UN នឹង​ឆ្លើយតប​ចំពោះ​សំណើ​របស់​កម្ពុជា​ក្នុង​ការសុំ​ខ្ចី​ផែនទី​

, , Leave a comment

​រាជធានី​ភ្នំពេញ : លិខិត​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​កម្ពុជា​ផ្ញើជូន​អគ្គលេខាធិការ​អង្គ​សហប្រជាជាតិ ក្នុងការ​ស្នើសុំ​ខ្ចី​ផែនទី ដែល​តម្កល់​នៅ​អង្គការសហប្រជាជាតិ​មក​ពិនិត្យ​ផ្ទៀងផ្ទាត់​ជាមួយ​ផែនទី​ដែល​រដ្ឋាភិបាល​បាន​ប្រើប្រាស់​ដោះស្រាយ​បញ្ហា​ព្រំដែន​ជាមួយ​ប្រទេសជិតខាង​នោះ កំពុង​ត្រូវ​ពិនិត្យ និង​រៀបចំ​ឆ្លើយតប​មក​កម្ពុជា​វិញ​។ នេះ​បើ​យោងតាម​ប្រភព​អ្នកនាំពាក្យ​អង្គការសហប្រជាជាតិ​ប្រាប់​បណ្តាញ​ព័ត៌មាន​កាលពី​ម្សិលមិញ​។​

 

​អ្នកនាំពាក្យ​រង​របស់​អង្គការសហប្រជាជាតិ​លោក Farhan Haq បាន​ឲ្យ​ដឹងថា «​អគ្គលេខាធិការ​អង្គការសហប្រជាជាតិ​បានទទួល​បាន​លិខិត​នោះ​ហើយ ។ យើង​កំពុងតែ​ពិនិត្យមើល​ដើម្បី​ឆ្លើយតប​នៅពេលនេះ​»​។ កាល​ទី​៦ ខែកក្កដា ឆ្នាំ​២០១៥​កន្លង​នេះ សម្តេច​តេ​ជោ​នាយករដ្ឋមន្ត្រី ហ៊ុន សែន បាន​សរសេរ​លិខិត​មួយច្បាប់​ទៅ​អគ្គលេខាធិការ​អង្គការសហប្រជាជាតិ​លោក បាន គី​មូ​ន ដោយ​ស្នើសុំ​ផែនទី​កម្ពុជា​ដែល​តម្កល់ទុក​នៅ​អង្គការ​ប្រជាជាតិ ដើម្បី ពិនិត្យ​ផ្ទៀងផ្ទាត់​ជាមួយ​ផែនទី​ដែល​រាជរដ្ឋាភិបាល​បាន​ប្រើប្រាស់​ដោះស្រាយ​បញ្ហា​ព្រំដែន​ជាមួយ​ប្រទេស​វៀតណាម​។​

 

​លិខិត​របស់​សម្តេច តេ​ជោ ហ៊ុន សែន ជា​ភាសា​ខ្មែរ និង​អង់គ្លេស បាន​ឲ្យ ដឹងថា​«​ខ្ញុំ​សរសេរ​លិខិត​នេះ​ជូន​ឯកឧត្តម​ដើម្បី​ស្នើសុំ​កិច្ចសហការ​ពី​សំណាក់​អង្គការសហប្រជាជាតិ​លើ​កិច្ចការ​មួយ​ដែលមាន​សារៈសំខាន់​ជាទីបំផុត​សម្រាប់​អធិបតេយ្យ និង​បូរណភាព​ទឹកដី របស់​ព្រះរាជាណាចក្រ​កម្ពុជា ដែលជា​សមាជិក​របស់​អង្គការសហប្រជាជាតិ​»​។​

 

