ប្រជា​នេសាទ​លើកគ្នា​សុំ​មក​សាលាសង្កាត់​ផ្សារឆ្នាំង ដើម្បី​ឲ្យ​អាជ្ញាធរ និង​មន្ត្រី​ជំនាញ​ជលផល​ដោះស្រាយ​បាតុភាព​នេសាទ​ប្រើប្រាស់​ឧបករណ៍​ខុសច្បាប់​

, , Leave a comment

​ខេត្តកំពង់ឆ្នាំង ៖ ក្រុម​ប្រជា​នេសាទ​ប្រមាណ​៥៤​នាក់​បាននាំគ្នា​មក​សាលាសង្កាត់​ផ្សារឆ្នាំង ដើម្បី​ឲ្យ​អាជ្ញាធរ និង​មន្ត្រីជលផល​ដោះស្រាយ​បាតុភាព​នេសាទ​នៅ​ចំណុច​បឹង​ធំ និង​បាន​សំណូមពរ​បញ្ជាក់​ឲ្យ​ច្បាស់​នូវ​ការប្រើប្រាស់​ឧបករណ៍​នេសាទ ស្របច្បាប់​។ ហេតុការណ៍​លើកគ្នា​មក​តវ៉ា​នេះ​បាន​កើតឡើង​កាលពី​ព្រឹក​ថ្ងៃទី​២៥ ខែធ្នូ ឆ្នាំ​២០១៣ ក្នុងភូមិ​សំរោង​សង្កាត់​ផ្សារឆ្នាំង ក្រុង​កំពង់ឆ្នាំង ខេត្តកំពង់ឆ្នាំង​។​

 

​តំណាង​ឲ្យ​ប្រជាពលរដ្ឋ​ដែល​ប្រកបមុខរបរ​នេសាទ​នៅ​ភូមិ​សំរោង​មានឈ្មោះ​ស៊ឹម ប៊​ន​, អ៊ឹម សុខុម​,​ចាប សារឿន បាន​រាយការណ៍ ថា​មាន​ប្រជា​នេសាទ​មួយចំនួន​ប្រើ​ឧបករណ៍​ខុសច្បាប់​ក្នុង​ចំណុច​បឹង​ធំ ព្រំប្រទល់​៣​ស្រុក​គឺ​ក្រុងមាន​ក្រុង​កំពង់ឆ្នាំង ស្រុក​រលាប្អៀរ និង​ស្រុក​ជល​គី​រី​។ ពួកគាត់​បាន​រាយការណ៍​ឲ្យ​អាជ្ញាធរ​ច្រើនដង​ហើយ តែ​គ្មាន​ចំណាត់ការ​ដោះស្រាយ​ទើប​ពួកគាត់​មក​សាលាសង្កាត់​ថ្ងៃនេះ ដើម្បី​សំណូមពរ​ឲ្យ​មន្ត្រី​ជំនាញ​ពន្យល់​អំពី​ការប្រើប្រាស់​ឧបករណ៍​នេសាទ ស្របច្បាប់​។​

 

​លោក​នាយរង​ខណ្ឌ​រដ្ឋ​បាល​ជលផល​កំពង់ឆ្នាំង បាន​ពន្យល់​ប្រជាពលរដ្ឋ​ទាំងអស់​ដែល​បានមក​ចូលរួម​ប្រជុំ​នៅ​សាលាសង្កាត់ ថា ឧបករណ៍​នេសាទ​ចំនួន​៥០​ប្រភេទ​ដែល​ច្បាប់​អនុញ្ញាត បើ​ប្រជាពលរដ្ឋ​ឃើញ​មាន​ប្រជា​នេសាទ​ណា​ប្រើប្រាស់​ឧបករណ៍​នេសាទ​ខុសពី ចំនួន​៥០​ប្រភេទ​នេះ ត្រូវ​សហការ និង​រាយការណ៍​មក​អាជ្ញាធរ សមត្ថកិច្ច​ជំនាញ ដើម្បី​ចុះបង្ក្រាប​ឲ្យ​បាន​ទាន់ពេលវេលា​។​

 

​លោក​បាន​សំណូមពរ​ដល់​ប្រជាពលរដ្ឋ​ទាំងអស់​កុំ​ឲ្យ​ប្រើ​ហិង្សា​ចាប់យក​ឧបករណ៍​នេសាទ​ខុសច្បាប់​ទាំង​នោះមក​កម្ទេច ចោល​ដោយ​ខ្លួនឯង ដោយ​គ្មាន​ការចូលរួម​ពី​អាជ្ញាធរ និង​សមត្ថកិច្ច​ជំនាញ ព្រោះ​ការធ្វើ​បែបនេះ​ជា​អំពើ​ខុសច្បាប់ ហើយ​ពាក់ព័ន្ធ​នឹង​ផ្លូវច្បាប់​គេ​អាច​ចោទ​បាន​ថា យើង​បាន​បំផ្លាញ​ទ្រ​សម្បត្តិ​អ្នកដទៃ​។​

 

​ប្រជានេសាទ​ទាំងអស់​បាន​ថ្លែងអំណរគុណ​ដល់​អាជ្ញាធរ​ដែនដី និង​មន្ត្រី​ជំនាញ​ជលផល​ដែល​បាន​ជួយ​ពន្យល់​ដល់​ពួកគាត់​ឲ្យ​បានដឹង ក្នុងការ​ប្រើ​ប្រា​ស់​​ឧបករណ៍​នេសាទ​ឲ្យ​ស្របតាម​ច្បាប់​។ ចំពោះ​បទល្មើស​ពួកគាត់​បាន​សន្យាថា នឹង​រាយការណ៍​ជូន​អាជ្ញាធរ និង​សមត្ថកិច្ច​ជំនាញ ដើម្បី​ចុះបង្ក្រាប​ឲ្យ​បាន​ទាន់ពេលវេលា ដើម្បី​រក្សាបាន​ពូជ​មច្ឆជាតិ​ឲ្យ​ស្ថិតនៅ​គង់វង្ស​សម្រាប់​កូនចៅ​ជំនាន់ ក្រោយ​៕

27-12-2013

 

Leave a Reply

(*) Required, Your email will not be published