នាយករដ្ឋមន្ត្រី​ថៃ​លោកស្រី យី​ង​ឡាក់ ប្រកាស​ការរំលាយ​សភា​

, , Leave a comment

​ប្រទេស​ថៃ ៖ ថ្លែង​តាម​ទូរទស្សន៍ Thai Television Pool of Thailand ព្រឹក​មិញ លោកស្រី យី​ង​ឡាក់ បាន​អះអាងថា រាជរដ្ឋាភិបាល​របស់​លោកស្រី​រិះរក​អស់ពី​លទ្ធភាព​ដើម្បី​ដោះស្រាយ​ជម្លោះ និង​ប៉ុនប៉ង​បន្ត​ចរចា​ជាមួយ​ពួក​បាតុករ​ប្រឆាំង​រាជរដ្ឋាភិបាល​ដែល​ទាមទារ​នូវ​អ្វីដែល​មិន​ទទួល​ការអនុញ្ញាត​ពី​រដ្ឋធម្មនុញ្ញ​នោះ​។​

 

​ប៉ុន្តែ​ចុងក្រោយ​លោកស្រី​បានដាក់​សំណើ​ស្តីពី​ការរំលាយ​សភា​ទៅ​ស្ថាប័ន​ព្រះមហាក្សត្រ​រួចរាល់​ហើយ ដើម្បី​ប្រគល់​អំណាច​ជូន​ប្រជាពលរដ្ឋ និង​ដើម្បី​ដោះស្រាយ​ជម្លោះ​នយោបាយ នាពេល​បច្ចុប្បន្ន​។ លោកស្រី​ថា ការបោះឆ្នោតជាតិ​នឹងត្រូវ​រៀបចំឡើង ខណៈដែល​លោកស្រី​និង​សមាជិក​គណរដ្ឋមន្ត្រី​នៅតែ​ជា​រាជរដ្ឋាភិបាល​ស្តីទី ដើម្បី​បំពេញ​កាតព្វកិច្ច ស្របទៅនឹង​ច្បាប់​។​

 

​ការប្រកាស​រំលាយ​សភា​របស់​លោកស្រី យី​ង​ឡាក់ បានកើត​មាន ខណៈដែល​ពួក​បាតុករ​រាប់ពាន់នាក់​មាន​ផែនការ​បន្តធ្វើ​ព្យុហយាត្រា ទៅកាន់​វិមាន​រាជរដ្ឋាភិបាល ហើយក៏​កើតមាន​ក្រោយ​មួយថ្ងៃ​ដែល​ពួក​សមាជិកសភា​ខាង​គណបក្ស​ប្រជាធិបតេយ្យ ដែលជា​បក្សប្រឆាំង​ដ៏​ធំ ដឹកនាំ​ដោយ​លោក អាប់​ភី​ស៊ីត នោះ​សម្រេចចិត្ត​លាលែង​ពី​តំណែង​ទាំងអស់គ្នា ដើម្បី​ដាក់​សំពាធ​ដល់​លោកស្រី​យី​ង​ឡាក់​។​

thailand-pm

​យ៉ាងណាក៏ដោយ មេដឹកនាំ​បាតុករ​ប្រឆាំង​រាជរដ្ឋាភិបាល​ថៃ លោក​ស៊ូ​ថេប ធឿ​ក​ស៊ូ​បាន ធ្លាប់​បានបញ្ជាក់​យ៉ាងច្បាស់​ថា ទោះបីជា​ត្រូវ​រំលាយ​សភា ឬក៏​នាយករដ្ឋមន្ត្រី​បច្ចុប្បន្ន​ចុះចេញ​ពី​តំណែង​ក៏ដោយ ក៏​នៅតែ​មិនអាច​បញ្ចប់​បាតុកម្ម​បានទេ ពោលគឺ​ទាល់តែ​អ្វីដែល​លោក​ហៅថា​របប​ថាក់ស៊ីន ត្រូវ​បញ្ចប់​ក្នុងប្រទេស​ថៃ​៕

 

Leave a Reply

(*) Required, Your email will not be published