សម្តេច​តេ​ជោ​នាយករដ្ឋមន្ត្រី ផ្តល់​អនុសាសន៍​ការពារ​ធនធាន​ជលផល​

, , Leave a comment

02-7-2015

​ខេត្តកំពង់ចាម : សម្តេច​តេ​ជោ ហ៊ុន សែន នាយករដ្ឋមន្ត្រី​ក្នុងឱកាស​លែង​មេ និង​កូន​ត្រី ចូលទៅក្នុង​អាង​ធម្មជាតិ​កាលពី​ម្សិលមិញ​បានធ្វើ​ការជំរុញ​ឲ្យ​មានការ​បង្កើន​ការចិញ្ចឹម​ត្រី និង​ការជំរុញ​ឲ្យ​មាន​ការលែង​កូន​ត្រី​ឲ្យ​បាន​ច្រើន​នៅតាម​បឹង​ព្រែក​ធម្មជាតិ​ឲ្យ​បាន​ច្រើន​ដោយ​មិនចាំបាច់​តែ​ទិវា​មច្ឆជាតិ​នោះទេ​។ ជាមួយ​នោះ​សម្តេច​តេ​ជោ បានធ្វើការ​អំពាវនាវ​ទៅកាន់​ពលរដ្ឋ​ដែលមាន​៧​ចំណុច​សំខាន់​ដែល​ពាក់ព័ន្ធ​ទៅដល់​ការអភិរក្ស និង​ការធ្វើ​ឲ្យ​ចំនួន​ត្រី​នៅក្នុង​ប្រទេស​កម្ពុ​ជាមាន​ការកើនឡើង​ដើម្បី​បំពេញ​ឲ្យ​សេចក្តីត្រូវការ​ហូបចុក​របស់​ប្រជាជន​តាម​មូលដ្ឋាន​។​

 

​ទិវា​មច្ឆជាតិ ១​កក្កដា ឆ្នាំ​២០១៥ ដែល​ត្រូវបាន​ប្រារព្ធ​នៅ​អាងទឹក​ខ្នាច ក្នុងភូមិ​វត្ត ឃុំ​ទួល​ព្រះ​ឃ្លាំង ស្រុក​ស្ទឹងត្រង់ ខេត្ត កំពង់ចាម ក្រោម​អធិបតីភាព សម្តេច​អគ្គមហាសេនាបតី​តេ​ជោ ហ៊ុន សែន ដោយ​មានការ​ប្រលែង​កូន​ត្រី​ចម្រុះ​ចំនួន ១​លាន ក្បាល និង​កូន​បង្កង ១​សែន​ក្បាល និង មេត្រី​ពូជ​មួយចំនួន​ចូលទៅក្នុង​អាង​ស្តុក ទឹក​ក្តុល​។​

 

​សម្តេច​តេ​ជោ​នាយករដ្ឋមន្ត្រី​បាន​មានប្រសាសន៍ថា​៖ ទិវា​មច្ឆជាតិ​នេះ​មិន​ធ្វើ​តែ​ថ្ងៃទី​១ កក្កដា​នេះ​ទេ គឺត្រូវធ្វើ​នៅពេល​វេលា​ជាច្រើន និង​ទីកន្លែង​ជាច្រើន​ទៀត​ដើម្បី​ធ្វើ​ឲ្យ ទន្លេ ស្ទឹង បឹងបួ​របស់​កម្ពុជា សម្បូរ ទៅដោយ​ត្រី​។ សម្ដេច​តេ​ជោ​បាន​កោតសរសើរ​ចំពោះ​កិច្ចខិតខំ​ប្រឹងប្រែង​រួមទាំង​ឡាយ​ក្នុងការ​អភិរក្ស​ធនធាន​មច្ឆជាតិ និង​ផ្នែក​វារីវប្បកម្ម​ដោយហេតុថា​បច្ចុប្បន្ន​ប្រជាពលរដ្ឋ​កម្ពុជា​កាន់​តែមាន​ចំនួន​កើនឡើង​ផ្ទុយទៅវិញ ផ្ទៃ​ទឹក​ដែលជា​ជម្រក​ត្រី​កាន់តែ​រួម និង​រាក់​ទៅ​គួបផ្សំ​នឹង​បញ្ហា​បទល្មើស​នេសាទ​ការប្រើ​ឧបករណ៍​ខុសច្បាប់​ទៀត​នោះបាន​ធ្វើឱ្យ​ផល​ត្រី​ថយចុះ​មិនអាច​បម្រើឱ្យ​របបហូបចុក​របស់​ប្រជាពលរដ្ឋ​កម្ពុជា​ដែលមាន​ទម្លាប់​បរិភោគ​ត្រី​ច្រើន​នោះ ដូច្នេះ​ការចិញ្ចឹម​ត្រី​និង​វា​រី​សត្វ​ផ្សេងៗ​ទៀត​នោះ​គឺជា​កិច្ច​ការដែល​ចាំបាច់​ត្រូវ​យកចិត្តទុកដាក់​ធ្វើជា​ប្រចាំ​គ្រប់ពេលវេលា​ដោយ​មិនមែន​ធ្វើ​តែ​ក្នុង​ទិវា​មច្ឆជាតិ​មួយថ្ងៃ​នេះ​ទេ​។​

