កូន​រមិលគុណ វាយ​សម្លាប់​ម្ដាយ​ខ្លួន ថា​មកពី​ព្រាយ​បិសាច​បម្រុង​មក​ជញ្ជក់​ឈាម​

, , Leave a comment

​ខេត្ដ​ពោធិ៍សាត់ ៖ កូន​អកតញ្ញូ​ម្នាក់​បាន​លើកដៃ​វាយ​ម្តាយបង្កើត​របស់ខ្លួន ដែលជា​អ្នក​បីបាច់​ថែរក្សា និង​មាន​គុណូបការៈ​ចំពោះ​ខ្លួន បានធ្វើ​ឲ្យ​មានការ​ភ្ញាក់ផ្អើល​ដល់​ប្រជាពលរដ្ឋ ហើយ​ត្រូវបាន​សមត្ថកិច្ច​ចាប់​ឃាត់ខ្លួន​ភ្លាមៗ ក្រោយ​កើតហេតុ​ផងដែរ ។ ហេតុការណ៍​កូន​រមិលគុណ​វាយ​សម្លាប់​ម្ដាយ​ខ្លួន​នេះ​កើតឡើង​កាលពី​វេលា​ម៉ោង ៧ និង ៣០ នាទី​យប់​ថ្ងៃទី​១០ ខែធ្នូ ឆ្នាំ​២០១៣ ឋិត​នៅក្នុង​ភូមិ​ឈើទាល ឃុំ​ត្នោតជ្រំ ស្រុក​ក្រគរ ខេត្ដ​ពោធិ៍សាត់ ។

 

​កូនប្រុស​អកតញ្ញូ​ដែល​វាយ​សម្លាប់​ម្តាយ​មានឈ្មោះ ឆោម ហេង អាយុ​៣៨​ឆ្នាំ រស់នៅក្នុង​គ្រួសារ​ជាមួយ​ម្ដាយ និង​មាន​ប្រពន្ធ​ឈ្មោះ ឈុត រដ្ឋា អាយុ ៤០​ឆ្នាំ មានកូន​ប្រុស​ស្រី​៤​នាក់​ក្នុងបន្ទុក​។ ចំណែក​ម្តាយ​ដែល​កូន​វាយ​សម្លាប់​នោះ​មានឈ្មោះ អ៊ូ ខេង  អាយុ ៧០ ឆ្នាំ ។

 

​ប្រភពពី​សមត្ថកិច្ច​បា​ន​ឲ្យ​ដឹងថា តាម​ចម្លើយសារភាព​ជនសង្ស័យ​បាន​ថា ៖ “​រូបគេ​មិនបាន​វាយ​សម្លាប់​ម្ដាយ​ទេ គឺ​គេ​វាយ​ព្រាយ​បិសាច ហេតុអ្វី​បានជា​ម្ដាយ​គេ​ស្លាប់​ទៅវិញ​? ព្រោះ​មុន គេ​វាយ​គេ​ឃើញ​ព្រាយ​បិសាច បម្រុង​មក​ជញ្ជក់​ឈាម​គាត់​(​ម្ដាយ​)” ។ ចំណែក​ប្រភពពី​ប្រជាពលរដ្ឋ​ជិតខាង​វិញ​បាន​បន្ថែមទៀតថា កូនប្រុស​ដៃដល់​វាយ​ម្ដាយ​រហូតដល់​ស្លាប់​នេះ​ទើប​មកពី​ធ្វើ ការ​នៅក្នុង​ប្រទេស​ថៃ​នា​ប៉ុន្មាន​ថ្ងៃនេះ​ប៉ុណ្ណោះ មិនដឹង​រឿង​អ្វី​ស្រាប់តែ​ផ្ទុះ​ហិង្សា​រហូត​យក​អង្រែបុកគ្រឿង​ប៉ុន កំភួនដៃ​ប្រវែង​៦​តឹក​វាយ​សំពង​ទៅលើ ក្បាល​ម្ដាយ​បណ្ដាលឱ្យ​ដួល​ប្រកាច់​ស្លាប់​នៅក្នុង​ថ្លុកឈាម​យ៉ាង​អាណោចអាធ័ម​តែម្ដង ។ ក្រោយពី​កើតហេតុ​ជនដៃដល់​មិនបាន​រត់​ទៅណា​ឡើយ ទើប​មេភូមិ​និង​កម្លាំង​ប្រជា​ការពារ​ភូមិ​បាន​រាយការណ៍​មក​សមត្ថកិច្ច នគរបាល​ស្រុក​កម្លាំង​សមត្ថកិច្ច​ក៏​ចុះ​ទៅដល់​កន្លែង កើតហេតុ​ចាប់​ជនដៃដល់​ភ្លាមៗ​តែម្ដងទៅ​។​

12-12-2013

​តែ​ទោះជា​យ៉ាង​សមត្ថកិច្ច​បាន​ឃុំខ្លួន​ជនដៃដល់​នៅ​អធិការដ្ឋាន​បណ្តោះអាសន្ន និង​កសាង​សំណុំរឿង ដើម្បី​ចាប់​ការ​តាម​នីតិវិធី​ច្បាប់​៕

 

Leave a Reply

(*) Required, Your email will not be published