ស៊ឹម ថៃណា ដេកស៊ី​ត្រៀម​ស្តារ​កេរ្តិ៍ឈ្មោះ​ឆ្នាំ​ក្រោយ

, , Leave a comment

រាជធានីភ្នំពេញ ៖ ខណៈ​ដែល​ប្រជាប្រិយភាព​កើនឡើង​មួយ​ប្រាវ​និង​ចាប់​បាន​ឱកាស​បណ្តើរ​គ្នា​ជាមួយ​ពិធីករ​ពោះម៉ាយ​ក្តៅ​ៗ​សម្ដី​ប៉ប៉ាច់ប៉ប៉ោច លោក អ៊ឹង រដ្ឋា​ហៅ​ទុយ ចេញ​ទៅ​កើប​ប្រាក់​នៅ​ឯ​សហរដ្ឋអាមេរិក​ទាំង​មន្ទិល​ស្នេហ៍​ដ៏​ក្តៅគគុក​ជាមួយ​គ្នា​ផង​នោះ​ពេល​នេះ​ទីផ្សារ​សិល្បៈ​របស់​អតីត​តារាចម្រៀង​ដែល​ធ្លាប់​មាន​សន្ទុះ​កេរ្តិ៍ឈ្មោះ​និង​ទីផ្សារ​ខ្ពស់​គួរសម​កាលពី​នៅក្នុង​ផលិតកម្ម​M កញ្ញា ស៊ឹម ថៃណា​បាន​កម្រើក​គួរ​ឲ្យ​ចាប់​អារម្មណ៍ ក្រៅពី​ដំណឹង​ថា​នៅ​ផ្ទះ​ដេកស៊ី​នោះ​។

 

នាង ស៊ឹម ថៃណា បាន​ទទួល​ស្គាល់​ថា មួយ​រយៈ​កន្លង​មក​នេះ​នាង​ពិតជា​ទំនេរ​ពី​ការងារ​សិល្បៈ​មិន​ដែល​បាន​ចេញ​ថតចម្រៀង​ឬ​ក៏​សម្តែង​ឈុត​អ្វី​នោះ​ទេ ប៉ុន្តែ​នាង​បែរ​ជា​បដិសេធ​មិន​ពន្យល់​ពី​ភាពអវិជ្ជមាន​ពី​ការ​ធ្លាក់​ចុះ​ការងារ​សិល្បៈ​របស់​នាង​នោះ​ឡើយ ដោយ​នាង​លើក​ហេតុផល​ថា នាង​មិន​មាន​អ្វី​ថ្មី​និង​មិន​មាន​អ្វី​ដែល​ត្រូវ​សារព័ត៌មាន​សម្ភាស​យក​ទៅ​ចេញ​ផ្សាយ​ដែរ ព្រោះ​វា​ជា​រឿង​ដដែល​ៗ​។

 

បន្ថែម​លើ​ពាក្យ​សម្ដី​ចុងមាត់​ចុងក​បែប​ការ​វាយឫក​នោះ តារា​ដែល​ផ្តើម​ស្រអាប់​ពន្លឺ​បន្ទាប់ពី​ចុះ​ចេញ​ពី​ទ្រនំ​M រូប​នេះ​បញ្ជាក់​ទៀត​ថា កន្លង​មក​មាន​ទស្សនាវដ្តី​ច្រើន​ណាស់ តែង​យក​រឿង​នាង​ទៅ​ចុះ​ផ្សាយ ដោយ​មិន​ដែល​បាន​ធ្វើ​បទសម្ភាស​ជាមួយ​នាង ដែល​ការ​ចេញ​ផ្សាយ​របស់​ពួកគេ​នោះ​មិនមែន​ជា​ការ​ពិត​ផង តែ​ចេះ​តែ​យក​ទៅ​ចុះ​ផ្សាយ​។

 

នាង​ប្រាប់​ភ្នំពេញ​ប៉ុស្តិ៍​ថា​៖​«​មួយ​រយៈ​នេះ​ខ្ញុំ​មិន​មមាញឹក​នឹង​ការងារ​សិល្បៈ​ឡើយ អាច​និយាយ​បាន​ថា នៅ​តែ​ផ្ទះ​ដេកស៊ី​ៗ​ហ្នឹង​។ មិន​ថា​ច្រៀង​ខនសឺត​តាម​ខេត្ត​ឬ​ការ​ប្រគំតន្រ្តី​ចុង​សប្តាហ៍​ទេ​មិន​មាន​គេ​ហៅ​ទេ មួយ​ថ្ងៃ​ៗ​នៅ​តែ​ផ្ទះ​ចំពោះ​ដំណឹង​ចេញ​ច្រៀង​ក្រៅ​ប្រទេស​ក៏​មិន​មាន​ដែរ​»។

