ស្ត្រី​មាន​ជំងឺ​ប្រចាំកាយ​ម្នាក់ ស្លាប់​យ៉ាង​អាណោចអាធ័ម​នៅខាងមុខ​មន្ទី​ពេទ្យ​ព្រះកុសុមៈ​

, , Leave a comment

​រាជធានី​ភ្នំពេញ ៖ ហេតុការណ៍​ដ៏​រន្ធត់​មួយ​នៅខាងមុខ​មន្ទី​ពេទ្យ​ព្រះកុសុមៈ បាន​បង្ក​ឲ្យ​មានការ​ភ្ញាក់ផ្អើល ខណៈដែល​ស្ត្រី​វ័យក្មេង​ម្នាក់​បាន​ដេកស្លាប់ ដោយសារ​ជំងឺ​ប្រចាំកាយ ។ ហេតុការណ៍​នេះ​បាន​កើតឡើង​កាលពី​វេលា​ម៉ោង ១២​នឹង​៣០​នាទី ថ្ងៃទី​២៦ ខែធ្នូ ឆ្នាំ​២០១៣​នេះ ត្រង់ចំណុច​ផ្លូវ​លេខ​២៧១ សង្កាត់​ទឹកល្អក់​២ ខណ្ឌទួលគោក រាជធានី​ភ្នំពេញ​។​

 

​ស្ត្រី​ដ៏​អភ័ព្វ​ស្លាប់​ដោយសារ​ជំងឺ​ទាច​ទឹក​មានឈ្មោះ  វ័ន ច​ន្ធូ អាយុ​២៤​ឆ្នាំ មុខរបរ ចាំចំការ​ឲ្យ​គេ ស្នាក់នៅ​ក្នុងភូមិ​ប៉​ខាំ ឃុំ​ប​កែវ ស្រុក​អូយ៉ាដាវ ខេត្ត​រតនៈគីរី ។​

 

​បើតាម​សម្តី​ស្ត្រី​ឈ្មោះ នួន មុំ អាយុ​៥២​ឆ្នាំ ត្រូវជា​ម្តាយ​ស្ត្រី​ខាងលើ មាន​ស្រុកកំណើត ភូមិ​បន្ទាយ ឃុំ​កំពង់​លាង ស្រុក​ទូក​មាស ខេត្តកំពត បាន​ប្រាប់​ឲ្យ​ដឹងថា កូនស្រី​របស់គាត់​មាន​ជំងឺ​រាំ​រ៉ៃ​ជាង​២​ឆ្នាំ​មកហើយ ។ ចំណែក​ប្តី​របស់​នាង​បាន​ស្លាប់​ដោយសារ​ជំងឺ​នេះដែរ​។ ​ស្ត្រី​ជា​ម្តាយ​បន្តទៀតថា កាលពី​ជាង​១​ខែ​មុន​គាត់​បាន​បញ្ជូន​កូនស្រី​របស់គាត់​ទៅ​សម្រាក​នៅ​មន្ទី​ពេទ្យ​ខេត្ត​រតនៈគីរី​ដែរ ហើយក៏​បញ្ជូនមក​មន្ទីរពេទ្យ​មិត្តភាព​ខ្មែរ​-​សូ​វៀត​វិញ ។ រហូ​ត​ម​កដល់​ថ្ងៃកើតហេតុ​ខាង​គ្រូពេទ្យ​បាន​ប្រាប់ថា អត់​មានសង្ឃឹម​ទេ​ឲ្យ​ត្រឡប់ទៅផ្ទះ​វិញ​ទៅ ។​

 

​ពេលនោះ​គាត​ក៏បាន​នាំ​កូន​របស់គាត់​ចេញពី​មន្ទីរពេទ្យ​ដោយ​ជិះ​រ៉ឺម៉ក​កង់​បី ខណៈ​ជិះ​មកដល់​ខាងមុខ​មន្ទី​ពេទ្យ​ព្រះកុសុមៈ គោលបំណង​ឈរ​ចាំ​រថយន្ត​ជិះ​ទៅ​ស្រុក​វិញ ស្រាប់តែ​កូន​របស់គាត់​បាន​ដួល​ដាច់​ផ្ងារ​ទៅក្រោយ​ស្លាប់​ភ្លាមៗ​តែម្តង ។​

 

ការស្លាប់​យ៉ាង​អាណោចអាធ័ម​របស់​ស្ត្រី​ខាងលើនេះ​ក៏បាន​បន្សល់ទុក​កូនប្រុស អាយុ​៥​ឆ្នាំ​ម្នាក់​ផងដែរ ។ ក្រោយ​កើតហេតុ​មន្ទី​ពេទ្យ​ព្រះ​កុ​សមៈបាន​ជួយ​ជួល​រថយន្ត​ដឹក​សព​ស្ត្រី​ខាងលើ​ទៅ​បូជា​នៅ​វត្ត​ទឹកថ្លា​៕

27-12-2013

 

Leave a Reply

(*) Required, Your email will not be published