យុវវ័យ​មួយចំនួន កំពុង​ប្រឈម​នឹង​បញ្ហា​ផ្លូវចិត្ត​

, , Leave a comment

​ជំងឺ​ថប់​អារម្មណ៍​កើតមាន​ច្រើនជាងគេ​ក្នុងចំណោម​ជំងឺផ្លូវចិត្ត​ដទៃទៀត ជាពិសេស​តែងមាន​លើ​ស្ត្រីភេទ​ច្រើនជាង​បុរស​។ ជំងឺ​នេះ​បណ្តាលមកពី​លោកអ្នក​ជួ​បញ្ហា​អាក្រក់ៗ​ម្តង​ហើយ​ម្តងទៀត​ពី​អតីតកាល​ដូចជា ការ​គំរាម​សម្លាប់ ភ្លើង​ឆេះ​ផ្ទះ សង្គ្រាម ការបំបែកបំបាក់ អំពើហិង្សា​ក្នុង​គ្រួសារ និង​បញ្ហា​ផ្សេងទៀត​ក្នុង​ខ្សែជីវិត​។​

 

​ជំងឺ​ថប់​អារម្មណ៍ ឬ​បញ្ហា​ផ្លូវចិត្ត​នេះ​មិនមែន​កើតឡើង​ចំពោះតែ​យុវវ័យ​សម័យថ្មី​នោះទេ តែមាន​គ្រប់​សម័យកាល​ទាំងអស់​តាំងពី​សម័យមុន និង​បច្ចុប្បន្ន ហើយ​ទៅ​អនាគត​ក៏​បញ្ហា​ផ្លូវចិត្ត​នៅតែ​កើតមានឡើង​ដែរ​។ បញ្ហា​ផ្លូវចិត្ត​ដែល​កើតមាន​បណ្តាលមកពី​កត្តា​មួយចំនួន ដូចជា វប្បធម៌ បច្ចេកវិទ្យា ការអប់រំ និង​សង្គម​ជាដើម​។​

 

​ជា​ការពិត​ក្នុងពេលដែល​ពួកគេ​មាន​បញ្ហា​ផ្លូវចិត្ត ឬ​ជំងឺផ្លូវចិត្ត​នោះ​នឹង​បណ្តាល​ឲ្យ​មាន​ផលប៉ះពាល់​យ៉ាងធ្ងន់ធ្ងរ​ទៅលើ​យុវជន​ខ្លួនឯង គ្រួសារ និង​សង្គម​។ ផលប៉ះពាល់​ចំពោះ​យុវវ័យ​មាន​ពីរ​ដំណាក់កាល គឺ​រយៈពេល​ខ្លី និង​រយៈពេល​វែង​។ ក្នុង​រយៈពេល​ខ្លី​បញ្ហា​ផ្លូវចិត្ត​ធ្វើ​ឲ្យ​យុវជន​បាត់បង់​ឱកាស​ក្នុងការ​ក្រេប​យកចំណេះ​វិជ្ជា និង​ខាត​ពេលវេលា ធ្វើ​ឲ្យ​ប៉ះពាល់​ដល់​សុខភាព​ផ្លូវកាយ ហើយ​ករណីខ្លះ​បញ្ហា​ផ្លូវចិត្ត​ធ្វើ​ឲ្យ​យុវជន​ប្រើប្រាស់​គ្រឿងញៀន​គំហុក ដែល​នាំ​ឲ្យ​បាត់​បង់ជីវិត ដោយសារ​គាំងបេះដូង និង​ការពុល​ខ្លាំងពេក​។ ចំណែក​ការប៉ះពាល់​យូរអង្វែង​វិញ​អាចធ្វើ​ឲ្យ​បាត់បង់​អនាគត និង​បាត់​បង់អស់​បំណង​ដែល​ចង់​ធ្វើ​។​

 

​ករណី​ខ្លះទៀត អ្នកមាន​បញ្ហា​ផ្លូវ​ចិត្តបាន​ផឹកស្រា និង​គ្រឿង​ស្រវឹង ដែល​នាំ​ឲ្យ​ប៉ះពាល់​ដល់​សុខភាព និង​កើតជា​ជំងឺ​ផ្សេងៗ ដូចជា​រលាក​ក្រពះ ពោះ វៀន​ក្រិន​ថ្លើម​ជាដើម និង​អាចធ្វើ​ឲ្យ​ប៉ះពាល់​ដល់​ប្រព័ន្ធ​ខួរក្បាល ហើយក៏​វិ​វត្ត​ទៅដល់​ជំងឺផ្លូវចិត្ត​រ៉ាំរ៉ៃ​មួយជីវិត​។​

 

​យុវវ័យ​ដែលមាន​បញ្ហា​ផ្លូវចិត្ត​ខ្លួនឯង​ផ្ទាល់ គួរ​មាន​ផែនការ​ប្រតិបត្តិ​យ៉ាង​ត្រឹមត្រូវ និង​ស្វែងយល់​ឲ្យ​បាន​ច្បាស់​អំពី មូលហេតុ និង​ផលប៉ះពាល់​ដែល​បណ្តាល​ឲ្យ​មាន​បញ្ហា​ផ្លូវចិត្ត​។ យុវវ័យ​មិនគួរ​ជ្រើសរើស​ដំណោះស្រាយ​ទាំងឡាយណា​ដែល​នាំ​ឲ្យ​មាន​ផលប៉ះពាល់ ឬ​ផ្តល់នូវ​គុណវិបត្តិ​សម្រាប់​ខ្លួនឯង គ្រួសារ និង​សង្គម​។ គួរ​ទៅ​ពិគ្រោះ​យោបល់​ជាមួយនឹង​អ្នកឯកទេស ជំនាញ​ផ្លូវចិត្ត ដើម្បី​ស្វែងរក​ដំណោះស្រាយ និង​ព្យាបាល​បញ្ហា​ផ្លូវចិត្ត​៕

29-7-2015

 

Leave a Reply

(*) Required, Your email will not be published