កែវ វិទូ ត្រូវ​មន្ត្រី​ពន្ធនាគារ​ប៉េ​ហ្ស៊ី ធ្វើការ​ដោះលែង តាម​អំណាច​ទឹក​លុយ​សេដ្ឋី​គយ កែវ សុខ​ឃាង ក្នុង​រូបភាព​ឆាកល្ខោន​នី​ទណ្ឌ​ភាព​ដដែលៗ​

, , Leave a comment

18-6-2015 (2)

​រាជធានី​ភ្នំពេញ : បន្ទាប់ពី​ជាប់ពន្ធនាគារ​ប៉េ​ហ្ស៊ី​រយៈពេល​៣​ខែ​ពិរុទ្ធជន​ឈ្មោះ កែវ វិទូ អាយុ​២៤​ឆ្នាំ ដែលជា​និស្សិត​ទើប​បញ្ចប់​ការសិក្សា​ពី​បរទេស និង​ត្រូវជា​កូនប្រុស​សំណព្វចិត្ត​របស់លោក​សេដ្ឋី​គយ​ដ៏​ល្បីឈ្មោះ កែវ សុខ​ឃាង ដែល​បង្ក​ការបាញ់បោះ​សេរី​ច្រើន​គ្រាប់ នៅ​មជ្ឈមណ្ឌល​កម្សាន្ត​រ៉ក់​(Rock)​របស់លោក​ឧកញ៉ា គិត ម៉េង និង​លោក​ឧកញ៉ា គិត ធៀង រួចហើយ​ជិះ​រថយន្ត​ទំនើប​ម៉ាក Lexus 570 ពណ៌​ស ពាក់​ស្លាក​លេខ​ភ្នំពេញ 2AA-0007 គេចខ្លួន​ពី​កន្លែងកើតហេតុ នា​វេលា​ទៀបភ្លឺ​ឈានចូល​ថ្ងៃទី​១៥ ខែមីនា ឆ្នាំ​២០១៥​កន្លងទៅ​ត្រូវបាន​មន្ត្រី​ពន្ធនាគារ ប៉េ​ហ្ស៊ី ដោះលែង​ឲ្យ​មាន​សេរីភាព​វិញ​ហើយ​កាលពី​ព្រឹក​ថ្ងៃទី​១៧ ខែ មិថុនា ឆ្នាំ​២០១៥​។​

 

​យោងតាម​ក្រមព្រហ្មទណ្ឌ នៃ​ព្រះរាជាណាចក្រ​កម្ពុជា​មាត្រា​២១៨, ៤១១ និង ៤៩០ ចៅក្រម​ស៊ើបសួរ ដំបូង​រាជធានី​ភ្នំពេញ លោក ឡុង កេស​ភី​រម្យ សម្រេច​ឃុំខ្លួន​នៅក្នុង​ពន្ធនាគារ ប៉េ​ហ្ស៊ី រយៈពេល​៨​ខែ កាលពី​ថ្ងៃទី​១៧ ខែមីនា ឆ្នាំ​២០១៥​។ សំណុំរឿង​ដ៏​រសើប​មួយ​នេះ​ត្រូវ​មន្ត្រី​ពន្ធនាគារ​ប៉េ​ហ្ស៊ី ទម្លាយ ឲ្យ​ដឹងថា មូលហេតុ​នៃ​ការដោះលែង​នេះ គឺធ្វើឡើង​តាម​អំណាច​សាលក្រម របស់​តុលាការ ដែល​បានសម្រេច ផ្តន្ទាទោស​ជនជាប់ចោទ ឈ្មោះ កែវ វិទូ ដាក់ពន្ធនាគារ​ចំនួន ៨​ខែ ប៉ុន្តែ​តុលាការ​តម្រូវ ឱ្យ​អនុវត្ត​ទោស​តែ ៣​ខែ ក្នុង​ពន្ធនាគារ និង​ត្រូវ​ព្យួ​ទោស​ចំនួន ៥​ខែ ខណៈដែល​ឈ្មោះ កែវ វិទូ ជាប់ចោទ​ពីបទ​ហិង្សា​ដោយ​ចេតនា​មាន​ស្ថាន​ទម្ងន់ទោស បទ​ធ្វើ​ឲ្យ​ខូចខាត​ដោយ​ចេតនា​មាន​ស្ថាន​ទម្ងន់ទោស និង​ពីបទ​ប្រើប្រាស់​អាវុធ​ដោយ​គ្មាន​ការអនុញ្ញាត​។

 

​ដោយមាន​មន្ត្រីជាន់ខ្ពស់​ម្នាក់ លូកដៃ​ជួយ​អន្តរាគមន៍ ខ្លាំង​សម្បើម​ណាស់ ទៅតាម​ដំណាក់កាល នៃ​នីតិវិធី ហើយ​មុនពេល ដែល​លោក កែវ សុខ​ឃាង នាំ​កូនប្រុស​សំណព្វ មក​ប្រគល់​ឲ្យ​សមត្ថកិច្ច គឺ​រឿងនេះ​គេ​ដៅ​ក្រឡា សម្រាប់​ដើរ​រួចហើយ ដើម្បី​សម្រាល ទោសកំហុស របស់​ឈ្មោះ កែវ វិទូ និង​សំដៅ​បិទ​សំណុំរឿង មិន​ឲ្យ​ពាក់ព័ន្ធ​ដល់​អ្នក​ផ្សេងទៀត​។

 

​ប្រភពព័ត៌មាន​នានា​បាន​បង្ហើប​ប្រាប់​ឲ្យ​ដឹងថា លោក​សេដ្ឋី​គយ កែវ សុខ​ឃាង បាន​ព្រមព្រៀង​ចំណាយ​ប្រាក់​៥​ម៉ឺន​ដុល្លារ​អាមេរិក សម្រាប់​ប៉ះប៉ូវ​លើ​ការខូចខាត​ក្នុង​ហេតុការណ៍​បាញ់បោះ​សេរី បង្កដោយ​កូនប្រុស​របស់ខ្លួន​ឈ្មោះ កែវ វិទូ នោះ ជា​ថ្នូរ​នឹង​ការស្នើសុំ​ឲ្យ​ម្ចាស់​ក្លឹប​កម្សាន្ត​រ៉ក់ និង​អ្នកពាក់ព័ន្ធ​ឯទៀត​កុំ​ឲ្យ​ប្តឹងផ្តល់ ឬ​ដក​ពាក្យបណ្តឹង​(​ក្នុងករណី​បាន​ប្តឹង​រួចហើយ​) ប្រឆាំង​លើ​កូនប្រុស​របស់ខ្លួន​។ ក្នុង​ហេតុផល​នេះហើយ ទើប​មជ្ឈដ្ឋាន​នានា​បាន​ទស្សន៍ទាយ​ទុកជាមុន​រួចហើយ​ថា ទោះយ៉ាងណា កូនប្រុស​សំណព្វចិត្ត​របស់លោក​សេដ្ឋី​គយ កែវ សុខ​ឃាង នឹងមិន​ជាប់ទោស​ទណ្ឌ​បានយូរ​ឡើយ​។ ឥឡូវ អ្វីៗ​បានក្លាយ​ជាការ​ពិត​ដូច​ការ​ទស្សន៍ទាយ មែន ព្រោះតែ​អំណាច​ទឹក​លុយ របស់​ឪពុក ដែលជា​មហាសេដ្ឋី​៕

18-6-2015 (1)  18-6-2015

 

Leave a Reply

(*) Required, Your email will not be published