ខេត្តមណ្ឌលគិរី : បុរសម្នាក់ដែលត្រូវគេស្គាល់ថាជាមេប៉ុស្តិ៍ច្រករបៀង ង៉ាំដី ត្រូវបានក្រុមឈ្មួញស៊ីដឹកឈើខុសច្បាប់ ព្រួតគ្នា ក្របួច.ក អាវជាប់ និងចាប់ដកកាំភ្លើង AK ដើម្បីរំដោះយករថយន្តដឹកឈើ កាលពីវេលាម៉ោង៩ព្រឹកថ្ងៃទី១៣ ខែឧសភា ឆ្នាំ២០១៥ ស្ថិតក្នុងភូមិឆ្នែង ឃុំស្រែខ្ទុម ស្រុកកែវសីមា ខេត្តមណ្ឌលគិរី។
ប្រភពព័ត៌មានបានឲ្យដឹងថា មេប៉ុស្តិ៍ច្រករបៀងង៉ាំដី មានឈ្មោះថា សៀក ពៅ ជាកូនចៅរបស់លោក ប៊ូ សំអុល មេប៉ុស្តិ៍ការពារព្រំដែនឡាប៉ាខេ ចំណុះឲ្យ វរនគរបាលការពារព្រំដែនគោកលេខ៦២១។ ចំណែកស្ត្រីជាឈ្មួញរកស៊ីឈើ ដ៏ល្បី ប្រចាំស្រុកកែវសីមាឈ្មោះ យាយឯម។ មុនពេលកើតហេតុគេបានឃើញ រថយន្តពីរគ្រឿងដែលមួយគ្រឿងម៉ាក កាមរីគូទហើម ពណ៌ទឹកប៊ិច ដឹកឈើប្រណីតពេញ និងមួយគ្រឿងទៀត ម៉ាកកាមរីបាឡែន ពណ៌ទឹកប្រាក់ (បើកតាមពីក្រោយ) លុះបានមកដល់កន្លែងកើតហេតុ ក៏ត្រូវលោកមេប៉ុស្តិ៍ច្រករបៀងង៉ាំដី កាន់កាំភ្លើង AKមួយដើមចេញមករាំងពីមុខឃាត់រថយន្តមិនឲ្យទៅមុន។ ភ្លាមៗនោះស្ត្រីដែលជាឈ្មួញរកស៊ីឈើដ៏ល្បីប្រចាំ ស្រុកកែវសីមាឈ្មោះ យាយឯម បានចុះពីរថយន្តកាមរី បាឡែន រួមនឹងតៃកុង ឡានម្នាក់ទៀតមកនិយាយចរចាគ្នា ជាមួយលោកមេប៉ុស្តិ៍ ប៉ុន្តែប្រហែលជាចរចាគ្នាមិនត្រូវ ព្រោះគេឮ លោកមេប៉ុន្តិ៍និយាយថា «ឡានហ្នឹងត្រូវតែចាប់»។ បន្តិចក្រោយមក ស្រាប់តែ យាយឯម និងគូកន សម្រុកចូលទៅចាប់ឱប លោកមេប៉ុស្តិ៍ ច្រករបៀងជាប់ និងស្រែកបញ្ជាឲ្យតៃកុងដែលបើកបរឡានដឹកឈើ ឲ្យបើកចេញពីកន្លែងកើតហេតុ គេចចូលទៅទឹកដីខេត្តក្រចេះបាត់ស្រមោលតែម្តង។
ជុំវិញករណីជំរិតទារលុយខាងលើនេះ ដោយមេប៉ុស្តិ៍ច្រករបៀងង៉ាំដីដែលបានបញ្ចេញសកម្មភាពស្ទាក់ចាប់ រថយន្តប្រព្រឹត្តបទល្មើសព្រៃឈើ តែម្នាក់ឯង នេះ មិនទាន់មានការបកស្រាយបញ្ជាក់ពីលោក សៀក ពៅ មេ ប៉ុស្តិ៍ច្រករបៀងង៉ាំដី បានទេ ព្រោះលោក មេប៉ុស្តិ៍ និងយាយឯម ដែលជាម្ចាស់ឈើ បានគេចខ្លួន បាត់ភ្លាមៗដែរ ព្រោះខ្លាចកាមេរ៉ា របស់អ្នកកាសែត៕
