អាជីវកម្ម​គ្រប់ទឹករ​បស់​ឯកឧត្តម ឧកញ៉ា ហ៊ឺ បា​វី និង​ឯកឧត្តម ស៊ុយ សែម រដ្ឋមន្ត្រីក្រសួង​រ៉ែ​និង​ថាមពល បាន​ក្លាយជា​ស្បៃ​ងងឹត គប្បី​លោក ឱម យ៉ិនទៀង ប្រធាន​អង្គភាព​ប្រឆាំង​អំពើពុករលួយ​ពិនិត្យមើល​ផង​ណា៎​!

, , Leave a comment

Herr-Bvvy-1

​រាជធានី​ភ្នំពេញ : អាជីវកម្ម​រកស៊ី​លក់​ខ្សាច់ ផ្តាច់មុខ​បស់​ឯកឧត្តម ឧកញ៉ា ហ៊ឺ បា​វី ប្រតិភូ​រាជរដ្ឋាភិបាល ទទួលបន្ទុក​ជា​ប្រធាន​អគ្គនាយក​កំពង់ផែ​ស្វយ័ត​រាជធានី​ភ្នំពេញ បានទទួល​ជោគជ័យ គ្មាន​គូប្រជែង ខណៈដែល​ឯកឧត្តម ស៊ុយ សែម រដ្ឋមន្ត្រីក្រសួង​រ៉ែ​និង​ថាមពល បានផ្តល់​សិទ្ធ​អំណាច និង​អាជ្ញាប័ណ្ណ​លើ​អាជីវកម្ម​បូម​ខ្សាច់​ឲ្យ​ឯកឧត្តម ឧកញ៉ា ហ៊ឺ បា​វី ដែល​ត្រូវជា ដន្លង​ដង​ជាមួយ​លោកស្រី​ឧកញ៉ា ស៊ុយ សុផាន នាយិកា​ក្រុមហ៊ុន​ផាន​អ៊ី​ម៉ិច បានធ្វើ​អាជីវកម្ម​មុនគេ​បង្អស់ ដោយ​ក្រុមអាជីវករ​រកស៊ី​ខ្សាច់​ផ្សេងៗ​ទៀត​ត្រូវតែ តម្រង់​ជួរ​គ្នា មក​ទិញ​ខ្សាច់​បន្ត​ពី​ឯកឧត្តម ឧកញ៉ា ហ៊ឺ បា​វី យកទៅលក់​ដោយ​គ្មាន​លក្ខខណ្ឌ ដែលជា​ឱកាស​ផ្តល់​ឲ្យ​ឯកឧត្តម ស៊ុយ សែម និង​ឯកឧត្តម ឧកញ៉ា ហ៊ឺ បា​វី មានលទ្ធភាព​ប្រមូល​លុយ ក្រោមរូបភាព​គ្រប់ទឹក​រួមគ្នា ព្រោះតែ​មិនមាន​ការឆ្លងកាត់​តាមរយៈ​ដេញថ្លៃ​ប្រកបដោយ​តម្លាភាព​។

 

​ក្រុមអាជីវករ​ប្រកប​របរ​អាជីវកម្ម​ខ្សាច់ សំណង់ បានត្រឹមតែ​និយាយ​រៀបរាប់​ទាំង​អួលដើមក​ថា តម្លៃ​ខ្សាច់​សំណង់​កាលពី​ពេលមុន​ត្រូវ​បង់​ត្រឹមតែ​០.២០​ដុល្លារ​អាមេរិក​តែប៉ុណ្ណោះ តែ​ដល់ពេល​ឯកឧត្តម ឧកញ៉ា ហ៊ឺ បា​វី បាន​កាន់កាប់​សិទ្ធិអំណាច​លើ​អាជីវកម្ម​ខ្សាច់ គឺ​ត្រូវ​កើន​តម្លៃ​រហូតដល់​០.២៥​ដុល្លារ​អាមេរិក​។ ជាក់ស្តែង​ពេលមុន​តម្លៃ​ខ្សាច់​សំណង់​ត្រឹម​២​ដុល្លារ​អាមេរិក​ទៅ​៣​ដុល្លារ​អាមេរិក​ក្នុង​១​ម៉ែត្រគូប ប៉ុន្តែ​ឥឡូវ​ពេល​ទិញ​បន្ត​ពី​ឯកឧត្តម​ឧកញ៉ា ហ៊ឺ បា​វី មានតម្លៃ​ដល់​៤.៥០​ដុល្លារ​អាមេរិក​ក្នុង​១​ម៉ែត្រគូប​ឯណោះ​។

