ផ្លូវជាតិ​លេខ ២១B បាន​ក្លាយ​អាជីវកម្ម​ថ្មី​របស់​លោក សំ សុជា ប៉ូលីស​សេដ្ឋកិច្ច​ក្រសួងមហាផ្ទៃ ​ក្នុង​ការ​ប្រមូល​លុយ​ច្រក​ហោប៉ៅ​យ៉ាង​ងាយស្រួល​

, , Leave a comment

​ខេត្តកណ្តាល ៖ ប៉ុស្តិ៍​ជជុះ​ដែល​រាយប៉ាយ​គ្មាន​សណ្តាប់ធ្នាប់​តាម​បណ្តោយ​ផ្លូវជាតិ​លេខ ២១B ដែលជា​ឆ្នាំងបាយ​របស់លោក សំ សុជា ជា​មន្ត្រី​ប៉ូលីស​សេដ្ឋកិច្ច​ក្រសួងមហាផ្ទៃ​បាន​បង្ក​ភាព​ក្តៅក្រហាយ​ប្រជាពលរដ្ឋ និង​ក្រុម​ឈ្មួញ​រកស៊ី​ដឹកជញ្ជូន​ទំនិញ​ឆ្លងកាត់​តាមផ្លូវ​នេះ ដោយ​គាបសង្កត់​ប្រ​ជា​ព​ល​រដ្ឋ អ្នករកស៊ី​ដឹកជញ្ជូន​ទំនិញ បន្តិចបន្តួច​រួមទាំង​កសិផល​ផងដែរ ដោយ​គ្មាន​ការយោគយល់​អ្វី​ឡើយ​។​

 

​ប្រភពពី​ប្រជាពលរដ្ឋ​ដែលជា​អ្នក​ដឹកជញ្ជូន​ម្នាក់​បាន​ឲ្យ​ដឹងថា ពួកគាត់​បាន​ដឹកជញ្ជូន​កសិផល​យកទៅ​លក់​នៅ​ប្រទេស​វៀតណាម ឬក៏​ដឹកទំនិញ​ផ្សេងៗ មកពី​ប្រទេស​វៀតណាម​តាម​ច្រក​ជ្រៃ​ធំ យកមក​លក់​នៅ​ភ្នំពេញ មិនដែល​គេចផុត​ពី​ប៉​ស្តិ៍​ជជុះ​របស់លោក សំ សុជា នោះទេ​។ គួររម្លឹកថា មន្ត្រីប៉ូលិស​សេដ្ឋកិច្ច​ក្រសួងមហាផ្ទៃរ​ប​ស់លោក សំ សុជា បាន​ចុះមក​ដាក់​ប៉ុស្តិ៍​ជជុះ​តាមផ្លូវ​ជាតិ​លេខ​២១B ច្រើន​ឆ្នាំ​មកហើយ តែងតែ​រំខាន​ដល់​ការរកស៊ី​ដឹកទំនិញ​របស់​ប្រជាពលរដ្ឋ និង​ឈ្មួញ​តូចតាច មិនដឹង​ជា​ពួកគេ​រត់​ការទិញ​ប៉ុស្តិ៍​អស់​ប៉ុន្មាន​នោះទេ​ក្នុង​មួយខែៗ ។​

 

