ខេត្តបាត់ដំបង : សេចក្តីរាយការណ៍បាន ឲ្យដឹងថា នៅវេលាម៉ោង ៤ល្ងាច ថ្ងៃទី១៧ ខែមិថុនា ឆ្នាំ២០១៥ លោក រង រឹម មេបញ្ជាការ យោធាសឹករង ស្រុកសំពៅលូន ខេត្តបាត់ដំបង ត្រូវបានតម្រួតថៃ ចាប់ឃាត់ខ្លួនគ្រាដែលមន្ត្រីរូបនេះដឹកប្រពន្ធរបស់ខ្លួនដែលមានផ្ទៃពោះទៅកាន់ប្រទេសថៃ ដើម្បីពិនិត្យសុខភាព ហើយបានជួបនឹងគ្រោះថ្នាក់ចរាចរណ៍ បើករថយន្ត បុកម៉ូតូ ១គ្រឿង ដែលជិះគ្នា ២នាក់ ប្តីប្រពន្ធ ជាជនជាតិថៃ បណ្តាលឲ្យប្តីស្លាប់ ចំណែកប្រពន្ធ រងបួសធ្ងន់។ហេតុការណ៍នោះ បានកើតឡើង ស្ថិតក្នុងស្រុកសយដាវ ខេត្តច័ន្ទបុរី ប្រទេសថៃ។
សេចក្តីរាយការណ៍បាន ឲ្យដឹងបន្តថា លោក រង រឹម មេបញ្ជាការយោធាសឹករង ស្រុកសំពៅលុន បានធ្វើដំណើរតាមរថយន្ត ឡង់គ្រីស័រ ៥៧០ ពណ៌ស ស៊េរី ឆ្នាំ២០១៣ ហើយដឹកប្រពន្ធ និងកូនមានគ្នា ៣នាក់ ឆ្លងចូលតាមច្រកព្រំដែន តំបន់អូររំដួល ស្រុកភ្នំព្រឹក ដើម្បីទៅខេត្តច័ន្ទបុរី ប្រទេសថៃ ជូនប្រពន្ធ ទៅមន្ទីរពេទ្យ ពិនិត្យផ្ទៃពោះ។ លុះធ្វើដំណើរមកដល់ចំណុច ស្រុកសយដាវ ប្រទេសថៃ ក៏បើកចូលចំណែកផ្លូវម៉ូតូ ហើយក៏បានបុកម៉ូតូមួយគ្រឿងពេញទំហឹង បណ្ដាលឲ្យបុរសជាប្ដីស្លាប់នៅកន្លែងកើតហេតុ រីឯភរិយារងរបួសធ្ងន់ក្នុងដំណើរទិសដៅផ្ទុយគ្នា ។ក្រោយពីកើតហេតុភ្លាមមន្ត្រី យោធានោះ ក៏បានបើករថយន្តរត់គេច ក៏ប៉ុន្តែត្រូវបានតម្រួតថៃ ដេញចាប់បាន ហើយ រួមទាំងដកហូតយករថយន្តបង្កទៀតផង ចំណែកប្រពន្ធនិងកូនរបស់លោកត្រូវសមត្ថកិច្ចថៃដោះលែងឲ្យត្រឡប់មកវិញ៕
