បបួលគ្នា​ទៅ​ឃ្វាលគោ ដូច​នាំគ្នា​ទៅ​ស្លាប់​

, , Leave a comment

​ខេត្ដ​កំពង់ចាម ៖ ឪពុកម្តាយ​របស់​ក្មេងរងគ្រោះ​ដោយ​លង់ទឹក​ទាំង​៣​នាក់​បាន​យំ​ស្ទើរ​បោក​ខ្លួន ខណៈដែល​ពួកគេ​ទាំងអស់គ្នា​បាន​បាត់បង់​កូន​ជាទី​ស្រឡាញ់​របស់គេ​ទៅនោះ ។ ហេតុការណ៍​នេះ​បានកើត​ឡើង​កាល​រសៀល​ថ្ងៃទី​២៦ ខែធ្នូ ឆ្នាំ​២០១៣ នៅ​ភូមិ​ស្រែ​សៀម ឃុំ​ជី​រោទ៍​ទី​២ ស្រុក​ត្បូងឃ្មុំ ខេត្ដ​កំពង់ចាម ។​

 

​ក្មេងប្រុស​ស្រី​ដែល​លង់ទឹក​ស្លាប់ ទាំង ៣​នាក់​មានឈ្មោះ ១-​ថុង ធា​រិ​ទ្ធ ភេទ ប្រុស អាយុ​៩​ឆ្នាំ​, ២-​វី ឫទ្ធី ភេទ​ប្រុស អាយុ​៩​ឆ្នាំ និង​៣-​រៀម សីហា ភេទ​ស្រី អាយុ​៩​ឆ្នាំ ។ ពួកគេ​ទាំង​៣​នាក់​មាន លំនៅឋាន​ក្បែរ​គ្នា​ក្នុងភូមិ​-​ឃុំ​កើតហេតុ​ខាងលើ​។ ក្រោយពី​ស្លាប់​សាកសព​ត្រូវបាន​ឪពុក ម្ដាយ​រៀបចំ​ធ្វើ​ពិធីបុណ្យ​រួមគ្នា​តែម្ដង​។​

 

​ប្រភពពី​យុវជន​ម្នាក់​ឈ្មោះ រឿន សំណាង អាយុ ១៩​ឆ្នាំ ដែល​ស្ថិតនៅក្នុង​ហេតុការណ៍​នោះបាន​រៀបរាប់​ប្រាប់ថា រូបគេ​រួមទាំង​ក្មេង​ទាំង​៣​នាក់​ខាងលើនេះ​បាន​ទៅ​ឃ្វាលគោ​ដូច​សព្វមួយដង ។ ក្រោយមក​ក្មេង​ទាំង​៣​នាក់​នោះបាន​ចុះទៅ​មុជទឹក​ស្រះ តែ​រូបគេ​បាន​ទៅ​បេះ​ផ្លែ​ពុទ្រា ក្បែរ​នោះ​ស៊ី​ទៅវិញ ។ ប្រហែល​១​ម៉ោង​ក្រោយមក រឿន សំណាង ដែល​បេះ​ផ្លែ​ពុទ្រា​បាន​បំណង​ទៅ​ចែក​ពួកគេ​ស្រាប់តែ ដើររក​ក្មេងៗ​ទាំង​៣​នាក់​នោះ​មិនឃើញ​។ ពេលនោះ រឿន សំណាង បាន​រត់​ជា​ប្រញាប់​ទៅ​មើល ស្រះ​ទឹក​ឃើញតែ​ខោអាវ​មិនឃើញ មនុស្ស​ក៏​កើតការ​សង្ស័យ ហើយក៏​ចុះ រាវ​ក្នុង​ស្រះ​ស្រាប់តែ​ប្រទះឃើញ​ពួកគេ ទាំង​៣​នាក់​ស្លាប់​ក្នុង​ទឹក​ក្បែរៗ​គ្នា​ទៅ ហើយ ។ រឿន សំណាង ស្រង់​សព​ក្មេង ទាំង​៣​នាក់​ដាក់​លើគោក​រួច​ប្រញាប់​ទៅ ប្រាប់​ឪពុកម្ដាយ​ពួកគេ​នៅឯ​ភូមិ ។​

 

​ក្រោយពី​ស្រង់​ក្មេង​ទាំង​៣​នាក់​នោះបាន​ស្លាប់​បាត់ទៅហើយ ឪពុកម្ដាយ​ក្មេង​ទាំង​៣​នាក់​យំសោក ព្រោះ​មិន​នឹកស្មានថា កូនប្រុស​ស្រី​របស់ ខ្លួន​ស្លាប់​យ៉ាង​ដូច្នេះ​សោះ ៕

27-12-2013

 

Leave a Reply

(*) Required, Your email will not be published