​សម្តេចនាយក​រដ្ឋមន្ត្រី បន្តថា មជ្ឈដ្ឋាន​នៅក្នុង​ប្រទេស​កម្ពុ​ជាមួយ​ចំនួន​កំពុង​ញុះញង់​បង្កើត​ស្មារតី​ជាតិនិយម​ជ្រុល បំភាន់​មតិ​ជាតិ​និង​អន្តរជាតិ ដើម្បី​កេងចំណេញ​នយោបាយ​លើ​បញ្ហា​កំណត់ និង​បោះបង្គោល​ព្រំដែន​ជាមួយ​ប្រទេសជិតខាង​។ សម្តេច​តេ​ជោ បញ្ជាក់ទៀតថា « ខ្ញុំ​សូម​ស្នើ​ឯកឧត្តម​អគ្គលេខាធិការ​មេត្តា​អនុញ្ញាត ឲ្យ​រាជរដ្ឋាភិបាល​កម្ពុជា​ខ្ចី​ផែនទី​ដើម​ទាំងអស់​ដែល​កម្ពុជា​បាន​តម្កល់ទុក​នៅ​អង្គការសហប្រជាជាតិ​មកប្រើប្រាស់ ដើម្បី​ផ្ទៀងផ្ទាត់​បញ្ជាក់​អំពី​ភាពត្រឹមត្រូវ​ពិតប្រាកដ​ជាមួយ​ផែនទី​ដែល​រាជរដ្ឋាភិបាល​កម្ពុជា​បាននិងកំពុង​ប្រើប្រាស់​សម្រាប់​កំណត់ព្រំដែន​គោក និង​ព្រំ​ដែនទឹក​រវាង​ព្រះរាជាណាចក្រ​កម្ពុជា ជាមួយនឹង​ប្រទេសជិតខាង​»​។​

 

​លោក អ៊ុំ សំអាន តំណាងរាស្ត្រ គណបក្ស​សង្គ្រោះ​ជាតិ​ដែល​ចោទថា​រដ្ឋាភិបាល​ប្រើប្រាស់​ផែនទី​ក្លែងក្លាយ​នោះបាន​មានប្រសាសន៍ថា មានតែ​ផែនទី​តម្កល់​នៅ​អង្គការសហប្រជាជាតិ​ទេ​ដែល​អាចធ្វើ​ឲ្យ​សាធារណជន​អាច​ដឹងថា តើ​រដ្ឋាភិបាល​ប្រើប្រាស់​ផែនទី​ក្លែងក្លាយ ឬ​យ៉ាងណា​។ លោក​បន្តថា​កន្លងទៅ​ប្រធាន​គណៈកម្មាធិការ​កិច្ចការ​ព្រំដែន​លោក វ៉ា គឹមហុង បានលើកឡើង​ថា​លោក​ចម្លង​ផែនទី​ដែល​ព្រះ​បរម​រតន​កោដ្ឋ​បាន​តម្កល់​នៅ​អង្គការ​ស​ប្រជាជាតិ​ពី​ប្រទេស​បារាំង​។ លោក​បន្តថា​លោក​ស្នើ​ឲ្យ​មានការ​ចូលរួម​ពី​ភាគី​ចម្រុះ​ចូលរួម​ពិនិត្យ​លើ​ផែនទី​ដែល​អង្គការសហប្រជាជាតិ​ផ្តល់​ឲ្យ​។​

 

​លោក​បញ្ជាក់ថា​«​ការផ្ទៀងផ្ទាត់​ហ្នឹង​ផងដែរ​សុំ​ឲ្យ​មានការ​ចូលរួម​ពី​គណបក្សប្រឆាំង តំណាង​រដ្ឋាភិបាល សង្គម​ស៊ីវិល និង​អ្នកជំនាញ​ព្រំដែន និង​តំណាង​អគ្គលេខាធិការ​អង្គការសហប្រជាជាតិ​។ យើង​ស្វាគមន៍​នឹង​ការសុំ​ផែនទី​ពី​អង្គការសហប្រជាជាតិ​ហើយ​យើង​នឹង​រង់ចាំ​ផ្ទៀងផ្ទាត់​ផែនទី​ដែល​យើង​មាន​ជាមួយ​ផែនទី​នោះ​»​។​

 

​ក្រុមប្រឹក្សា​ឃ្លាំមើល​កម្ពុជា​អះអាងថា រដ្ឋាភិបាល​កម្ពុជា​កំពុង​ប្រើប្រាស់​ផែន ទី​ក្លែងក្លាយ​សម្រាប់​បោះបង្គោល​ព្រំដែន​ជាមួយ​ប្រទេសជិតខាង ។ នៅក្នុង​សេចក្តីថ្លែងការណ៍​ចេញផ្សាយ​នៅ​ថ្ងៃទី​៧ ខែកក្កដា ឆ្នាំ​២០១៥ បាន​ឲ្យ​ដឹងថា​ក្រុមប្រឹក្សា​ឃ្លាំ មើល​កម្ពុជា​ចាត់ទុក​ការស្នើសុំ​ផែនទី​ពី អង្គការសហប្រជាជាតិ​ជាការ​សារភាព និង​ទទួលស្គាល់​របស់​រដ្ឋាភិបាល​កម្ពុជា ថា​ខ្លួន​បាន​ប្រើប្រាស់​ផែនទី​ក្លែងក្លាយ សម្រាប់​បោះបង្គោល​ព្រំដែន​ជាមួយ​វៀតណាម នាពេល​កន្លងមក​។​

