ជិះ​ម៉ូតូ​មិន​មើលមុខ មើល​ក្រោយ ជ្រុល​បុក​ជាមួយ​ម៉ូតូ​មួយទៀត រងរបួស​ទាំងអស់គ្នា​

, , Leave a comment

​រាជធានី​ភ្នំពេញ ៖ មាន​ហេតុការណ៍​គ្រោះថ្នាក់​ចរាចរ​ណ័​មួយ​បណ្តាល​ឲ្យ​យុវជន​៤​នាក់ រងរបួស​ធ្ងន់ និង​ស្រាល ខណៈដែល​ម៉ូតូ​មួយគ្រឿង បើក​ឆ្លងផ្លូវ មិនបាន​មើល ឆ្វេង​មើល​ស្តាំ ជ្រុល​ទៅបុក​ម៉ូតូ​មួយគ្រឿង​ទៀត ដែល​នៅ​ខាងស្តាំ​ដៃ យ៉ាង​ពេញទំហឹង ។ ហេតុការណ៍​គ្រោះថ្នាក់​ចរាចរណ៍​នេះ​បាន​កើតឡើង​កាលពី​វេលា​ម៉ោង​១១​និង​៤៥​នាទី ថ្ងៃទី​១៦ ខែវិច្ឆិកា ឆ្នាំ​២០១៣ តាម​បណ្តោយ​ផ្លូវជាតិ លេខ​៤ ភូមិ​កំបូល សង្កាត់​កំបូល ខណ្ឌ​ពោធិ៍​សែន​ជ័យ ។​

 

​ភាគី​រងរបួស​ខាង​ម៉ូតូ​គុប​មាន ១-​ឈ្មោះ ថា ដា ភេទ​ប្រុស អាយុ​១៨​ឆ្នាំ មុខរបរ​កម្មករ​រោងចក្រ ជា​អ្នកបើកបរ រងរបួស​ធ្ងន់ បាក់ឆ្អឹង​ដងកាំបិត​ខាងស្តាំ   ២- ឈ្មោះ ជួង ផានិត ភេទ​ប្រុស អាយុ​២១​ឆ្នាំ មុខរបរ​កម្មករ​រោងចក្រ រងរបួស​បែកក្បាល ពីក្រោយ ទាំង​២​នាក់​ស្នាក់នៅ​ផ្ទះជួល ភូមិ​ព្រៃទា សង្កាត់​ចោមចៅ ខណ្ឌ​ពោធិ៍​សែន​ជ័យ  ៣- ឈ្មោះ អឿន ជំរឿន ភេទ​ប្រុស អាយុ​១៦​ឆ្នាំ ជា​សិស្សសាលា រៀន​ថ្នាក់​ទី​៨ សូមបញ្ជាក់​ផងដែរ​ថា ទាំង​៣​នាក់​ជា​បងប្អូន​និង​គ្នា មាន​ស្រុកកំណើត ភូមិ​ច្បារមន ឃុំ​កុមា​រាជា ស្រុក​បាទី ខេត្តតាកែវ ។ ចំណែក​ភាគី​ខាង​ម៉ូតូ​ស៊ូ​រ៉ូ​ស អ្នកបើកបរ​មានឈ្មោះ អ៊ុក សុ​ផា ភេទ​ប្រុស អាយុ​២១​ឆ្នាំ ជា​មន្ត្រី​យោធា អង្គភាព​៩១១ រងរបួស​បែកក្បាល សន្លប់​ឈឹង និង​អ្នករួមដំណើរ​ម្នាក់ទៀត ឈ្មោះ ប្រាជ្ញ វាសនា ភេទ​ប្រុស អាយុ​២៥​ឆ្នាំ ជា​មន្ត្រី​យោធា អង្គភាព​៩១១ រងរបួស​បាក់ជើង​ឆ្វេង ។​

 

​ប្រភពព័ត៌មាន​ពីសា​ក្សី​ដែល​បានឃើញ​ហេតុការណ៍​បាន​ឲ្យ​ដឹងថា មុនពេល​កើតហេតុ​មាន ម៉ូតូ​មួយគ្រឿង ម៉ាក​ហុងដា គុប​ជ្រុង មិន​ចាំ​ស្លាក​លេខ ជិះ​គ្នា​៣​នាក់​ក្នុងទិសដៅ ពី​កើ​តទៅ​លិច លុះដល់​ចំណុចកើតហេតុ ស្រាប់​តែមាន យុវជន​២​នាក់ ជិះ​ម៉ូតូ​មួយគ្រឿង​ម៉ាក ស៊ូ​រ៉ូ​ស ពណ៌​ខ្មៅ គ្នាន​ស្លាក​លេខ បើក​ឆ្លង​ពី​ត្បូ​វ​ទៅ​ជើង ដោយ​បាំង​រថយន្ត មើល​មិនបាន គ្រប់​ជ្រុងជ្រោយ ជ្រុល​ទៅបុក​ម៉ូតូ​គុប យ៉ាង​ពេញទំហឹង បណ្តាល​ឲ្យ​មាន ជនរងគ្រោះ​ធ្ងន់​ស្រាល រហូតដល់​ទៅ​៥​នាក់ ។​

17-11-2013

​ក្រោយ​កើតហេតុ​ជនរងគ្រោះ​ទាំងអស់ ត្រូវបាន​រថយន្ត​សង្គ្រោះ ដឹក​បញ្ជូនទៅ​មន្ទីរពេទ្យ​ព្រះកុសុមៈ ។ ចំណែក​ម៉ូតូ​របស់​ជនរងគ្រោះ​ទាំងអស់​ត្រូវបាន​សមត្ថ​កិច្ច​យកទៅ​រក្សាទុក​នៅ​អធិការដ្ឋាន​រង់ចាំ​ដោះស្រាយ​ពេល​ក្រោយ ៕

 

Leave a Reply

(*) Required, Your email will not be published