ព្រឹទ្ធសភា ពិនិត្យ និង​ឲ្យ​យោបល់​លើ​សេចក្តីព្រាងច្បាប់​អង្គការ នៅ​ថ្ងៃ​សុក្រ​ស្អែក​

, , Leave a comment

​រាជធានី​ភ្នំពេញ : សម្តេច​វិបុល​សេនា​ភក្តី សាយ ឈុំ ប្រធានព្រឹទ្ធសភា​នៃ​ព្រះរាជាណាចក្រ​កម្ពុជា​កាល​ពី​ព្រឹក​ថ្ងៃទី​២២​កក្កដា បាន​ដឹកនាំ​កិច្ចប្រជុំ​គណៈកម្មាធិការ​អចិន្ត្រៃយ៍​ព្រឹទ្ធសភា​។ បន្ទាប់ពី​បាន​ពិនិត្យ និង​ពិភាក្សា​រួចមក គណៈកម្មាធិការ​អចិន្ត្រៃយ៍​ព្រឹទ្ធសភា​បានកំណត់​យក​ថ្ងៃ​សុក្រ ទី​២៤ ខែកក្កដា ឆ្នាំ ២០១៥ វេលា​ម៉ោង​៨:០០​ព្រឹក បន្ត​សម័យប្រជុំ​លើក​ទី​៧​ព្រឹទ្ធសភា​នីតិកាល​ទី​៣​។​

 

​របៀបវារៈ​ដែល​នឹង​លើក​យកមក​ពិនិត្យ​ពិភាក្សា គឺ​១-​ការប្រកាស​ទទួលស្គាល់ សមាជិក​ព្រឹទ្ធសភា​ថ្មី និង​២-​ពិនិត្យ និង​ឲ្យ យោបល់​លើ​សេចក្តីព្រាងច្បាប់ ស្តីពី​សមាគម និង​អង្គការ​មិនមែន​រដ្ឋាភិបាល​។​

 

​សេចក្តីព្រាងច្បាប់​ស្តីពី​សមាគម និង​អង្គការ​មិនមែន​រដ្ឋាភិបាល ដែលមាន​៩​ជំពូក និង​៣៩​មាត្រា មាន​គោលបំណង​ធានា​ការពារ​សិទ្ធ​សេរីភាព និង​លើកកម្ពស់​ចលនា​បង្កើត​សមាគម​អង្គការ​មិនមែន​រដ្ឋាភិបាល​នៅក្នុង​ព្រះរាជាណាចក្រ​កម្ពុជា ដើម្បី​ការពារ​ផលប្រយោជន៍​ស្របច្បាប់ និង​ការពារ​ផលប្រយោជន៍​សាធារណៈ ព្រមទាំង​ពង្រឹង​កិច្ចសហប្រតិបត្តិការ​ក្នុង​ភាពជា​ដៃគូ​រវាង​សមាគម​និង​អង្គការ​មិនមែន​រដ្ឋាភិបាល​ជាមួយ​រាជរដ្ឋាភិបាល​កម្ពុជា​។​

 

​គួររំលឹកថា សមាជិក​រដ្ឋសភា​គណ​បក្ស​ប្រជាជន​កម្ពុជា​ចំនួន​៦៨​រូប បាន​ឆ្លង​សេចក្តីព្រាងច្បាប់​ស្តីពី​សមាគម និង​អង្គការ​មិនមែន​រដ្ឋាភិបាល​ដោយ​ឯក​បក្ស​ជា​ឯកច្ឆន្ទ កាលពី​ព្រឹក​ថ្ងៃ​ចន្ទ ទី​១៣ ខែកក្កដា បើទោះបី​អ្នកតំណាងរាស្ត្រ​គណបក្ស​សង្គ្រោះ​ជាតិ​ចំនួន​៥៥​រូប ធ្វើពហិការ​មិន​ចូលរួម​ពិភាក្សា​និង​អនុម័ត​ក្នុង​កិច្ចប្រជុំពេញអង្គ​រដ្ឋសភា​នេះ​។​

 

​សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ ដែល​ឡើងមក​ការពារ​ច្បាប់​នេះ​បាន​ថ្លែងថា ច្បាប់​នេះ​មិន​មានការ​រឹតបន្តឹង​សេរីភាព​អង្គការ​សង្គម​ស៊ីវិល​ឡើយ ផ្ទុយទៅវិញ​ត្រូវបាន​រៀបចំឡើង ដើម្បី​លើកស្ទួយ​ការប្រើប្រាស់​សិទ្ធិសេរីភាព​ក្នុងការ​បង្កើត​សមាគម និង​អង្គការ​មិនមែន​រដ្ឋាភិបាល ក្នុង​ក្របខណ្ឌ​នីតិរដ្ឋ និង​លើកកម្ពស់ កិច្ចសហប្រតិបត្តិការ​ក្នុង​ភាពជា​ដៃគូ​រវាង​សមាគម និង​អង្គការ​មិនមែន​រដ្ឋាភិបាល ជាមួយ​អាជ្ញាធរ​សាធារណៈ​ក្នុងការ​អភិវឌ្ឍ​កម្ពុជា​លើ​គ្រប់​វិស័យ​តាម​គោលការណ៍​ប្រជាធិបតេយ្យ​។​

 

​ទោះជា​បែបនេះ​ក្តី​សម្តេច​ក្រឡាហោម បានបញ្ជាក់​ថា​នឹង​អាចមាន​ធ្វើ​វិសោធនកម្ម​លើ​ច្បាប់​នេះ​ប្រសិនបើ​ការអនុវត្ត​មាន​ភាពខ្វះ​ចន្លោះ និង​មាន​ភាព​ប៉ះពាល់​ខ្លាំង​៕

23-7-2015

 

Leave a Reply

(*) Required, Your email will not be published