 

​ទាក់ទិន​ការចោទប្រកាន់​នេះ​អ្នកនាំពាក្យ​អង្គភាព​ព័ត៌មាន​និង​ប្រតិកម្ម​រហ័ស​នៃ​ទីស្តីការគណៈរដ្ឋមន្ត្រី លោក ទិ​ត សុធា ឲ្យ​ដឹងថា​រដ្ឋាភិបាល​ស្នើសុំ​ខ្ចី​ផែនទី​ពី​អង្គការ​សហ​ប្រជា​តិ​នេះ​គឺ​ដើម្បី​បញ្ជាក់​ការពិត​បន្ថែម​ទៅលើ​ការចោទប្រកាន់​នាពេល កន្លងមក​ថា​កម្ពុជា​បាន​ប្រើប្រាស់​ផែនទី​ក្លែងក្លាយ​។ លោក​បន្ថែមថា​«​អីចឹង​គ្រាន់តែ​ចង់​បញ្ជាក់​ផ្ទៀងផ្ទាត់​បន្ថែមទៀត​ដើម្បី បំភ្លឺភ្នែក​ទៅដល់​ក្រុមប្រឆាំង​នោះ​ទើប​រាជរដ្ឋាភិបាល​ស្នើសុំ​ខ្ចី​ផែនទី​ពី​អង្គការសហប្រជាជាតិ​អញ្ចឹង​សូមកុំ​បកស្រាយ​ខុសពី​ការពិត​ដែល​ខ្លួន​បាន​ចោទ​រាជរដ្ឋាភិបាល​»​។

 

«​ចំណុច​បាតុភាព​ថ្មីៗ នៅតាម​បណ្តោយ​ព្រំដែន​កម្ពុជា​វៀតណាម​នឹងត្រូវ​ស្ថិតក្នុង របៀបវារៈ​កិច្ចប្រជុំ​គណៈ​ក​មា្ម​ធិ​ការ​ចម្រុះ​» កាលពី​ម្សិលមិញ គណៈកម្មាធិការ​ចម្រុះ​កិច្ចការ​ព្រំដែន​កម្ពុជា​-​វៀតណាម បានចាប់ផ្តើម​កិច្ចប្រជុំ​របស់ខ្លួន ដើម្បី​ពិភាក្សា​លើ បញ្ហា​ព្រំដែន​រវាង​ប្រទេស​ទាំងពីរ ដែល នៅ​សេសសល់​មិនទាន់​ដោះស្រាយ​ចប់ និង​បាតុភាព​មួយចំនួន ដែល​បានកើត មាន​ឡើង​ថ្មីៗ​នេះ នៅតាម​បណ្តោយ ព្រំដែន​នៃ​ប្រទេស​ទាំងពីរ​។​

 

​កិច្ចប្រជុំ​ខាងលើនេះ បានរៀបចំ​ឡើង បន្ទាប់ពី​មាន​បាតុភាព​ថ្មីៗ នៅតាម បណ្តោយ​ព្រំដែន​កម្ពុជា​-​វៀតណាម ដូចជា  ការដែល​វៀតណាម បាន​ចូល​បាញ់ថ្នាំ បំផ្លាញ​ដំណាំ​កសិករ​ខ្មែរ ការជីក​ស្រះ​ទឹក​នៅ​ខេត្ត​នៅ​ខេត្តរតនគិរី ការសាងសង់ ប៉ុស្តិ៍​យោធា ការកសាង​ផ្លូវ​យុទ្ធសាស្ត្រ​នៅតាម​បណ្តោយ​ព្រំដែន​ដោយ​ភាគី​វៀតណាម​។ ជាពិសេស​ការប៉ះទង្គិច​គ្នា​កាលពី​ថ្មីៗ​នេះ​រវាង​ប្រជាពលរដ្ឋ យុវជន ព្រះសង្ឃ ដែល​ដឹកនាំ​ដោយ​តំណាងរាស្ត្រ​គណបក្ស​សង្គ្រោះ​ជាតិ ជាមួយ​ប្រជាពលរដ្ឋ​វៀតណាម កាលពី​ថ្ងៃទី​២៨ ខែមិថុនា ឆ្នាំ​២០១៥ ព្រំដែន​លេខ​២០២ និ​២០៣ ស្ថិតនៅ​ភូមិ ធ្លក​ថ្មី ឃុំ​ត្នោត ស្រុក​កំពង់រោ​ទ ខេត្ត​ស្វាយ រៀង ដែល​បណ្តាល​ឲ្យ​មាន​អ្នករងរបួស ទាំងសងខាង​។​

