ប្រពន្ធ​ចិត្តធំ សុំ​ខ្ញុំ​លែង បាន​ក្លាយជា​ប្រធានបទ​ថ្មី​សម្រាប់​យុវវ័យ​សិក្សា​

, , Leave a comment

​ខេត្ដ​តាកែវ ៖ “​តើ​បងខុស​អ្វី​បាន​ស្រី​សុំ​លែង​?” ពាក្យ​មួយ​ឃ្លា​ដ៏​មាន​អត្ថន័យ​នៅក្នុង​បទ​ចម្រៀង​របស់​អធិរាជ​សំឡេង​មាស​លោក ស៊ីន ស៊ី​សាមុត ត្រូវបាន​ទំនោរ​ទៅលើ​ខ្សែជីវិត​របស់​ពោះម៉ាយ​ម្នាក់ នាគ្រា​ផ្សំ​ដំណេក ។ ស្រប​ពេលដែល​កំពុងមាន​វិបត្តិ​ផ្លូវចិត្ត​បែបនេះហើយ ភាគី​ខាង​ស្រី​បាន​បញ្ឈឺចិត្ត​ដោយ​នាំយក​សង្សា​ដេក​នៅផ្ទះ​ថែមទៀត ។​ភាពចម្រូងចម្រាស់​នេះ​បាន​កើតឡើង​កាលពី​ព្រឹក​ថ្ងៃទី​១៤ ខែវិច្ឆិកា ឆ្នាំ​២០១៣ នៅ​សាលាស្រុក​ព្រៃកប្បាស​បន្ទាប់ពី​កូនស្រី លែងលះ​ជាមួយ​ស្វាមី​ដោយ​នាង​អះអាងថា ការរៀប​អាពាហ៍ពិពាហ៍​គឺជា​ការបង្ខិតបង្ខំ​រប​ស់​ឪពុកម្ដាយ​នាង​ប៉ុណ្ណោះ ។

 

​បុរស​ជា​ស្វាមី​អភ័ព្វ​ឈ្មោះ ណែម សំណាង អាយុ​២១​ឆ្នាំ ទើប​រៀបការ​ជាមួយ​នាង​ឈ្មោះ យ៉ាង ស្រី​យ៉ា អាយុ​២៣ ឆ្នាំ នៅ​ភូមិ​រកា ឃុំ​ស្នោ ស្រុក​ព្រៃកប្បាស បាន​រៀបរាប់ថា គេ​រៀបការ​កាលពី​ថ្ងៃទី​៧ ខែមិថុនា ឆ្នាំ ២០១៣​។ ក្រោយ​រៀបការ​រួច​ពិសេស​នៅ​យប់​ផ្សំ​ដំណេក​គឺ​បាន​ក្រេប​ទឹកឃ្មុំ​ជាធម្មតា ក៏​ស្រាប់តែ​ប្រពន្ធ​របស់គេ​និយាយ​សុំ​លែងលះ​ធ្វើឱ្យ​រូបគាត់​ជា​ប្ដី​ស្ទើរ​ធ្លាក់​ថ្លើម​ចេញពី​ខ្លួន ។ ពេលនោះ​គេ​ក៏​សួរ​ទៅ​ប្រពន្ធ​ជាទី​ស្រឡាញ់​ស្មើ​ជីវិត​វិញ​ថា “​តើ​បងខុស​អ្វី​បានជា​អូន​សុំ​លែង​?” ភ្លាមនោះ​ប្រពន្ធ​បាន​ឆ្លើយតប​វិញ​ថា “​អូន​អត់​ស្រឡាញ់​បង​បន្ដិច​ទេ​” ការ ដែល​រៀបការ​ជាមួយ គឺ​ធ្វើតាម​ការបង្ខិតបង្ខំរ​បស់​ឪពុកម្ដាយ​តែប៉ុណ្ណោះ​។​

 

​បុរស​ពោះម៉ាយ​ប្រពន្ធ​សុំ​លែង​បាន​បន្ដថា ក្រោយពី​ប្រពន្ធ​និយាយ​មិនទាន់​ចប់​ស្រួលបួល​ផង​នាង​ក៏​រៀបចំ​អីវ៉ាន់​ចុះទៅ​ផ្ទះ​របស់​នាង​ដែល​នៅ​ទល់មុខ​នឹង​ផ្ទះ​របស់គេ ។ ការចុះ​ចេញពី​ប្ដី​បែក​បាន​មួយរយៈ​ក៏​ត្រឡប់មកវិញ ហើយ​នាង​ធ្វើបែបនេះ​ជាច្រើន​ដង ។ លុះ​នៅ​ថ្ងៃទី​៣០ ខែតុលា ឆ្នាំ​២០១៣ នាង មិនដឹង​យក​ប្រុស​មកពីណា​នោះទេ​យកមក​បញ្ឈឺ​ចិ​ត្ដ​និង​ជិះ​ម៉ូតូ​ឱប​ចង្កេះ​គ្នា​ហើយ​ក្រោយមក​ក៏​ងូតទឹក​ក្នុង​បន្ទប់​ជាមួយគ្នា​ថែម​ទៀតផង ។ ចាប់តាំងពី​មាន​ប្រុស​មកដល់​ផ្ទះ​ប្រពន្ធ​របស់លោក​កាន់តែ​ទទូច​ហើយ​ទទូច​ទៀត​សុំ​លែងលះ​ដោយ​នាង​សុំ​យកតែ​គ្រែ​ដេក​មួយ និង​ឆ្នាំងបាយ​ប៉ុណ្ណោះ ។​

