ឧទ្យាន​ជាតិ​ភ្លី​ន​ដឺ​ស៍​ឆេស (Flinders Chase National Park) ជា​រមណី​ដ្ឋា​ន​ធម្មជាតិ​ដែលមាន​ផ្ទាំង​ថ្ម​ប្រែ​ពណ៌​

, , Leave a comment

​ប្រទេស​អូស្ត្រាលី ៖ ឧទ្យាន​ជាតិ​ភ្លី​ន​ដឺ​ស៍​ឆេស​(Flinders Chase National Park) គឺជា​តំបន់​រមណីយដ្ឋាន​ធម្មជាតិ​ដែលជា​ទី​មនោ​រម្យ​មួយ​សម្រាប់​ភ្ញៀវទេសចរ​ជាតិ និង​អន្តរជាតិ​ទៅ​កម្សាន្ត​លេង​នៅ​ចុង​សប្តាហ៍ ឬ​ពេល​សម្រាក​ពី​ការងារ ។ ឧទ្យាន​នេះ​ស្ថិតនៅលើ​ផ្ទៃដី​៣២៨​គីឡូម៉ែត្រ​ជាប់​នឹង​មាត់សមុទ្រ​តែម្តង គឺ​ស្ថិតនៅលើ​កោះ​កង់​គូ​រូ​ភាគខាងត្បូង​នៃ​ប្រទេស​អូស្ត្រាលី ហើយ​ត្រូវបាន​បង្កើតឡើង​នៅក្នុង​អំឡុង​ឆ្នាំ​១៩១៩ ដោយ​ក្រុម​អភិរក្ស​បរិស្ថាន និង​សត្វ​ព្រៃរបស់​ប្រទេស​អូស្ត្រាលី ។ នៅក្នុង​ឆ្នាំ​២០០៧ ឧទ្យាន​មួយ​នេះ​ស្ទើរ​បំផ្លិចបំផ្លាញ​ទាំងស្រុង​ដោយ​ភ្លើង​ឆេះ​ព្រៃ ហើយ​ក្រុម​អ្នក​ពន្លត់អគ្គីភ័យ​បាន​ប្រើពេល​១០​ថ្ងៃ​ទើប​អាច​ពន្លត់​វា​បាន ។​

 

​ឧទ្យាន​ជាតិ​ភ្លី​ន​ដឺ​ស៍​ឆេស​(Flinders Chase National Park) មានឈ្មោះ​ល្បីល្បាញ​បំផុត គឺ​ផ្ទាំង​ថ្ម​ប្រែ​ពណ៌​ដែល​ផ្ទាំង​ថ្ម​នីមួយៗ​ខ្លះ​មាន​កម្ពស់​រហូតដល់​ទៅ​ជាង​៦០​ម៉ែត្រ​ឯណោះ ។ ផ្ទាំង​ថ្ម​ប្រែ​ពណ៌​បាន​ឈរ​យ៉ាង​សង្ហា​អែប​ជាប់​នឹង​ច្រាំង​សមុទ្រ​តែម្តង ហើយ​វា​ជា​ផ្ទាំង​ថ្ម​បុរាណ​កើតចេញពី​កំ​អែ​ភ្នំភ្លើង​កាលពី​៥០០​លាន​ឆ្នាំមុន ។ ដោយសារតែ​ភាព​សំណឹក​ប៉ះ​ជាមួយនឹង​រលក​ទឹកសមុទ្រ​ទើប​ធ្វើឱ្យ​ផ្ទាំង​ថ្ម​ទាំងនេះ​មាន​រូបរាង​ប្លែកៗ​ពីគ្នា​បែបនេះ ។

 

​ឧទ្យាន​ជាតិ​ភ្លី​ន​ដឺ​ស៍​ឆេស ក៏​ជាទី​ជម្រក​ដ៏​សុខសាន្ត​មួយ​ផងដែរ សម្រាប់​ជីវិត​សត្វព្រៃ​គ្រប់​ប្រភេទ និង​ជីវៈចម្រុះ​គ្រប់បែបយ៉ាង​ដែល​រស់នៅក្នុង​តំបន់​នេះ ហើយ​វា​ក៏​ជា​គោលដៅ​សំខាន់​មួយ​ផងដែរ សម្រាប់​ភ្ញៀវទេសចរ​ជាតិ និង​អន្តរជាតិ​ដែល​ចូលចិត្ត​ការកម្សាន្ត​បែប​ធម្មជាតិ និង​ទស្សនា​សត្វព្រៃ ពីព្រោះថា​នៅក្នុង​ឧទ្យាន​នេះ​មាន​ពពួកសត្វ​កម្រៗ​ជាច្រើន​ដូចជា សត្វ​ខ្លាឃ្មុំ​កូ​ឡា និង​សត្វ​កង់​គូ​រូ​ជាដើម ។​