 

​កិច្ចប្រជុំ​គណៈ​ម្មា​ធិ​ការ​ចម្រុះ​កិច្ចការ​ព្រំដែន​កម្ពុជា​វៀតណាម​នេះ​ធ្វើឡើង​ដោយ​បិទទ្វារ នៅ​ទីស្ដីការគណៈរដ្ឋមន្ត្រី រាជធានី ភ្នំពេញ​ហើយ ហើយ​ភាគី​កម្ពុ​ជាមាន​គ្នា ប្រមាណ​ជាង​១០ នាក់​ដឹកនាំ​ដោយ​លោក វ៉ា គឹមហុង ទេសរដ្ឋមន្ត្រី​ទទួលបន្ទុក​កិច្ចការ​ព្រំដែន​កម្ពុជា និង​ភាគី​វៀតណាម​មាន គ្នា​ប្រមាណ​ជាង​១០ នាក់​ដូចគ្នា ដឹកនាំ ដោយ​លោក ហូរ សិន​សឺ​ន (Ho Zuan Sen) អនុរដ្ឋមន្ត្រី​ទី​១ និង​ជា​ប្រធាន​គណៈកម្មាធិការ​ចម្រុះ​កិច្ចការ​ព្រំដែន​វៀតណាម​។ កិច្ចប្រជុំ​ខាងលើនេះ​មាន​គម្រោង​ធ្វើឡើង​នៅ ខេត្តសៀមរាប ប៉ុន្តែ​ត្រូវបាន​ប្តូរ​មក​ទីក្រុង ភ្នំពេញ​វិញ ហើយ​តាម​កម្មវិធី​បញ្ជាក់ថា កិច្ចប្រជុំ​នេះ រៀបចំ​ធ្វើឡើង​រយៈពេល​ពីរ​ថ្ងៃ គឺ​ថ្ងៃទី​៧​និង​៨ ខែកក្កដា ឆ្នាំ​២០១៥ ហើយ លទ្ធផល​យ៉ាងណា​នោះ​នៅ​មិនទាន់​ទទួល បាន​នៅឡើយ​ទេ ប៉ុន្តែ​យោងតាម​របៀប វារៈ​នៃ​កិច្ចប្រជុំ​រវាង​ប្រធាន​គណៈ​ក​មា្ម​ធិ​ការ ចម្រុះ​ខណ្ឌសីមា និង​បោះបង្គោល​ព្រំដែន គោក (​កម្ពុជា​-​វៀតណាម​, វៀតណាម​-​កម្ពុជា​) មាន​ពីរ​ថ្ងៃ គឺ​នៅ​ថ្ងៃទី​៧ និង​ថ្ងៃ ទី​៨ ខែកក្កដា ឆ្នាំ​២០១៥​។​

 

​តាមរបៀប​វារៈ​នៃ​កិច្ចប្រជុំ​រវាង​ប្រធាន គណៈកម្មាធិការ​ចម្រុះ​ខណ្ឌសីមា ដែល ការិយាល័យ​របស់​យើង​ទទួលបាន​ចំណុច​ដែល​ត្រូវ​ពិភាក្សា​នៅក្នុង​កិច្ចប្រជុំ​នោះ​រួមមាន​៖

 