 

​ករណី​ទាំងអស់នេះ កើតឡើង ព្រោះតែ​ឯកឧត្តម ឧកញ៉ា ហ៊ឺ បា​វី ត្រូវជា​ដន្លង​ដង​ជាមួយ​លោកស្រី​ឧកញ៉ា ស៊ុយ សុផាន នោះ មាន​សិទ្ធិ​ពេញទី​លើ​ការធ្វើ​អាជីវកម្ម​បូម​ខ្សាច់ ទាំង​នៅ​ទន្លេមេគង្គ​លើ ទាំង​នៅ​ទន្លេមេគង្គ​ក្រោម ក្នុង​ទំហំ​ផ្ទៃដី​ជាង​២០០​ហិកតា រួចហើយ​យក​ខ្សាច់​លក់​បន្ត​ឲ្យ​ទៅ​ក្រុមអាជីវករ​ផ្សេងៗ​ទៀត​ដែល​ត្រូវការ​ខ្សាច់​ក្នុងតម្លៃ​ខ្ពស់​។

 

​ដោយសារ​ព្រះរាជក្រឹត្យ​លេខ​នស​/​រកត​/០៨០៨/៩៤៤ ចុះ​ថ្ងៃទី​១៨ ខែសីហា ឆ្នាំ​២០០៨ គឺ​ធ្វើ​ឲ្យ​លោក ហ៊ឺ បា​វី មាន​ឋានៈ​ជា​"​ឯកឧត្តម​"​។ ក្រោយមក ឯកឧត្តម ហ៊ឺ បា​វី ក៏​ទទួលបាន​ការតែងតាំង​ជា​ឧកញ៉ា​ដោយ​ព្រះរាជក្រឹត្យ​លេខ​នស​/​រកត /០៨១៤/១០០៧ ចុះ​ថ្ងៃទី​០៤ ខែសីហា ឆ្នាំ​២០១៤​។ ព្រោះ​តែមាន​ងារ​ជា​"​ឯកឧត្តម ឧកញ៉ា​" និង​ជា​សមាជិក​គណៈកម្មាធិកា​រ​កណ្តាល​គណបក្ស​ប្រជាជន​កម្ពុជា ធ្វើ​ឲ្យ​ឯកឧត្តម ឧកញ៉ា ហ៊ឺ បា​វី ទទួលបាន​ការតែងតាំង​ជា​ប្រតិភូ​រាជរដ្ឋាភិបាល ទទួលបន្ទុក​ជា​ប្រធាន​អគ្គនាយក​កំពង់ផែ​ស្វយ័ត​រាជធានី​ភ្នំពេញ មាន​ឋានៈ​ស្មើ​រដ្ឋលេខាធិការ​។​

 

​ចំពោះ​ករណី​ខាងលើ​ដែលមាន​ភាពពុករលួយ​ស៊ីជម្រៅ អង្គភាព​ប្រឆាំង​អំពើពុករលួយ​លោក ឱម យ៉ិនទៀង ចាត់វិធានការ​ត្រួតពិនិត្យ​លើ​ការផ្តល់​អាជ្ញាប័ណ្ណ​អាជីវកម្ម​ខ្សាច់ ដែលជា​លក្ខណៈ​ប្រព័ន្ធ​យ៉ាង​ស្អិតល្មួត ធ្វើ​ឲ្យ​ឯកឧត្តម ស៊ុយ សែម  និង​ឯកឧត្តម ឧកញ៉ា ហ៊ឺ បា​វី កំពុងមាន​ឱកាស​បូម​លុយ​ពី​ការ​បូម​ខ្សាច់​លក់ ក្រោម​លទ្ធផល​"​គ្រប់ទឹក​រួមគ្នា​"៕

Khsach  Herr-Bvvy

 

Leave a Reply

(*) Required, Your email will not be published