កុងត្រូលជជុះ រីក​ដូច​ផ្សិត តាម​បណ្តោយ​ផ្លូវជាតិ​លេខ​៥ តែ​ថ្នាក់លើ​ធ្វើ​មិនដឹង ព្រោះ​មិន​បំបែក​ឆ្នាំងបាយ​ខ្លួន​

, , Leave a comment

​ខេត្តកំពង់ឆ្នាំង ៖ ប្រជាពលរដ្ឋ​ជាច្រើន​នាក់​រស់នៅ​ក្នុងស្រុក​ទឹកផុស ខេត្តកំពង់ឆ្នាំង បាន​ប្រតិកម្ម និង​រិះគន់​យ៉ាងខ្លាំង​ចំពោះ​កម្លាំង​ប៉ូលីស​នាយកដ្ឋាន​ប្រឆាំង​បទល្មើស​សេដ្ឋកិច្ច​ក្រ​សួ​ង​ម​ហា​ផ្ទៃដែលមាន​ប្រធាន ឧ​ត្ត​ម​សេនីយ៍​ទោ ជា សុ​ម៉េ​ធី បានដាក់​កូនចៅ​ក្រោម​ឱវាទ​ចុះមក​កាន់​ទឹកដី​ខេត្តកំពង់ឆ្នាំង ដើម្បី​ឃ្លាំមើល​និង​បង្ក្រាប​បទល្មើស​ទូទៅ​ដែល​ជាប់​ពាក់ព័ន្ធ​នឹង​ប​ទ​ល្មើ​ស​​សេដ្ឋកិច្ច ។​

 

​ក្រុម​អ្នករកស៊ី​ដឹកទំនិញ​តាម​បណ្តោយ​ផ្លួ​វ​ជាតិ​លេខ​៥ បាន​រអ៊ូរទាំ​ថា កម្លាំង​នគរបាល​ប្រឆាំង​បទល្មើស​សេដ្ឋកិច្ច​ក្រសួង ដែល​ចុះ​បំពេញបេសកកម្ម​មកកាន់​ទឹកដី​ខេត្តកំពង់ឆ្នាំង និង​ខេត្តពោធិ៍សាត់​ដឹកនាំ ដោយ​នាយ​ការ​និ​យា​ល័យ​នៃ​នាយកដ្ឋាន​នគរបាល​ប្រឆាំង​បទល្មើស​សេដ្ឋកិច្ច ក្រសួងមហាផ្ទៃ​ក្រោម​កា​ដឹកនាំ​របស់លោក​វរៈសេនីយ៍ឯក ទូច យុ​ទ្ធា បាន​បែងចែក​កម្លាំង​ជា​បី​ក្រុម ដោយ​ក្រុមទី​១​ឈរជើង​នៅតាម​បណ្តោយ​ផ្លូវជាតិ​លេខ​៥ ក្នុងភូមិ​សាស្ត្រ​ស្រុក​ក្រគរ ខេត្តពោធិ៍សាត់ ក្រុមទី​២​ឈរជើង​នៅ​ខាងលិច​ផ្សារ​ត្រាច ក្នុងភូមិ​សាស្ត្រ​ស្រុក​កំពង់ត្រឡាច និង​ស្រុក​សាមគ្គី​មានជ័យ ខេត្តកំពង់ឆ្នាំង​។ នគរបាល​ប្រឆាំង​បទល្មើស​សេដ្ឋកិច្ច​ខាងលើ​ត្រូវបាន​ប្រជាពលរដ្ឋ​រិះគន់ និង​ចោទថា ដាក់​កុងត្រូលជជុះ​ដេញ​ប្រមាញ់​ស្ទាក់ចាប់​រថយន្ត​ដឹកទំនិញ ជាពិសេស​រថយន្ត​ដឹក​ផល​អនុផល​ព្រៃឈើ ជំរិត​ទារប្រាក់​។ ប្រជាពលរដ្ឋ​ដែលជា​អ្នករកស៊ី​ដឹក សត្វ​គោ ក្របី មាន់ ទា ជ្រូក ត្រូវ​ឈប់​ចូល​បង់លុយ​ឲ្យ​ប៉ូលីស​ដែល​ឈរជើង​នៅ​ខាងលើ​ដោយ​មិនអាច​អាក់ខាន​បានឡើយ​ដោយឡែក​រថយន្ត​ដឹកឈើ​ប្រណីត​ដូចជា​គ្រញូង នាងនួន​ជាដើម សម្រាប់​រថយន្ត​ហាយ​ឡិន​ដឺ ឡិច​ស៊ី​ស សាំ​យ៉ុង កាមរី​បា​ឡែ​ន និង​ហាយ​ប្រ៊ី​ត រត់​ឆ្លងកាត់​គោលដៅ​នេះ​ត្រូវតែ​ចំណាយលុយ​ក្នុង​មួយ​រថយន្ត​សម្រាប់​ខេត្តពោធិ៍សាត់​ចំនួន​២០០​ដុល្លារ និង​ខេត្តកំពង់ឆ្នាំង​២០០​ដុល្លារ​ទៀត បើ​មិន​ដូច្នោះ​ទេ​និង​ត្រូវ​ដេញ​ប្រមាញ់​ចាប់​ពិន័យ​មិនខានឡើយ​។​

 