ក​-​ការបើក​កិច្ចប្រជុំ​ដោយ​ប្រធាន គណៈកម្មាធិការ​ព្រំដែន​នៃ​ប្រទេស​ទាំងពីរ​
​ខ​-​អនុម័ត​របៀបវារៈ​នៃ​កិច្ចប្រជុំ​ដោយ​ប្រធាន​គណៈកម្មការ​ចម្រុះ​នៃ​ប្រទេស​ទាំងពីរ
​និង គ​-​ចំណុច​ដែល​ត្រូវ​ពិភាក្សា​រួមមាន​ទី
១,​ស្តាប់​របាយការណ៍​រប​ស់​ប្រធាន​ក្រុមការងារ ពិសេស ដែល​បាន​ចុះ​អនុវត្ត​លើដី​ជាក់ ស្តែង នៅ​៥ តំបន់ ( ៣០-៤០, ៤០-៤៥, ១៣៨-១៤៧, ២៤៧-២៥៣ និង​២៩៥-៣០២ ) កាលពី​ថ្ងៃទី​៣ ដល់​ថ្ងៃទី​១៩ ខែមិថុនា ឆ្នាំ​២០១៥ តាម​ខ្លឹមសារ​ដូច​មាន ក្នុង​ចំណុច​១.១ និង​១.២ នៃ​កំណត់ហេតុ កិច្ចប្រជុំ​រវាង​គណៈកម្មាធិកា​រ​ចម្រុះ​ទាំងពីរ នៅ​ទីក្រុង​ហាណូយ នា​ថ្ងៃទី​២២ ដល់​ថ្ងៃ ទី​២៧ ខែមេសា ឆ្នាំ​២០១​។ ទី​២,​អនុម័ត យក​កំណត់ហេតុ​ទាំង​៥​របស់​ក្រុមការងារ​ពិសេស ដែល​បាន​ចុះ​អនុវត្តន៍​លើដី​ជាក់ស្តែង កាលពី​ថ្ងៃទី​៣ ដល់​ថ្ងៃទី​១៩ ខែមិថុនា ឆ្នាំ​២០១​។ ទី​៣, ស្តីពី​ដំណើរ​ការបោះបង្គោល​ព្រំដែន​បំពេញបន្ថែម (​កម្ពុជា-សេស វៀតណាម​-​គូ​) ទី​៤, ពិភាក្សា​ពី ចំណែក​ដី ដែល​នៅ​បន្ត​គ្រប់គ្រង​ដោយ ភាគី​ទាំងពីរ បន្ទាប់ពី​ឯកភាព​លើ​ខ្សែ​ព្រំដែន ទី​៥,​កិច្ចប្រជុំ​ក្រុម​ជំនាញ លើក​ទី​២៣​ដើម្បី​បន្តការងារ​បច្ចេកទេស​ដែល​នៅ​សេសសល់ ទី​៦, ស្តីពី​សម្នើ​របស់​ប្រធាន​ក្រុមបច្ចេកទេស​ចម្រុះ ស្នើ​បន្ថែម​បង្គោល​បំពេញ​បន្ថែមចំនួន​១៥ទៀត នៅ​ខេត្តព្រៃវែង-​ដុងថាប់ ទី​៧, ពិភាក្សា​ស្តីពី​តំបន់​បង្គោល​ព្រំដែន​លេខ​១៣៧ (១.២ ) ទី​៨, ស្តីពី​ការកំណត់​កាលបរិច្ឆេទ​សម្ពោធ​បង្គោល​ព្រំដែន​បំពេញបន្ថែម និង​តម្រុយ​បង្គោល​ព្រំដែន​នៅ​ខេត្ត​ត្បូងឃ្មុំ​-ប៊ិន​ភឿ​ក ដោយ​ប្រធាន​ទាំងពីរ និង​ទី​៩, ស្តីពី​ការអនុវត្ត​គោលការណ៍​ទាំងឡាយ ដែល​បាន​ឯកភាពគ្នាកន្លងមក​។​

 

​ដោយឡែក​កិច្ចប្រជុំ​នោះ​ក៏មាន​គម្រោង​ពិភាក្សា​លើ​បញ្ហា​ផ្សេងៗ​ផងដែរ ដែល​ទី​១, ស្តីពី​តំបន់​បាតុភាព​ដែល​កើតមាន​នៅតាម បណ្តោយ​ព្រំដែន ទី​២, ការសាងសង់​ប៉ុស្តិ៍ និង​ផ្លូវ​យុទ្ធសាស្ត្រ​នៅតាម​បណ្តោយ ព្រំដែន​ដោយ​វៀតណាម និង​ទី​៣, បាតុភាព នៅ​ទីតាំង​បង្គោល​ព្រំដែន​លេខ ២០២ និង ២០៣ នៅ​ខេត្តស្វាយរៀង​តៃនិញ​៕

08-7-2015 (1) 08-7-2015

 

Leave a Reply

(*) Required, Your email will not be published