មូលហេតុ​អ្វី​ដែលថា កូនស្រី​របស់​ស្ត្រី​រងគ្រោះ អាច​មិនមែនជា​ឃាតក ?

, , Leave a comment

10-6-2015

​ខេត្តកោះកុង : បន្ទាប់ពី​កើតរឿង​សម្លាប់​ស្ត្រី​ម្នាក់ប្លន់​យក​ខ្សែក និង​ខ្សែដៃ នៅ​ទី​រួម​ខេត្តកោះកុង កាលពី​ថ្ងៃទី​២៨ ខែ​​ឧសភា ឆ្នាំ​២០១៥​ លោក​ឧ​ត្ត​ម​សេនីយ៍​ត្រី ថុង ណា​រ៉ុង មេបញ្ជាការ​កង​រាជអាវុធហត្ថខេត្តកោះកុង បានសម្រេច​បង្កើត​គណៈ​កម្ម​ការ​ចម្រុះ​មួយដែលមាន​ប៉េអឹម​ខេត្ត និង​ប៉េអឹម​ក្រុង​ខេមរភូមិន្ទ ដើម្បី​បើក​ការស៊ើបអង្កេតស្វែងរក​ការពិត​ជុំវិញសំណុំរឿង​ឃា​ត​កម្ម​នោះ​។​

 

​ក្រោយ​ការស៊ើបអង្កេត​បឋម ប៉េអឹម​ក្រុង​ខេមរភូមិន្ទ ដែល​បាន​ចូលរួម​ការស៊ើបអង្កេត អះអាងថា សាក្សី​ជាង១០នាក់ ដែល​បានជួប​សម្ភាស​បាន​អះអាងថា កូនស្រីរបស់​ស្ត្រីរងគ្រោះ​នោះ អាច​​មិនមែនជា​ឃាតក ដូច​ការអះអាង​របស់​ប៉ូលិស​នោះទេ​។​

 

​ការ​ស៊ើបអង្កេត​របស់​ប៉េអឹមលើ​ឃាតកម្ម​ស្ត្រី​វ័យ៥៣ឆ្នាំ ឈ្មោះ​ ម៉េង សៃ ប្លន់​យក​ខ្សែក និង​ខ្សែដៃ២ដំឡឹង​នោះត្រូវបានធ្វើ​ឡើង ដើម្បីស្វែងរកយុត្តិធម៌ ការពិត និង​មួយវិញទៀត សំ​ណុំ​រឿង​​ឃាតកម្មដែល​ប៉ូលិសខេត្តកោះកុង អះអាងថា កូនស្រី​បង្កើត​របស់​ស្ត្រី​រងគ្រោះជា​ឃាតក​នោះ គឺ​មហាជន​មិន​អស់ចិត្ត​ឡើយ​។​

 

​មន្ត្រី​ប៉េអឹម​ម្នាក់​ដែល​បាន​ចូលរួម​ការស៊ើបអង្កេតបាន​ឲ្យ​ដឹងថា សាក្សី​ជាង១០​នាក់​ដែល​នៅ​ជិត​តូប​លក់ដូរ​របស់កូនស្រី និងនៅ​ជិត​ផ្ទះរបស់​ស្ត្រីរងគ្រោះបាន​អះអាងថា អាច​មិនមែនជា​កូន ស្រី​​បង្កើត ជា​អ្នក​កាប់សម្លាប់​ម្តាយ​ខ្លួនឯង ដើម្បី​ប្លន់​យក​ខ្សែក និង​ខ្សែដៃ​ផ្លា​ទីន ទម្ងន់២ដំឡឹង​នោះទេ​។​

 

​សាក្សីសំអាងថា នៅ​ព្រឹក​ថ្ងៃកើតហេតុមាន​សាក្សី​នៅ​ជុំវិញ​តូប​របស់​ស្ត្រី​ឈ្មោះ ប៉ាន់ ណៃ​ស៊ីម ជា​កូនស្រី​បង្កើត​របស់​ស្ត្រី​រងគ្រោះ គឺ​នៅ​ព្រឹក​នោះស្ត្រី​ឈ្មោះ ប៉ាន់ ណៃ​ស៊ីម នៅ​ផ្សារ​លក់ដូរ រហូត​ដល់​​កូនស្រី​របស់​ណៃ​ស៊ីម រត់​ទៅប្រាប់ ទើប​នាង​ចាក​ចេញពី​តូប​ទៅផ្ទះ​។​

 

​រីឯសាក្សីសំខាន់ម្នាក់ទៀតបាន​អះអាងថា នៅ​ម៉ោងប្រមាណ៨ព្រឹក ស្ត្រី​រងគ្រោះបាន​ទៅ​ទិញ​បបរ​របស់ខ្លួន​នៅឡើយ ដូច្នេះ​ហេតុការណ៍កាប់សម្លាប់ស្ត្រីរងគ្រោះអាច​កើតឡើង​នៅ​ម៉ោង​ជាង៨ ឬម៉ោង៩ព្រឹក ថ្ងៃទី ២៨ ខែ​ឧសភា ហើយ​ការ​ផ្អើល​ឆោ​រ​ឡោ កើតឡើង​ម៉ោងជាង១០ព្រឹក​នោះ​។​