​មិន​ថា​ការរកស៊ី​ដឹកជញ្ជូន​ទំនិញ​ទាំង​ស្របច្បាប់ និង​ខុសច្បាប់​ត្រូវតែ​ចូល​បង់លុយ​ឲ្យ​លោក សំ សុជា តាម​ការទាមទារ ទើប​អាច​ដឹកជញ្ជូន​ទំនិញ ឬ​កសិផល​ឆ្លងកាត់ តាមផ្លូវ​ជាតិ​លេខ ២១B ទៅកាន់​ច្រកព្រំដែន​ជ្រៃ​ធំ​បាន​ដោយ​រលូន ។ តាម​ធម្មតា​លោក សំ សុជា បានកំណត់​ឲ្យ​ប្រជាពលរដ្ឋ​រកស៊ី​ដឹកជញ្ជូន​ទំនិញ​មានដូចជា ត្រី ពង​ទា បន្លែ អីវ៉ាន់​ចាប់ហួយ ពោត សណ្តែក ល្ង ត្រូវតែ​ចូល​បង់លុយ​យ៉ាងហោចណាស់​ចាប់ពី ១៥ ទៅ ២០ ម៉ឺន​រៀល ដោយ​គិត​តាម​រថយន្ត​តូច​ឬ​ធំ គ្មាន​នរណា​ហ៊ាន​បើក​ហួស ឬ​ភ្លេច​ចូល​បង់លុយ​នោះទេ ។ ចំណែក​រកស៊ី​ដឹកជញ្ជូន​ទំនិញគេចពន្ធ​ដូចជា​ថ្នាំពុល តាម​ម៉ូតូ ឬ​រថយន្ត​តូចៗ​នោះ ក៏ត្រូវ​ចូល​បង់​ដែរ គឺ​ក្នុង​មួយខែ​ចាប់ពី ២០០ ដុល្លារ​ទៅ ៣០០ ដុល្លារ​ទើប​អាច​រកស៊ី​បាន​។ បើ​មិន​បង់លុយ​តាម​ការកំណត់​ទេនោះ នឹងមាន​វិធានការ​យ៉ាង​ចាស់ដៃ​ព្រោះ​លោក សំ សុជា ដើរតួ​ជា​នគរបាល​សេដ្ឋកិច្ច ក្រសួងមហាផ្ទៃ​ផង និង​ជា​តុលាការ​ផង គ្មាន​ក្រែង​ញញើត ពី​ច្បាប់ទម្លាប់​អ្វី​ទេ​។​

 

​ជា​រៀងរាល់ថ្ងៃ​យប់ មាន​រថយន្ត​កាមរី​ឆ្លាម ពណ៌​កណ្តុរ​ប្រមេះ ពាក់​ស្លាក​លេខ ន​.​ប បិទ​កញ្ចក់​ខ្មៅ​ដែលជា​របស់លោក សំ សុជា បើក​តាម​ប្រមាញ់ រថយន្ត​ដឹកជញ្ជូន​ទំនិញ ទាំង​ស្របច្បាប់​និង​មិន​ស្របច្បាប់ ដើម្បី​តាម​ប្រដេញ​ឲ្យ​ចូល​បង់លុយ​។ សកម្មភាព​របស់លោក សំ សុជា បែបនេះ​គឺ​ផ្ទុយ​ពីបទ​បញ្ជា របស់​ប្រមុខ​រដ្ឋាភិបាល​ដែល​បាន​ហាមឃាត់​ដាច់ខាត មិន​ឲ្យ​មាន​ប៉ុស្តិ៍​ជជុះ​តាមផ្លូវ​រំខាន​ដល់​ការរកស៊ី​ដឹកជញ្ជូន​ទំនិញ​របស់​ប្រជាពលរដ្ឋ​។​

DSCF0178

​លោក សំ សុជា ដែលជា​មន្ត្រីប៉ូលិស​សេដ្ឋកិច្ច ក្រសួងមហាផ្ទៃ ពុំ​អាច​សុំ​ការធ្វើ​អធិប្បាយ​បាន​នៅឡើយ​ទេ ចំពោះ​បញ្ហា​ជុំវិញ​ការចេញ​ចល័ត​ដាក់​ប៉ុស្តិ៍​ជជុះ តាម​បណ្តោយ​ផ្លូវជាតិ​លេខ​២១B គាប​ជំរិត​ទារលុយ​ពី​ប្រជាពលរដ្ឋ​ដែល​រកស៊ី​ដឹកជញ្ជូន​ទំនិញ ។ ទោះបីយ៉ាងណា​ក៏ដោយ​គេ​យល់ថា លោក សំ សុជា បាន​បង់លុយ​ជូន​លោក ហែម​មុន្នី ដែលជា​មេប៉ូលីស​សេដ្ឋកិច្ច ក្រសួងមហាផ្ទៃ ប្រចាំខេត្ត​កណ្តាល តាមរយៈ​ការទិញ​ប៉ុស្តិ៍​ច្រើនសន្ធឹក​សន្ធាប់​ហើយ​មើលទៅ ទើប​លោក សំ សុជា មិន​ក្រែង​ញញើត​អ្វី​ទាំងអស់​៕

 

Leave a Reply

(*) Required, Your email will not be published