 

​សម្តេច​តេ​ជោ ហ៊ុន សែន មានប្រសាសន៍ថា​ការថយចុះ​នៃ​ផល​ត្រី​ពីមួយ​ឆ្នាំទៅ​មួយឆ្នាំ​គឺ​កើតឡើង ដោយ​កត្តា​សត្យានុម័ត​ផង និង​កត្តា​អន្ត​នោ​ម័​តិ​ផង​។ កត្តា​សត្យានុម័ត​គឺ​ចំនួន​ប្រជាពលរដ្ឋ​មាន​ចំនួន​កើនឡើង​ចំណែក​បឹង​ត្រពាំង​ទន្លេ​របស់​យើង​កាន់តែ​រីង​រាក់​ទៅ​ដោយសារតែ​បាតុភូតធម្មជាតិ​ការហូរ​ច្រោះ​ដី និង​ការ​គោក​រាក់​។ ដើម្បី​ការពារ​និង​បង្កើន​ទិន្នផល​ធនធាន​ម​ច្ចា​ជាតិ​សម្តេច​តេ​ជោ ហ៊ុន សែន បាន ធ្វើការ​អំពាវនាវ​ជាថ្មី​ចំពោះ​ពលរដ្ឋ​នៅ​ទូទាំងប្រទេស​ជាមួយនឹង​អនុសាសន៍​ចំនួន​៧ ចំណុច ដែល​សម្តេច​ធ្លាប់បាន​អំពាវនាវ​កាលពី​ឆ្នាំ​២០១២ នៅក្នុង​ខេត្តកំពង់ចាម អនុសាសន៍​នោះ​រួមមាន ទី​១.​សុំ​កុំ​ប្រើ ឧបករណ៍​ខុសច្បាប់ ជាពិសេស​ការប្រើ ឧបករណ៍​ឆក់​ត្រី ។ ទី​២.​កុំ​ចាប់​ត្រី​ក្នុង​រដូវ​ហាមឃាត់​គឺ​ក្នុង​រដូវ​ត្រី​ពង ។ ទី​៣.​សូមកុំ កាប់​ព្រៃ​លិច​ទឹក​ដែលជា​ជម្រក​ត្រី​ពង​កូន​។ ទី​៤.​ជួយផ្ដល់​ព័ត៌មាន​អំពី​ជនខិលខូច និង​មន្ត្រី​ខិលខូច​ដែល​ចូលទៅ​នេសាទ ឬ​ពាក់ព័ន្ធ ក្នុង​តំបន់​អភិរក្ស​។ ទី​៥.​កុំ​យក​បឹង​ព្រែក​ប្រើប្រាស់​ខុស​គោលដៅ​នេសាទ​ដូចជា​យកទៅ​ដាំ​ឈូក និង​ចាក់ដី​លុប​ជា ដើម​។ ទី​៦ កុំ​ឲ្យ​មានទំនាស់​រវាង​ពលរដ្ឋ អ្នកនេសាទ និង​អ្នកធ្វើ​ស្រែប្រាំង ឬ​ទំនាស់ ដែនទឹក​ជាមួយ​ពលរដ្ឋ​ដែល​មក​ធ្វើ​នេសាទ នៅ​តំបន់​របស់ខ្លួន​គឺ​ត្រូវ​ចែកគ្នា​រស់​ទាំងអស់គ្នា​និង​ទី​៧. សូម​ចូលរួម​ឱ្យ សកម្ម​ក្នុង​ទិវា​មច្ឆជាតិ​១​កក្កដា​ជា​រៀងរាល់ឆ្នាំ​ដែលជា​ទិវា​ជំរុញ​វារីវប្បកម្ម​ឲ្យ​កាន់តែ​ទូលំទូលាយ និង​ចូលរួម​ការពារ​ត្រី និង​ជីវចម្រុះ​ដែល