ ពាក់ព័ន្ធ​នឹង​ការស្នើសុំ​ឲ្យ​មានការ​ធ្វើ​វិសោធនកម្ម​រដ្ឋធម្មនុញ្ញ​មាត្រា​២​នោះ​លោក​បណ្ឌិត សុខ ទូច បាន​លើកឡើងថា លោក​បាន​បន្តថា លោក​ពុំទាន់​បាន​សិក្សា​នៅលើ​ផែនដី​ទេ តែ​បាន​សិក្សា​ទៅតាម​ឯកសារ​គឺ​រដ្ឋធម្មនុញ្ញ​មាត្រា​ទី​២ អត់​បាន​ឆ្លើយតប​ទៅនឹង​អ្វី​ជាការ​ពិត​នោះទេ​។ ឧទាហរណ៍​បើ​យកតាម​មាត្រា ២ ដែល​ផែនទី​បាន​បោះពុម្ព​ដោយ​ក្រុម​ភូមិសាស្ត្រ​ឥណ្ឌូចិន នៅ​ឆ្នាំ​១៩៣៣-១៩៥៣​។ ប៉ុន្តែ​បើ​មើល​ដាក់ ហ៊ូ​ត គឺ​នៅ​ឆ្នាំ ១៩១៤​គឺ​បាត់ៗ​ទៅហើយ យើង​ប្រើ​ផែនទី​បោ​ន​ខ្នាត​១​លើ​១០០.០០០ គឺ​ខុស​បាត់ទៅហើយ គឺ​ប្រើ​បានតែ​ជាមួយ វៀតណាម ចុះ​ជាមួយ​ឡាវ ជាមួយ​ថៃ និង​ព្រំដែន​សមុទ្រ គឺ​ខុស​បាត់ទៅហើយ  បើ មិន​កែ​រដ្ឋធម្មនុញ្ញ​។ ជា​ចុងក្រោយ​លោក បាន​បន្ត​អំពាវនាវ​ឲ្យ​មានការ​ឯកភាព​ជាតិ​ជាមុនៗ និង​ទៅធ្វើ​ការចរចា​ជាមួយ​ប្រទេស វៀតណាម​៕

 

 

Leave a Reply

(*) Required, Your email will not be published