រដ្ឋាភិបាល​ ភូមា ​​គ្រោង​ដោះលែង​អ្នក​ទោស​នយោបាយ​ទាំង​អស់​​​ចុង​ឆ្នាំ​នេះ

, , Leave a comment

ភូមា​នឹង​ដោះលែង​អ្នក​ទោស​នយោបាយ​របស់​ខ្លួន​ទាំង​អស់​ ​ត្រឹម​ចុង​ឆ្នាំ​នេះ​។ ​នេះ​គឺ​ជា​ការ​លើកឡើង​របស់​ប្រធានាធិបតី​ភូមា​លោក​ ថេន សេន​ អំឡុង​ទស្សនកិច្ច​ផ្លូវការ​ជា​លើក​ដំបូង​ទៅ​កាន់​ចក្រភព​អង់គ្លេស។ ​ក្នុង​ជំនួប​ជាមួយ​នាយក​រដ្ឋ​មន្ត្រី​អង់គ្លេស​ លោក David Cameron ​លោក​ ថេន សេន​ បាន​គូស​បញ្ជាក់​ដូច្នេះ​ថា ៖ “ត្រឹម​ចុង​ឆ្នាំ​នេះ ​នឹង​លែង​មាន​អ្នក​ទោស​នយោបាយ​ទៀត​ហើយ​ ក្នុង​ប្រទេស​មីយ៉ាន់ម៉ា”។ ​ប្រមុខ​អតីត​ប្រទេស​ឯកោ​ជាង​គេ​ក្នុង​លោក​ដដែល​បាន​បន្ថែម​ថា ​គណៈកម្មការ​ពិសេស​មួយ​ក្រុម​កំពុង​ពិនិត្យ​​មើល​ឡើងវិញ​​លើ​ករណី​ទណ្ឌិត​នយោបាយ​នីមួយៗ។

 

ក្នុង​ខណៈ​នោះ​​​ លោក David Cameron ​ក៏​បាន​សម្ដែង​ក្ដី​បារម្ភ​​ទៅ​លើ​បញ្ហា​សិទ្ធិមនុស្ស​ក្នុង​ប្រទេស​​ភូមា​ពិសេស​​ទៅ​លើ​ជន​មូស្លីម​រ៉ូហ៊ីនយ៉ា។ ជម្លោះ​សាសនា​ក្នុង​រដ្ឋ​រ៉ាក់ឃីន ​កាល​ពី​ឆ្នាំ​ទៅ​មិញ​​បាន​សម្លាប់​មនុស្ស​ប្រហែល ២០០ ​នាក់ ​និង​រាប់ពាន់​​ផ្សេងទៀត​បាត់បង់​ទីជម្រក​ដែល​ភាគច្រើន​ជា​ជន​មូស្លីម​រ៉ូហ៊ីនយ៉ា។ ​អាជ្ញាធរ​ភូមា​​ត្រូវ​បាន​គេ​ចោទ​ប្រកាន់​ថា ​​មិន​បាន​ខិតខំ​បញ្ឈប់​អំពើ​ហិង្សា ​និង​ការពារ​សិទ្ធិ​របស់​ជន​មូស្លីម​ឲ្យ​បាន​សមស្រប។

 

​ការ​ចោទប្រកាន់​នោះ​ត្រូវ​បាន​រដ្ឋាភិបាល​មីយ៉ាន់ម៉ា​​ច្រាន​ចោល​ដោយ​លើក​ឡើង​ថា ​​ភាគច្រើន​នៃ​ជនជាតិ​រ៉ូហ៊ីនយ៉ា​ទាំង​នោះ​ជា​អ្នក​ធ្វើ​និរប្រវេសន្ត​មក​ពី​ឧបទ្វីប​ឥណ្ឌា ​ដូច្នេះ​បើ​តាម​រដ្ឋធម្មនុញ្ញ​របស់​ប្រទេស​មិន​អាច​ចាត់​ចូល​ថា​ជា​ ជនជាតិ​ភាគតិច​ដែល​ទទួល​បាន​សិទ្ធិ​ការពារ​ពី​រដ្ឋាភិបាល​ឡើយ។ ​​​បន្ទាប់​ពី​ប្រទេស​​ ​ភូមា​រៀបចំ​ឲ្យ​មាន​ការ​បោះឆ្នោត​ដោយសេរី​នៅ​ខែ​វិច្ឆិកា ឆ្នាំ២០១០ ​មក​ ​គេ​សង្កេត​ឃើញ​ប្រទេស​នេះ​ ចាប់​ផ្ដើម​កែទម្រង់​ប្រព័ន្ធ​នយោបាយ​កាន់​តែ​ប្រសើរ​ឡើង​ដោយ​ក្នុង​នោះ​រួម​មាន​​ការ​ដោះលែង​អ្នក​ទោស​នយោបាយ ​និង​បន្ធូរបន្ថយ​ទៅ​លើ​ការ​រឹត​បន្តឹង​ប្រព័ន្ធ​ផ្សព្វផ្សាយ​ជាដើម។​​ ដោយ​មើល​ឃើញ​ពី​​ ការ​ផ្លាស់ប្ដូរ​នេះ​ អន្តរជាតិ​បាន​លើកលែង​ទណ្ឌកម្ម​ស្ទើរ​ទាំងស្រុង​​មក​លើ​ភូមា៕

_68749487_173483392

 

Leave a Reply

(*) Required, Your email will not be published