ជិត​ផុត​ពូជ​។ ជាមួយគ្នានេះ​ដើម្បី​ធ្វើ​ឲ្យ​ការអនុវត្ត​អនុសាសន៍​ទាំង​៧ ទទួលបាន ជោគជ័យ​ត្រូវតែមាន​អាជ្ញាធរខេត្ត​សមត្ថកិច្ច ខេត្ត​ចួ​ល​រួមជាមួយ​ពលរដ្ឋ​ទប់ស្កាត់​កុំ​ឲ្យ​មានការ​បំពាន​លើ​ច្បាប់​ទើប​សម្រេចបាន​នូវ​ជោគជ័យ​ព្រោះ​ជលផល​តែមួយ​មិន អាច​ទប់​ស្កា​ប់​បាន​នោះទេ​។    សម្ដេច​តេ​ជោ ហ៊ុន សែន បានបញ្ជាក់ សាជាថ្មី​ទៅកាន់​ពលរដ្ឋ​ក្នុង​ក្របខណ្ឌ​ទូទាំងប្រទេស​នូវ​កំណែទម្រង់​ឡូត៍​នេសាទ​របស់​រាជរដ្ឋាភិបាល​កម្ពុជា​ដែល​បានចាប់ផ្ដើម​យ៉ាង​ស៊ីជម្រៅ​តាំងពី​ឆ្នាំ​២០០០ មក​។ ដោយសារ​មើលឃើញ​ការលំបាក​របស់ ពលរដ្ឋ​រាជរដ្ឋាភិបាល​បានធ្វើ​កំណែទម្រង់​ផ្ដាច់​ព្រាត់​មួយ​ក្នុង​ឆ្នាំ​២០១១ ដោយបាន​បង្ក្រាប​សកម្ម​ភាព​អាណាធិបតេយ្យ​ក្នុង​តំបន់​ទន្លេសាប​បូក​បន្ថែ​ម និង​ការផ្អាក​នូវ​ការធ្វើ​អាជីវកម្ម​នៅក្នុង​តំបន់​នេសាទ​ឡូត៍​នេសាទ​ជា​បណ្ដោះអាសន្ន​ដែល​បានធ្វើ​ឲ្យ​ផល​ត្រី​សម្បូរ​ឡើងវិញ​។ ក្នុងស្ថានភាព​នេះ​សម្ដេច​ថ្លែង​ដោយ​សុទិដ្ឋិនិយម​និង​ដោយ​មោទនភាព​ថា​«​ច្បាស់​ណាស់​ថា ពលរដ្ឋ​បានទទួល​ផលប្រយោជន៍​ពិតប្រាកដ​ពី​កំណែទម្រង់​ឡូត៍​នេសាទ​របស់​រាជរដ្ឋាភិបាល​»​។ ច្នេះ​ហើយ​បានជា​សម្ដេច​ផ្ទាល់​ក្នុងនាម​រាជរដ្ឋាភិបាល​ក្នុងនាម​គណបក្ស​ប្រជាជន​ដែលជា​បក្ស​កាន់អំណាច​បានចាប់ផ្ដើម​ធ្វើកំណែទម្រង់​ស៊ីជម្រៅ​ផ្ដាច់​ព្រាត់​ដោយ​មិន​រាថយ​ចាប់តាំងពី​ថ្ងៃទី​៨ ខែមីនា ឆ្នាំ​២០១២ កន្លងទៅ ដោយ​លុបបំបាត់ចោល​ឡូត៍​នេសាទ​ទាំងអស់​មិន​ឲ្យ​ពួក​ថៅកែ​គ្រប់គ្រង​ទៀតហើយ​ឡូត៍​នេសាទ​ទាំងនោះ​តំបន់​នេសាទ​ទាំងនោះ​ត្រូវតែ​ជា​តំបន់​នេសាទ​សម្រាប់តែ​ប្រជាជន​តែប៉ុណ្ណោះ​។

