តើ​អង្គភាព​ប្រឆាំង​អំពើពុករលួយ​មាន​វិធានការ​បែបណា ចំពោះ​លោក កង ឌី​ណា ប្រធាន​មន្ទីរ​ធម្មការ និង​សាសនា​ខេត្ដ​ព្រះសីហនុ ប្រើប្រាស់​សាសនា​ជា​អាជីវកម្ម​

, , Leave a comment

29-4-2015

​ខេត្ត​ព្រះសីហនុ : កាលពី​ថ្ងៃទី​២៨ ខែមេសា ឆ្នាំ​២០១៥ ព្រះ​មេគណ​ខេត្ដ​ព្រះសីហនុ ព្រះគ្រូ​គៀត ច័ន្ទ​ធុច អំពាវនាវ​ឲ្យ​អង្គភាព​ប្រឆាំង​អំពើពុករលួយ​ចុះ​ស៊ើបអង្កេត​នៅក្នុង​មន្ទីរ​ធម្មការ​និង​សាសនា​ខេត្ដ​ជាបន្ទាន់​។ ដោយ​លោក កង ឌី​ណា ប្រធាន មន្ទីរ​ធម្មការ​និង​សាសនា​ខេត្ដ​ព្រះសីហនុ​បានដាក់​ខែ​ក្នុង​មួយ​វត្ដ​១០​ម៉ឺន​រៀល​ក្នុង​មួយខែ​ហើយ​វត្ដ​ទាំងអស់​មាន​ចំនួន​៣៤​វត្ដ​ក្នុង​ខេត្ដ​ព្រះសីហនុ បើ​ទូទាត់​ទៅ​ប្រធាន​មន្ទីរ​រូបនេះ​អាច​រកប្រាក់​ចំណូល​ពី​ការដាក់​ខែ​ចំនួន​៣៤០​ម៉ឺន​រៀល ក្នុង​មួយខែ​នេះ​គ្រាន់តែ​លុយ​ដាក់​ខែ​។​

 

​ជាក់ស្តែង​មន្ដ្រីរាជការ និង​ប្រជាពលរដ្ឋ​ប្រមាណ​៧៥​នាក់​ដែល​ចង់បាន​មេដាយ​ស្ថាបនា​ជាតិ​ពី​ព្រះមហាក្សត្រ និង​រាជរដ្ឋាភិបាល​កម្ពុជា តាមរយៈ​លោក កង ឌី​ណា ប្រធាន​មន្ទីរ​ធម្មការ និង​សាសនា​ខេត្ដ​ព្រះសីហនុ ដោយ​ពួក គាត់​ចំណាយ​ថវិកា​អស់​ក្នុង​ម្នាក់​៣០០​ដុល្លារ តែ​មិនទាន់​បានប្រកាស​ណាមួយ​ជា​ផ្លូវការ​នៅឡើយ​នោះទេ​។​

 

​កាលពី​អំឡុង​ឆ្នាំ​២០១៣ លោក កង ឌី​ណា ប្រធាន​មន្ទីរ​ធម្មការ និង​សាសនា​ខេត្ដ​ព្រះសីហនុ​ធ្លាប់បាន​កម្ចាត់​អនុប្រធាន​មន្ទីរ​ម្នាក់​ដោយសារតែ​មានការ​ដេញដោល​រឿង​ប្រាក់ខែ​គ្រូ​ជាប់កិច្ចសន្យា ហើយ​ពេលនោះ​ក្រសួង ធម្មការ និង​សាសនា ដែលមាន​ទំនាក់ទំនង​ល្អជា​មួយ​លោក​កង ឌី​ណា បាន សម្រេច​ដក​លោក ចិន ស្រស់ អនុប្រធាន​មន្ទីរ​រូបនោះ​ទៅ​បញ្ឈរជើង​នៅ​ក្រសួង​រហូតដល់​សព្វថ្ងៃ​នេះ​។

 

​ជុំវិញ​ករណីនេះ​លោក កង ឌី​ណា ប្រធាន​មន្ទីរ​ធម្មការ និង​សាសនា​ខេត្ដ​ព្រះសីហនុ បាន​និយាយថា ចំពោះ​ប្រាក់ខែ​គ្រូ​ជាប់កិច្ចសន្យា​នោះ​លោក​មិនបាន​កាត់កង​អ្វី​នោះទេ ព្រោះ​គេ​ទៅ​បើក​ផ្ទាល់​ជាមួយ​គណនេយ្យ តែ​ក្រៅពីនេះ​លោក​មិន​បានធ្វើ​អត្ថាធិប្បាយ​នោះទេ​។​

 

​ករណីនេះ​ល្មម អង្គភាព​ប្រឆាំង អំពើពុករលួយ មេត្តា​ចុះ​ពិនិត្យមើល​ហើយ តើ​ដូច​ពាក្យ​ចោទប្រកាន់​នោះ​ឬទេ​?

 

 

Leave a Reply

(*) Required, Your email will not be published