ពីរ​នាក់​បងប្អូន​បានដាក់​ពាក្យបណ្តឹង​ឲ្យ​សមត្ថកិច្ច​រក​យុត្តិធម៌ ករណី​ថៅកែ​ខារ៉ាអូខេ​យីហោ បុប្ផា​ជាយដែន បង្ខាំង​ធ្វើ​ទារុណកម្ម​ប៉ុនប៉ង​រំលោភ​នៅក្នុង​បន្ទប់​ខារ៉ាអូខេ​

, , Leave a comment

​រាជធានី​ភ្នំពេញ ៖ ថៅកែ​ខារ៉ាអូខេ​មួយកន្លែង​យីហោ បុប្ផា​ជាយដែន ត្រូវបាន​នារី​រងគ្រោះ​២​នាក់​បងប្អូន​ដាក់ពាក្យ​បណ្តឹង​ករណី​បង្ខាំង​ធ្វើ​ទារុណកម្ម​ប៉ុនប៉ង​រំលោភ​នៅក្នុង​បន្ទប់​ខារ៉ាអូខេ ។ហេតុការណ៍​ភ្ញាក់ផ្អើល​មួយ​នេះ​បាន​កើតឡើង​កាលពី​វេលា​ម៉ោង​២​និង​៣០​នាទី​អធ្រាត្រ ថ្ងៃទី​២២ ខែធ្នូ ឆ្នាំ​២០១៣ ស្ថិតនៅតាម​បណ្តោយ​ផ្លូវ​លេខ​៩៩ សង្កាត់​ផ្សារ​ដើមថ្កូវ ខណ្ឌចំការមន រាជធានី​ភ្នំពេញ ។​

 

​នារី​រងគ្រោះ​២​នាក់​បងប្អូន​មានឈ្មោះ សែម ទិ​ត្យ​ចិន្តា អាយុ​២២​ឆ្នាំ និង​ឈ្មោះ សែម លីន​ដា អាយុ​១៨​ឆ្នាំ អ្នក​ទាំងពីរ​ស្នាក់នៅ​ភូមិ​បន្លា​ស្អិត សង្កាត់​ឃ្មួញ ខណ្ឌ​សែន​សុខ រាជធានី​ភ្នំពេញ ។

 

​តាម​ការរៀប​រាប់រប​ស់នា​រី​ទាំងពីរ​នាក់​បងប្អូន​បាន​ប្រាប់​សមត្ថកិច្ច​ឲ្យ​ដឹងថា ដំបូង​ឡើយ​កាលពី​ព្រលប់​ថ្ងៃទី​២១ ខែធ្នូ ឆ្នាំ​២០១៣ ពួកនាង​រួមជាមួយ​បងស្រី​ម្នាក់ទៀត​ឈ្មោះ រដ្ឋា បាននាំគ្នា​ទៅ​ចូល​ញាំ​អាហារ និង ស្រា​បៀរ​នៅក្នុង​ហាង​បុប្ផា​ជាយដែន​ក្នុង​លក្ខណៈ​គ្រួសារ ។ ពេលនោះ​ថៅកែ​ហាង​ម្នាក់ ឡេ ហុក​ឡាយ បានមក​រាក់ទាក់​ស្វាគមន៍​យ៉ាង​សមគួរ​មកលើ​ពួកនាង ទាំង​៣​នាក់​បងប្អូន ។ លុះដល់​វេលាយប់​ជ្រៅ​ម៉ោង​ប្រមាណ​១២ ឈ្មោះ ឡេ ហុក​ឡាយ បាន​បបួល​ពួកនាង​ចូលទៅ​កាន់​បន្ទប់​ខារ៉ាអូខេ​ដើម្បី​ច្រៀង​រាំលេង កំសាន្ត ។ ប៉ុន្តែ​នៅពេលដែល​ពួកនាង​ផឹកស៊ី​ជ្រុល​ដំណើរ​ស្រវឹង​ជោកជាំ​ស្ទើរ បាត់ស្មារតី ស្រាប់តែ​ឈ្មោះ ឡេ ហុក​ឡាយ បាន​បណ្តេញ​នារី​ម្នាក់​ជា​ប្អូន ក្នុងចំណោម​នារី​ទាំងពីរ​នាក់​ឲ្យ​ចេញពី​បន្ទប់​ខារ៉ាអូខេ ហើយ ទុក​បងស្រី​របស់ខ្លួន​ឲ្យ​នៅក្នុង​បន្ទប់​ជាមួយ​ឈ្មោះ ឡេ ហុក​ឡាយ ។ ពេលនោះ​នារី​ជា​ប្អូន​មិន​ព្រម​ចេញពី​បន្ទប់​ខារ៉ាអូខេ​ចោល​បងស្រី​ឡើយ ហើយ​នៅ​ក្រាញននៀល​រង់ចាំ​ចេញពី​ខារ៉ាអូខេ​ជាមួយ​បងស្រី ។