 

ការធ្វើកំណែទម្រង់​នេះ​បាន​លុបបំបាត់​ទាំងស្រុង​នូវ​ស្ថានភាព​ថៅកែ​ឡូត៍​នេសាទ​នៅក្នុង​ប្រទេស​កម្ពុជា​ដែលមាន​រយៈពេល​១០៤ ឆ្នាំ​ចាប់តាំងពី​ឆ្នាំ​១៩០៨​មក​នោះ​។  គួរបញ្ជាក់​ថា​នេះ​ជា​លើក​ទី​១៣ ហើយ​ដែល​ទិវា​មច្ឆជាតិ​នេះ​ត្រូវបាន​រៀបចំឡើង​ហើយ​សម្តេច​តេ​ជោ ហ៊ុន សែន នាយក​រដ្ឋ​ម​ន្រី្ត​នៃ​ព្រះរាជាណាចក្រ​កម្ពុជា​តែងតែ​អញ្ជើញ​ចូលរួម​ក្នុង​គោលបំណង​ផ្សារភ្ជាប់​មនោសញ្ចេតនា​ជាមួយ​ពលរដ្ឋ និង​បំផុស ចលនា​ពលរដ្ឋ​គ្រប់ៗ​រូប​ឱ្យ​ចូលរួម​យ៉ាងសកម្ម​ក្នុងការ​ថែរក្សា​ពូជ​ត្រី​ក៏ដូចជា​វា​រី​ជាតិ​ផ្សេងៗ​ទៀត​ឱ្យមាន​នៅក្នុង​ដែនទឹក​ធម្មជាតិ​ផង​ព្រមទាំង​បង្កើត​ផល​ត្រី​នៅតាម​តំបន់ ដែល​មិន​ជាប់​ដែន​នេសាទ ជាពិសេស​នៅតាម​តំបន់​វាលទំនាប​និង​វាលស្រែ​ក្នុង​ទូទាំងប្រទេស ដើម្បី​ធានាឱ្យមាន​ផល​ត្រី​នៅតាម​តំបន់​ជនបទ​។​

 

​យោងតាម​របាយការណ៍​របស់លោក អ៊ុក រ៉ាប៊ុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ​បាន​ឲ្យ​ដឹងថា ក្នុងការ​អនុវត្ត​កំណែទម្រង់​ស៊ីជម្រៅ​រាជរដ្ឋាភិបាល​បានសម្រេច​លប់​ឡូ​តិ៍​នេសាទ​ចំនួន​១៥៨ ឡូ​តិ៍ ដែលមាន​ផ្ទៃ​សរុប​៩៥៣.០០០ ហិកតា​ក្នុង​នោះបាន​កាត់​ជូន​ប្រជាពលរដ្ឋ​ចំនួន ៨៥៦. ២៣៧ ហិកតា​ស្មើនឹង​ប្រមាណ​៩០​ភាគរយ​និង​រក្សា​ទុកជា​កន្លែង​អភិរក្ស​ជលផល​ស្មើនឹង​៩៧.៥០០​ហិកតា​ស្មើ ១០ ភាគរយ​។​

 