 

​យ៉ាងណាក៏ដោយមកដល់​ថ្ងៃទី៦ ខែ​​មិថុនា ឆ្នាំ​២០១៥ ការស៊ើបអង្កេត​របស់​ប៉េអឹមនៅ​មិនទាន់​បិទ​បញ្ចប់​ទេ​។ តែ​មន្ត្រី​ប៉េអឹមបានអះអាងថា របាយការណ៍ស៊ើបអង្កេត របស់​ប៉េអឹម នឹងត្រូវ បញ្ជូន​ទៅកាន់តុលាការ ដើម្បីបង្ហាញ​ការពិត ខណៈដែលមតិ​ភាគច្រើន នៅមាន​ចម្ងល់ជុំវិញ​ឃាតកម្ម ដែលប៉ូលិស អះអាងថា កូនស្រីជា​ឃាតក សម្លាប់​ម្តាយបង្កើតដើម្បី​ប្លន់​យក​ខ្សែក និង​ខ្សែដៃ ផ្លា​ទីន ចំនួន ២ ដំឡឹង​។​

10-6-2015 (3)

 

​សូម​រម្លឹកថា ប៉ូលិសខេត្តកោះកុង និង ប៉ូលិស​ក្រុងខេមរភូមិន្ទ បាន​ចាប់ខ្លួន​ និង​ចោទប្រកាន់​ស្រី្ត ប៉ាន់ ណៃ​ស៊ីម  ជា​កូនបង្កើតរបស់​ស្ត្រីរងគ្រោះក្នុង​សំណុំរឿង ឃាតកម្មសម្លាប់រួច​ប្លន់ ដែល​​បាន​កើតឡើង កាលពី​ថ្ងៃទី ២៨ ខែឧសភា កន្លងទៅ នៅផ្ទះ​ស្ត្រី​រងគ្រោះ ក្នុងភូមិ​៤ សង្កាត់​ដងទង់ ក្រុង​ខេមរភូមិន្ទ ខេត្តកោះកុង គឺ​ប៉ូលិស​សម្អាង តែ​លើស​ម្តី​របស់​ស្ត្រី​ជា​អ្នកជិតខាង ឈ្មោះ​​ជា​មុំ ឆ្លើយ​ដាក់បន្ទុក ខណៈដែល​ក្រុមគ្រួសារ​ស្ត្រី​រងគ្រោះ និង​កូនស្រី​នោះ បាន​បដិសេធ​ការចោទប្រកាន់​។​

 

​បន្ទាប់ពី​សាកសួរ​លើ​ស្ត្រី​ជាប់ចោទនៅ​ថ្ងៃទី​១​មិថុនា ចៅក្រម​ស៊ើបសួរ នៃ​សាលាដំបូង​ខេត្តកោះកុង បានសម្រេច ធើ្វ​ការចោទប្រកាន់​ស្រី្ត​ឈ្មោះ ជា មុំ អាយុ ៤៥ ឆ្នាំ ( អ្នកជិតខាង ) ពីបទ​សមគំនិត​ក្នុង​អំពើ​ឃាតកម្ម​គិតទុក​ជាមុន តាម​មាត្រា​ទី​២៩ និង​២០០ នៃ​ក្រមព្រហ្មទណ្ឌ​។​ ​រីឯ​ស្រី្តជា​កូនបង្កើត​ឈ្មោះ ប៉ាន់ ណៃ​ស៊ីម អាយុ ៣១​ឆ្នាំ ត្រូវបាន ចោទប្រកាន់​ពីបទ​ឃាតកម្ម​គិតទុក​ជាមុន តាម​មាត្រា​២០០ នៃ​ក្រមព្រហ្មទណ្ឌ​។​

 

​ចំណែក​បុរស​ជា​សង្សារ​របស់​ស្ត្រី​ជាប់ចោទ ប៉ាន់ ណៃ​ស៊ីម ឈ្មោះ កុសល អេង​អភិវឌ្ឍន៍ ត្រូវបាន តុលា​ការលើក លែង​ការចោទប្រកាន់ និង​ដោះលែង​ឲ្យ​មាន​សេរីភាព​វិញ​។​ ​ក៏ប៉ុន្តែ​យ៉ាងណាក៏ដោយ ក្រុមគ្រួសារ​ស្ត្រី​រងគ្រោះ មិន​យល់ថា ស្ត្រី​ជា​កូនបង្កើត ប្រព្រឹត្តិ​ដូច​ការចោទប្រកាន់​រប​ស់​ប៉ូលិស និង​ចៅក្រម ក្នុង​រឿង​សម្លាប់​ម្តាយបង្កើត​នោះទេ​។​

 