 

​គ្រាន់តែ​ធ្វើដំណើរ​ទៅដល់​ឧទ្យាន​នេះ​ភ្លាម លោកអ្នក​នឹងមាន​អារម្មណ៍​ថា ប្លែក​ជាក់​ជាពុំខាន​ឡើយ ពិសេស​ពេល​មើលឃើញ​ព្រៃព្រឹក្សា​ដ៏​ខៀវស្រងាត់​ដុះ​អម​យ៉ាង​ក្រាស់ឃ្មឹក​តាម​សង្ខាង​ផ្លូវ ។ ប៉ុន្តែ​ពេល​បើកបរ​លោកអ្នក​គួរ​មានការ​ប្រុងប្រយ័ត្ន​ខ្ពស់ ពីព្រោះ​សត្វព្រៃ​នៅ ទីនេះ​មិនសូវ​ខ្លាច​មនុស្ស​ឡើយ ហើយ​ពួកវា​ចូលចិត្ត​បង្ហាញខ្លួន​ជា​ញឹកញាប់​ទៀតផង ។

 

​ភ្ញៀវទេសចរ​ដែល​បានមក​កម្សាន្ត​លេង​នៅក្នុង​ឧទ្យាន​ជាតិ ភ្លី​ន​ដឺ​ស៍​ឆេស ពួកគេ​មិនដែល​មើលរំលង​ឡើយ​ការ​មក​ទស្សនា​ទេសភាព​នៅតាម​មាត់សមុទ្រ ពិសេស​គឺ​នៅលើ​ឆ្នេរ​ខ្សាច់​ដ៏​ស្រស់ស្អាត​ដែលជា​កន្លែង​សត្វ​ឆ្មាទឹក​បង្ហាញខ្លួន ។ ការថតរូប​អនុស្សាវរីយ៍​ជាមួយ​ក្រុមគ្រួសារ និង​គូស្នេហ៍​ជាប់​នឹង​ផ្ទាំង​ថ្ម​ប្រែ​ពណ៌ គឺជា​ទម្លាប់​ដ៏​ពេញនិយម​មួយ​ផងដែរ នៅក្នុង​ចំណោម​ភ្ញៀវ​ដែល​មក​កម្សាន្ត​នៅទីនេះ ។ ពួកគេ​តែងតែ​ចូលទៅក្នុង​រូង​ផ្ទាំង​ថ្ម​ដើម្បី​ស្តាប់​សំឡេង​ដ៏​គ្រលួច​នៅក្នុង​ផ្ទាំង​ថ្ម​នោះ គឺ​ពេលដែល​ខ្យល់​បក់​មក​ប៉ះ​នឹង​ផ្ទាំង​ថ្ម​នោះ ។ នៅក្នុង​ឧទ្យាន​ជាតិ​ភ្លី​ន​ដឺ​ស៍​ឆេស​ក៏មាន​កន្លែង​អាំង​សាច់​ឬ​កន្លែង​បោះជំរំ​ផងដែរ ពិសេស​គឺ​នៅជាប់​នឹង​ទន្លេ​ថ្ម​ដែល​ទន្លេ​នេះ​មានទឹក​ក្តៅ​ឧណ្ហៗ អាចឱ្យ​ភ្លៀវ​ទេសចរ​ចូល​ងូត​កម្សាន្ត​សប្បាយ​ដោយ​គ្មាន​ភ័យព្រួយ​អ្វី​សោះឡើយ ។ ចំពោះ​សេវាកម្ម​សណ្ឋាគារ និង​ភោជនីយដ្ឋាន​វិញ គឺ​នៅ​មិន​ឆ្ងាយ​ពី​ឧទ្យាន​ជាតិ​មួយ​នេះ​ប៉ុន្មាន​ឡើយ ហើយ​ជា​រៀងរាល់​ឆ្នាំមាន​ភ្លៀវ​ទេសចរ​មិន​ក្រោម​លាន​នាក់​ទេ​ដែល​បានមក​កម្សាន្ត​លេង​នៅទីនេះ ៕

29-1-2014 (1) 29-1-2014 (2) 29-1-2014 (3) 29-1-2014 (4) 29-1-2014 (5) Cape Willoughby Lighthouse 29-1-2014 (7) 29-1-2014 (8) 29-1-2014 (9)

 

Leave a Reply

(*) Required, Your email will not be published