​លោក​រដ្ឋមន្ត្រី​បាន​ឲ្យ​ដឹង​ទៀតថា រហូត មកដល់​ឆ្នាំ​២០១៤ សហគមន៍​នេសាទ ចំនួន​៥១៦ ត្រូវបាន​បង្កើតឡើង​ក្នុងនោះ​សហគមន៍​នេសាទ​ទឹកសាប​ចំនួន ៤៧៧ និង​សហគមន៍​នេសាទ​សមុទ្រ​ចំនួន ៣៩ ហើយ ក្នុងនោះ​សហគមន៍​នេសាទ​ចំនួន ៣៦០ ត្រូវបាន​ចុះបញ្ជី​ទទួលស្គាល់​ជា​ផ្លូវការ​ពី​ក្រសួងកសិកម្ម រុក្ខាប្រមាញ់ និង នេសាទ​រួចហើយ​។ ជាមួយនេះ​បានរៀបចំ សហគមន៍​នេសាទ​គ្មាន​បទល្មើស​ចំនួន ២៨​សហគមន៍​ផងដែរ​។ ធនាគារ​ក្ដាម​៣៤ កន្លែង​ត្រូវបាន​បង្កើតឡើង​ដែល​ធ្វើឱ្យ​ក្ដាមសេះ​មាន​បរិមាណ​កើនឡើង​៤​ដង​។ លើ​ការបង្ក្រាប​បទល្មើស​ជល​ផល​ក្នុង​ឆ្នាំ​២០១៤​បាន​បង្ក្រាប​បទល្មើស​បាន​ចំនួន​៣.៦៦២ ករណី ធៀប​នឹង​ឆ្នាំមុន ថយចុះ​ចំនួន ១៤​។​

 

​អាងទឹក​ខ្នាច​ដែល​ប្រារព្ធ​ទិវា​មច្ឆជាតិ​នេះ​មាន​ទំនប់​ទ្វារ​រំដោះ​ទឹក​ប្រព័ន្ធ​ស្រោចស្រព និង​ប្រឡាយ​ជាច្រើន​ខ្សែ​ដែល​បាន​សង​សង់​ឡើង​ក្នុងអំឡុង​ឆ្នាំ​១៩៧៦ និង​បានបញ្ចប់ ក្នុង​ឆ្នាំ​១៩៧៧ ក្នុងសម័យ​របប​កម្ពុ​ជា​ប្រជា ធិបតេយ្យ​។ ក្រោយ​ថ្ងៃ​រំដោះ​៧ ខែមករា ឆ្នាំ​១៩៧៩ តំបន់​នេះ​នៅ​ជួប​បញ្ហា​សង្គ្រាមស៊ីវិល​ជា​បន្តបន្ទាប់​អូសបន្លាយ​អស់​រយៈពេល​ជិត​២០​ឆ្នាំ​ដែល​បានធ្វើឱ្យ​អាងទឹក​នេះ​ទទួលរង​នូវ​ការខូចខាត និង ខ្វះ​ការថែទាំ​។ ស្ថិតក្នុង​ស្ថានភាព​នេះ​អាងទឹក​ត្រូវបាន​ស្តារ​និង​សាងសង់​ឡើងវិញ​នៅ​ឆ្នាំ​២០១៤ ដោយ​ក្រសួង​ធនធានទឹក និង​ឧតុនិយម​។​

 

​បច្ចុប្បន្ននេះ​អាងទឹក​ក្តុល​មាន​ទំហំ​ផ្ទៃ​ទឹក​ប្រមាណ​២១៥ ហិកតា​មាន​ធារទឹក ប្រមាណ ៦,៧ លាន​ម៉ែត្រត្រីគុណ និង មាន​ជម្រៅ​ជា​មធ្យម ២ ម៉ែត្រ​នៅ​រដូវប្រាំង និង​១០ ម៉ែត្រ​នៅ​រដូវវស្សា​ដែលមាន​លទ្ធភាព​ស្រោចស្រព​លើ​ផ្ទៃដី​ស្រែវស្សា​ជាង ៦៧០​ហិកតា ក្នុង​ឃុំ​ចំនួន​២ គឺ​ឃុំ​ទួល ព្រះ​ឃ្លាំង និង​ឃំ់​ព្រែកបាក់​ដែលមាន​ប្រជាពលរដ្ឋ​រស់នៅ​ចំនួន​១.៤៥២ គ្រួសារ​៕

 

Leave a Reply

(*) Required, Your email will not be published