​ប្រភព​ខាងលើ​បាន​អះអាង​បន្តថា កម្លាំង​នគរបាល​ប្រឆាំង​បទល្មើស​សេដ្ឋកិច្ច​ខាងលើនេះ​ចុះមក​កាន់​ខេត្តកំពង់ឆ្នាំង និង​ពោធិ៍សាត់ ជាង​២​ឆ្នាំ​កម្ល​ង​មកហើយ​ការបង្ក្រាប​មាន​តិចតួច​ណាស់​ស្ទើ​តែ​អត់​ក៏​ថា​បាន ហើយ​គេ​បង្ក្រាប​តែ​ចំពោះ​រថយន្ត​ដឹកឈើ​ប្រណីត​ណា​ដែល​មិនបាន​បង់ប្រាក់ ឬ​រថយន្ត​បែក​កង់ ឬ​ជួប​ឧ​ប​ទ្ទ​ប​ហេតុ​គ្រោះថ្នាក់​ចរាចរណ៍​ទៅមុខ​លែងរួច​ប៉ុណ្ណោះ​។ ដោយឡែក​កម្លាំង​នគរបាល​ប្រឆាំង​បទល្មើស​សេដ្ឋកិច្ច​ក្រុមទី​៣​ដឹកនាំ​ដោយ​លោក មករា ក៏ត្រូវ​ប្រជាពលរដ្ឋ​ចោទប្រកាន់ និង​រិះគន់​ដែរ​ថា ក្រុម​នេះ​ជា​ក្រុម​ដែល​រៀបចំ​ដាច់ដោយឡែក សម្រាប់ធ្វើ​សកម្មភាព​ប្រដេញ​រថយន្ត​ដឹក​ផល​អនុផល​ព្រៃឈើ​លើផ្លូវ​គ្រួស​ក្រហម ហើយ​ក្រុម​នេះ​កំពុងតែ​ធ្វើ​ឲ្យ​ប្រជាពលរដ្ឋ​ក្តៅក្រហាយ ដោយសារតែ​ពួកគេ​បើករថយន្ត​កាមរី​ស្វិត​ពណ៌​ស ប្រដេញ​គោយន្ត​កន្ត្រៃ​ដឹកអុស និង​ដឹកឈើ​បន្តិចបន្តួច​យកទៅ​ធ្វើ​ផ្ទះសម្បែង​នោះ ត្រូវ​ពួកគេ​ឃាត់​ទារលុយ​យ៉ាង​ចាស់ដៃ ។​

 

​កន្លងមក​ថ្មីៗ​នេះ​ប៉ូលីស​សេដ្ឋកិច្ច​ដែល​ដឹកនាំ​ដោយ​លោក មករា នេះ​បានធ្វើ​ដំណើរ​ទៅកាន់​ស្រុក​បរិបូណ៌​ហើយ​ឃាត់​រទេះគោ​-​ក្របី​របស់​ប្រជាពលរដ្ឋ​ដឹក​កូនឈើ​បន្តិចបន្តួច​យកមកប្រើ​ប្រាស់​នៅក្នុង​ផ្ទះ​ដោយ​ជំរិត​ទារលុយ​ពី​ប្រជាពលរដ្ឋ មិនតែប៉ុណ្ណោះ​លោក មករា បាន​ប្រាប់​ប្រជាពលរដ្ឋ​ចំពោះ​ការដឹកឈើ​ក្តារ ឬ​ឈើ​គ្រឿង​យកមក​ធ្វើជា​ផ្ទះ បើ​ស្តុ​ប​ទុក​នៅក្នុង​លំនៅដ្ឋាន​លើសពី​២​ម៉ែត្រគូប ពួកគេ​នឹង​ចាប់​បើ​មិន​ចង់​ឲ្យ​ប៉ូលីស​ចាប់​ទេ​ត្រូវតែ​រត់ការ​មកជួប​លោក មករា ។​

 

​កន្លងមក​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​ធ្លាប់បាន​ព្រមាន​ដល់​កងកម្លាំងប្រដាប់អាវុធ​ដែល​ប្រាស់ចាក​ពី​គោលនយោបាយ​របស់​រដ្ឋា​ភិ​បាល​ក្នុងការ​សម្រួល​ចរាចរណ៍​រកស៊ី​ចិញ្ចឹមជីវិត​របស់​ប្រជាពលរដ្ឋ ដោយ​ហាម​មិន​ឲ្យ​មាន​ការដាក់​កុងត្រូលជជុះ ហើយ​អ្នក​ដែល​ដើរតួ​សំខាន់​ក្នុង​បញ្ហា​នេះ​គឺ​អាជ្ញាធរខេត្ត​នីមួយៗ ត្រូវតែ​មើលផ្លូវ​នៅក្នុង​ដែន​សមត្ថកិច្ច​របស់ខ្លួន​ជាប្រចាំ​។ ជុំវិញ​បញ្ហា​នេះ​កងកម្លាំង​នគរបាល​ប្រឆាំង​បទល្មើស​សេដ្ឋកិច្ច​ដែល​ត្រូវ​ប្រជាពលរដ្ឋ​ចោទប្រកាន់​ខាងលើ​ពុំទាន់​មានការ​អធិប្បាយ​ពី​ពន្យល់​ឡើយ​៕

08-4-2014

 

Leave a Reply

(*) Required, Your email will not be published