 

បើ​ទោះ​ជា​ស្រីស្រស់​ដើមទ្រូង​សិចស៊ី​ត្អូញត្អែរ​ពី​ការងារ​សិល្បៈ​នៅ​មួយ​រយៈ​ចុង​ក្រោយ​យ៉ាង​នេះ​ក្តី​ប៉ុន្តែ​នាង​បែរ​ជា​បង្ហាញ​ការ​រំពឹង​ដោយ​មុតមាំ​ទាំង​ខ្លួន​មិន​មាន​ទ្រនំ​ជ្រក​ថា ដាច់​ឆ្នាំ ២០១៣​នេះ​ការងារ​សិល្បៈ​របស់​នាង​នឹង​កម្រើក​ឡើង​វិញ ទាំង​ការងារ​ក្នុង​ស្រុក និង​ក្រៅ​ស្រុក​។ នាង​និយាយ​ថា​៖​«​មួយ​រយៈ​នេះ ខ្ញុំ​នៅ​ផ្ទះ​ក៏​មិន​ដេកស៊ី​ៗ​អត់​អំពើ​ដែរ ក៏​មាន​ការ​ហាត់​សម​ខ្លះ​ៗ​ដែរ​ទាំង​ក្បាច់​រាំ និង​រិះរក​នូវ​អ្វី​ប្លែក​ថ្មី​សម្រាប់​យុវវ័យ​សម័យ​ថ្មី​ខ្លះ​ដែរ​»។

 

តារាចម្រៀង​និយម​តុបតែង​ខ្លួន​ខើចលើ​ខើចក្រោម​សម្ញែង​ដើមទ្រូង​ធ្វើឲ្យ​បុរស​ជាច្រើន​ឈ្លក់វង្វេង​នាង​ស៊ឹម​ថៃណា​កាលពី​មុន​ចុះ​ចេញ​ពី​ផលិតកម្ម​អឹម​ក៏​លេច​ឮ​ព័ត៌មាន​ថា​នាង​មាន​ទ្រនំ​ថ្មី​ហើយ​ត្រៀម​វាយលុក​ទីផ្សារ​ក្នុង​ពេល​ឆាប់​ៗ​ខាង​មុខ​នេះ​។ ប៉ុន្តែ​រហូត​ដល់​ពេល​នេះ មិន​ត្រឹម​តែ​ធ្វើ​ឲ្យ​ទស្សនិកជន​ទន្ទឹង​រង់ចាំ​អ៊ុត​ឡើង​ផ្សារ​ភ្នែក​នោះ​ទេ តែ​ផ្ទុយ​ទៅ​វិញ​គេ​បែរ​ជា​កេរ្តិ៍ឈ្មោះ​របស់​នាង​ហាក់​កាន់​តែ​ស្ងាត់​ដូច​ចោរ​លួច​សេះ​មិន​សូវ​ឃើញ​នាង​បង្ហាញ​វត្តមាន​នៅ​លើ​កញ្ចក់​ទូរទស្សន៍​និង​មាន​បទចម្រៀង​ថ្មី​ៗ​ចេញ​លក់​នៅ​លើ​ទីផ្សារ​ដូច​ការ​រំពឹង​ទុក​នាង​មុន​ពេល​ដើរ​ចេញ​ពី​ផលិតកម្ម​ចាស់​នោះ​ទេ។

 

មហាជន​ពិសេស​យុវវ័យ​ដែល​តែង​គាំទ្រ​នាង​បាន​សម្តែង​ការ​ព្រួយបារម្ភ​ខ្លាច​ធ្លាក់​ប្រជាប្រិយភាព​ព្រោះ​តែ​ភាព​ស្ងាត់ជ្រងំ​របស់​នាង​។ ដោយ​ពួកគេ​នាំ​គ្នា​និយាយ​ថា បើ ស៊ឹម ថៃណា នៅ​តែ​ស្ងប់ស្ងាត់​មិន​មាន​វត្តមាន​ក្នុង​នាម​ជា​សិល្បៈ​ចម្រៀង​ទៀត​នោះ ថា​មិន​បាន​ប្រជាប្រិយភាព​របស់​នាង​អាច​នឹង​ពិបាក​ដើរ​ទាន់​មិត្តភក្តិ​ក្នុង​អាជីព​មួយ​នេះ​ណាស់ ហើយ​មួយ​ទៀត​អ្នក​ជំនាន់​ក្រោយ​ៗ​ក៏​អាច​នឹង​បំបាក់​ប្រជាប្រិយភាព​នាង​ផង​ដែរ​៕

130813_28a

ប្រភព ភ្នំពេញ​ប៉ុស្តិ៍

 

 

Leave a Reply

(*) Required, Your email will not be published