ខេត្តព្រះសីហនុ ៖ យ៉ាងហោចណាស់ មនុស្ស ៥ នាក់បានរងរបួសធ្ងន់ និងស្រាល ក្នុងហេតុការណ៍គ្រោះថ្នាក់ចរាចរណ៍មួយបណ្តាលមកពីរថយន្តដឹកអ្នកដំណើររបស់ក្រុមហ៊ុន រិទ្ធិមុនី ។ហេតុការណ៍គ្រោះថ្នាក់នេះបានកើតឡើងនៅវេលាម៉ោង ១៣ និង ៣៥ នាទី ថ្ងៃទី១៩ ខែវិច្ឆិកា ឆ្នាំ២០១៣ នៅចំណុចគីឡូម៉ែត្រលេខ ១០៩-១១០ តាមបណ្តោយផ្លូវជាតិលេខ៤ ស្ថិតនៅមុខវិទ្យាស្ថានរ៉ូលីង ភូមិស្ទឹងច្រាល ឃុំអូរបាក់រទះ ស្រុកកំពង់សីលា ខេត្តព្រះសីហនុ ។
តាមប្រភពព័ត៌មានពីសមត្ថកិច្ចមូលដ្ឋានបានឱ្យដឹងថា គ្រោះថ្នាក់នេះបង្កឡើងរថយន្តម៉ាកហ្វត (FORD) ពណ៌ឈាមជ្រូក ពាក់ស្លាកលេខ ភ្នំពេញ 2N-1088 ទិសដៅភ្នំពេញ ទៅខេត្តព្រះសីហនុ បើកបរដោយជនជាតិចិន មិនស្គាល់ឈ្មោះ ធ្វើការនៅខេត្តកោះកុង បើកបរម្នាក់ឯងបានបុកជាមួយរថយន្តក្រុង ក្រុមហ៊ុន រិទ្ធិមុនី ទិសដៅបញ្ច្រាសទិសគ្នា ពេញទំហឹង បណ្តាលឱ្យអ្នកបើកបរ ជនជាតិចិនរងរបួសធ្ងន់ហើយជ្រុលមកបុកជាមួយឡង់គ្រីស័រ ៥៧០ (ទិសដៅខេត្តព្រះសីហនុ ទៅភ្នំពេញ) ពណ៌ស្ករ ពាក់ស្លាកលេខ 2X-1987 បន្ថែមទៀត បណ្តាលឱ្យរថយន្ត៥៧០ទៅបុកជាមួយដើមឈើរទៅមុខលែងរូច បណ្តាលឱ្យអ្នកធ្វើដំណើរ ក្នុងរថយន្ត ចំនួន៥នាក់ រងរបួសធ្ងន់២ ស្រាល១ ហើយត្រូវបានក្រុមគ្រួសារបញ្ជូន ទៅព្យាបាលតាមរយៈរថយន្ត១គ្រឿងទៀត នៅភ្នំពេញភ្លាមៗផងដែរ។
ចំពោះអ្នកបើកបររថយន្ត៥៧០ មានឈ្មោះ ឡុក សុវណ្ណារ៉ា ភេទប្រុស អាយុ ២៣ឆ្នាំ ទីលំនៅបឹងស្នោរ ផ្លូវជាតិលេខ១ រាជធានីភ្នំពេញ ។ ចំពោះ អ្នករបួសជនជាតិចិន ត្រូវបានរថយន្តសង្គ្រោះស្រុកកំពង់សិលា ដឹកបញ្ជូនទៅព្យាបាលនៅភ្នំពេញផងដែរ ។
បច្ចុប្បន្នរថយន្តគ្រោះថ្នាក់ ទាំងអស់ ត្រូវបានសមត្ថកិច្ច អូសយកទៅកាន់អធិកាដ្ឋាននគរបាល ស្រុកកំពង់សិលា រង់ចាំម្ចាស់រថយន្តទាំងអស់ ចូលមកធ្វើការដោះស្រាយ តាមផ្លូវច្បាប់ ៕
