ចោរលួច​ខុស​បច្ចេកទេស ត្រូវ​ប្រជា​តុលាការ​កាត់ទោស​ភ្លាមៗ​

, , Leave a comment

​ខេត្ត​ព្រះសីហនុ ៖ បុរស​ម្នាក់​ត្រូវបាន​ប្រជា​តុលាការ កាត់ទោស​មួយ​រំពេច ខណៈដែល​ជនសង្ស័យ​រូបនេះ​បាន​បន្លំ​លួច​យក​ខ្សែដៃ របស់​អាជីវក​ក្នុង​ផ្សារលើ ក្រុងព្រះសីហនុ ខេត្ត​ព្រះសីហនុ ។ ការកាត់ទោស​នេះ​ធ្វើឡើង​កាលពី​ព្រឹក​ថ្ងៃទី ៨ ខែតុលា ឆ្នាំ​២០១៣ វេលា​ម៉ោង​១១ និង ៣០ នាទី បន្ទាប់ពី​ស្ទាក់​ចាប់បាន​ប្រជាពលរដ្ឋ​បាន​ស្វាគមន៍​ម្នាក់​មួយ​ដៃ ម្នាក់​មួយ​ជើង​ផងដែរ មុនពេល​បញ្ជូន​ទៅកាន់​អធិការដ្ឋាន​នគរបាល​ក្រុងព្រះសីហនុ​នោះ ។

8-10-2013 (2)

យុវជន​សង្ស័យ​ជាប់ចោទ​ពីបទ លួច​បន្លំ​យក​ខ្សែដៃ​របស់​អាជីវករ ក្នុង​ផ្សារលើ​មានឈ្មោះ កែវ លីដា អាយុ ២៣​ឆ្នាំ មាន​ទីលំនៅ​តំបន់ អ៊ូ​វៀតណាម ទំនប់រលក ក្រុមទី​៣១ ភូមិ​៣ សង្កាត់​លេខ​១ ក្រុង​ខេត្ត​ព្រះសីហនុ ដោយ​ធ្វើ​សកម្មភាព ឆក់​ខ្សែដៃ ទម្ងន់ ៥​ជី​មាស ពី​ស្ត្រី​អាជីវក​លក់​មាស ក្នុង​ផ្សារលើ ក្រុងព្រះសីហនុ ឈ្មោះ នាង ឡេង អាយុ ៦០​ឆ្នាំ មុខរបរ​ដូរ​លុយ និង​លក់​មាស តូប​លេខ​១ មាន​ទីលំនៅ​ក្រុមទី​១៧ ភូមិ​១ សង្កាត់​លេខ​៤ ក្រុង​ខេត្ត​ព្រះសីហនុ តែ​មិនបាន​សម្រេច​។​

 

​តាម​រៀបរាប់​របស់​ស្ត្រី​រងគ្រោះ​ឈ្មោះ នាង ឡេង បាន​និយាយ​ឱ្យដឹង​ទាំង​តក់ស្លុត​ថា នៅមុន​កើតហេតុ​ពេល​គាត់​សម្រាក​បាយ​ថ្ងៃត្រង់​រួច ក៏មាន​យុវជន​វ័យក្មេង​ម្នាក់​បានមក​សួររក​ទិញ​ខ្សែដៃ​មាស នៅពេលនោះ​គាត់​បាន​លូក​យក​ខ្សែដៃ ទម្ងន់​៣​ជី​មាស ឲ្យ​យុវជន​នោះ​មើល​ត្រូវ​យុវជន​នោះ​ឆ្លើយថា អា​មួយ​នេះ​វា​ស្ទើរ​បន្តិច​តើ​មាន​អា​ធំ​ជាង​នេះ​បន្តិច​ទេ គាត់​ក៏បាន​លូក​យក​ខ្សែដៃ​ទម្ងន់ ៥​ជី​មាស ហុច​ទៅ​ឲ្យ​មើល ក៏ ត្រូវ​យុវជន​រូបនេះ​ឆក់យក​រួច​ស្ទុះ​រត់គេចខ្លួន ។ ភ្លាមៗ​នោះ​គាត់​បាន​ស្រែក​ឆោឡោ​ឲ្យ​អ្នកជិតខាង​ជួយ​ចាប់ ។ ដោយ​បានឮ​សម្រែក​ស្រែកថា ចោរៗ អាជីវករ​ក្នុង​ផ្សារ​ជាច្រើន បាន​ស្រែក​បន្ត​គ្នា រហូត​ឮ​ដល់​នគរបាល ការពារ​ផ្សារ ក៏​ស្ទាក់ចាប់​ជាប់​បានតែ​ម្តង ។​

 8-10-2013 (1)

​បន្ទាប់ពី​ចាប់បាន​ប្រជាពលរដ្ឋ​បាន​ស្វាគមន៍​ម្នាក់​មួយ​ដៃ មួយ​ជើង ទើប​ប្រគល់​ឲ្យ​សមត្ថកិច្ច ។ ជនសង្ស័យ​ត្រូវ​សមត្ថកិច្ច​នាំទៅ​អធិការដ្ឋាន ដើម្បី​សាកសួរ និង​ចាត់ការ​តាមផ្លូវ​ច្បាប់​៕

 

Leave a Reply

(*) Required, Your email will not be published