ស្ត្រី​ម្នាក់​បាន​ស្លាប់ចោល​កូន ពេល​សម្រាលកូន​នៅ​ពេទ្យឆ្មប​ឯកជន គ្មាន​ជំនាញ​

, , Leave a comment

​ខេត្ដ​កំពង់ធំ ៖ ស្ត្រី​ម្នាក់​បាន​ស្លាប់ចោល​កូន ខណៈដែល​សម្រាលកូន​ក្នុង​ពេទ្យឆ្មប​ឯកជន​មួយកន្លែង​ស្ថិតនៅ​ភូមិ​ស្ទឹងសែន សង្កាត់​កំពង់​ក្របៅ ក្រុង​ស្ទឹងសែន ខេត្ដ​កំពង់ធំ កាលពី​វេលា​ម៉ោង​១២​និង​២០​នាទី​ថ្ងៃទី​១៧ ខែមីនា ឆ្នាំ​២០១៤ ដោយ​សម្រាលកូន​បានកូន​ប្រុស​១​ត្រឹមតែ​ជាង​២​ម៉ោង​ក៏បាន ស្ទះដង្ហើម​បណ្ដាលឱ្យ​ស្លាប់​ភ្លាម​។​

 

​ប្រភពព័ត៌មាន​ពី​ក្រុមគ្រួសារ​របស់​ស្ត្រី​រងគ្រោះ​បាន​ឲ្យ​ដឹងថា ជនរងគ្រោះ​ឈ្មោះ សេង ស្រីមុំ អាយុ​៣៤​ឆ្នាំ និង​ស្វាមី​ឈ្មោះ រុន គួ​ង មានកូន​៥​នាក់​ស្រី​៣ ប្រុស​២​ទាំង​ទារក​នេះ ។ នៅ​ថ្ងៃ​សម្រាលកូន ក្រុម​សាច់ញាតិ​បាន​នាំ​ស្ត្រី​រងគ្រោះ​ទៅ​ពេទ្យឆ្មប​ខាងលើ ដើម្បី​សម្រាលកូន​។ លុះ​សម្រាលកូន​បាន​២​ម៉ោង​គ្រូពេទ្យ​ដែល​ទទួលខុស​ត្រូវបាន​ទុកឱ្យ​អ្នកជំងឺ​នៅ​ជាមួយ​សាច់ញាតិ​ដោយសារតែ​ឃើញ​អា​ការមិន​គួរឱ្យ​ព្រួយបារម្ភ​ក្រោយពី​តាមដាន​សុខភាព​បាន​ល្អិតល្អន់​មក ហើយ​អ្នក​គ្រូពេទ្យ​ក៏បាន​ចេញទៅ​ទិញ​ម្ហូប ។ លុះ​បន្ដិចក្រោយមក​អាការ​អ្នកជំងឺ​ថប់ដង្ហើម ទើប​ហៅ​គ្រូពេទ្យ​មក​បញ្ជូន​ជនរងគ្រោះ​ទៅ​មន្ទីរពេទ្យ​តាម​រ៉ឺម៉ក​ម៉ូតូ ។ ពេលមកដល់​ខ្លោងទ្វារ​មន្ទីរពេទ្យ​ស្ដ្រី​រងគ្រោះ​បាន​សន្លប់​បាត់ស្មារតី  ។​

 

​ប្រធាន​មន្ទីរពេទ្យបង្អែក ខេត្ដ​កំពង់ធំ​បានឱ្យដឹងថា នៅពេលដែល​ពេទ្យឆ្មប​បាន​បញ្ជូន​មកដល់​មន្ទី​រ​ពេទ្យ គឺ​អាការ​របស់​អ្នកជំងឺ​ធ្ងន់ធ្ងរ​ទោះជា​គ្រូពេទ្យ​នាំគ្នា​ជួយ​យ៉ាង​សស្រាក់សស្រាំ​ក៏​មិនអាច​ជួយសង្គ្រោះ​ជីវិត​បានដែរ ដោយសារតែ​បេះដូង​ជនរងគ្រោះ​មិនអាច​ធ្វើ​ចលនា​បាន​គឺ​អ្វីៗ​គាំង​អស់​ទៅហើយ ។

 

​លោកស្រី នូ វិ​ចិ​ត្រា ដែលជា​ពេទ្យឆ្មប​ទទួលបន្ទុក​ខុសត្រូវ​នឹង​បណ្ដាលឱ្យមាន​ការបាត់បង់​ជីវិត​បានឱ្យដឹងថា អ្នកជំងឺ​មាន​សុខ​ភាពល្អ​ពុំមាន​បញ្ហា​អ្វី​នោះទេ ទើបបាន​ហ៊ាន​បណ្ដោយ​ទុកឱ្យ​សាច់ញាតិ​ឆ្លៀតឱកាស​ទិញ​ម្ហូប​តែ​គាត់​បាន​ខំប្រឹងប្រែង​អស់​លទ្ធភាព​ហើយ​នៅតែ​ពុំ​អាចជួយ សង្គ្រោះ​អាយុជីវិត​ជនរងគ្រោះ​បាន ។

 

​ជុំវិញ​បញ្ហា​ខាងលើ​នេះដែរ មហាជន​រិះគន់ថា មូលហេតុ​នៃ​ការស្លាប់​នេះ ដោយសារតែ​ការធ្វេសប្រហែស​របស់​ពេទ្យឆ្មប​ឯកជន និង​ពុំមាន​ឧបករណ៍​គ្រប់គ្រាន់ ខ្វះ​បច្ចេកទេស ខ្វះ​ជំនាញ​ក្នុងការ​ជួយសង្គ្រោះ ជាពិសេស​ពុំមាន​បុគ្គលិក​ជំនាញ​មើលថែរក្សា​តាមដាន​អាការ​អ្នកជំងឺ និង​សង្គ្រោះ​ឱ្យបាន​ទាន់ពេលវេលា រង់ចាំ​ឱ្យក្លាយ​ជា​សព​ទើប​ភ្ញាក់រលឹក​នាំ​អ្នកជំងឺ​ទៅ​មន្ទីរពេទ្យ ៕

18-3-2014 18-3-2014 (1) 18-3-2014 (2)

 

Leave a Reply

(*) Required, Your email will not be published