 

​បុរស​ជា​ប្ដី​បាន​និយាយ​ទាំង​អួល​ដើម​.​កថា ព្រោះតែ​ការឈឺចាប់ និង​ខ្មាស​ញាតិ​ក្នុងភូមិ​ដែល​ប្រពន្ធ​ធ្លាប់​ឱប​ជាប់​ដើមទ្រូង​បែរជា​ទៅ​ល្អូកល្អិន​ជាមួយ​ប្រុស​ផ្សេង​លោក​ក៏បាន​សម្រេច​ចិ​ត្ដ​ចូលទៅ​សាលាស្រុក​ដើម្បី ដោះស្រាយ​និង​លែងលះគ្នា​ឱ្យដាច់​ស្រេច​តែម្ដងទៅ ។ ចំពោះ​ការ​លែងលះ​លោក​មិន​តម្រូវឱ្យ​ខាង​ស្រី​សង​សំណង​ជំងឺ​ចិ​ត្ដ​អ្វី​នោះទេ ព្រោះ​លោក​ចាត់ទុកថា នេះ​ជា​ផល​បុណ្យ​ពី​ជាតិ​មុន​មក​កំណត់ឱ្យ​លោក​ជួប​ស្រី​ដែល​ខ្លួន​ស្រឡាញ់​បាន​ត្រឹមហ្នឹង ។​

 

​ដោយឡែក​នាង​ជា​ប្រពន្ធ​ក៏បាន​ឱ្យដឹង​ដែរ​ថា នាង​មិនបាន​យក​ប្រុស​មក​រស់នៅ​ជាមួយ​ទេ ហើយ​ប្រុស​ដែល​នាង​ជិះ​ម៉ូតូ​ជាមួយ​នោះ គឺជា​ពូ​របស់​នាង​ប៉ុណ្ណោះ តែ​អ្វីដែល​នាង​មិនអាច​រស់នៅ ជាមួយ​ប្ដី​បន្ដទៀត​បាន​ព្រោះតែ​ប្ដី​ម្នាក់ នេះ​ពូកែ​ប្រើ​អំពើហិង្សា​មកលើ​រូបនាង​ខ្លាំងណាស់ ។ អំពើហិង្សា​របៀប​ណា​នោះ នាង​សុំ​មិន​ធ្វើ​អត្ថាធិប្បាយ​នោះទេ ។​

 

​បើទោះបីជា​ភាគី​ខាង​ស្រី​មិន​ទំលាយ​ឱ្យដឹងពី​សកម្មភាព​ដែល​ប្ដី​ប្រើ​អំពើហិង្សា​លើ​ប្រពន្ធ​ក៏ដោយ​តែ​តាម​អ្នកភូមិ​បង្ហើប​ឱ្យដឹងថា គូ​ស្វាមីភរិយា​មួយគូ​នេះ​ចាប់តាំងពី​រៀប​អាពាហ៍ពិពាហ៍​មក មិន​ដែលមាន​ជម្លោះ​មាត់​មួយ​មួយ​.​ក ឮ​ដល់​អ្នកជិតខាង​នោះទេ ។ ប៉ុន្ដែ​អ្វីដែល​ខាង​ស្រី​អះអាងថា ប្ដី​ប្រើ​អំពើហិង្សា​មិនអាច​រស់នៅ​បាន​ហើយ​ឈានទៅដល់​ប្រពន្ធ​សុំ​លែងលះ​គឺ​គេ​សង្ស័យថា ព្រោះតែ​ខាង​ស្រី​មិនអាច​ទ្រាំទ្រ​ដំណេក​នឹង​បុរស​ជា​ប្ដី​បាន ។

14-11-2013

​ជុំវិញ​ការបញ្ចប់​អា​ពា​ពិពាហ៍​ខាង លើ​នេះ​អាជ្ញាធរ​ស្រុក​ព្រៃកប្បាស​ឱ្យដឹងថា រឿង​ប្ដី​ប្រពន្ធ​ខាងលើនេះ​កើតចេញពី​ខាង​ស្រី​មិន​ស្រឡាញ់​ប្ដី បើទោះជា​អាជ្ញាធរ​ស្រុក​បាន​សម្របសម្រួល​ចង់ ឱ្យ​ត្រូវរ៉ូវ​គ្នា​វិញ​ក៏ដោយ​ក៏​ពួកគេ​មិនត្រូវ​គ្នា​ដែរ ។ អាជ្ញាធរ​ស្រុក​បាន​បញ្ជាក់ថា ការសុំ​លែងលះគ្នា​នេះ​អាជ្ញាធរ​ស្រុក​មិនមាន​សិទ្ធិ​សម្រេច​នោះទេ​តែបើ​ចង់​ផ្ដាច់​សង្វាស​ឬ​បញ្ចប់​អា​ពា​ពិពាហ៍​ទាល់តែ​អ្នក​ទាំង​២​ដឹក​ដៃ​គ្នា​ទៅ​តុលាការ​ទើប​អាច​រំលត់​បាន ៕

 

Leave a Reply

(*) Required, Your email will not be published