អើតអើម​មួយរយៈ មកវិញ​ស្ទើរ​លង់​ស្មារតី​

, , Leave a comment

​រាជធានី​ភ្នំពេញ ៖ បាត់​មុខ​មួយរយៈ​ពី​កញ្ចក់​ទូរទស្សន៍​ក្នុងស្រុក ឥឡូវនេះ​ស្ថានីយទូរទស្សន៍​ខេមរភូមិន្ទ​ប៉ុស្តិ៍​លេខ ៥ បានចាប់ផ្ដើម​ចាក់ផ្សាយ​ភាពយន្ត​ភាគ​របស់​ថៃ​ជាថ្មី​នៅ​មួយ​រ​យៈ​កា​ល​​ចុងក្រោយ​នេះ ខណៈដែល​ស្ថានីយ​ដទៃទៀត​កំពុងតែ​ពេញនិយម​ភាពយន្ត​ចិន ឬ​កូរ៉េនោះ​។ នេះ​មិនមែនជា​រឿង​ថ្មី​ទេ​សម្រាប់​បណ្ដា​ប៉ុស្តិ៍​ទូរទស្សន៍​នៅក្នុង​ប្រទេស​កម្ពុជា ព្រោះ​ធ្លា​ប់​បានក្លាយ​ជាទី​ពេញនិយម​បំផុត​ក្នុង​ស្រទាប់​មហាជន​ខ្មែរ​នៅ អំឡុង​ទសវត្ស ១៩៩០​។​

 

​ការហូរចូល​យ៉ាង​ភ្លូកទឹកភ្លូកដីនៃ​ភាពយន្ត​បរទេស​ពេលនោះ ជាដើម​ចមនាំ​ឲ្យ​វិស័យ​ភាពយន្ត​ខ្មែរ​ត្រូវ​សន្លប់​ស្ដូកស្ដឹង ដោយ​ផលិតករ​ទាំងអស់​ហាក់​ដូចជា​សោះអង្គើយ​លើ​ការបង្កើត​ភា​ព​យ​ន្ត​ខ្លួនឯង ដើម្បី​បម្រើ​អារម្មណ៍​ទស្សនិកជន​ក្នុងស្រុក​ ។ ចំណែក​ស្ថានីយទូរទស្សន៍​នានា​ក៏​មិនបាន​ផលិតភាព​យន្ត​ដើម្បី​ចាក់ផ្សាយ​ផ្ទាល់ខ្លួន​នោះឡើយ​ដោយ​រង់ចាំ​ខ្ចី​ដង្ហើម​គេ​ដក​ប៉ុ​ណ្ណោះ និង​ស្វែងរក​ពាណិជ្ជកម្ម​ទ្រទ្រង់​ការផ្សាយ​។ កាលពី​ថ្ងៃទី ២៨ ខែមករា ឆ្នាំ ២០០៣ រាជរដ្ឋាភិបាល​កម្ពុជា​បានសម្រេច​ផ្អាក​ការចាក់ផ្សាយ​គ្រប់​ភាពយន្ត​របស់​ថៃ​នៅ​គ្រប់​ស្ថា​នី​យ​ទូរ​ទ​ស្ស​ន៍​ខ្មែរ​ទូទាំងប្រទេស​កម្ពុជា រហូតមកដល់​បច្ចុប្បន្ន​នេះ​។​

 

​អន្តរកាល​នេះបានធ្វើ​ឲ្យ​វិស័យ​ភាពយន្ត​ក្នុងស្រុក​ចាប់ផ្ដើម​កម្រើក​ឡើងវិញ ដោយមាន​ផលិតករ​ភាគច្រើន​ងាក​មក​ថត​ភាពយន្ត​ផ្ទាល់ខ្លួន​វិញ ដើម្បី​ប្រជែង​ជាមួយ​ភាពយន្ត​របស់​កូរ៉េ ចិន ហុ​ង​​កុង ឬ​ឥណ្ឌា​ជាដើម​។ ហើយ​ចំនួន​នេះ​មានការ​កើនឡើង​ជា​លំដាប់ និង​មាន​ផលិតករ​កាន់តែច្រើន ។ នៅ​មិនទាន់​ដឹង​នៅឡើយ​ថា តើ​ការចាក់ផ្សាយ​ភាពយន្ត​ថៃ​ជាថ្មី​របស់​ស្ថា​នី​យ​ទូរ​ទ​ស្ស​ន៍​ខាងលើ​បានទទួល​ការអនុញ្ញាត​ពី​រាជរដ្ឋាភិបាល ឬ​ក្រសួង​មន្ទីរ​ដែល​ពាក់ព័ន្ធ​យ៉ាងណា​នោះ ។ មហាជន​មួយចំនួន​បាន​លើកឡើងថា ប្រសិនបើ​មានការ​អនុញ្ញាត​ជាទូទៅ ប្រ​ហែ​ល​ជា​​មិនយូរ​ទេ នឹងមាន​ការហូរចូល​យ៉ាង​ភ្លូកទឹកភ្លូកដី​ដូច​ពីមុន​ដែល​អាចជា​ឧបសគ្គ​មួយ​សម្រាប់​ការអភិវឌ្ឍ​វិស័យ​ភាពយន្ត​ខ្មែរ​មិន​ខាន ។​

 

​ប៉ុន្តែ​បើ​យោងតាម​ឯកឧត្ដម ស៊ិន ចន្ទ​សា​យ៉ា ប្រធាន​នាយកដ្ឋាន​ភាពយន្ត​នៃ​ក្រសួង​វប្បធម៌ ធ្លាប់បាន​មានប្រសាសន៍ថា លោក​កំពុងមាន​ផែនការ​ជាច្រើន​ដើម្បី​អភិវឌ្ឍ​វិស័យ​ភាពយន្ត​ខ្មែរ​។ ក្រសួង​មាន​គម្រោង​បង្កើត​ព្រឹត្តិការណ៍​មួយចំនួន​ដើម្បី​បណ្ដុះបណ្ដាល ជំនាញ​ភាពយន្ត​ដល់​កូន​ខ្មែរ​ជំនាន់​ក្រោយ ដោយ​អញ្ជើញ​អ្នកជំនាញ​ភាពយន្ត​មក​ចែករំលែក​បទពិសោធន៍​ធ្វើ​យ៉ា​ង​ណា​​ឲ្យ​ពូកគេ​មាន​សមត្ថភាព​អាច​ប្រកួតប្រជែង​បាន​៕

06-1-2014 (1)

06-1-2014  06-1-2014 (2)

 

Leave a Reply

(*) Required, Your email will not be published