 

ដោយសារ​នារី​ជា​ប្អូន​មិន​ព្រម​ចេញពី​បន្ទប់​ខារ៉ាអូខេ​តាម​បំណង​របស់​ឈ្មោះ  ឡេ ហុក​ឡាយ ទើប​រូបគេ​នារី​ជា​ប្អូន​ត្រូវ​មួយ​កំផ្លៀង​របស់​ថៅកែ ឡាយ នៅក្នុង​បន្ទប់​ខារ៉ាអូខេ ហើយ​គំរាម​មិន​ឲ្យ​ស្រែក​ឆោ​រ​ឡោរ​ឡើយ ។ ទោះជា​យ៉ាងនេះ​ក៏ដោយ នារី​ទាំងពីរ​នាក់​បងប្អូន​បាន​លើកដៃ​សំពះ​និង​លត់​ជង្គង់​ក្នុង​បន្ទប់ ខារ៉ាអូខេ​សុំ​អង្វរ​ឈ្មោះ ឡេ ហុក​ឡាយ កុំ​ធ្វើបាប​ពួកនាង រហូត​ហេតុការណ៍​នេះ​មានការ​ភ្ញាក់ផ្អើល​ដល់​ស​ម​ត្ថ​កិច្ច​ចុះ​អន្តរាគមន៍ រំដោះ​ពួកនាង​ចេញពី​បន្ទប់​ខារ៉ាអូខេ​នាំមក​កាន់​ស្នាក់ការ​ប៉ុស្តិ៍ រដ្ឋបាល​ផ្សារ​ដើមថ្កូវ​ដើម្បី​ដាក់ពាក្យ​បណ្តឹង​។​

 

​នៅពេលដែល​សមត្ថកិច្ច​នគរបាល​ប៉ុស្តិ៍​ផ្សារ​ដើមថ្កូវ​ចុះទៅ​អន្តរាគមន៍​នោះ គឺ​សមត្ថកិច្ច​មិនបាន​ឃាត់ខ្លួន​ជនបង្ក​ហេតុ​ឡើយ ហើយ​ថែមទាំង​នាំគ្នា​ការពារ​ឲ្យ​បើករថយន្ត​ចេញពី​កន្លែងកើតហេតុ​តាម​សម្រួល​ធ្វើ​ដូច​មិនមាន​រឿង​អ្វី​កើតឡើង​ឡើយ​។

23-12-2013

​ចំពោះ​ករណី​ខាងលើនេះ ចាំ​មើលថា តើ​សមត្ថកិច្ច​ចាត់ការ​យ៉ាង​ណា​ចំពោះ​ម្ចាស់​ហាង​មួយ​នេះ​។ ហើយ​ករណីបែបនេះ​សម្រាប់​ថៅកែ​ហាង​ខាងលើ​ក៏​មិនមែនជា​លើក​ទី​១​ដែរ នេះ​បើតាម​ការ​បង្ហើប​ពី​មន្ត្រីនគរបាល​ខណ្ឌចំការមន​។ តាម​ការរៀប​រាប់រប​ស់នា​រី​ទាំងពីរ​នាក់​បងប្អូន គឺ​ថៅកែ​ហាង​ឈ្មោះ ឡេ ហុក​ឡាយ បាន​សម្តែង​ឫកពារ​ក្នុង​សកម្មភាព​ខាងលើ គឺមាន​លក្ខណៈ​ប៉ុនប៉ង​រំលោភ​លើ​ពួកនាង ។ ជុំវិញ​បញ្ហា​នេះ​មិនទាន់​មានកា​បំភ្លឺ​ពី​ភាគី​ម្ចាស់​ហាង​ខារ៉ាអូខេ​យីហោ បុប្ផា​ជាយដែន នៅឡើយ​ទេ ព្រោះ​ទូរ​សព្ទ័​ចូល​ហើយ​គ្មាន​អ្នកទទួល ៕

 

Leave a Reply

(*) Required, Your email will not be published