សមត្ថកិច្ច​ចាប់បញ្ជូន​ខ្លួន​ជនជាតិ​បរទេស​៣​នាក់ និង​ខ្មែរ​ម្នាក់ ទៅ​តុលាការ​ពាក់ព័ន្ធ​ករណី​ជួញដូរ​គ្រឿងញៀន​ឆ្លងដែន​

, , Leave a comment

​រាជធានី​ភ្នំពេញ ៖ ជន​សង្ស័យ​ចែកចាយ​គ្រឿងញៀន​៤​នាក់ ក្នុងនោះ​ជនជាតិ​នី​ហ្សេ​រី​យ៉ា ២​នាក់ ហ្វ៊ី​លី​ពី​ន​ម្នាក់ និង​ខ្មែរ​ម្នាក់ ត្រូវ​កម្លាំង​នគរបាល​ប្រឆាំង​គ្រឿងញៀន ក្រសួងមហាផ្ទៃ​ចាប់ខ្លួន​បញ្ជូន​ទៅកាន់​សាលាដំបូង​រាជធានី​ភ្នំពេញនៅ​ថ្ងៃទី​១៦ កុម្ភៈ ២០១៤ ពាក់ព័ន្ធ​ករណី​ដឹក​គ្រឿងញៀន​ជាង​២​គីឡូក្រាម ឆ្លងដែន​ចូលមក​កម្ពុជា ។​

 

​ជនសង្ស័យ​ទាំង​៤​នាក់ ១-​ឈ្មោះ Micheal Sunshines ភេទ​ប្រុស អាយុ​៣១​ឆ្នាំ ជនជាតិ​នី​ហ្សេ​រី​យ៉ា​, ២-​ឈ្មោះ Emmanuel Thankgod អាយុ​៣៣​ឆ្នាំ ជនជាតិ​នី​ហ្សេ​រី​យ៉ា​, ៣-​ឈ្មោះ​ម៉េង ស៊ីនួន ភេទ​ស្រី អាយុ​៣០​ឆ្នាំ ជនជាតិខ្មែរ ស្នាក់​នៅផ្ទះ​លេខ​៣៧៨ ផ្លូវ​លេខ​១៦៣ សង្កាត់​ផ្សារ​ដើមថ្កូវ ខណ្ឌចំការមន និង​៤-​ឈ្មោះ Macoy Mavill Villamor អាយុ​៤២​ឆ្នាំ ជនជាតិ​ហ្វ៊ី​លី​ពី​ន ។​

 

​ប្រភព​បន្តថា ស្ត្រី​ជា​ជនជាតិ​ហ្វ៊ី​លី​ពី​ន ដែល​ត្រូវ​ចាប់ខ្លួន​នៅ​ព្រលានយន្តហោះ​អន្តរជាតិ​ភ្នំពេញ បានចេញ​ដំណើរ​ពី​ប្រទេស​ប្រេ​ស៊ី​ល ទៅកាន់​ប្រទេស​សិង្ហ​បុរី និង​បាន​បន្ត​មកកាន់​ប្រទេស​កម្ពុជា ។ ជនសង្ស័យ​រូបនេះ​សារភាពថា ខ្លួន​គ្រាន់តែ​ជា​អ្នកស៊ីឈ្នួល​កាន់​វ៉ាលិស​នោះ​ឱ្យគេ​ទេ ខ្លួន​មិនបាន​ដឹងថា នៅក្នុង​វ៉ាលិស​នោះ​មាន​អ្វី​ផង ហើយ​នៅពេល​យក​វ៉ាលិស​នោះមក​ដល់​ភ្នំពេញ ប្រទេស​កម្ពុជា នាង​ត្រូវ​យកទៅ​ប្រគល់ឱ្យ​ជនជាតិ​នី​ហ្សេ​រី​យ៉ា ដើម្បី​ជា​ថ្នូរ​បាន​ប្រាក់​មកវិញ​ចំនួន​២.៥០០​ដុល្លារ​អាមេរិក ប៉ុន្តែ​មិនទាន់​បានទទួល​ប្រាក់​ផង ក៏ត្រូវ​សមត្ថកិច្ច​ចាប់ខ្លួន ។ ប្រភព​បន្តទៀតថា បន្ទាប់ពី​ចាប់ខ្លួន​ជនសង្ស័យ​ខាងលើនេះ សមត្ថកិច្ច​បន្តធ្វើ​ការ​ស្រាវជ្រាវ​ចាប់ខ្លួន​ជនជាតិ​នី​ហ្សេ​រី​យ៉ា​២ នាក់ និង​ខ្មែរ​ម្នាក់ទៀត​នៅ​រាជធានី​ភ្នំពេញ ។​

 

​ជនសង្ស័យ​ត្រូវបាន​តំណាង​អយ្យការ​កំពុងធ្វើការ​សាកសួរ ដើម្បី​រក​បន្ទុក​ចោទប្រកាន់​ដាក់ជូន​ទៅខាង​ចៅក្រម​ស៊ើបសួរ សម្រេច​ឃុំខ្លួន​ពួកគេ​ដាក់ពន្ធនាគារ​ជា​បណ្តោះអាសន្ន​រង់ចាំ​បើក​សវនាការផ្តន្ទាទោស​តាមផ្លូវ​ច្បាប់ ៕

17-2-2014 (1)

 

Leave a Reply

(*) Required, Your email will not be published