​លោក ប៉ាន់ សុភ័ក្ត្រ កូនប្រុស​របស់​ស្ត្រី​រងគ្រោះ ម៉េង សៃ បាន​អះអាងថា មាន​សាក្សី​ជា​អ្នកលក់ដូរ​នៅ​ផ្សារ យ៉ាង ហោចណាស់ ៥ នាក់ បាន​អះអាងថា ពួកគេ​បានឃើញ​ស្ត្រី​ឈ្មោះ ប៉ាន់ ណៃ​ស៊ីម ដែល​ជាប់​ចោទថា​ជា​អ្នក​សម្លាប់​ម្តាយបង្កើតនៅ​លក់ដូរ​នៅ​ផ្សារ តាំងពី​ម៉ោង៦ព្រឹក រហូត​ដល់ពេលផ្អើលឆោឡោ នៅ​ម៉ោងប្រមាណ ១១ ព្រឹក ថ្ងៃកើតហេតុ​នោះ​។​​ម្យ៉ាងវិញទៀត លោក ប៉ាន់ សុភ័ក្ត្រ បាន​បញ្ជាក់ថា រូបគេ មិន​ជឿថា បងស្រី​ខ្លួន ( ប៉ាន់ ណៃ​ស៊ីម ) ប្រព្រឹត្ត​ដូច​ការចោទប្រកាន់​នោះទេ ព្រោះ​របស់របរ​មាសប្រាក់​និង​កេរ្តិ៍​អាករ​របស់​ម្តាយ​គឺ​ត្រូវប្រគល់​ឲ្យ​កូនស្រី​នោះ​(​ណៃ​ស៊ីម​) ដោយសារ​សព្វថ្ងៃ ម្តាយ និង​កូន រស់នៅ​ជាមួយគ្នា​។​ ​ដូច្នេះ គ្មាន​ហេតុផល​អ្វីដែល​កូនស្រី សម្លាប់​ម្តាយ ដើម្បី​យក​ខ្សែក​ខ្សែដៃ ២ ដំឡឹង ដូច​ការអះអាង​របស់​ស្ត្រី អ្នក ជិតខាង ឈ្មោះ ជា មុំ នោះទេ​។​

 

10-6-2015 (2)

 

​លោក ប៉ាន់ សុភ័ក្ត្រ ក៏បាន​កត់សម្គាល់​នូវ​ចម្លើយ​របស់​ស្ត្រី​ជាប់ចោទ ជា មុំ ដែល​បាន​ប្រាប់​ប៉ូលិស​ថា ខ្សែក និង​ខ្សែដៃ ដែល​ប្លន់​បាន​ពី​ស្ត្រី​រងគ្រោះ ត្រូវបាន ណៃ​ស៊ីម ចែក​ឲ្យ​ខ្លួន​ខ្លះ​។​ ​ប៉ុន្តែ​នៅពេល​ប៉ូលិស ទៅ​ដកហូត គឺ​ខ្សែក ១ ដំឡឹង និង​ខ្សែដៃ ១ ដំឡឹង​ដែលជា​របស់​ស្ត្រី​រងគ្រោះ​បែរជា​ត្រូវ​ស្ត្រី​អ្នកជិតខាង ឈ្មោះ ជា មុំ លាក់ទុក​នៅក្នុង​ចាន​អង្ករ​របស់ខ្លួន​ទាំងអស់​ទៅវិញ​។​ ​ម្យ៉ាងវិញទៀត ក្រុមគ្រួសារ​ស្ត្រី​រងគ្រោះ តាមរយៈ​មេធាវី ក៏បាន​ស្នើសុំ​ទៅកាន់​តុលាការ ដើម្បី​យកមក​វិញ​នូវ​គ្រឿង អលង្ការ និង លុយ មួយចំនួនធំ ដែល​ប៉ូលិស​បាន​រឹបអូស ព្រោះថា គ្រឿងអលង្ការ និង លុយ​ទាំងនោះ មិន​ជាប់​ពាក់ព័ន្ធ​ក្នុង​សំណុំរឿង​នោះទេ តែ​ត្រូវ​ប៉ូលិស​រឹបអូស ហើយ​តុលាការ មិន​ប្រគល់​ឲ្យ​គ្រួសារ​ជនរងគ្រោះ​វិញ​ទេ ។​

 

​ដូច្នេះ ក្នុង​សំណុំ​រឿងក្តី​នេះ ចៅក្រម​តុលាការ​ខេត្តកោះកុង គួរតែ​បើក​ការស៊ើបអង្កេត ស្វែងរក​ការពិត ដើម្បី​កុំ​ឲ្យ​គ្រួសារ ស្ត្រី​រងគ្រោះ ត្រូវ​ទទួលរង អយុត្តិធម៌​។ ពោលគឺ ម្តាយ​ត្រូវគេ សម្លាប់​ហើយ បែរជា ចាប់​កូនស្រី ដាក់គុក ចោទថា ជា​ឃាតក សម្លាប់​ម្តាយ​ខ្លួនឯង​ទៅទៀត​

10-6-2015 (4)  10-6-2015 (1) 

 

Leave a Reply

(*) Required, Your email will not be published