បន្ទាប់ពី​មេភូមិ​ទំនើង បើករថយន្ត​បុក​រះ ហើយ​យកឈ្មោះ​ឧបនាយករដ្ឋមន្ត្រី​មក​អាង តើ​សមត្ថកិច្ច​ដោះស្រាយ​បែបណា ឬក៏​ចាំ​ចំណាត់​​ថ្នាក់លើ​​សិន​

, , Leave a comment

​រាជធានី​ភ្នំពេញ ៖ បុរស​ម្នាក់​ដែល​ត្រូវបាន​គេ​ស្គាល់​ថា ជា​មេភូមិ​ទឹកល្អក់​ទី​២  បាន​បើករថយន្ត​ទៅបុក​រះ​បង្គោល​ភ្លើង​បាក់ ១​ដើម ហើយ​ជ្រុល​ទៅបុក​ម៉ូតូ​សង់​កូរ៉េ ១​គ្រឿង​ទៀត បណ្តាល​ឲ្យ​ខ្ទេច រួច​ចុះមក​ស្រែក​អួត​ក្អេងក្អាង​យកឈ្មោះ​ឧបនាយករដ្ឋមន្ត្រី​មក​អាង ។  ហេតុការណ៍​បុក​រះ​ដែល​បង្កដោយ​មេភូមិ​ទំនើង​នេះ​បាន​កើតឡើង​កាលពី​វេលា​ម៉ោង ១១ និង ០៥​នាទី យប់​ថ្ងៃទី​០៩ វិច្ឆិកា ២០១៣ នៅ​ចំណុច​មុខ​ហាង KFC ស្ថិតក្នុង​សង្កាត់​ទឹកល្អក់​ទី​១ ខណ្ឌទួលគោក​។​

 

​បុរស​ដែល​បង្ក​នោះ​មាន ឈ្មោះ សារឿន អាយុប្រមាណ​ជា ៣៥​ឆ្នាំ ត្រូវជា​មេភូមិ​ទឹកល្អក់​ទី​២ ជិះ​រថយន្ត​ឡិច​ស៊ី​ស​៤៧០ មួយគ្រឿង រួម​ដំណើរ​ជាមួយ​នារី​វ័យក្មេង ៤ ទៅ ៥​នាក់ ក្នុង​រថយន្ត ផងដែរ​។​

 

​តាម​ប្រភពព័ត៌មាន​ពី​កន្លែងកើតហេតុ​ឲ្យ​ដឹងថា រថយន្ត​ឡិច​ស៊ី​ស​៤៧០ ពណ៌​ស្ករ ១​គ្រឿង ពាក់​ស្លាក​លេខ ភ្នំពេញ 2L-7091 បើកបរ​ដោយ​លោក​មេភូមិ​ទឹកល្អក់​ទី​២ ស្រវឹងស្រា​ជោក រួម​ដំណើរ​ជាមួយ​នារី​វ័យក្មេង ៤ ទៅ ៥​នាក់ ធ្វើដំណើរ​យ៉ាង​លឿន​តាម​បណ្តោយ​ផ្លូវ​កម្ពុជា​ក្រោម ក្នុងទិសដៅ​ពី​កើ​តទៅ​លិច ខណៈ​មកដល់​ចំណុច​កែង​ផ្លូវ​២៦១ រថយន្ត​បាន​បត់​ស្តាំ ក៏​ជ្រុល​ល្បឿន​ទៅបុក​បង្គោល​ភ្លើង ១​ដើម បណ្តាល​ឲ្យ​បាក់ ហើយ​រថយន្ត​បាន​ជ្រុល​ហួស​ទៅបុក​ម៉ូតូ​សង់​កូរ៉េ ពណ៌​ក្រហម ១​គ្រឿង​ទៀត ពាក់​ស្លាក​លេខ ភ្នំពេញ 1AE-7590 ដែល​ចត​នៅមុខ​ហាង KFC បណ្តាល​ឲ្យ​ខ្ទេច​រង​ការខូចខាត​តែម្តង​។​

10-11-2013

​បន្ទាប់ពី​បង្កហេតុ​ហើយ​លោក​មេភូមិ​រូបនោះ បាន​ចុះ​ពី​រថយន្ត​ហើយ​ស្រែក​អួត​ក្អេងក្អាង​ដោយ​យកឈ្មោះ​ឧបនាយករដ្ឋមន្ត្រី​មក​អាង​ទៀតផង ដើម្បី​ឲ្យ​គេ​ខ្លាច​បើ​កុំ​តែ​សមត្ថកិច្ច​មក​រំ​ដោះចេញ​ទៅ​ទេ កុំ​អី​មេភូមិ​ពូកែ​អួត​នោះ ត្រូវ​ប្រជាពលរដ្ឋ​ព្រួត​វាយ​ទ្រោម​ខ្លួន​មិនខានឡើយ ព្រោះ​បង្ក​គ្រោះថ្នាក់​ហើយ មក​អាង​អំណាច​អ្នកធំ ដើម្បី​គេចវេស​ពី​កំហុស​ខ្លួន​ទៀត​។​ ​ក្រោយ​កើតហេតុ រថយន្ត​បង្ក និង​ម៉ូតូ ត្រូវ​សមត្ថកិច្ច​នាំយកទៅ​រក្សា​ទុក​នៅ​អធិការដ្ឋាន​នគរបាល​ខណ្ឌទួលគោក ដើម្បី​រង់ចាំ​ធ្វើការ​ដោះស្រាយ​តាមផ្លូវ​ច្បាប់​៕

 

Leave a Reply

(*) Required, Your email will not be published